N‑ka kaxí ñayiu ka kukanu ini Jesucristu uxa se nkonetniu xa junukuechi‑s nuu‑i
6
Kukueʼe ka ñayiu ka kukanu ini Jesucristu juaʼan tiempo ijan.
N‑ka jan kuechi ñayiu ka kuu yatnuʼu Israel ka jaʼan griegu xa ña xee xa niʼi ñadɨʼɨ n‑ka xiʼí yɨɨ xyɨtnaʼa nuu‑i xa kexio kɨu xiʼin kɨu ná ka niʼi ñadɨʼɨ n‑xiʼí yɨɨ ka jaʼan hebreu.
2 N‑ka nadataka uxi uu se n‑tundaʼa ñaʼa Jesús ntdaa ñayiu ka kukanu ini‑ia,
te n‑ka jaʼan‑s nuu‑i:
—Kunini koio‑n xa na jaʼan‑da.
Ñatu io vaʼa nux dandoo koio‑da xa dakuaʼa‑da ñayiu xa n‑jaʼan Ianyuux,
te dakexio koio‑da xa ka ndoñuʼu‑n.
3 Vaʼa ka nuu na nduku koio‑n uxa tnaʼa mee‑n.
Nduku koio‑n se ka xini‑n xa ɨnuu kaxi ini‑s,
te ñuʼu ñaʼa Espíritu Ianyuux.
Te jantuu tniu‑ro‑s xa kada‑s tniu yaʼa.
4 Jaʼan naʼi koio daña tnuʼu Ianyuux nuu ñayiu,
te kajan taʼu naʼi koio‑da nuu‑ia —kuu uxi uu se n‑tundaʼa ñaʼa Jesús,
n‑ka xiaʼan‑s.
5 Ntdaa‑i n‑ka kida ɨnuu te n‑ka kendoo‑i xa daa koo.
Te n‑ka kaxí‑i Steba.
Idii ni vuelta n‑xajan se yaʼa anu‑s xa n‑kukanu ini‑s Jesucristu.
Ñuʼu ñaʼa Espíritu Ianyuux.
Dɨuni n‑ka kaxí niʼno‑i Slipe.
N‑ka kaxí niʼno‑i Prócoro,
Nicanor,
Timón,
Parmenas,
Nicolás du.
Se Antioquía kuu Nicolás,
ko n‑xo neʼe tnɨɨ‑s mudu ñayiu Israel.
6 Xndeka‑i‑sɨ ntdaa‑s juaʼan nuu se n‑tundaʼa ñaʼa Jesús te n‑ka xijan taʼu se n‑tundaʼa ñaʼa Jesús nuu Ianyuux.
N‑ka xajan ndodo‑s ndaʼa‑s dɨkɨ‑s te n‑ka xe konetniu‑s.
7 Kɨu xiʼin kɨu ka teku ka ñayiu tnuʼu Ianyuux juaʼan,
te kueʼe ka ñayiu Jerusalén n‑kixeʼe xa kukanu ini‑i Jesucristu.
Dɨuni kueʼe dutu n‑ka kukanu ini‑ia tuku.
N‑ka tnɨɨ presu‑s Steba
8 Yo n‑kidatniu Ianyuux anu Steba.
N‑kida‑ia xa kada‑s milagru xa chindee‑s ñayiu.
9 Kueʼe se tɨtnɨ ñuu n‑ka taka nuu tuu Steba.
N‑ka taka se ñuu Cirene,
se ñuu Alejandría,
se distrito Cilicia,
se distrito Asia xiʼin se ka xeʼen veñuʼu ñayiu n‑ka yaa xa n‑ka kidatniu duʼa‑i nuu xtoʼo‑i.
N‑ka jantnaʼa tnuʼu se ijan xiʼin Steba.
10 N‑xaʼnu Steba jan tnuʼu se ijan xaxeʼe xa ñuʼu ñaʼa Espíritu Ianyuux.
11 Naʼi n‑ka jaʼan‑s nuu tɨtnɨ se jaʼan koio nuu juxtixia xa na jaʼan koio‑s xa n‑ka teku‑s xa n‑jan kuiʼa Steba Moisés xiʼin Ianyuux,
te n‑ka chiyaʼu ñaʼa‑s xa na jaʼan‑s.
12 Mudu yaʼa n‑ka kida‑s xa n‑ka kiti ini ñayiu Jerusalén xiʼin sexaʼnu ka taxnuni nuu ñayiu Israel xiʼin se ka tuʼa vaʼa tnuʼu n‑chidotnuni Moisés nuu Steba te n‑ka tnɨɨ‑s‑sɨ.
Xndeka ñaʼa‑s juaʼan koio nuu xyuku juxtixia.
13 Te n‑ka jaʼan‑s nuu juxtixia jan xa xndeka‑s se ka kuu testiu n‑ka teku xa n‑jaʼan Steba.
Ka xiaʼan testiu jan nuu juxtixia:
—Ña nujani Steba xa jan kuiʼa‑s veñuʼu ii‑ro.
Jaʼan‑s xa ñatu xiniñuʼu ley n‑chidotnuni Moisés.
14 N‑ka teku‑da xa n‑jaʼan‑s xa Jesús,
se Nazaret kanu veñuʼu‑ro,
te kada‑s xa dandoo‑ro xa n‑dakuaʼa ñaʼa Moisés.
Jaʼan‑s xa tuku na jandixa‑ro.
Tnuʼu yaʼa n‑ka kidavaʼa vete‑s xa n‑ka tekuechi neñu‑s Steba.
15 N‑ka ndakoto ndee se ka taxnuni xyuku vetniu Israel nuu Steba,
te n‑ka xini‑s xa kaa nuu‑s na kaa nuu ángel,
ia xinokuechi nuu Ianyuux.