Tnuʼu Ianyuux n‑chidotnuni Steu
Xixitna Jesús
1
Libru yaʼa kakuneʼe xixitna Jesucristu.
Xixitna‑ia n‑kuu David.
Xixitna David n‑kuu Abraham.
2 Abraham n‑kuu taa Isaac.
Isaac n‑kuu taa Jacob.
Jacob n‑kuu taa Judá xiʼin ñani‑s.
3 Judá n‑kuu taa Fares xiʼin Zara,
te Tamar n‑kuu dɨʼɨ‑s.
Fares n‑kuu taa Esrom,
te Esrom n‑kuu taa Aram.
4 Aram n‑kuu taa Aminadab,
te Aminadab n‑kuu taa Naasón,
te Naasón n‑kuu taa Salmón.
5 Salmón n‑kuu taa Booz,
te Rahab n‑kuu dɨʼɨ Booz.
Booz n‑kuu taa Obed,
te Rut n‑kuu dɨʼɨ Obed.
Obed n‑kuu taa Isaí.
6 Isaí n‑kuu taa David.
David n‑kuu se kunxaʼnu.
Daʼya yɨɨ David n‑kuu Salomón.
N‑kaa David xiʼin ñadɨʼɨ Urías,
te n‑kaku Salomón.
7 Salomón n‑kuu taa Roboam,
te Roboam n‑kuu taa Abías,
te Abías n‑kuu taa Asa.
8 Asa n‑kuu taa Josafat,
te Josafat n‑kuu taa Joram,
te Joram n‑kuu taa Uzías.
9 Uzías n‑kuu taa Jotam,
te Jotam n‑kuu taa Acaz,
te Acaz n‑kuu taa Ezequías.
10 Ezequías n‑kuu taa Manasés,
te Manasés n‑kuu taa Amón,
te Amón n‑kuu taa Josías.
11 Josías n‑kuu taa Jeconías xiʼin ntaka ñani‑s.
Na n‑xo tuu Jeconías,
daa xndeka juexa soldado Babilonia dava ñayiu Israel juaʼan ñuu‑s xa nkotuu‑i ijan.
12 Nu n‑yaʼa xijan,
te n‑kaku daʼya Jeconías.
Salatiel n‑xo nani‑s.
Salatiel n‑kuu taa Zorobabel.
13 Zorobabel n‑kuu taa Abiud,
te Abiud n‑kuu taa Eliaquim,
te Eliaquim n‑kuu taa Azor.
14 Azor n‑kuu taa Sadoc,
te Sadoc n‑kuu taa Aquim,
te Aquim n‑kuu taa Eliud.
15 Eliud n‑kuu taa Eleazar,
te Eleazar n‑kuu taa Matán,
te Matán n‑kuu taa Jacob.
16 Jacob n‑kuu taa José,
se n‑kuu yɨɨ María.
María n‑kuu dɨʼɨ Jesús,
Ia kuu Cristu.
17 Nde tiempo n‑xo tuu Abraham xiʼin nde tiempo n‑xo tuu David uxi koon generación n‑kuu.
Nde na n‑xo tuu David xiʼin nde kɨu xndeka juexa soldado Babilonia ñayiu Israel juaʼan Babilonia uxi koon ka generación n‑kuu.
Uxi koon ka generación n‑yaʼa.
Ijan dada n‑kaku Cristu.
N‑kaku Jesús
18 Duʼa n‑kuu xa n‑kaku Jesucristu.
María,
ñá n‑kuu dɨʼɨ Jesucristu,
n‑xiaʼan‑ña tnuʼu‑ña José xa tnundaʼa‑ña xiʼin‑s.
Ta jini tnaʼa ka‑ña xiʼin‑s na n‑kida Espíritu Ianyuux xa niʼi daʼya‑ña.
19 José,
se vaʼa kuu‑s.
Ñatu n‑kuu ini‑s xa datuu‑s‑ña nuu ñayiu xa niʼi daʼya‑ña.
Xijan kuu xa n‑juini‑s xa naʼi ni dandoo‑s‑ña.
20 Duʼa n‑xani ini‑s xa kada‑s,
te ɨɨn xakuaa n‑kachi xene‑s xa n‑jaʼan ɨɨn ángel,
ia xinokuechi nuu Ianyuux nuu‑s.
Duʼa n‑jaʼan‑ia:
—José,
se kuu daʼya dana David,
maxku yuʼu‑n xa tnundaʼa‑n xiʼin María chi daʼya ñuʼu xiti‑i,
daʼya Espíritu Ianyuux kuu‑ia.
21 Kajan‑i se yɨɨ.
Danani‑n‑ia Jesús.
Duʼa kunani‑ia chi dananitaʼu‑ia ñayiu kundeka‑ia.
22 Ntdaa xaʼa yaʼa xa na jɨn tnaʼa xa n‑jaʼan Ianyuux nuu ɨɨn se n‑jaʼan nuu ñayiu xa n‑jaʼan‑ia.
Duʼa n‑chidotnuni‑s:
23 Kunaʼa xa juʼun daʼya ɨɨn dichi ii,
te kajan‑i ɨɨn se yɨɨ.
Dandee ñaʼa ñayiu Emanuel.
(Emanuel kuu:
Tuu‑ro xiʼin Ianyuux.)