N‑ka xijan tnuʼu se ka taxnuni nuu ñayiu Israel Spedru xiʼin Sua
4
Nɨni ka jaʼan Spedru xiʼin Sua nuu ñayiu,
n‑ka xee dutu xiʼin agente taxnuni nuu policía xndee veñuʼu xiʼin se ka kuu saduceu.
2 N‑ka kiti ini ntdaa se ijan xaxeʼe xa n‑ka jaʼan Spedru xiʼin Sua nuu ñayiu xa nandoto ndɨyɨ xaxeʼe xa n‑nandoto Jesús.
3 Te n‑ka tnɨɨ‑s Spedru xiʼin Sua.
Xaxeʼe xa n‑ñini,
ña n‑kuu xa kadandaa‑s kuechi‑s,
te n‑ka chindiʼu ñaʼa‑sɨ vekaa.
Nde kɨu kuu uu dada n‑ka kineʼe ñaʼa‑s xa n‑kundaa kuechi‑s.
4 Kueʼe ñayiu n‑ka xo nini xa n‑jaʼan‑s nduu‑s te n‑ka kukanu ini‑i Jesucristu.
Kueʼe ka‑i n‑kuu;
naxa oʼon mil mee ni seyɨɨ te ña tuu na kuenda ñadɨʼɨ.
5 Kɨu kuu uu n‑ka nataka sexaʼnu.
N‑ka nataka dava ka se ka taxnuni nuu ñayiu Israel xiʼin se ka tuʼa vaʼa ley n‑chidotnuni Moisés.
6 N‑ka nataka Anás se kuu dutu taxnuni ka,
Caifás,
Sua,
Alejandro xiʼin ntdaa ñayiu ka kuu familia dutu ka taxnuni ka Jerusalén.
7 Te n‑ka taʼu tniu‑s nuu se xndee vekaa xa na kandeka koio‑s Spedru xiʼin Sua jɨʼɨn nuu‑s.
N‑ka xani‑s Spedru xiʼin Sua meʼñu‑s ntdaa‑s xa kajan tnuʼu ñaʼa‑s.
Te ka xiaʼan‑s nuu‑s:
—¿Jundu n‑taʼu tniu xa duʼa ka kida‑n?
¿Jundu jaʼan xa duʼa kada‑n?
8 N‑kidatniu ka Espíritu Ianyuux anu Spedru,
te n‑jaʼan‑s nuu ntdaa se ijan:
—Ndixi,
sexaʼnu xiʼin dava ka se ka taxnuni nuu ntdaa ñayiu ka kuu yatnuʼu Israel,
9 ka xijan tnuʼu ñaʼa‑n nuu janda n‑ka kida‑da xa n‑xika se n‑kakuneʼe.
10 Na kachitnuʼu ñaʼa‑da ntdaa‑n xa Jesucristu,
Ia Nazaret,
n‑kida xa n‑xika‑s.
Kuu‑ia Ia n‑ka xatakaa dika koio‑n te n‑nadandoto ñaʼa Ianyuux.
Mee‑ia n‑kida xa n‑xika se yaʼa te nujuiin‑s nuu‑n ntdaa‑n.
Kunaʼa‑n xiʼin ntdantuʼu ka ñayiu ka kuu yatnuʼu Israel xaʼa:
11 “Kuenda kɨu ɨɨn yuú ña n‑ka xe ini se ka kidavaʼa veʼe kuu‑ia,
ko yuú ijan n‑nduu yuú n‑ndunuu yɨtnɨɨ veʼe jan vitna.”
12 Ñayo ka io xa dakaku ñaʼa‑i;
mee ni Jesús dakaku ñaʼa.
Ña n‑tundaʼa Ianyuux ɨnka Ia dakaku ñaʼa chi Jesús kuu Ia n‑tundaʼa‑ia xa dakaku ñaʼa‑ia —kuu‑s.
13 N‑ka xini‑s xa ña n‑ka yuʼu Spedru xiʼin Sua xa jaʼan koio‑s.
Dɨuni n‑ka xini‑s xa ñatu kuia n‑ka xeʼen‑s xcuela xiʼin xa ñatu ka kuu‑s se ndandɨʼɨ.
Nu n‑ka xini‑s xijan,
n‑ka yuʼu anu‑s.
Ijan dada n‑ka tuu ini‑s xa Jesús n‑dakuaʼa ñaʼa.
14 Daa xa n‑ka xini‑s xa nujuiin yatni se n‑xika jan,
xijan kuu xa ña n‑ka jaʼan ka‑s xa ñatu io vaʼa xa n‑ka kida‑s.
15 Ijan dada ka xiaʼan se ka taxnuni nuu ñayiu Israel jan nuu‑s xa na kee koio‑s ijan.
Te n‑ka ndatnuʼu se ka taxnuni jan.
16 Ka xiaʼan tnaʼa‑s:
—¿Nax kada koio‑ro se yaʼa?,
chi ntdaa ñayiu Jerusalén n‑ka xini xa n‑ka kida‑s milagru ya.
Ma kuu xa dandaʼu‑ro‑i.
17 Xa maxku kakuneʼe ka‑s xa n‑dakuaʼa ñaʼa Jesús nuu ñayiu na dayuʼu‑ro‑s na kuaʼa maxku juña tnuʼu ka‑s‑yɨ.
18 Ijan dada n‑ka nakana ntuku‑s Spedru xiʼin Sua xa ndɨu‑s vetniu te n‑ka xiaʼan‑s xa maxku kakuneʼe ka‑s Jesús,
ni maxku dakuaʼa ka‑s ñayiu ná n‑jaʼan Jesús xa kada‑s.
19 Ijan dada xiaʼan Spedru xiʼin Sua nuu‑s ntdaa‑s:
—¿Nax ka kachi‑n?
¿Io vaʼa xa jandixa ñaʼa‑da ndixi ɨɨn ɨɨn‑n a xa jandixa koio‑da Ianyuux a?
20 Ma kuu xa nujani koio‑da xa jaʼan‑da xa n‑ka xini‑da xiʼin xa n‑ka teku‑da —kuu Spedru xiʼin Sua,
xiaʼan‑s.
21 N‑ka jaʼan‑s xa kada uʼu ñaʼa‑s xa n‑ka dayuʼu ñaʼa‑s,
te n‑ka dayaa ñaʼa‑s.
N‑ka dayaa ñaʼa‑s chi ña n‑kuu xa kada uʼu ñaʼa koio‑s xaxeʼe xa n‑ka najuen tnuʼu ñayiu n‑ka teku xa n‑ka kida‑s Ianyuux.
22 Viʼi ka uu diko kuia io se n‑xika xa n‑ka kida Spedru xiʼin Sua milagru.
N‑ka xijan taʼu ñayiu ka kukanu ini Jesucristu
23 Nu n‑ka yaa Spedru xiʼin Sua,
ka nuʼu‑s nuu xyuku ñayiu xndeka tnaʼa xiʼin‑s te n‑ka najani‑s ntdaa xa n‑ka jaʼan dutu ka taxnuni xiʼin sexaʼnu ka taxnuni nuu ñayiu Israel.
24 Nu n‑yaʼa xa n‑ka xo nini‑i ntdaa xa n‑jaʼan Spedru xiʼin Sua,
ɨɨn ni tnuʼu n‑ka jaʼan‑i xiʼin‑s xa n‑ka xijan taʼu‑i nuu Ianyuux.
Xee n‑ka jaʼan‑i xiʼin‑s.
Duʼa n‑ka xijan taʼu koio‑i xiʼin‑s:
—Taa‑ro Ianyuux,
ndixi taxnuni nuu ntdantuʼu xa io.
Ndixi,
n‑kidavaʼa andɨu,
ñuñayiu,
mar xiʼin ntdaa xa io nuu ndruni xaʼa.
25 N‑jaʼan‑n nuu Espíritu‑n nax chidotnuni xixitna‑da David,
se n‑xinokuechi nuu‑n,
te n‑chidotnuni‑s:
¿Nakuenda ka kiti ini ñayiu ñatu ka kuu yatnuʼu Israel xndaxio ɨnka ɨnka nación nuu‑n?
¿Nakuenda xñu ini‑i xa kada‑i ɨɨn xa ña xiniñuʼu?
26 Se ka taxnuni xiʼin se ka kunxaʼnu ka kida ɨnuu‑s xa ndandita‑s nuu‑n xa kuu‑n Xtoʼo‑da.
Nani ndandita‑s nuu‑n,
dani ndandita‑s nuu Cristu,
Ia n‑tundaʼa‑n.
27 ʼN‑ka nataka Herodes xiʼin Poncio Pilato,
ñayiu ñatu kuu yatnuʼu Israel,
ñayiu Israel du ñuu yaʼa xa n‑ka ndandita‑s nuu Jesús,
Ia ii,
Ia xinokuechi nuu‑n,
Ia n‑kaxí‑n xa nkonetniu‑ia.
28 N‑ka kida‑s ntdaa xa n‑ñu ini mee‑n xa kada‑s.
N‑yaʼa xa n‑ñu ini‑n xa yaʼa.
29 Taa‑ro Ianyuux,
kunaʼa‑n xa n‑ka dayuʼu ñaʼa‑s daña,
ñayiu ka xinokuechi nuu‑n.
Kada‑n xa ma yuʼu‑da xa jaʼan koio‑da tnuʼu‑n nuu ñayiu.
30 Kada‑n xa na kada Jesús,
Ia ii,
Ia xinokuechi nuu‑n xa na ndadavaʼa koio‑da ñayiu te na kada koio ka‑da milagru.
31 Nu n‑xinokava xa n‑ka xijan taʼu ñayiu xyuku ijan nuu Ianyuux te n‑tnaa nuu xtuu‑i.
Ijan dada n‑keé ñaʼa Espíritu Ianyuux te ñayo‑i n‑yuʼu xa jaʼan‑i tnuʼu Ianyuux nuu ñayiu.
Ni ɨɨn ñayiu ka kukanu ini Jesucristu ñatu n‑jaʼan xa xaxii mee ni‑i kuu xa n‑ka xo nevaʼa‑i
32 Ɨnuu n‑ka xo xani ini ntdaa ñayiu ka kukanu ini Jesucristu.
Ni ɨɨn‑i ñatu n‑jaʼan xa xaxii mee ni‑i kuu xa n‑ka xo nevaʼa‑i,
chi xaxii ntdaa‑i n‑kuu.
33 N‑kida Jesús,
Ia kuu Xtoʼo‑ro,
xa n‑kunuu tnuʼu n‑ka jaʼan se n‑tundaʼa‑ia xaxeʼe xa n‑ka kakuneʼe‑s xa n‑nandoto‑ia.
Yo n‑xo chindee ñaʼa Ianyuux xa daa n‑ka xo jaʼan‑s.
34 Ni ɨɨn ñayiu n‑ka xo kandeka tnaʼa xiʼin‑s,
ñatu n‑ka kundaʼu‑i chi ñayiu io veʼe a ñuʼu,
n‑ka xo diko‑i te tvini n‑ka xo niʼi‑i
35 n‑ka xo xiaʼan‑i se n‑tundaʼa ñaʼa Jesús te n‑ka xo dakexio‑s tvini jan según janda ka ndoñuʼu‑i ɨɨn ɨɨn‑i.