Xa n‑ka jaʼan se n‑tundaʼa Jesús xiʼin xa n‑ka kida‑s
N‑jaʼan Jesús xa keé Espíritu Ianyuux ñayiu
1
Dito Teófilo,
libru n‑kidavaʼa‑da kiʼna nuu n‑kakuneʼe‑da ntdandituʼu xa n‑kixeʼe Jesús xa n‑kida‑ia xiʼin xa n‑dakuaʼa‑ia ñayiu.
2 N‑kixeʼe‑ia xa kada‑ia tniu‑ia te dani n‑kidatniu‑ia xa nde kɨu juan ndaa‑ia andɨu.
Antecas xa n‑ndaa‑ia andɨu n‑taʼu tniu‑ia nuu se n‑kaxí‑ia xa kada koio‑s xa n‑jaʼan Espíritu Ianyuux nuu‑ia xa kada‑s.
Te dɨuni n‑jaʼan‑ia nuu se n‑kaxí‑ia jan xa tundaʼa‑ia‑s xa juña tnuʼu koio‑s ñayiu xa n‑jaʼan‑ia.
3 Ndaʼu n‑yaʼa‑ia te n‑xiʼí‑ia te n‑nandoto‑ia.
Nu n‑yaʼa xijan tɨtnɨ vuelta n‑xeʼen‑ia nuu xtuu‑s te kueʼe xa n‑kida‑ia xa na kutnuni ini koio‑s xa xandaa xakuiti ndito‑ia.
Te n‑kakuneʼe‑ia xa taxnuni Ianyuux nuu ñayiu ñuñayiu.
Uu diko ka kɨu daa n‑yaʼa.
4 Ɨɨn kɨu nu n‑nataka Jesús xiʼin se n‑dakuaʼa‑ia,
n‑taʼu tniu‑ia nuu‑s xa maxku kee koio ni‑s Jerusalén chi na kundetu koio‑s.
Xiaʼan‑ia:
—N‑jaʼan‑r xa n‑jaʼan Taa‑ro Ianyuux xa taxi‑ia ɨɨn xa taxi‑ia.
Kundetu koio‑n yaʼa nde na xee kɨu jɨn tnaʼa xijan.
5 N‑dajuendute ñaʼa Sua xiʼin ndute,
ko Espíritu Ianyuux,
tuku kada‑ia.
Nuu xaku kɨu keé ñaʼa‑ia ndoʼo ɨɨn ɨɨn‑n —kuu‑ia,
n‑jaʼan‑ia.
Juan ndaa Jesús andɨu
6 N‑ka nataka ñayiu nuu Jesús,
te n‑ka xijan tnuʼu‑i‑ia:
—¿Kada‑n xa taxnuni ntuku se Israel vitna u?
Xiaʼan Jesús nuu‑i:
7 —Ñadu ndoʼo ɨɨn ɨɨn‑n io xa jini koio‑n na kɨu,
na hora yaʼa xijan,
chi Taa‑ro Ianyuux ni xini.
Mee ni‑ia naʼa na kɨu n‑xantuu‑ia xaxeʼe xa taxnuni‑ia.
8 Kɨu na keé ñaʼa Espíritu Ianyuux,
daa kada‑ia xa kada‑n tniu‑ia,
te kakuneʼe ñaʼa‑n nuu ñayiu Jerusalén ya xiʼin dava ka ñuu distrito Judea xiʼin distrito Samaria xiʼin nituʼu ñuñayiu.
9 Tnuʼu yaʼa n‑jaʼan‑ia,
te nɨni xndeʼa ñaʼa ñayiu xyuku ijan juan ndaa‑ia andɨu.
N‑daʼu‑ia nuu vikó te ñayo ka‑i n‑ka xini‑ia.
10 Nɨni xndeʼa‑i xa juan ndaa‑ia andɨu,
dana ini n‑ka xini‑i uu ia xniʼno daʼma kuixi xnii ijan.
11 Ka xiaʼan‑ia:
—Ndoʼo,
ñayiu Galilea,
¿nakuenda xa xnii ni‑n yaʼa,
te xndeʼa‑n andɨu?
Xa juan ndaa‑ia.
Ia yaʼa,
nani juan ndaa‑ia,
dani ndixi‑ia ɨnka vuelta.
N‑kaxí se n‑tundaʼa ñaʼa Jesús Matías, xa n‑nujuiin naa‑s nuu Judas
12 N‑ka ndee se n‑kaxí ñaʼa Jesús nuu nani Yuku Tnu Olivo xa ka nuʼu ntuku‑s Jerusalén.
Ñatu xika Jerusalén xiʼin nde Yuku Tnu Olivo.
Kani ichi ijan ná kani ichi xejoon ley ñayiu Israel xa kaka‑i kɨu ka ndetatu‑i.
13 Juan nuʼu koio‑s nuu xtuu‑s,
te n‑ka ndaa‑s pisu kuu uu nuu xtuu‑s.
Duʼa xnani se yaʼa:
Spedru,
Sua,
Jacobo,
Ndrixi,
Slipe,
Tomaxi,
Stolo,
Steu,
Jacobo daʼya yɨɨ Alfeo,
Simón se kuu partido Zelote,
Judas ñani Jacobo du.
14 Ijan n‑ka xo nataka kutu‑s ntdaa‑s xiʼin María,
dɨʼɨ Jesús,
ñani‑ia du xiʼin dava ka ñadɨʼɨ xa n‑ka xo xijan taʼu kaʼnu‑s xiʼin‑ña ntdaa‑ña nuu Ianyuux.
15 Tiempu ijan n‑ka taka naxa ɨɨn cientu oko ñayiu n‑ka kukanu ini Jesucristu.
Te n‑jaʼan ndodo Spedru.
Xiaʼan‑s:
16 —Dito,
Ñani,
n‑xetnaʼa xa n‑jaʼan Espíritu Ianyuux xa n‑chidotnuni David na n‑kakuneʼe‑s Judas xa kandeka‑s se tnɨɨ koio Jesús jɨʼɨn nuu‑ia.
N‑xio xa duʼa yaʼa.
17 Judas n‑kuu ɨɨn se n‑ka xo kandeka tnaʼa xiʼin‑da ntdaa‑da xa kadatniu koio‑da xiʼin‑s.
18 N‑xeen‑s ɨɨn ñuʼu xiʼin tvini niʼi‑s xaxeʼe kuechi n‑kida‑s.
Ijan dada jungava ndeyu‑s.
N‑ndata xiti‑s te n‑kee xiti kuechi‑s.
19 ʼN‑ka teku ntdaa ñayiu Jerusalén xaʼa,
te n‑ka dandee‑i ñuʼu ijan Acéldama.
Yuʼu yaʼa kuu yuʼu ka jaʼan ñayiu Jerusalén.
(Acéldama kuu ñuʼu nɨñɨ.)
20 Daa yaʼa chi duʼa yodotnuni libru Salmos:
Ni ɨɨn ñayiu,
maxku kutuu ka veʼe n‑xo tuu‑s.
Dɨuni yodotnuni:
Na nujuiin naa ɨnka se nujuiin naa nuu‑s.
21 ʼKidayɨka‑i xa kaxí‑ro ɨɨn seyɨɨ n‑ka xo kandijun xiʼin‑da Jesús,
Ia kuu Xtoʼo‑ro,
22 nde tiempo n‑dajuendute ñaʼa Sua xiʼin nde tiempo juan ndaa‑ia andɨu.
Io xa ntdaa‑da xiʼin‑s jaʼan nuu ñayiu xa n‑nandoto Jesús —kuu Spedru,
xiaʼan‑s nuu ñayiu xyuku ijan.
23 Xijan kuu xa n‑ka nduku‑s uu‑s.
Ɨɨn‑s nani José.
Dɨuni nani‑s Barsabás.
Dɨuni nani‑s Justo.
Ɨnka‑s nani Matías.
24 Te duʼa n‑ka xijan taʼu‑s nuu Ianyuux:
—Taa‑ro Ianyuux,
ndixi xa xini‑n janda kuu anu ntdaa ñayiu,
datnuu dayeʼe‑n ndeda nduu se yaʼa kaxí‑n xa nkonetniu‑s
25 xa junukuechi‑s nuu‑n te tundaʼa‑n‑sɨ xa juña tnuʼu‑s ñayiu xa n‑jaʼan Jesús xiʼin xa n‑kida‑ia chi n‑dakuita Judas xa junukuechi‑s,
te juaʼan‑s nuu niʼi‑s taʼu‑s —kuu‑s,
n‑ka xijan taʼu‑s.
26 N‑ka kida sortiari‑s‑sɨ,
te n‑kakunuu Matías,
te n‑kɨu tnaʼa‑s nuu uxi ɨɨn se tundaʼa ñaʼa Jesús xa juña tnuʼu koio‑s ñayiu xa n‑jaʼan‑ia xiʼin xa n‑kida‑ia.