N‑keé Espíritu Ianyuux ñayiu n‑ka kukanu ini Jesucristu
2
N‑xee viko Pentecostés te ntdaa ñayiu n‑ka kukanu ini Jesucristu xyuku kaʼnu ɨɨn veʼe katuu Jerusalén.
2 Te danaa ndeʼe n‑kayu andɨu te n‑ka teku‑i ɨɨn xa kuu ná kuu xa kane tachi ndeʼe.
Nituʼu xiti veʼe nuu xtuu‑i n‑kayu.
3 N‑ka xee xa ná xndaa yañuʼu.
Nudɨɨn nudɨɨn n‑ka xe juindodo xijan dɨkɨ‑i.
4 Ntdaa‑i n‑keé ñaʼa Espíritu Ianyuux te n‑ka kixeʼe‑i ka jaʼan‑i nudɨɨn yuʼu sejoon n‑juini Espíritu Ianyuux xa jaʼan koio‑i ɨɨn ɨɨn‑i.
5 Kueʼe ñayiu neʼe tnɨɨ mudu ñayiu Israel xndaxio nudɨɨn ñuu xtuu Jerusalén tiempo ijan.
Xndaxio‑i xañuʼu nuu Ianyuux.
6 Nu n‑ka teku‑i xa ndeʼe n‑kayu andɨu,
n‑ka nataka‑i nuu xyuku ñayiu ka kukanu ini Jesucristu jan,
te n‑ka teku‑i xa ka jaʼan ñayiu ijan nudɨɨn yuʼu ná ka jaʼan mee‑i país‑yɨ.
N‑ka yuʼu anu‑i chi ñayo‑i n‑xani ini xa daa yaʼa.
7 Vichi n‑ka yuʼu‑i,
te ka xiaʼan tnaʼa‑i:
—¿Ñadu ñayiu Galilea ka kuu ntdaa ñayiu ka jaʼan yaʼa u?
8 ¿Janda n‑kuu xa ka jaʼan‑i yuʼu ka jaʼan‑ro país‑ro,
te ka teku‑ro?
9 Yaʼa xyuku ñayiu Partia,
ñayiu Media,
ñayiu Elam,
ñayiu io Mesopotamia,
ñayiu Judea,
ñayiu Capadocia,
ñayiu Ponto,
ñayiu Asia,
10 ñayiu Frigia,
ñayiu Panfilia,
ñayiu Egipto,
ñayiu ñuu katuu yatni Cirene país Libia,
ñayiu Roma xtuu Israel ya,
11 ñayiu Creta,
xiʼin ñayiu Arabia.
Dava‑ro ka kuu yatnuʼu Israel.
Dava‑ro ñatu ka kuu yatnuʼu Israel,
ko ntdaa‑ro ka jandixa Ianyuux.
Ntdaa‑ro ka kutnuni ini xa ka jaʼan‑i xa ka nakuetu‑i nuu‑ia chi ka jaʼan‑i yuʼu‑ro —ka kuu‑i,
ka xiaʼan tnaʼa‑i.
12 Ntdaa‑i n‑ka yuʼu anu te ñayo‑i n‑ka kutnuni ini janda n‑kuu xa dana ini n‑ka jaʼan ñayiu ijan ɨnka yuʼu.
Dava‑i ka xiaʼan tnaʼa:
—¿Janda n‑kuu xa daa ka jaʼan‑i?
13 Ko dava‑i n‑ka xakundee ñayiu n‑ka jaʼan ɨnka yuʼu.
Ka xiaʼan tnaʼa‑i:
—¡Ka xini ñayiu dian!
N‑dakuaʼa Spedru ñayiu
14 Te n‑ndojuiin Spedru xiʼin uxi ɨɨn ka se tundaʼa ñaʼa Jesús xa juña tnuʼu koio‑s ñayiu xa n‑jaʼan Jesús xiʼin xa n‑kida‑ia meʼñu ntdaa ñayiu.
Te xee n‑jaʼan‑s nuu‑i ntdaa‑i:
—Ñani,
Dito,
xa ka kuu‑n ñayiu Israel xiʼin ndixi,
ñayiu n‑ka kixee xa xtuu‑n Jerusalén ya.
Kunini vaʼa koio‑n xa na kutnuni ini‑n xa na jaʼan‑da.
15 Ñayo ñayiu yaʼa ka xini ná ka xani ini‑n.
Dijan kaa ɨɨ́n datne kuu.
Ñadu hora ku xini ñayiu kuu.
16 N‑xetnaʼa xa yaʼa vitna ná n‑jaʼan se n‑xo nani Joel,
se n‑xian tnuʼu ñayiu xa n‑jaʼan Ianyuux.
Duʼa n‑chidotnuni‑s:
17 N‑jaʼan Ianyuux:
“Danduu nga dakeé‑r Espíritu‑r ñayiu xiʼin daʼya‑i,
te jaʼan koio daʼya dɨʼɨ‑i xiʼin daʼya yɨɨ‑i nax koo.
Daʼya yɨɨ‑i,
se ka kuu solteru,
datutuku‑r‑sɨ.
Sexaʼnu,
kachi xene koio‑s nax yaʼa.
18 Tiempu ijan dakeé‑r Espíritu‑r se ka xinokuechi nuu‑r xiʼin ñá ka xinokuechi nuu‑r.
Juʼun‑s xiʼin‑ña Espíritu‑r,
te jaʼan koio‑s xiʼin‑ña tnuʼu‑r nuu ñayiu.
19 Kada‑r xa koo nɨñɨ xiʼin ñuʼú,
te junu ñuʼa tkoo andɨu xiʼin ñuñayiu.
Ntdaa xijan kada‑r xa kundeʼa ñayiu ñuñayiu xa na yuʼu‑i nuu‑r.
20 Kunee nuu ngandii te kukueʼe nuu yoo ná kueʼe nɨñɨ.
Duʼa kuu antecas xa xee kɨu ndukaʼnu‑r,
te jini ñayiu xa taxnuni‑r.
21 Ntdaa ñayiu kajan taʼu nuu‑r nanitaʼu daa”,
kuu Ianyuux,
n‑jaʼan‑ia.
22 ʼKunini koio ndixi xa ka kuu‑n yatnuʼu Israel.
Xnaʼa mee‑n xa Jesús Nazaret,
n‑kida Ianyuux xa n‑kida‑ia kueʼe milagru,
te n‑ka xini‑ro.
Xaxeʼe xa n‑ka xo ndeʼa‑ro xaʼa n‑ka kutnuni ini‑ro xa Ianyuux n‑tundaʼa ñaʼa.
23 N‑ka kida‑n xa n‑ka tnɨɨ se unu loko‑ia,
te n‑ka xatakaa dika‑n‑ia.
Xa daa nga ñu ini Ianyuux xa daa yaʼa,
te naʼa‑ia.
24 N‑kida‑ia xa n‑nandoto Jesús,
te n‑ndokoo‑ia nuu xndaa ndɨyɨ chi ña n‑kuu ka xa kuu ka‑ia ndɨyɨ:
25 Daa yaʼa chi n‑chidotnuni David:
“Ndɨkɨu ndɨñuu ndeʼa ñaʼa‑da.
Ña tuu na xa chi ini‑da chi nujuiin‑n lado kuaʼa‑da.
26 Xijan kuu xa yo kudɨ ini‑da,
te najani‑da nuu ñayiu xa kudɨ ini‑da.
Jandixa‑da xa xandaa xakuiti nadandoto ñaʼa‑n na kuú‑da.
27 Na kuú‑da ma dandoo ñaʼa‑n nuu xyɨnduxi ndɨyɨ.
Ni ma juejoon‑n xa tɨu yɨkɨ kuñu Daʼya Yɨɨ‑n,
Ia ii.
28 N‑kachitnuʼu ñaʼa‑n xa kada‑da na nandoto‑da.
Te kutuu‑ro nɨkava nɨkuita te yo kudɨ ini‑da.”
29 ʼÑatu yuʼu‑da xa jaʼan‑da xa n‑xiʼí xixitna‑ro David chi xandaa xakuiti n‑xiʼí‑s,
te n‑xe konduxi‑s.
Ntdaa‑ro ka xini nuu n‑xe konduxi‑s chi io daa nde vitna.
30 David n‑kuu se n‑jaʼan tnuʼu Ianyuux nuu ñayiu,
te n‑xo naʼa‑s xa n‑chinaa Ianyuux nuu‑s xa ɨɨn daʼya dana‑s ku kuu se taxnuni.
31 Xá ama n‑jaʼan David xa nandoto Cristu te n‑chidotnuni‑s:
“Ma ndoo‑ia nuu xyɨnduxi ndɨyɨ,
ni ma tɨu yɨkɨ kuñu‑ia.”
32 N‑nadandoto Ianyuux‑ia,
te n‑ka xini ntdaa daña xa n‑nandoto‑ia.
33 N‑kida Ianyuux xa juan ndaa‑ia andɨu xa kunukoo‑ia diñi kuaʼa‑ia xa taxnuni‑ia.
Dɨuni n‑kida Ianyuux xa n‑kidatniu ka Espíritu‑ia anu Jesús te n‑kida Jesús xa keé ñaʼa Espíritu‑ia ntdaa daña na n‑jaʼan‑ia.
N‑ka xo ndeʼa‑n te n‑ka teku‑n vitna.
34 Ñadu David juan ndaa andɨu chi mee‑s kuu se duʼa n‑chidotnuni:
N‑jaʼan Taa‑ro Ianyuux nuu Ia kuu Xtoʼo‑da:
“Nkoo diñi kuaʼa‑r nɨni na xee kɨu,
35 kada‑r xa taxnuni‑n nuu ntdaa ñayiu ka xini uʼu ñaʼa.”
36 ʼNdixi,
ñayiu ka kuu daʼya dana Israel,
kunaʼa koio‑n xa n‑kida Ianyuux xa n‑nduu Jesús Xtoʼo‑ro.
Dɨuni n‑kida‑ia xa n‑kuu‑ia Cristu te n‑xe konetniu‑ia xa taxnuni‑ia.
Maxku jɨn tnɨɨ anu‑n chi xandaa kuu.
Mee‑ia n‑ka xatakaa dika‑n —kuu Spedru,
xiaʼan‑s.
37 Nu n‑ka teku ñayiu n‑ka taka ijan xaʼa,
te vichi n‑ka kune ini‑i.
N‑ka xijan tnuʼu‑i Spedru xiʼin dava se n‑tundaʼa ñaʼa Jesús xa dakuaʼa‑s ñayiu:
—Dito,
¿Nax kada koio‑da?
38 Xiaʼan Spedru nuu‑i:
—Natu ini koio xa n‑ka kida‑n kuechi na kuaʼa na taxkanu ini Ianyuux kuechi‑n,
te juendute koio‑n ɨɨn ɨɨn‑n xaxeʼe xa ka kukanu ini‑n Jesucristu.
Kada Taa‑ro Ianyuux xa keé ñaʼa Espíritu‑ia.
39 Juʼun koio‑n Espíritu‑ia chi n‑jaʼan‑ia xa juʼun ñaʼa Espíritu‑ia ndoʼo xiʼin daʼya‑n xiʼin ñayiu xndaxio xika.
Juʼun Espíritu‑ia ntdaa ñayiu kida‑ia xa kunini‑i tnuʼu‑ia,
te jandixa‑i —kuu‑s.
40 Tnuʼu yaʼa n‑jaʼan Spedru nuu‑i.
Ijan dada n‑jaʼan ka‑s xa n‑jan doʼo‑s‑yɨ.
N‑jaʼan‑s nuu‑i xa maxku kada koio ka‑i kuechi.
—Maxku kada ka‑n xaloko xaduʼa ka kida dava ñayiu io vitna —kuu ntuku Spedru,
xiaʼan‑s.
Janda n‑xo tuu ñayiu kiʼna nuu kiʼna vii n‑ka kukanu ini Jesucristu
41 Duʼa n‑kuu xa n‑ka jandixa ñayiu tnuʼu n‑jaʼan Spedru,
te n‑ka xendute‑i.
Naxa uni mil ñayiu n‑ka kɨu tnaʼa nuu ñayiu ka kukanu ini Jesús kɨu ijan.
42 Kɨu xiʼin kɨu n‑ka xo nataka ñayiu xa kunini vaʼa‑i xa n‑xo jaʼan se n‑tundaʼa ñaʼa Jesús nuu‑i.
N‑ka xo xijan taʼu kaʼnu‑i nuu Ianyuux,
te n‑ka xo xaxi kaʼnu‑i.
43 N‑ka xo yuʼu ñayiu chi n‑ka xo kida se n‑tundaʼa Jesús milagru.
44 Ɨnuu n‑ka xani ini ñayiu kukanu ini Jesucristu,
te ntdaa xaxii ɨɨn‑i n‑ka kuu xaxii ntdaa‑i.
45 N‑ka diko ñayiu ñuʼu‑i xiʼin xaxii‑i,
te n‑ka xo dakexio nuu tnaʼa‑i tvini n‑ka xo niʼi‑i según janda ka ndoñuʼu mee‑i ɨɨn ɨɨn‑i.
46 Ntdantuʼu kɨu n‑ka xo nataka‑i veñuʼu Jerusalén.
Dani n‑ka xo nataka‑i veʼe‑i ɨɨn ɨɨn‑i xa n‑ka xo xaxi kaʼnu‑i.
N‑ka xo kudɨ ini‑i.
Ñayo‑i n‑kuxaʼnu anu nuu tnaʼa.
47 N‑ka xo ndadakaʼnu‑i Ianyuux,
te n‑ka xo kudɨ ini‑i chi n‑ka tna ini ñaʼa ñayiu.
Te n‑kida Ianyuux xa kueʼe ka ñayiu n‑ka xo nanitaʼu kɨu xiʼin kɨu te n‑kɨu tnaʼa ñayiu ijan nuu ntdaa ñayiu ka kukanu ini Jesucristu.