Carta n‑tundaʼa Spalu nuu ñayiu Roma
N‑ndajan tnuʼu Spalu ñayiu ka kukanu ini Jesucristu xndaxio Roma
1
Daña Spalu,
se xinokuechi nuu Cristu Jesús,
n‑kaxi ñaʼa Taa‑ro Ianyuux xa dakuaʼa‑da ñayiu,
te n‑tundaʼa ñaʼa‑ia xa kada‑da xijan.
N‑kaxí ñaʼa‑ia xa jaʼan‑da nuu ñayiu nax io xa kada‑i xa nanitaʼu‑i.
Tnuʼu vaʼa kuu.
2 Xa daa nga n‑jaʼan Ianyuux nuu se n‑ka xo jaʼan tnuʼu‑ia nuu ñayiu xaʼa.
Xa daa nga n‑xiaʼan‑ia tnuʼu‑ia‑s xa kada‑ia ɨɨn xa kada‑ia xa na kuaʼa nanitaʼu ñayiu.
N‑ka chidotnuni‑s xijan.
Ii tutu xyodotnuni xa n‑jaʼan‑ia.
3 N‑kakuneʼe‑ia nax kada Daʼya Yɨɨ‑ia.
Ñayiu n‑kuu Daʼya Yɨɨ‑ia,
te kuu‑ia daʼya dana David.
4 N‑nadandoto Espíritu Ianyuux‑ia na n‑xiʼí‑ia.
Ii Espíritu Ianyuux.
N‑nandoto Jesucristu,
te n‑ka xini ñaʼa ñayiu,
te dɨuni n‑ka xini‑i xa kuu‑ia Daʼya Yɨɨ Ianyuux.
Xtoʼo‑ro kuu Jesucristu,
te taxnuni‑ia.
5 N‑kaxi ñaʼa Jesucristu xa kada‑da tniu‑ia.
Mee‑ia n‑tundaʼa ñaʼa ntdaa‑da xa dakuaʼa koio‑da ñayiu ntdaa nación io ñuñayiu xa na kuaʼa na kukanu ini koio‑i‑ia,
te jandixa‑i‑ia.
6 Tnaʼa ñayiu n‑kida Ianyuux xa teku‑i tnuʼu‑ia xa na kuaʼa nanitaʼu‑i ka kuu‑n.
7 Tundaʼa‑da carta yaʼa juan xee nuu ntdaa ndixi xa ka kuu‑n ñayiu xemani ñaʼa Ianyuux xndaxio Roma.
N‑jaʼan‑ia xa nduu koio‑n ñayiu ii,
te daa n‑kida‑ia.
Xijan taʼu‑da nuu Ianyuux xiʼin nuu Cristu Jesús,
Ia kuu Xtoʼo‑ro,
xa na chindee chituu ñaʼa‑ia.
Dɨuni xijan taʼu‑da nuu‑ia xa na ku kundaa ku kuvatu anu koio‑n chi n‑ka natu ini‑n xa n‑ka kida‑n kuechi.
Kuu anu Spalu xa nkotoniʼni‑s ñayiu ka kukanu ini Jesucristu xndaxio Roma
8 Kiʼna ka na jaʼan‑da nuu‑n xa xko xiaʼan‑da nuu Taa‑ro Ianyuux xa n‑kutaʼu‑da chi n‑kida‑ia xa ka kukanu ini‑n Jesucristu.
Dɨuni xko xiaʼan‑da nuu‑ia xa kuvete‑da xa ka teku ñayiu ntdaa ñuu io ñuñayiu vaxi xa ka kukanu ini‑n Jesucristu.
Xaxeʼe xa n‑xiʼí Jesucristu,
chinuu Ianyuux xa xijan taʼu‑da.
9 Naʼa Ianyuux xa xko kakuneʼe ñaʼa‑da hora xko xijan taʼu‑da nuu‑ia ndɨkɨu ndɨñuu.
Tniu‑da kuu xa dakuaʼa‑da ñayiu.
Duʼa xinokuechi‑da nuu‑ia.
Xko jaʼan‑da nuu‑i xa io xa kukanu ini‑i Daʼya Yɨɨ‑ia.
Vichi ndeʼe xinokuechi‑da nuu‑ia.
10 Ndɨkɨu ndɨñuu xijan taʼu‑da nuu‑ia te xijan tnuʼu‑da‑ia nu ma kachi‑ia xa xee‑da dian.
11 Yo kuu anu‑da xa xe kotoniʼni ñaʼa‑da na kuaʼa na kachitnuʼu ñaʼa vaʼa‑da nax kuu xa n‑jaʼan Ianyuux xiʼin Jesucristu na kuaʼa vaʼa ka na kutnuni ini koio‑n xa n‑ka jaʼan‑ia,
te vaʼa ka kukanu ini koio‑n Jesucristu.
12 Na teku‑n xa vaʼa ka kukanu ini‑da‑ia,
dani ndixi vaʼa ka kukanu ini koio‑n‑ia.
Dɨuni vaʼa ka kukanu ini‑da‑ia hora na teku‑da xa ka kukanu ini ka‑n‑ia tuku.
13 Kachitnuʼu ñaʼa‑da ndixi xa kuu‑n ñayiu ka kukanu ini Jesucristu xa kueʼe vuelta n‑xantuu‑da kɨu xa xee‑da dian,
ko daa nga ñatu n‑kuu xa xee‑da.
Xa dakuaʼa ñaʼa‑da kuu‑da xa xee‑da xa na kuaʼa na jandixa koio‑n Jesucristu.
Dava ñayiu ñatu ka kuu daʼya dana Israel xndaxio dava ka ñuu ka jandixa Ianyuux xaxeʼe xa n‑dakuaʼa‑da‑i.
Ná ka jandixa ñayiu ijan Ianyuux,
io xa jandixa koio‑n‑ia.
14-15 Kidayɨka‑i xa juña tnuʼu ka‑da dava ka ñayiu Grecia xiʼin dava ka ñayiu ka kuu yatnuʼu ñayiu Grecia xiʼin ñayiu ñatu ka kuu yatnuʼu‑i nax io xa kada‑i xa nanitaʼu‑i.
Kidayɨka‑i xa kachitnuʼu ñaʼa‑da ndixi nax io xa kada‑n xa nanitaʼu‑n tuku.
Nani xian tnuʼu‑da ñayiu kaxi ini,
dani xian tnuʼu‑da ñayiu ka kukuee xiʼin xaxtnuni‑i.
16 Ñatu kujanuu‑da xa xian tnuʼu‑da ñayiu nax io xa kada‑i xa nanitaʼu‑i.
Hora ka teku‑i xijan,
ka kukanu ini‑i Jesucristu te ka nanitaʼu‑i.
Davaʼa nga ñayiu kukanu ini‑ia nanitaʼu.
Kiʼna nuu ñayiu Israel n‑ka kukanu ini‑ia.
Ijan dada ndijun nga n‑ka kukanu ini ñaʼa ñayiu ñatu ka kuu ñayiu Israel.
17 Xiaʼan‑da nuu ñayiu xa na kukanu ini koio‑i Jesucristu na kuaʼa maxku kundido kutau ka‑i kuechi n‑ka kida‑i.
Ñayiu n‑ka kixeʼe xa kukanu ini‑i‑ia,
kukanu ini ka‑i‑ia juaʼan.
Ná jaʼan‑da ya n‑jaʼan Ianyuux,
te yodotnuni.
Duʼa yodotnuni:
“Ña tuu ka na kuechi xndido xtau ñayiu n‑ka kukanu ini‑ia,
te xaxeʼe xijan kutuu koio‑i andɨu nɨkava nɨkuita.”
Yo kiti ini Ianyuux nuu ñayiu ka kida kuechi
18 Kueʼe xa kida Ianyuux xa na kutnuni ini ñayiu xa kiti ini‑ia nuu ntakaa ñayiu ña ka chinuu‑ia te ka kida‑i xaloko xaduʼa.
Xaloko ka kida‑i jan kida xa ñatuka xini dava ka ñayiu ndeda xa kuu xandaa,
te ni mee‑i ñatuka xini ndeda kuu xandaa tuku.
19 Ntdaa ñayiu ñuñayiu xnaʼa xa io Ianyuux chi xndeʼa‑i xa n‑kidavaʼa‑ia,
te ka tutnuni ini‑i janda kuu‑ia.
20 Ka tutnuni ini‑i janda kuu Ianyuux juini ña xini‑i janda kaa‑ia xaxeʼe xa ñatu kanda ndeʼa‑i‑ia.
Ka kutnuni ini‑i janda kuu‑ia chi nde na n‑xe kavatuu ñuñayiu xiʼin nde vitna io xa n‑kidavaʼa‑ia,
te xndeʼa‑i.
Xnaʼa‑i xa mee‑ia n‑kidavaʼa ntdantuʼu xa io.
Xa daa nga kuaʼa‑ia kadavaʼa‑ia xa n‑kidavaʼa‑ia,
te dani kuaʼa‑ia xa kani ini‑ia ɨɨn xa juini‑ia xa koo.
Dɨuni ka xini‑i xa nɨkava nɨkuita kutuu‑ia.
Xijan kuu xa maxku yoo‑i ku jaʼan xa ñayo‑i xini janda kuu Ianyuux ndixa.
21 Juini ka xini‑i xa io Ianyuux,
ko ña ka ndadakaʼnu‑i‑ia,
ni ñatu ka jaʼan‑i xa mee‑ia kuu Ianyuux ndixa.
Ni ñayo‑i xiaʼan nuu‑ia:
“Na kutaʼu‑da,
Taa‑ro.”
Ñatu ka chinuu‑i xa io‑ia,
ni ñatu ka juini‑i kada‑i xa juini‑ia xa kada koio‑i.
Mee ni xaloko xaduʼa xñuʼu anu‑i.
Ka kuu‑i ná ka kuu ñayiu xtuu nee xtuu duʼa.
Kuenda kɨu nuu nee xtuu‑i xa ñatu ka kida‑i xavaʼa.
22 Ka jaʼan‑i xa ka tuʼa vaʼa‑i,
ko unu lilu‑i.
23 Ñatu ka ndadakaʼnu‑i Ianyuux ndixa,
chi daa xa n‑ka kidavaʼa mee‑i ka ndadakaʼnu‑i.
Ka ndadakaʼnu‑i xa xndaa ná xndaa ñayiu,
xa xndaa ná xndaa kɨtɨ ka ndava xiʼin xa xndaa ná xndaa kɨtɨ koon ndaʼa xiʼin xa xndaa ná xndaa koo.
Ntdaa xaʼa ka naa,
ko Ianyuux makɨu mañuu naa‑ia.
24 Xaxeʼe xijan n‑dandoo ñaʼa Ianyuux,
te xejoon‑ia xa kada‑i xaloko xaduʼa ka kuu ini mee‑i.
Kuiʼa kaa xa ka kida‑i chi dava se ka kuu seyɨɨ daa ntnaʼa mee ka‑s xndaa.
Dani ka kida dava ñadɨʼɨ tuku.
Kueʼe xa januu kuu.
25 Naa xa jandixa koio‑i xa ɨɨn xandaa kuu xa n‑jaʼan Ianyuux,
daa xa ka jaʼan ñayiu vete ka jandixa‑i.
Ña xndaxio‑i xañuʼu nuu‑ia,
ni ña ka ndadakaʼnu‑i‑ia.
Daa nuu xa n‑kidavaʼa‑ia xndaxio‑i xañuʼu te ka ndadakaʼnu‑i.
Mee‑ia io xa ndukaʼnu.
Nɨkava nɨkuita,
na ku ndukaʼnu‑ia.
26 Xaxeʼe xijan n‑dandoo ñaʼa Ianyuux,
te xejoon‑ia xa kada‑i xaloko xaduʼa kuu anu‑i xa kada‑i.
Ñatuka ka tna ini dava ñadɨʼɨ xa kava‑ña xiʼin seyɨɨ chi daa ntnaʼa mee ka‑ña xndaa,
te ñadu daa vaxi‑ña.
Ɨɨn xa januu kuu xa ka kida‑i.
27 Dani ka kida dava seyɨɨ.
Ñatuka ka tna ini‑s xa kava‑s xiʼin ñadɨʼɨ chi daa ntnaʼa seyɨɨ ka‑s xndaa.
Yo vichi ka tna ini‑s xa daa kada‑s.
Xa januu kuu,
te ndeʼe ndaʼu ka yaʼa‑s xaxeʼe xijan.
Xijan kuu taʼu‑s.
28 Ña tuu nax viʼi ñayiu yaʼa xa io Ianyuux.
Ka xani ini‑i xa ñatu ka ndoñuʼu‑i‑ia.
Xijan kuu xa n‑dandoo ñaʼa‑ia,
te ñatu xejoon‑ia xa kani ini koio‑i xavaʼa.
Mee ni xaloko xaduʼa ka xani ini‑i.
29 Mee ni xaloko ñuʼu anu‑i.
Ña tuu nax kuu anu‑i xa ka kida‑i xaloko xaduʼa.
Yo unu kajan ini‑i tvini.
Yo ka kida‑i kuechi.
Yo ka tna ini‑i xa daa kada‑i.
Yo unu kuedi ini‑i.
Yo ka xaʼni‑i ndɨyɨ.
Yo ka tna ini‑i xa jantnaʼa koio‑i.
Ka dandaʼu tnaʼa‑i.
Yo ka kineʼe tnuʼu tnaʼa‑i.
30 Ka jan tnuʼu tnaʼa‑i.
Ka xini uʼu‑i Ianyuux.
Ñatu xndaxio‑i xañuʼu nuu ɨnka ñayiu chi ka ndandita‑i.
Unu xe ini‑i.
Unu iʼni‑i.
Ka xani ini‑i xa kada‑i ɨɨn xaloko ta yoo ka kada.
Ka ndandita‑i nuu taa nuu dɨʼɨ‑i.
31 Ñatuka kuu anu‑i xa kada‑i xavaʼa.
Ka jaʼan‑i xa kada‑i ɨɨn xa kada‑i a juñaʼa‑i ɨɨn xa juñaʼa‑i ñayiu,
te ñatu xetnaʼa tnuʼu‑i.
Ñatu xemani tnaʼa‑i,
ni ñatuka kundaʼu ini tnaʼa‑i.
32 Juini xnaʼa‑i xa n‑jaʼan Ianyuux xa jɨʼɨn koio ñayiu duʼa ka kida andea chi xijan kuu taʼu‑i,
ko ka kida naʼi‑i xaloko xaduʼa yaʼa.
Te ñadu xijan ni ka kida‑i chi dɨuni ka jaʼan‑i xa io vaʼa xa ka kida dava ka ñayiu xaloko xaduʼa.