Tnuʼu Ianyuux n‑chidotnuni Sluka
Tnuʼu yodotnuni yaʼa kakuneʼe na io na juaʼan tnuʼu Ianyuux
1
1-2 Dito,
Ta Teófilo,
tnuʼu dijan kakuneʼe‑da ya nakaxtnaʼa xiʼin xa n‑ka chidotnuni se n‑ka jaʼan tnuʼu Ianyuux nuu ñayiu.
Ñayiu n‑ka xini xiʼin nuu‑i xa n‑yaʼa n‑ka najani‑i nuu‑da xijan,
te n‑ka chidotnuni dava‑i xa na kaʼu koio‑ro xijan.
N‑ka kixeʼe dava ka ñayiu xa chidotnuni‑i ntdandituʼu xijan,
ko ñatu n‑ka daxinokava‑i.
Kueʼe‑i n‑ka chidotnuni xijan.
3 Dani daña,
vii nene n‑nduku tnuʼu‑da,
te n‑xini‑da nax n‑kuu nax n‑xino,
te xini‑da xandaa.
Xijan kuu xa xini‑da xa io vaʼa xa chidotnuni‑da xa n‑kuu xa n‑xino.
4 Kachitnuʼu ñaʼa‑da xa na kunaʼa‑n xa xandaa kuu xa n‑ka jaʼan ñayiu jan nuu‑n tuku.
El Comienzo
N‑jaʼan ángel, ia xinokuechi nuu Ianyuux, xa koo daʼya Zacarías xiʼin Isabel
5 Na n‑taxnuni Herodes distrito Judea,
n‑xio ɨɨn dutu nani Zacarías.
Daʼya dana dutu Abías n‑xo kuu‑s.
Isabel nani ñadɨʼɨ‑s.
Daʼya dana Aarón kuu‑ña.
6 Vaʼa‑s nduu‑s nuu Ianyuux.
N‑ka xo jandixa‑s xa n‑xo taʼu tniu‑ia.
Ña n‑ka kuxee ini‑s nuu‑ia.
Xijan kuu xa ña n‑jaʼan‑ia xa io kuechi‑s nduu‑s.
7 Ña n‑xio daʼya Zacarías xiʼin Isabel chi ña n‑kuaʼa xa koo daʼya‑ña,
te n‑ka yɨɨ‑s nduu‑s.
8 Ntnaʼa semana n‑xo nadama tnaʼa dutu ka xinokuechi veñuʼu Jerusalén xa n‑ka xo kida‑s tniu Ianyuux,
te n‑xee semana kada Zacarías xiʼin dava ka dutu xnetnaʼa xiʼin‑s tniu‑ia.
9 N‑ka dadɨkɨ‑s suerte‑s ná xneʼe tnɨɨ‑s vaxi nuu ndeda ɨɨn‑s na kakunuu xa kɨu‑s veñuʼu Jerusalén xa jandodo‑s kuu ñuʼu duxa nuu altar Ianyuux kɨu ijan,
te n‑kakunuu Zacarías.
10 Nɨni kayu duxa ka xijan taʼu ñayiu xyuku nukeñuʼu.
Kueʼe‑i xyuku.
11 Danaa n‑xini‑s ɨɨn ángel,
ia xinokuechi nuu Ianyuux,
nujuiin lado kuaʼa altar nuu kayu duxa jan.
12 Nu n‑xini‑s‑ia,
yo n‑yuʼu‑s,
te kueʼe xa n‑xani ini‑s.
13 Te n‑jaʼan ángel,
ia xinokuechi nuu Ianyuux,
nuu‑s:
—Maxku yuʼu‑n,
Zacarías,
chi chinuu Ianyuux vaxi xa xko xijan taʼu‑n nuu‑ia.
Koo daʼya ñadɨʼɨ‑n vitna.
Seyɨɨ kajan‑ña.
Danani‑n‑sɨ Sua.
14 Xaxeʼe xa kaku‑s yo kudɨ ini‑n nduu‑n,
te kueʼe ñayiu kudɨ ini tuku.
15 Se ndandɨʼɨ ku kuu‑s nuu Ianyuux,
te ma koʼo‑s vinu.
Ni ɨɨn nuu ndɨdɨ́ ma koʼo‑s,
te juʼun ñaʼa Espíritu Ianyuux nde kɨu jun tuu‑s xiti dɨʼɨ‑s.
16 Kada‑s xa kueʼe daʼya dana Israel dama mudu‑i,
te jandixa koio‑i Ianyuux,
Ia kuu Xtoʼo‑ro,
Ia ndeka ñaʼa.
17 Kiʼna ka‑s kixi dada Ia kuu Xtoʼo‑ro.
Juʼun ñaʼa espíritu n‑ñuʼu Elías.
Nani n‑kuaʼa Elías xa kada‑s,
dani kuaʼa‑s xa kada‑s.
Kada‑s xa juemani se ka kuu taa daʼya‑s.
Kada‑s xa ñayiu ka kuxee ini,
kixeʼe‑i xa kani ini‑i ná ka xani ini ñayiu vaʼa anu.
Kada‑s xa kada tuʼa ñayiu mee‑i xa xe ini‑i Ia kuu Xtoʼo‑ro —kuu ángel,
ia xinokuechi nuu Ianyuux,
xiaʼan‑ia.
18 —¿Janda kada‑da xa jini‑da xa duʼa yaʼa?,
chi yo n‑ka kuxaʼnu‑da xiʼin ñadɨʼɨ‑da —kuu Zacarías,
xiaʼan‑s.
19 —Ruʼu kuu Gabriel,
te xinokuechi‑r nuu Ianyuux.
N‑tundaʼa ñaʼa‑ia xa kachitnuʼu ñaʼa‑r ɨɨn xavaʼa yaʼa,
20 ko xaxeʼe xa ña n‑jandixa‑n xa n‑jaʼan‑r,
ma kuu ka xa jaʼan‑n.
Nde na kaku daʼya ñadɨʼɨ‑n,
ijan dada najaʼan‑n.
Kɨu n‑xantuu Ianyuux jɨn tnaʼa xaʼa —kuu‑ia,
xiaʼan‑ia.
21 Xndetu ñayiu xyuku nukeñuʼu jan Zacarías.
Ka yuʼu anu‑i xa naʼa n‑kuu n‑kɨu‑s xiti veñuʼu.
22 Nu n‑ndee‑s veñuʼu jan,
ña n‑kuu ka xa jaʼan‑s.
N‑ka kutnuni ini ñayiu jan xa n‑kida Ianyuux xa n‑xini‑s ɨɨn xa n‑xini‑s.
Ña n‑kuu ka xa jaʼan‑s;
diko nga seña n‑kida‑s.
23 Nu n‑xinokava kɨu n‑kidatniu‑s veñuʼu,
te juan nuʼu‑s veʼe‑s.
24 Nu n‑yaʼa xijan,
te n‑niʼi daʼya ñadɨʼɨ‑s,
Isabel.
Oʼon yoo ñatu n‑kee Isabel veʼe‑ña chi n‑xo tuu kutu n‑xo tuu kuu‑ña.
N‑xo xani ini‑ña:
25 “N‑kida Ianyuux xa koo daʼya‑r,
te ma kujanuu ka‑r nuu ñayiu.”
N‑jaʼan ɨɨn ángel, ia xinokuechi nuu Ianyuux, nuu María xa kajan‑ña ɨɨn daʼya yɨɨ
26 Nu n‑kuu iñu yoo ñuʼu daʼya‑ña,
te n‑tundaʼa Ianyuux Gabriel,
ia xinokuechi nuu‑ia,
ñuu nani Nazaret,
distrito Galilea.
27 N‑tundaʼa ñaʼa‑ia nuu ɨɨn dichi ii nani María.
Xá n‑xiaʼan María tnuʼu‑ña xa tnundaʼa‑ña xiʼin se nani José,
se kuu daʼya dana David.
28 N‑kɨu‑ia veʼe‑ña,
n‑jaʼan‑ia nuu‑ña:
—Vaʼa nga taʼu kuu‑n.
Kunduu‑n xiʼin Ianyuux.
Taʼu kuu‑n chi kada ñaʼa‑ia ɨɨn xavaʼa —kuu‑ia,
xiaʼan‑ia.
29 Xaxeʼe xa duʼa n‑jaʼan‑ia,
n‑chi ini María,
te n‑xani ini‑ña nuu nax kuu xa n‑jaʼan‑ia nuu‑ña.
30 Te xiaʼan‑ia nuu‑ña:
—Maxku yuʼu‑n,
María chi ɨɨn xa vaʼa kada ñaʼa Ianyuux.
31 Vitna niʼi daʼya‑n,
kajan‑n daʼya yɨɨ.
Jesús danani‑n‑ia.
32 Ia yaʼa,
ndandɨʼɨ‑ia,
te kuu‑ia Daʼya Yɨɨ Ianyuux,
Ia kuu Xtoʼo‑ro.
Juñaʼa‑ia ñuu daʼya dana Israel nuu n‑taxnuni David,
se kuu xixitna‑ia,
33 xa taxnuni‑ia nɨkava nɨkuita —kuu‑ia.
34 Te n‑jaʼan‑ña nuu‑ia:
—¿Janda io xa duʼa yaʼa?,
chi ta jini ka‑da teyɨɨ.
35 Te xiaʼan ángel nuu‑ña:
—Keé ñaʼa Espíritu Ianyuux,
te niʼi daʼya‑n.
Daʼya Yɨɨ Ianyuux kuu‑ia.
Ii‑ia.
36 Juini n‑yɨɨ Isabel,
ñá kuu tnaʼa‑n,
ko n‑kuu iñu yoo ñuʼu daʼya‑ña.
N‑ka xani ini ñayiu xa ma koo daʼya‑ña,
ko koo daʼya‑ña vitna.
37 Xaxa Ianyuux ntdandituʼu xa ñatu kuaʼa ñayiu xa kada‑i kida‑ia —kuu ángel,
xiaʼan‑ia.
38 —Daña xinokuechi‑da nuu Ianyuux,
Ia kuu Xtoʼo‑ro.
Na kuu na n‑jaʼan‑n —kuu‑ña,
xiaʼan‑ña.
Ijan dada juan nuʼu ángel,
ia xinokuechi nuu Ianyuux.
N‑xe kotoniʼni María Isabel
39 Kɨu ijan ni juaʼan‑ña yuku distrito Judea nuu katuu ɨɨn ñuu luchi.
40 N‑xee‑ña ijan,
te n‑xeʼen‑ña veʼe Zacarías,
te n‑jaʼan‑ña nyuux nuu Isabel.
41 Nu n‑teku Isabel xa n‑jaʼan‑ña nuu‑ña,
te n‑kanda daʼya ñuʼu xiti‑ña chi n‑kudɨ ini‑s,
te n‑keé Espíritu Ianyuux Isabel.
42 Xee n‑jaʼan‑ña.
Xiaʼan‑ña nuu María:
—N‑kida ñaʼa Ianyuux xavaʼa.
Taʼu kuu‑un,
te taʼu kuu daʼya kajan‑un.
43 Nava vaxi dichi kuu dɨʼɨ Ia kuu Xtoʼo‑ro veʼe‑r.
44 Nu n‑teku‑r xa n‑jaʼan‑un nyuux nuu‑r,
n‑kudɨ ini daʼya ñuʼu xiti‑r,
te n‑kanda‑i.
45 Naka taʼu‑un chi jandixa‑un xa jɨn tnaʼa xa n‑jaʼan Ianyuux,
Ia kuu Xtoʼo‑ro —kuu Isabel,
xiaʼan‑ña.
46 Xiaʼan María:
Ndadakaʼnu‑da Ia kuu Xtoʼo‑ro.
47 Te kudɨ ini‑da chi dananitaʼu ñaʼa‑ia.
48 N‑chinuu Ianyuux xa kundaʼu kukee‑da.
Naʼa ñaʼa‑ia,
te naʼa‑ia xa xinokuechi‑da nuu‑ia.
Vitna kixeʼe ntdaa ñayiu xa jaʼan‑i xa taʼu kuu‑da,
49 chi kueʼe xavaʼa n‑kida ñaʼa Ianyuux.
Ii‑ia.
50 Kundaʼu ini‑ia ñayiu ka yuʼu nuu‑ia.
N‑kundaʼu ini‑ia xixitna‑ro,
te n‑kundaʼu ini ñaʼa‑ia roo,
te dani kundaʼu ini‑ia daʼya dana‑ro.
51 Kueʼe xavaʼa n‑kida ñaʼa‑ia.
N‑xate niʼno‑ia ñayiu xe ini.
Ñayiu ijan ka xani ini xa ña ka ndoñuʼu‑i‑ia.
52 N‑kida‑ia xa te ka taxnuni,
ña taxnuni ka‑te.
N‑kida‑ia xa ñayiu ka kundaʼu ka kukee,
nduu‑i ñayiu ndandɨʼɨ.
53 Kueʼe xa n‑taxi‑ia roo,
ñayiu ka kojon ka yichi chi ka kundaʼu‑ro,
te ma kojon ka‑ro.
Ni ɨɨn ña tuu nax n‑xiaʼan‑ia ñayiu kuika;
duʼa ntakaa ndaʼa‑i ka nuʼu‑i.
54 N‑chindee ñaʼa‑ia roo,
ñayiu Israel,
ñayiu xinokuechi nuu‑ia chi naʼa ñaʼa‑ia,
te kundaʼu ini ñaʼa‑ia.
55 Naʼa‑ia nax n‑jaʼan‑ia nuu xixitna‑ro Abram xiʼin nuu daʼya dana‑te.
Nɨkava nɨkuita koo xijan,
kuu María,
xiaʼan‑i.
56 Naxa uni yoo n‑xo tuu María veʼe Isabel.
Ijan dada juan nuʼu‑ña veʼe‑ña.
N‑xee kɨu n‑kaku Sua
57 N‑xee kɨu kaku daʼya Isabel,
te n‑xajan‑ña ɨɨn seyɨɨ.
58 Yo n‑kudɨ ini‑ña.
N‑ka teku ñayiu xndaxio yatni xiʼin‑ña xiʼin ñayiu ka kuu tnaʼa‑ña xa yo n‑kundaʼu ini ñaʼa Ianyuux,
te n‑ka kudɨ ini‑i tuku.
59 Nu n‑kuu una kɨu seluchi jan,
te xndeka ñaʼa tadɨʼɨ‑s juaʼan xa taʼnde ndodo ñɨɨ nuu ii‑s,
te n‑ka juini ñayiu xyuku ijan xa danani‑i‑sɨ Zacarías ná nani taa‑s,
60 ko xiaʼan dɨʼɨ‑s nuu ñayiu jan:
—Ñaʼa,
chi Nxua kunani‑i.
61 Te ka xiaʼan ñayiu jan nuu‑ña:
—Ko ñayo ñayiu ka kuu tnaʼa‑n nani duʼa.
62 N‑ka kida ñayiu jan seña xa kajan tnuʼu‑i taa‑s janda juini‑s xa kunani seluchi jan.
63 N‑xijan taa‑s tutu,
te n‑chidotnuni‑s:
“Sua kunani‑s.”
N‑ka yuʼu anu ñayiu xyuku ijan.
64 Hora ni ijan n‑kida Ianyuux xa n‑najaʼan Zacarías,
te n‑nakuetu‑s nuu‑ia.
65 N‑ka yuʼu ntdaa ñayiu xndaxio yatni xiʼin Zacarías xiʼin Isabel.
N‑ka xo kakuneʼe ntdaa ñayiu xndaxio nituʼu yuku distrito Judea ntdaa xa n‑yaʼa.
66 Ntdantuʼu ñayiu n‑ka teku xijan n‑ka xani ini nax yaʼa.
Te n‑ka xo xijan tnuʼu tnaʼa‑i:
—¿Nax ku kuu seluchi yaʼa na tnuu ini‑s u?
Duʼa n‑ka xo xiaʼan tnaʼa‑i chi n‑ka chinuu‑i xa Ianyuux chindee chituu ñaʼa.
N‑nakuetu Zacarías nuu Ianyuux
67 N‑keé Espíritu Ianyuux Zacarías,
te duʼa n‑jaʼan‑s nuu ñayiu:
68 Na ndadakaʼnu‑ro Ianyuux,
Ia ndeka ñaʼa roo,
ñayiu Israel.
N‑kixee‑ia xa dakaku ñaʼa‑ia roo,
ñayiu ndeka‑ia.
69 N‑kida Ianyuux xa kixi Ia dananitaʼu ñaʼa.
Kuu‑ia daʼya dana David,
se n‑xinokuechi nuu Ianyuux.
70 Jɨn tnaʼa tnuʼu n‑jaʼan‑ia nuu se ka jaʼan tnuʼu‑ia nuu ñayiu ka kuu daʼya‑ia.
71 N‑kixee‑ia xa dakaku ñaʼa‑ia nuu se ka kida uʼu ñaʼa xiʼin nuu se ka xini uʼu ñaʼa.
72 N‑kundaʼu ini‑ia xixitna‑ro.
Naʼa‑ia xa n‑jaʼan‑ia xa duʼa kada‑ia.
Ii tnuʼu‑ia.
73 N‑xiaʼan‑ia tnuʼu‑ia Abraham,
taa xixitna‑ro,
xa duʼa kada ñaʼa‑ia mee‑ro.
74 N‑jaʼan‑ia xa dakaku ñaʼa‑ia nuu se ka xini uʼu ñaʼa.
Ma yuʼu ka‑ro nuu‑s vitna,
te ndaa vatuu junukuechi‑ro nuu‑ia.
75 Xaxeʼe xijan ndaku‑ro xa kada‑ro xavaʼa,
te junukuechi‑ro nuu‑ia ndɨkɨu ndɨñuu,
kuu Zacarías,
n‑jaʼan‑s.
76 Te n‑jaʼan‑s nuu seluchi jan:
Ndoʼo,
seluchi,
jaʼan‑n tnuʼu Ianyuux,
Ia taxnuni ka nuu ñayiu.
Kiʼna ka‑n n‑kixee dada Ia kuu Xtoʼo‑ro xa kada tuʼa‑n ñayiu xa na xe ini‑i‑ia.
77 Juña tnuʼu‑n ñayiu ka kuu daʼya Ianyuux nax io xa kada‑i xa nanitaʼu koio‑i,
te taxkanu ini‑ia kuechi n‑ka kida‑i.
78 Xaxeʼe xa kundaʼu ini ñaʼa‑ia,
xijan kuu xa daa kada‑ia.
Te nde andɨu tundaʼa‑ia Ia kuu ná kuu ngandii xino datne,
datne.
79 Kixi Ia kachitnuʼu ñaʼa jundu kuu Ianyuux.
Kuenda kɨu nuu nee nuu kuu‑ro ka xikonuu‑ro,
xa ñatu ka kutnuni ini‑ro jundu kuu‑ia,
Te dandumani ñaʼa‑ia xiʼin‑ia,
kuu Zacarías,
xiaʼan‑s nuu seluchi jan.
80 N‑tnuu ini seluchi jan,
te idii vuelta n‑xajan‑s anu‑s xa kada‑s tniu Ianyuux.
Juaʼan‑s nuu ñayo ñayiu io,
te ñatu nga juun dau.
N‑xo tuu‑s ijan nde kɨu n‑xee‑s nuu ka nataka ñayiu Israel xa jini‑i jundu kuu‑s.