N‑ndadavaʼa Spedru ɨɨn se yakua
3
Ɨɨn kɨu juan kɨu Spedru xiʼin Sua veñuʼu kaʼnu Jerusalén naxa kaa uni xañini.
Hora ka xijan taʼu ñayiu kuu hora ijan.
2 Nukoo ɨɨn se yakua yeñuʼu nani Yeʼe Vili Kaa.
Daa n‑kaku‑s.
Ntnaʼa kɨu n‑xo xantuu ñaʼa ñayiu yeʼe jan xa kajan ndaʼu‑s hora ka kɨu ñayiu veñuʼu.
3 Nu n‑xini se yakua jan xa juan kɨu Spedru xiʼin Sua veñuʼu jan,
te n‑xijan ndaʼu‑s tvini.
4 N‑ka nukondeʼa‑s se yakua jan.
Te n‑jaʼan Spedru nuu‑s:
—Kundeʼa ñaʼa nduu‑r.
5 N‑nukondeʼa ñaʼa‑s,
te n‑kachi ini‑s xa juñaʼa koio‑s ɨɨn xa juñaʼa nga‑s.
6 Xiaʼan ntuku Spedru nuu‑s:
—Ña tuu na tvini‑r xa taxi‑r,
ko io ɨɨn xa kada ñaʼa‑r.
N‑kida Jesucristu Nazaret xa ndadavaʼa ñaʼa‑r.
Ndojuiin te kaka.
7 N‑tnɨɨ‑s ndaʼa kuaʼa se yakua jan te n‑ndojani ñaʼa‑s.
Hora ijan ni n‑kuyutnu nduu xeʼe‑s.
8 Ñama n‑ndojuiin ni‑s te n‑xe kandava‑s.
Xika nga mee‑s,
te juan kɨu‑s veñuʼu xiʼin Spedru xiʼin Sua.
N‑najuen tnuʼu‑s Ianyuux.
9 N‑ka xini ntdaa ñayiu xyuku ijan xa xika‑s xiʼin xa najuen tnuʼu‑s Ianyuux.
10 Ka xini‑i xa n‑xo xo nukoo se ijan yeñuʼu nani Yeʼe Vili Kaa jan xa n‑xo xijan ndaʼu‑s.
Ñayo‑i n‑kutnuni ini janda n‑kuu xa n‑xika‑s,
te loko n‑ka yuʼu anu‑i.
N‑jaʼan Spedru nuu ñayiu n‑ka nataka Portal Salomón
11 N‑tnɨɨ se n‑xo kuʼu xeʼe jan,
xeʼe daʼma Spedru xiʼin xeʼe daʼma Sua te n‑xe kuitandijun ñaʼa‑s.
N‑ka yuʼu anu ntdaa ñayiu n‑ka xo ndeʼa xaʼa,
te n‑ka kendava‑i nde yeʼe nani Portal Salomón nuu xnii ndruni se yaʼa.
12 Nu n‑xini Spedru xaʼa,
n‑jaʼan‑s nuu ñayiu:
—Dito,
Didi,
ñayiu ka kuu yatnuʼu Israel.
¿Nakuenda ka yuʼu‑n xa n‑ka xini‑n xaʼa?
¿Nakuenda daa xndeʼa ñaʼa‑n xa kuenda kɨu daña n‑ka kida xa n‑xika se yaʼa?
¿Nakuenda xndeʼa ñaʼa‑n xa kuenda kɨu daña kuaʼa xa duʼa kada‑da xaxeʼe xa unu vaʼa‑da?
13 Xndeka ndixi Jesús,
Ia xinokuechi nuu Ianyuux n‑ka xeʼen nuu Pilato xa kaʼni ñaʼa‑s,
te n‑ka jaʼan‑n xa maxku dayaa‑s‑ia.
Jesús ya ndadakaʼnu ñaʼa Taa‑ro Ianyuux,
Ia ndeka xixitna‑ro Abraham xiʼin Isaac,
Jacob du.
N‑juini Pilato xa dayaa‑s‑ia,
ko ñayo‑n n‑ka juini.
14 Naa xa jaʼan koio‑n xa dayaa Pilato Ia ii te ña tuu na kuechi‑ia io,
n‑ka jaʼan‑n xa dayaa‑s se n‑xaʼni ndɨyɨ.
15 Duʼa n‑kuu xa n‑ka xaʼni‑n Ia kida xa ndito roo,
ñayiu ñuñayiu,
ko n‑kida Ianyuux xa n‑nandoto‑ia.
N‑ka xini‑da xa n‑nandoto‑ia.
Kachitnuʼu ñaʼa‑da xa n‑ka xini‑da.
16 Xaxeʼe xa n‑kukanu ini se yaʼa Jesús xa ndadavaʼa ñaʼa‑ia,
xijan kuu xa n‑ndadavaʼa ñaʼa‑ia.
Ntdaa‑n ka xinitnaʼa xiʼin‑s,
te n‑ka xo ndeʼa‑n xa n‑kuu.
Diko ni xaxeʼe xa n‑kukanu ini‑s‑ia,
n‑kuyutnu xeʼe‑s te n‑xika‑s.
17 ʼXaxeʼe xa ñayo ndixi ni se ka taxnuni nuu‑ro n‑ka kutnuni ini jundu kuu‑ia,
xijan kuu xa n‑ka xaʼni‑n‑ia.
18 Duʼa n‑kida Ianyuux xa n‑xetnaʼa xa n‑jaʼan‑ia nuu ntdaa se n‑jaʼan tnuʼu‑ia nuu ñayiu xa ndaʼu yaʼa Cristu.
19 Natu ini koio‑n xa n‑ka kida‑n chi kuechi kuu,
te kukanu ini koio‑n Cristu xa na taxkanu ini Ianyuux xa n‑ka kida‑n,
te kada‑ia xa kutuu vaʼa koio‑n.
20 Cristu Jesús,
Ia n‑kaxí‑ia,
n‑tundaʼa‑ia‑ia nuu roo,
ñayiu ñuñayiu.
21 Tuu Jesucristu andɨu vitna,
te kutuu‑ia ijan nde na ndadavaʼa xee Ianyuux ntdaa xa io ñuñayiu xiʼin andɨu.
Xaʼa xá daa nga n‑jaʼan‑ia nuu se n‑jaʼan tnuʼu‑ia nuu ñayiu.
Ka kuu‑s se n‑kida Ianyuux xa n‑ka nduu‑s se ii.
22 N‑jaʼan Moisés nuu xixitna‑ro:
“Kada Ianyuux,
Ia kuu Xtoʼo‑ro,
xa ɨɨn se kuu daʼya dana‑ro jaʼan tnuʼu Ianyuux nuu ñayiu nación‑ro na kida‑r.
Jandixa koio‑i ntdaa tnuʼu jaʼan‑s.”
23 Ntdaa ñayiu ma jandixa tnuʼu na jaʼan se ijan,
danaa ñaʼa Ianyuux.
24 ʼNde tiempo n‑xo tuu Samuel xiʼin nde tiempo n‑xo tuu ɨɨn nga se n‑jaʼan tnuʼu Ianyuux nuu ñayiu n‑ka kakuneʼe ntdaa se n‑jaʼan tnuʼu Ianyuux nuu ñayiu xa yaʼa.
25 Ka xini‑n xa n‑jaʼan Ianyuux nuu se n‑jaʼan tnuʼu‑ia nuu ñayiu.
Dɨuni ka xini‑n xa n‑xiaʼan‑ia tnuʼu‑ia xixitna‑ro Abraham xa taxi‑ia ɨɨn xa taxi‑ia chi n‑jaʼan‑ia nuu‑s:
“Chindee chituu‑r ñayiu xndaxio ntdaa ñuu ñuñayiu xaxeʼe daʼya dana‑n.”
26 Kiʼna nuu nuu ndixi n‑tundaʼa Ianyuux Daʼya Yɨɨ‑ia na n‑nadandoto‑ia‑ia xa na natu ini‑n ɨɨn ɨɨn‑n xa n‑ka kida‑n kuechi.