N‑kaku Jesús
2
Tiempu ijan,
n‑taʼu tniu Augusto César,
se kuu emperador,
xa nkodotnuni dɨu ntdaa ñayiu xndaxio ntakaa ñuu nuu n‑taxnuni‑s xa jini‑s nuu nadaa‑i io.
Te n‑xe kodotnuni xa n‑taʼu tniu‑s.
2 Tiempu daa n‑taxnuni se nani Cirenio distrito Siria.
Vuelta yaʼa kuu vuelta kiʼna nuu n‑ka kaʼu‑s ñayiu.
3 Xijan kuu xa n‑ka xeʼen ntdaa ñayiu ñuteyu xixitna‑i xa nkodotnuni dɨu‑i.
4 Xijan kuu xa n‑kee José xiʼin María ñuu Nazaret,
distrito Galilea xa ka xeʼen‑s Belén,
distrito Judea.
Belén kuu ñuteyu‑s chi daʼya dana David kuu‑s.
5 Juaʼan‑s nduu‑s xiʼin María,
ñá tnundaʼa xiʼin‑s xa nkodotnuni‑s.
Xa ñuʼu daʼya‑ña daa.
6 Nɨni xtuu‑s Belén n‑xee kɨu kaku daʼya‑ña.
7 N‑kaku daʼya kiʼna nuu‑ña.
Seyɨɨ kuu‑s.
N‑duku niʼno ñaʼa‑ña daʼma,
te n‑xajan niʼno ñaʼa‑ña ɨɨn nuu xjuʼun xa ka xaxi kɨtɨ chi ñatu niʼi José mesón nuu ndoo koio‑s.
N‑ka jaʼan ángel, ia ka xinokuechi nuu Ianyuux, nuu se xñunuu tkachi
8 Yuku yuʼu ñuu Belén xtuu se xñunuu tkachi‑s xakuaa ijan.
9 Nɨni xtuu‑s ijan,
danaa n‑juun ɨɨn ángel,
ia xinokuechi nuu Ianyuux,
te n‑kida Ianyuux xa n‑ndii nɨkaduku nuu xtuu‑s,
te yo vichi n‑ka yuʼu‑s.
10 N‑jaʼan ángel,
ia xinokuechi nuu Ianyuux,
nuu‑s:
—Maxku yuʼu koio‑n chi ɨɨn xa vaʼa kachitnuʼu ñaʼa‑r,
te yo kudɨ ini‑n xiʼin ntdaa ñayiu teku xaʼa.
11 Vitna n‑kaku Ia dananitaʼu ñaʼa.
Kuu‑ia Cristu,
te dɨuni kuu‑ia Ianyuux.
Kuu‑ia Xtoʼo‑ro tuku.
N‑kaku‑ia ñuteyu David.
12 Duku niʼno‑ia daʼma,
te kaa niʼno‑ia ɨɨn nuu xjuʼun xa ka xaxi kɨtɨ.
Na jini koio‑n‑ia,
te jini‑n xa dɨu‑ia kuu Ia kakuneʼe‑r.
13 Danaa kueʼe ka ángel,
ia xinokuechi nuu Ianyuux,
n‑ka juun andɨu.
Yo kueʼe ka‑ia n‑kuu.
N‑ka nakuetu‑ia nuu Ianyuux.
N‑ka jaʼan‑ia:
14 Na ndadakaʼnu koio‑ro Ianyuux,
Ia tuu andɨu.
Kutuu mani‑ia xiʼin ñayiu kada xa juini‑ia,
ka kuu‑ia.
15 Nɨni juan ndaa koio ángel,
ia ka xinokuechi nuu Ianyuux,
andɨu,
te n‑ka xiaʼan tnaʼa se xñunuu tkachi jan:
—Na jɨʼɨn‑ro Belén.
Na jɨn koto‑ro nax n‑yaʼa.
Na jɨn koto‑ro xa n‑ka kuneʼe ia n‑tundaʼa ñaʼa Ianyuux —kuu‑s,
ka xiaʼan tnaʼa‑s.
16 Hora ijan juaʼan koio‑s Belén,
te n‑ka nanduku‑s Jesús,
te n‑ka naniʼi‑s‑ia xiʼin dɨʼɨ‑ia xiʼin José.
Kaa niʼno‑ia ɨɨn nuu xjuʼun xa ka xaxi kɨtɨ.
17 Nu n‑ka xini‑s Ia luchi jan,
te n‑ka xiko‑s,
te n‑ka xian tnuʼu‑s ñayiu xa n‑ka jaʼan ángel,
ia ka xinokuechi nuu Ianyuux.
18 Te n‑ka yuʼu ñayiu n‑ka teku xa n‑ka najani se xñunuu tkachi jan.
19 N‑xo naʼa María ntdaa xa n‑yaʼa,
te kueʼe xa n‑xo xani ini‑ña.
20 N‑ka nakuetu se xñunuu tkachi jan nuu Ianyuux ichi ka nuʼu‑s xaxeʼe xa n‑ka xo ndeʼa‑s xa n‑yaʼa xiʼin xaxeʼe ntdaa xa n‑ka teku‑s.
Dɨuni n‑ka najuen tnuʼu‑s‑ia.
N‑ka xini‑s xa n‑xetnaʼa xa n‑xian tnuʼu ángel,
ia ka xinokuechi nuu Ianyuux.
Nacimiento de Jesús
Xndeka‑s Jesús n‑xeʼen veñuʼu Jerusalén
21 Nu n‑kuu una kɨu Jesús,
n‑taʼnde ndodo ñɨɨ nuu ii‑ia,
te n‑ka danani ñaʼa tadɨʼɨ‑ia Jesús na n‑jaʼan ángel,
ia xinokuechi nuu Ianyuux,
xa kunani‑ia na ta juntuu ka‑ia xiti dɨʼɨ‑ia.
22 N‑ndundoo María xa n‑xajan‑ña daʼya chi n‑chidotnuni Moisés xa daa kada ñadɨʼɨ Israel.
Nu n‑xinokava xa n‑ndundoo‑ña,
xndeka‑ña nduu‑ña xiʼin José Jesús juaʼan veñuʼu Jerusalén xa juñaʼa‑s xiʼin‑ña nuu Ianyuux xa kuenda mee‑ia kuu‑ia.
23 Duʼa n‑ka kida‑s chi yodotnuni xa n‑taʼu tniu Ianyuux xa daʼya yɨɨ kiʼna nuu n‑kaku,
ñadu kuenda tadɨʼɨ‑s kuu‑s chi kuenda mee‑ia kuu‑s.
24 Dɨuni yodotnuni tnuʼu Ianyuux xa ndoñuʼu xa doko‑s ɨɨn tayu nleu (ɨɨn kɨt yɨɨ,
ɨɨn kɨt dɨʼɨ) a uu data kuechi nuu altar‑ia.
25 Ñuu Jerusalén io ɨɨn se yo vaʼa nani Simeón,
tiempo daa.
Vaʼa xinokuechi‑s nuu Ianyuux,
te ñuʼu ñaʼa Espíritu Ianyuux.
N‑xo ndetu‑s xa kixi se juñaʼa tnuʼu kanu ini nuu ñayiu Israel.
26 N‑jaʼan Espíritu Ianyuux nuu‑s xa kiʼna ka jini‑s Cristu,
Ia tundaʼa‑ia;
ijan dada kuú‑s.
27 Dɨuni n‑jaʼan Espíritu‑ia nuu‑s xa na jɨʼɨn‑s veñuʼu.
Xndeka tadɨʼɨ Jesús‑ia juaʼan veñuʼu daa.
N‑ka kɨu‑s xa kada koio‑s Jesús na io ley n‑chidotnuni Moisés xa kada ntdaa ñayiu.
28 N‑nundee Simeón Jesús,
te n‑najuen tnuʼu‑s Ianyuux.
Dɨuni nakuetu‑s nuu‑ia.
N‑jaʼan‑s:
29 Taa‑ro Ianyuux,
xa kuu‑n Ia taxnuni nuu ntdandituʼu ñayiu ñuñayiu,
ndaa vatu na kuu‑da.
Nakueka‑n anu‑da.
Na kuu ná n‑jaʼan ná n‑kachi‑n vitna.
30 Chi n‑xini‑da xiʼin nuu‑da Ia dananitaʼu ñaʼa.
31 N‑kida‑n xa daa kada‑ia,
te n‑kixee‑ia xa kundeʼa ñaʼa ntdaa ñayiu.
32 Kuenda kɨu ɨɨn xa datnuni kuu‑ia xa kada‑ia xa na jini ñayiu ña ka kuu ñayiu Israel jundu kuu Ianyuux.
Kuvete ñayiu Israel chi kuu‑ia se Israel.
Israel kuu nación ndeka‑n,
Taa‑ro Ianyuux,
kuu Simeón,
n‑jaʼan‑s nuu Ianyuux.
33 N‑ka yuʼu tadɨʼɨ Jesús nu n‑ka teku‑s xa duʼa n‑jaʼan Simeón.
34 N‑xijan taʼu Simeón nuu Ianyuux xa kada‑ia xa na kuu José xiʼin dɨʼɨ Jesús xavii xavaʼa.
Te xiaʼan‑s nuu‑ña:
—Kunaʼa‑n xa kueʼe ñayiu Israel ma kukanu ini‑i‑ia,
te kada Ianyuux xa kujanuu‑i chi ma ku kuu ka‑i ñayiu ndandɨʼɨ.
Dɨuni kueʼe ñayiu Israel kukanu ini‑ia,
te nduu‑i ñayiu ndandɨʼɨ.
Dɨu‑ia kada xa jini ñayiu ñuñayiu jundu kuu Ianyuux,
te kuiʼa jaʼan ñaʼa dava‑i.
35 Hora kuiʼa na jaʼan ñaʼa ñayiu,
jini‑ia janda kuu anu‑i,
te ndoʼo,
yo tnau ini‑n kuenda kɨu espada tuu ñaʼa ñayiu —kuu Simeón,
n‑xiaʼan‑s nuu María.
36 Hora ijan nujuiin ɨɨn ñá yo n‑kuxaʼnu nani T‑ana nukeñuʼu jan.
Ñá jaʼan tnuʼu Ianyuux nuu ñayiu kuu‑ña.
Taa‑ña n‑kuu Fanuel,
se n‑kuu daʼya dana Aser.
Idii ni yɨɨ‑ña n‑xio.
Uxa kuia n‑xo tuu‑ña xiʼin‑s,
te n‑xiʼí‑s.
37 Koon diko koon kuia io‑ña.
Ña n‑xo kee‑ña veñuʼu Jerusalén xaxeʼe xa n‑xo xijan taʼu‑ña nuu Ianyuux.
N‑xo xo neʼe ii‑ña,
te n‑xo xio ndite‑ña.
Mee ni xa xinokuechi‑ña nuu Ianyuux.
Nduu,
xakuaa n‑xo xinokuechi‑ña.
38 N‑kendita‑ña nuu xnii tadɨʼɨ Jesús.
N‑nakuetu‑ña nuu Ianyuux.
N‑xo kakuneʼe‑ña‑ia nuu ñayiu Jerusalén n‑ka xo ndetu se dakaku ñaʼa.
39 N‑ka daxinokava José xiʼin María ntdaa xa n‑taʼu tniu Ianyuux n‑chidotnuni Moisés,
te n‑ka xiko‑s.
Ka ndixi‑s Nazaret,
distrito Galilea.
40 Vax kueʼnu Jesús,
te n‑xiaʼan Ianyuux xandendaku.
Yo kaxi n‑xo kuu ini‑ia,
te n‑chindee n‑chituu ñaʼa Ianyuux.
N‑xo tuu Jesús veñuʼu
41 Ntnaʼa kuia n‑xo xeʼen tadɨʼɨ Jesús viko Paxcua Jerusalén.
42 Na io Jesús uxi kuia,
juaʼan‑ia xiʼin tadɨʼɨ‑ia viko Paxcua ná ka kida ntdaa ñayiu ñuteyu‑ia vaxi.
43 Nu n‑xinokava viko jan,
te n‑ka xiko tadɨʼɨ‑ia xa ka ndixi‑s ñuu‑s,
te ña n‑ka chinuu‑s xa n‑ndoo‑ia Jerusalén.
44 N‑ka xani ini‑s xa yɨtnaʼa‑ia nuu ñayiu ka ndixi koio xiʼin‑s Nazaret.
Ɨɨn kɨu n‑kuu ka xika‑s juan ndixi koio.
Ijan dada n‑ka nanduku‑s‑ia nuu ñayiu kuu tnaʼa‑s xiʼin nuu ñayiu ka xini tnaʼa xiʼin‑s.
45 Xaxeʼe xa ña n‑ka naniʼi‑s‑ia,
xijan kuu xa n‑ka nangondita‑s;
juaʼan ntuku‑s Jerusalén,
te n‑ka nanduku‑s‑ia ichi n‑ka nangondita‑s.
46 Kɨu kuu uni,
dada n‑ka naniʼi‑s‑ia veñuʼu Jerusalén.
Nukoo‑ia xiʼin se ka dakuaʼa ñayiu xa n‑chidotnuni Moisés.
Nini‑ia tnuʼu‑s,
te dandichi ñaʼa‑ia.
47 Diko n‑ka yuʼu ntdantuʼu se ijan xaxeʼe xa vaʼa kutnuni ini‑ia xiʼin xaxeʼe tnuʼu n‑jaʼan‑ia nuu‑s.
48 Nu n‑ka xini ñaʼa tadɨʼɨ‑ia,
te n‑ka yuʼu‑s.
N‑jaʼan dɨʼɨ‑ia:
—Jesús,
¿nakuenda duʼa n‑kida ñaʼa‑un?
Te ka nanduku ñaʼa‑r xiʼin taa‑un.
Yo n‑ka chi ini‑r xaxeʼe‑un —kuu‑ña,
xiaʼan‑ña.
49 Te xiaʼan‑ia nuu‑ña nduu‑ña xiʼin yɨɨ‑ña:
—¿Nakuenda ka nanduku ñaʼa‑n u?
¿Ñadu xa ka xini‑n xa io xa kutuu‑da veʼe Taa‑da u?
—kuu‑ia,
xiaʼan‑ia.
50 Ña n‑ka kutnuni ini tadɨdɨ‑ia nakuenda xa daa n‑jaʼan‑ia.
51 N‑xiko‑ia xiʼin‑s,
te n‑ka naxee‑s xiʼin‑ia Nazaret.
N‑xo jandixa‑ia xa n‑ka xo taʼu tniu tadɨʼɨ‑ia nuu‑ia.
N‑xo naʼa dɨʼɨ‑ia ntdaa xa n‑kuu.
52 Vax kueʼnu‑ia,
te vaʼa xani ini‑ia.
N‑chindee n‑chituu ñaʼa Ianyuux,
te n‑ka tna ini ñaʼa ñayiu.
La Niñez de Jesús.