Tnuʼu Ianyuux n‑chidotnuni Sua
Ia nani Tnuʼu Ianyuux, n‑kixee‑ia ñuñayiu
1
Nde kiʼna nuu,
xá daa,
tuu Ia nani Tnuʼu Ianyuux.
Kunduu Ia nani Tnuʼu Ianyuux xiʼin Ianyuux.
Te Ia nani Tnuʼu Ianyuux kuu Ianyuux.
2 Antecas xa kuaʼa ntdaa xa io,
te n‑xo tuu Tnuʼu Ianyuux xiʼin Ianyuux.
La Palabra (Juan 1.1-18)
3 N‑kidavaʼa Ianyuux xiʼin mee‑ia ntdaa xa io.
Ni ɨɨn xa io ña n‑kidavaʼa meni Ianyuux.
Xiʼin Ia nani Tnuʼu Ianyuux n‑kidavaʼa Ianyuux ntdaa xa io.
4 Kida Ia nani Tnuʼu Ianyuux xa xtuu ñayiu.
Kida‑ia xa kutnuni ini ñayiu xa kuu xandaa.
Ná kuu luz vaʼa ka koko,
da kuu Tnuʼu Ianyuux.
5 Koko luz vaʼa ka koko nuu nee,
te ña n‑kuaʼa nuu nee xa chidaʼu‑i luz vaʼa ka koko.
6 Te n‑xee ɨɨn seyɨɨ n‑tundaʼa Ianyuux.
Nani‑s Sua.
7 N‑xee‑s xa jaʼan ndaa‑s xaxeʼe luz vaʼa ka koko.
N‑jaʼan ndaa‑s xaxeʼe luz vaʼa ka koko,
xa na jandixa koio ntdaa ñayiu luz jan.
8 Sua,
ñatu n‑kuu‑s luz vaʼa ka koko.
Diko ni n‑xee‑s xa jaʼan ndaa‑s xaxeʼe luz jan.
9 Te luz vaʼa ka koko,
luz ndaa,
n‑kixee ñuñayiu.
Kida‑ia xa kutnuni ini ntdaa ñayiu xa kuu xandaa.
10 N‑xo tuu Tnuʼu Ianyuux ñuñayiu.
Xiʼin mee‑ia n‑kidavaʼa‑ia xiʼin Ianyuux ñuñayiu.
Ko ña n‑ka kutnuni ini ñayiu ñuñayiu jundu kuu‑ia.
11 N‑kixee‑ia ñuñayiu,
ko ñayiu n‑kidavaʼa‑ia,
ña n‑ka xeka vaʼa‑i‑ia.
12 Dava‑i,
joon,
n‑ka xeka vaʼa‑i‑ia,
n‑ka jandixa‑i‑ia.
Te xaxeʼe xa n‑ka jandixa‑i‑ia,
te n‑kida‑ia xa n‑ka nduu‑i daʼya Ianyuux.
13 Ña ka kuu daʼya Ianyuux ná ka kuu daʼya ñayiu.
Chi daʼya ñayiu ka kaku‑i hora tuu ɨɨn seyɨɨ xiʼin ñadɨʼɨ‑s.
Ka kaku‑i xaxeʼe xa juini ɨɨn seyɨɨ xa koo daʼya.
Ko daʼya Ianyuux,
ka kuu‑i daʼya‑ia xaxeʼe xa n‑kida‑ia xa n‑ka nduu‑i daʼya‑ia.
14 Ia nani Tnuʼu Ianyuux,
n‑kixee‑ia ñuñayiu.
N‑kaku‑ia ná ka kaku mee‑ro,
te n‑xo tuu‑ia xiʼin‑ro.
N‑ka xo ndeʼa‑da xa Ia kunxaʼnu ka kuu‑ia.
Ia kunxaʼnu ka kuu‑ia,
te medini‑ia kudaʼya ñaʼa Taa‑ia Ianyuux.
N‑ka xo ndeʼa‑da xa xemani ñaʼa‑ia mee‑ro,
te kundau ini ñaʼa‑ia mee‑ro,
te jaʼan‑ia xa kuu xandaa.
15 Te n‑jaʼan ndaa Sua xaxeʼe‑ia hora n‑kana‑s:
—Se yaʼa kuu se n‑kakuneʼe‑da nuu‑n.
N‑jaʼan‑da xa juindodo nuu mee‑da nuu mee‑ia kixee,
ko taxnuni ka mee‑ia dada mee‑da.
Chi antecas xa kuaʼa ntdaa xa io,
te xá daa tuu‑ia.
16 Te kueʼe xa kueʼe xa n‑taxi‑ia.
Xá n‑ka tnɨɨ‑ro,
ntdaa‑ro,
xamani‑ia xiʼin xamani‑ia.
17 Chi tnuʼu n‑taʼu tniu Ianyuux,
n‑taxi Ianyuux xiʼin Moisés.
Te xamani‑ia xiʼin xa kuu xandaa,
n‑taxi‑ia xiʼin Jesucristu.
18 Nuncas ña n‑xini ni ɨɨn ñayiu Ianyuux,
xiʼin nuu‑i.
Idini Daʼya Yɨɨ Ianyuux,
n‑kida‑ia xa jini‑ro Ianyuux.
Kunduu‑ia xiʼin Taa‑ia Ianyuux,
te dandeʼa ñaʼa‑ia Taa‑ia Ianyuux mee‑ro.
N‑jaʼan ndaa Sua xaxeʼe Jesús
19 Te se Israel io ñuu nani Jerusalén,
n‑ka tundaʼa‑s dutu xiʼin se levita nuu Sua,
xa kajan tnuʼu koio‑s jundu kuu‑s.
Juan el Bautista identifica al Mesías (Juan 1.19-34)
—Ruʼu,
ñatu kuu‑r Cristu,
Ia tundaʼa Ianyuux.
21 N‑ka xijan tnuʼu ka‑s:
—¿Jundu kuu‑n?
¿Elías kuu‑n a?
N‑jaʼan‑s:
—Ñatu kuu‑r Elías.
N‑ka xijan tnuʼu ka‑s:
—¿Kuu‑n se tundaʼa Ianyuux xa juña tnuʼu‑s tnuʼu Ianyuux nuu ñayiu a?
N‑xiaʼan‑s:
—Ñaʼa.
22 Xijan kuu xa n‑ka jaʼan‑s:
—Ndoñuʼu‑n xa jaʼan ndaa‑n jundu kuu‑n.
Io xa najuña tnuʼu koio‑r nuu se n‑ka tundaʼa ñaʼa.
¿Nax jaʼan‑n xaxeʼe‑n?
23 N‑xiaʼan Sua:
—Ruʼu kuu se kana yuku nuu ñayo ñayiu io:
“Kada tuʼa koio‑n ichi nuu kixi Xtoʼo‑ro.”
Jaʼan mee‑r ná n‑jaʼan se n‑xian tnuʼu tnuʼu Ianyuux nuu ñayiu xá n‑kuu kueʼe kuia,
se n‑xo nani Isaías.
24 Te se ijan,
se n‑ka tundaʼa se Israel io ñuu nani Jerusalén,
mee‑s ka kuu se fariseu.
25 N‑ka xijan tnuʼu‑s:
—Nux ñatu kuu‑n Cristu,
ni Elías,
ni se juña tnuʼu tnuʼu Ianyuux nuu ñayiu,
te,
¿nakuenda dajuendute‑n ñayiu nda?
26 N‑jaʼan Sua:
—Mee‑r dajuendute ñayiu xiʼin ndute ni.
Io ɨnka seyɨɨ tuu meʼñu mee‑n vitna,
ko ta najini ka‑n‑sɨ.
27 Juini ndodo nuu ka‑r vaxi,
ko taxnuni ka mee‑s dada mee‑r.
Ni xa ku kuu‑r muxu‑s,
ma kuaʼa‑r.
Ni xa nandaxi‑r correa ndixa‑s,
ma kuaʼa‑r.
28 Te ntdaa xaʼa n‑yaʼa ñuu nani Betábara,
ɨnka xio deʼva nani Jordán,
nuu n‑dajuendute Sua ñayiu.
Jesús kuu Tkolelu n‑taxi Ianyuux
29 Kɨu kuu uu,
n‑xini Sua xa vax kuyatni Jesús,
te n‑jaʼan‑s:
—Kundeʼa koio‑n.
Vaxi se kuu Tkolelu n‑taxi Ianyuux.
Se dita kuechi ñayiu ñuñayiu kuu‑s.
30 N‑jaʼan ndaa‑da xaxeʼe mee‑s,
hora n‑jaʼan‑da xa ndodo nuu ka‑da n‑kixee nuu ɨɨn seyɨɨ taxnuni ka dada mee‑da.
Taxnuni ka‑ia,
chi xá daa tuu‑ia,
antecas xa kuaʼa ntdaa xa io.
31 Te mee‑da,
ña n‑xo najini‑da‑ia.
Juini n‑dajuendute‑da ñayiu,
xa kutnuni ini koio ñayiu Israel jundu kuu mee‑ia,
ko na n‑kixi‑ia,
te ña n‑najini‑da‑ia.
32 N‑jaʼan ndaa Sua:
—N‑xini‑da Espíritu Ii vax juun nde andɨu.
Ná kaa ɨɨn data n‑kaa‑ia,
te n‑ndoo‑ia xiʼin se yaʼa.
33 Ta kutnuni ini ka‑da jundu kuu‑s,
ko n‑xo najaʼan‑da nax n‑jaʼan Ianyuux,
hora n‑tundaʼa ñaʼa‑ia mee‑da vaxi,
xa dajuendute‑da ñayiu nuu ndute.
N‑jaʼan Ianyuux:
“Jini‑n Espíritu Ii vax juun nde andɨu,
te jini‑n xa ndoo‑ia nuu ɨɨn seyɨɨ.
Seyɨɨ jan kada xa tnɨɨ koio ñayiu Espíritu Ii.”
34 N‑xini‑da xa duʼa n‑kuu,
te jaʼan ndaa‑da xa se yaʼa kuu Daʼya Yɨɨ Ianyuux.
N‑jaʼan Jesús Ndrixi xiʼin Spedru
35 Kɨu kuu uni,
ɨnka vuelta n‑xo tuu Sua xiʼin uu se dakuaʼa‑s.
Los seguidores siguen a Jesús (Juan 1.35-51)
—Kundeʼa koio.
Se ijan kuu Tkolelu n‑taxi Ianyuux.
37 Na n‑ka teku uu se dakuaʼa Sua nax n‑jaʼan‑s,
te n‑ka xe kuitandijun‑s Jesús.
38 N‑konenuu Jesús,
te n‑xini‑ia se xndijun ñaʼa.
N‑jaʼan‑ia:
—¿Nax ka nduku‑n?
N‑ka jaʼan‑s:
—Rabí,
¿ndexu io‑n?
(Rabí juini kachi:
maestru.)
39 N‑jaʼan‑ia:
—Na jɨʼɨn‑ro,
te jini‑n nde tuu‑r.
Xijan kuu xa ndeka‑ia‑s juaʼan,
te n‑ka xini‑s nde tuu‑ia.
N‑ka ndoo‑s xiʼin‑ia kɨu ijan,
chi n‑ñini.
Vaa xá kaa koon xañini kuu.
40 Ɨɨn se ijan nani Ndrixi.
Ñani Simón Spedru kuu‑s.
N‑teku‑s nax n‑jaʼan Sua,
te n‑xe kuitandijun‑s Jesús.
41 Hora ijan ni n‑nanitnaʼa‑s xiʼin ñani‑s Simón,
te n‑jaʼan‑s:
—N‑ka nanitnaʼa‑r xiʼin Mesías,
Ia n‑tundaʼa Ianyuux.
(Mesías juini kachi:
Cristu.)
42 Ndeka Ndrixi Simón juaʼan nuu Jesús.
Na n‑xini Jesús Simón,
n‑jaʼan‑ia:
—Ndoʼo kuu Simón,
daʼya Jonás.
Danani ñaʼa‑r Cefas.
(Cefas juini kachi:
Spedru.
Te Spedru juini kachi:
yuú kaʼnu ka.)
N‑jaʼan Jesús Slipe xiʼin Natanael
43 Kɨu kuu koon,
n‑juini Jesús xa jɨʼɨn‑ia do Galilea.
N‑nanitnaʼa‑ia xiʼin ɨɨn seyɨɨ nani Slipe.
N‑jaʼan Jesús:
—Kunduu‑n xiʼin‑r.
44 Te Slipe kuu se ñuu nani Betsaida.
Te Betsaida kuu ñuu Ndrixi xiʼin Spedru xiʼin Slipe.
45 N‑nanitnaʼa Slipe xiʼin Natanael,
te n‑jaʼan‑s:
—N‑ka nanitnaʼa‑r xiʼin ɨɨn seyɨɨ.
Hora n‑chidotnuni Moisés tnuʼu n‑taʼu tniu Ianyuux,
n‑jaʼan‑s xa kixi ɨɨn seyɨɨ.
Se n‑ka xian tnuʼu tnuʼu Ianyuux nuu ñayiu du.
N‑ka chidotnuni‑s xa kixi ɨɨn seyɨɨ.
Te vitna xa n‑ka nanitnaʼa‑r xiʼin‑s.
Kuu‑s Jesús,
daʼya José.
Se ñuu Nazaret kuu‑s.
46 N‑xiaʼan Natanael:
—¿Ñuu Nazaret?
¡Ma kuaʼa xa kee ɨɨn se vaʼa nde ijan!
N‑xiaʼan Slipe:
—Na jɨʼɨn‑ro,
te jini‑n.
47 Te n‑xini Jesús xa vaxi Natanael nuu tuu‑ia,
te n‑jaʼan‑ia:
—Kundeʼa koio.
Se ndaa ñuu Israel kuu mee‑s.
Nuncas ña n‑dandaʼu‑s ni ɨɨn ñayiu.
48 N‑xiaʼan Natanael:
—¿Nanda xinitnuni ñaʼa‑n?
N‑jaʼan Jesús:
—Antecas xa kana ñaʼa Slipe mee‑n,
te n‑xini ñaʼa‑r nuu nukoo‑n xeyutnu higo.
49 N‑jaʼan Natanael:
—Maestru,
mee‑n kuu Daʼya Yɨɨ Ianyuux.
Mee‑n kuu se kunxaʼnu ka nuu ñayiu Israel.
50 N‑xiaʼan Jesús:
—¿Jandixa ñaʼa‑n xaxeʼe xa n‑jaʼan‑r xa n‑xini ñaʼa‑r nuu nukoo‑n xeyutnu higo a?
Kundeʼa‑n tniu naʼnu ka dada xijan.
51 N‑jaʼan Jesús:
—Xandaa kuu xa jaʼan‑r.
Kundeʼa koio‑n xa najaan andɨu.
Kundeʼa koio‑n ángel,
ia ka xinokuechi nuu Ianyuux,
juan ndaa koio‑ia andɨu te vax juun koio‑ia andɨu.
Te kundeʼa ñaʼa koio‑n mee‑r.
Se kuu ñani tnaʼa ñayiu kuu‑r.
Kundeʼa koio‑n ángel,
ia ka xinokuechi nuu Ianyuux,
kixi nuu tuu mee‑r.