N‑ka jaʼan vete Ananías xiʼin ñadɨʼɨ‑s Safira
5
Dɨuni tnaʼa ɨɨn se nani Ananías xiʼin ñadɨʼɨ‑s Safira nuu ñayiu ijan.
N‑ka diko‑s ñuʼu‑s,
2 te n‑kida ɨnuu‑s xiʼin ñadɨʼɨ‑s xa n‑ka ndoo‑s xiʼin dava tvini n‑ka niʼi‑s.
Ijan dada neʼe‑s dava tvini jan n‑xee nuu se n‑tundaʼa ñaʼa Jesús te n‑xiaʼan‑s.
3 Te xiaʼan Spedru nuu‑s:
—Vete‑n,
Ananías chi Satanás n‑keé anu‑n xa jaʼan vete‑n nuu Espíritu Ianyuux.
¿Nakuenda n‑ka ndoo‑n xiʼin dava tvini n‑ka niʼi‑n xa n‑diko‑n ñuʼu‑n?
4 ¿Ñadu ñuʼu mee‑n n‑kuu ñuʼu jan u?
Nuu n‑ka xani ini‑n xa ndoo‑n nduu‑n xiʼin tvini n‑ka niʼi‑n xa n‑ka diko‑n ñuʼu‑n,
ndoo‑n xiʼin tvini ijan n‑kuu chi tvini mee‑n n‑kuu,
te nuu n‑ka xani ini‑n xa taxi‑n ntdaa,
ntdaa taxi‑n n‑kuu.
¿Nakuenda duʼa n‑ka xani ini‑n xa kada koio‑n?
Ña n‑jaʼan vete‑n nuu ñayiu,
chi n‑jaʼan vete‑n nuu Ianyuux.
5 Nu n‑teku Ananías tnuʼu yaʼa,
n‑ndua‑s te n‑xiʼí‑s.
Yo n‑ka yuʼu ntdaa ñayiu n‑ka teku xijan.
6 N‑ka xetuʼa uu solteru n‑ka xo nukoo yatni nuu n‑katuu yɨkɨ kuñu‑s,
te n‑ka chiduku‑s yɨkɨ kuñu‑s,
te ndido ñaʼa‑s juaʼan xa kuxi ñaʼa koio‑s.
7 Naxa uni hora n‑kuu.
Ijan dada n‑kɨu ñadɨʼɨ Ananías nuu tuu Spedru.
Ña n‑xini‑ña xa n‑yaʼa.
8 Te n‑xijan tnuʼu ñaʼa Spedru:
—¿Yaʼu ka jaʼan‑n n‑ka diko‑n ñuʼu a?
Te xiaʼan‑ña:
—Joon,
daa juaʼan.
9 Xiaʼan Spedru nuu‑ña:
—¿Nakuenda xa nduu‑n xiʼin yɨɨ‑n n‑kida ɨnuu xa kototnuni‑n Espíritu Ianyuux?
Na se n‑ka xe kuxi yɨɨ‑n xá n‑ka nxee,
jiin.
Na‑s xniñi yeʼe de.
Dɨuni kandido ñaʼa‑s ndoʼo jɨʼɨn vitna —kuu Spedru,
xiaʼan‑s.
10 Hora ijan n‑ndua Safira xeʼe Spedru te n‑xiʼí‑ña.
N‑ka naxee ndɨu solteru jan te n‑ka xini‑s xa n‑xiʼí‑ña,
te xndido‑s‑ña juaʼan xa nkuxi‑s‑ña nuu n‑xe konduxi yɨɨ‑ña.
11 N‑yuʼu ntdaa ñayiu ka kukanu ini Jesucristu xiʼin dava ka ñayiu n‑ka teku xaʼa.
N‑ka ndadavaʼa se n‑tundaʼa Jesús kueʼe ñayiu
12 Kueʼe milagru n‑ka xo kida se n‑tundaʼa ñaʼa Jesús xa chindee‑s ñayiu te n‑ka xo nataka‑s xiʼin ñayiu kukanu ini Jesucristu yeʼe nani Portal Salomón.
Ɨnuu n‑ka xo xani ini‑i.
13 Dava ñayiu ña ka kukanu ini Jesucristu,
n‑ka najuen tnuʼu ñaʼa‑i,
ko ña n‑ka kuyɨɨ‑i xa kɨu tnaʼa‑i nuu‑i.
14 N‑kukueʼe ka ñayiu ka kukanu ini Jesús,
Ia kuu Xtoʼo‑ro;
nani n‑ka kɨu tnaʼa seyɨɨ,
dani n‑ka kɨu tnaʼa ñadɨʼɨ.
15 N‑ka xo kandeka ñayiu ñayiu ka kuʼu n‑ka xo xeʼen ichi kaʼnu xa hora na yaʼa Spedru juini nga juendaʼu‑s na kajuʼun dava ñayiu ka kuʼu jan.
Camilla xiʼin xito n‑ka xo ñuʼu‑i.
16 Dɨuni n‑ka xee ñayiu ñuu xndatuu nadukunduu Jerusalén nuu‑s.
N‑ka xo kandeka‑i ñayiu ka kuʼu xiʼin ñayiu kida uʼu ñaʼa xaloko n‑ka xo xee,
te n‑ka xo ndvaʼa‑i ntdaa‑i.
N‑ka nduku se ka taxnuni nuu ñayiu Israel Sua xiʼin Spedru xa kada uʼu ñaʼa koio‑s
17 N‑kukuedi ini dutu taxnunika xiʼin se ka kuu saduceu ndeka tnaʼa xiʼin‑s xaxeʼe xaʼa,
18 te n‑ka tnɨɨ‑s Spedru xiʼin Sua,
te n‑ka chindiʼu ñaʼa‑s vekaa.
19 Ɨɨn ángel,
ia xinokuechi nuu Ianyuux,
n‑kaan yekaa xakuaa ijan,
te n‑kineʼe‑ia‑s.
Xiaʼan‑ia nuu‑s:
20 —Juaʼan koio veñuʼu te juña tnuʼu‑n ñayiu nax kada‑i xa kutuu‑i xiʼin Ianyuux nɨkava nɨkuita.
21 Nu n‑tuu,
n‑ka kɨu‑s nduu‑s veñuʼu,
te n‑ka ndixeʼe‑s dakuaʼa‑s ñayiu chi n‑ka jandixa‑s xa n‑jaʼan‑ia.
N‑naxee dutu taxnuni ka xiʼin se xnetniu xiʼin‑s vetniu.
Te n‑ka nadataka‑s ntdaa juxtixia ka taxnuni nuu ñayiu Israel,
te n‑ka taʼu tniu‑s nuu se ka xinokuechi nuu‑s xa na jɨn nukueka koio‑s se n‑tundaʼa ñaʼa Jesús.
22 Nu n‑ka xee se ijan vekaa jan,
ñayo se n‑tundaʼa ñaʼa Jesús n‑ka naniʼi‑s.
N‑ka nangondita‑s,
te n‑ka xian tnuʼu‑s se n‑ka tundaʼa ñaʼa xa duʼa n‑kuu.
23 Ka xiaʼan‑s:
—Ndiʼu vaʼa yekaa.
Ijan xnii ntdaa se xndee vekaa.
N‑ka najaan‑da yekaa jan,
te n‑ka kɨu‑da xiti‑i,
ko ñayo‑s n‑ka naniʼi‑da.
24 Nu n‑ka teku agente taxnuni nuu policía xndee veñuʼu xiʼin dutu ka taxnuni,
te kueʼe xa n‑ka xani ini‑s xa duʼa n‑kuu,
te n‑ka chi ini‑s.
25 Hora ijan n‑xee ɨɨn se xiaʼan:
—Na se n‑ka chindiʼu‑n vekaa ka dakuaʼa ñayiu xiti veñuʼu.
26 N‑ka xe nukueka ñaʼa agente taxnuni xiʼin policía‑s,
ko ña tuu nax n‑ka kida ñaʼa‑s chi n‑ka yuʼu‑s xa janñaʼa ñayiu xyuku ijan yuú.
27 Xndeka ñaʼa‑s n‑naxee nuu xyuku ntdaa se ka kuu juxtixia Israel te xiaʼan dutu taxnuni ka nuu‑s:
28 —Xá n‑ka jaʼan‑r xa maxku dakuaʼa koio ka‑n ñayiu xa n‑dakuaʼa ñaʼa se ijan.
¿Nakuenda xa dani dakuaʼa naʼi‑n ñayiu?,
te nituʼu Jerusalén ka teku ka ñayiu xa ka jaʼan‑n juaʼan,
te ka jaʼan‑n nuu ñayiu xa ruʼu n‑ka xaʼni‑s.
29 Xiaʼan Spedru xiʼin dava ka se n‑tundaʼa ñaʼa Jesús nuu koio‑s:
—Io xa jandixa‑ro xa jaʼan Ianyuux chi ndandɨʼɨ ka‑ia dada se ñuñayiu.
30 Taa‑ro Ianyuux,
Ia kuu Ianyuux xixitna‑ro,
n‑nadandoto Jesús,
Ia n‑ka xatakaa dika‑n nuu curuxi xa n‑ka xaʼni‑n‑ia.
31 N‑xantuu Ianyuux‑ia diñi kuaʼa‑ia andɨu xa najuen tnuʼu ñaʼa‑ia,
te n‑jantuu tniu ñaʼa Ianyuux xa taxnuni‑ia.
Dɨuni n‑kida‑ia xa kuu‑ia Ia dananitaʼu ñaʼa.
Xijan kuu xa na natu ini roo,
ñayiu ka kuu yatnuʼu Israel kuechi n‑ka kida‑ro,
te taxkanu ini ñaʼa‑ia.
32 Testiu ka kuu mee‑da xiʼin Espíritu Ianyuux xa daa io.
N‑kida Ianyuux xa n‑keé ñaʼa Espíritu‑ia ntdaa‑da xiʼin ñayiu ka jandixa‑ia —kuu Spedru xiʼin dava ka se n‑tundaʼa ñaʼa Jesús,
ka xiaʼan‑s.
33 Nu n‑ka teku juxtixia jan xa n‑ka jaʼan se n‑tundaʼa ñaʼa Jesús xaʼa,
yo ndeʼe n‑ka kiti ini‑s.
N‑ka juini‑s xa kaʼni ñaʼa koio‑s,
34 ko ña n‑kuu xaxeʼe tnuʼu n‑jaʼan ɨɨn se fariseu nani Gamaliel nuu se ka kuu juxtixia jan.
N‑ndojuiin‑s,
te n‑taʼu tniu‑s xa na kineʼe koio‑s se n‑tundaʼa ñaʼa Jesús itaʼu.
Gamaliel jan n‑dakuaʼa ñayiu ley n‑chidotnuni Moisés.
Ntdaa ñayiu io xañuʼu nuu‑s.
35 N‑jaʼan‑s nuu se ka kuu juxtixia xnetniu xiʼin‑s:
—Kani ini vaʼa koio‑n nu vatuka xa kada koio‑n ɨɨn xa kada koio‑n se yaʼa a ñaʼa.
36 Xnaʼa‑n xa n‑kixi Teudas,
te n‑jaʼan‑s xa se ndandɨʼɨ kuu‑s.
N‑ka xe kuitandijun ñaʼa naxa koon cientu ñayiu.
N‑ka xaʼni‑s‑sɨ,
te se n‑ka xe kuitandijun ñaʼa,
duʼa duʼa n‑ka xite niʼno‑s.
Ijan n‑xe ndɨʼɨ ntdaa xa n‑juini se ijan xa kada‑s.
Xa n‑kuu kuia n‑kuu xaʼa.
37 Nu n‑yaʼa xa n‑kixi se ijan,
n‑kixi Judas,
se Galilea.
Tiempu ijan n‑nukodotnuni ñayiu.
N‑ka xe kuitandijun ñaʼa ñayiu,
te n‑dajaʼan‑s‑yɨ xa ndandita‑s xiʼin‑i nuu gobierno.
Dɨuni n‑ka xaʼni‑s se yaʼa,
te duʼa duʼa n‑ka xite niʼno ntdaa ñayiu n‑ka xo kandijun ñaʼa tuku.
38 Xijan kuu xa daa na koo naʼi se yaʼa.
Dayaa koio‑n‑sɨ chi nux xa ka taʼu tniu ñayiu ka kida‑s,
te yachi jɨn ndɨʼɨ tniu‑s,
39 ko nux xa Ianyuux n‑taʼu tniu xa kada‑s xa ka kida‑s mayo‑n ndaku nuu‑s.
Xa maxku ndandita koio‑n nuu Ianyuux maxku jantnaʼa tnuʼu‑n xiʼin‑s —kuu Gamaliel,
xiaʼan‑s.
Ñatu n‑ka chindiʼu ñaʼa ka juxtixia jan xaxeʼe xa daa n‑jaʼan Gamaliel.
40 Ijan dada n‑ka nakana ntuku‑s se n‑tundaʼa ñaʼa Jesús te n‑ka janñaʼa‑s chirrión.
N‑ka xiaʼan‑s nuu‑s xa maxku kakuneʼe koio ka‑s Jesús te n‑ka dayaa ñaʼa‑s.
41 Ijan dada n‑ka ndee‑s vetniu.
N‑ka kudɨ ini‑s chi n‑kaxí ñaʼa Ianyuux xa kueʼe xa januu yaʼa‑s xaxeʼe Jesús.
Dɨuni ndaʼu yaʼa‑s.
42 Ñatu n‑ka nujani‑s xa n‑xo dakuaʼa‑s ñayiu,
te n‑ka xo kakuneʼe‑s xa Jesús kuu Cristu,
Ia n‑tundaʼa Ianyuux.
Kɨu xiʼin kɨu n‑ka xo dakuaʼa‑s ñayiu veñuʼu xiʼin ntaka veʼe.