N‑kixee Spalu isla nani Malta
28
Nu n‑yaʼa n‑ka kaku‑da,
te n‑kachitnuʼu ñaʼa ñayiu io isla ijan xa Malta nani ijan.
2 Vaʼa n‑ka xitondee ñaʼa‑i.
Xaxeʼe xa yo ndita dau xiʼin xa yo vixi,
n‑ka tɨu‑i ñuʼu,
te n‑ka jaʼan‑i xa na jɨn ndeʼe koio‑da xa na ndvidi‑da.
3 N‑dataka Spalu uni koon tutnu kuechi,
te n‑dakeé‑s‑tnu nuu nuʼu jan.
Danaa n‑kee ɨɨn koo yunuʼu jan,
te n‑duku niʼno‑tɨ ndaʼa‑s.
4 Nu n‑ka xini ñayiu xndaxio ijan koo ntakaa ndaʼa‑s,
n‑ka xiaʼan tnaʼa‑i:
—Vaa,
ndɨyɨ n‑xaʼni se yaʼa.
Juini n‑kaku‑s xa kuú‑s nuu mar,
ko ña juini ka ianyuux,
ia ndadandaa kuechi‑ro xa kundito‑s.
5 N‑kɨdɨ Spalu ndaʼa‑s,
te n‑keé koo nuu nuʼu,
te ña tuu nax n‑yaʼa‑s.
6 Ntdaa ñayiu xndaxio ijan n‑ka xani ini xa ndatachi ndaʼa‑s,
te ndua‑s,
te kuú‑s.
Nu naʼa n‑kuu n‑ka xo ndeʼa‑i,
n‑ka xini‑i xa ña tuu nax n‑yaʼa‑s,
te n‑ka yuʼu anu‑i.
Ijan dada ñatuka n‑ka xani ini‑i xa n‑xaʼni Spalu ndɨyɨ,
te n‑ka nukuita‑i ka xiaʼan tnaʼa‑i xa ianyuux kuu‑s.
7 Yatni ijan io ñuʼu se ndandɨʼɨ ka io ñuu ijan.
Spubliu nani‑s.
N‑xeka ñaʼa‑s veʼe‑s te vaʼa n‑xitondee ñaʼa‑s uni kɨu.
8 Kaa taa Spubliu xa tnaʼa‑s kaʼni xiʼin daxi.
N‑kɨu Spalu nuu kaa‑s,
te n‑xijan taʼu‑s nuu Ianyuux xa na ndvaʼa‑s.
Ijan dada n‑xajan ndodo‑s ndaʼa‑s dɨkɨ‑s,
te n‑ndadavaʼa‑s‑sɨ.
9 Xaxeʼe xa duʼa n‑kida Spalu,
kueʼe ñayiu ka kuʼu xndaxio ijan n‑ka xee nuu tuu‑s,
te n‑ndadavaʼa‑s‑yɨ.
10-11 Vaʼa n‑ka xitondee ñaʼa ñayiu ijan.
N‑kixee Spalu Roma
Nu n‑kuu uni yoo xtuu‑da isla jan,
dada n‑ka tnɨɨ‑da ɨɨn barcu n‑xo tuu ijan yoo vixi.
Barcu Alejandría kuu.
Xndenee ianyuux ka kuu cuati nani Cástor xiʼin Pólux.
Nu n‑ka keé‑da barcu jan xa n‑ka nujunu ichi‑da,
n‑ka taxi ñayiu xndaxio ijan xa n‑ka ndoñuʼu‑da ichi vaxi‑da.
12 N‑ka kixee‑da ñuu nani Siracusa.
Ijan n‑ka ndoo‑da uni kɨu.
13 Ijan dada n‑ka nujunu ichi ntuku‑da,
te n‑ka kixee‑da xiʼin barcu jan ñuu nani Regio.
Dani vaxi koio‑da,
te kɨu kuu uu kane tachi xajan‑i do norte.
Kɨu kuu uni n‑ka kixee‑da nuu nani Puteoli.
14 Ijan n‑ka nitnaʼa‑da xiʼin se ka kukanu ini Jesucristu.
N‑ka kana ñaʼa‑s veʼe‑s xa n‑ka xo tuu‑da xiʼin‑s una kɨu.
Ijan dada n‑ka nujunu ichi ntuku‑da xa vaxi koio‑da Roma.
15 Ñayiu ka kukanu ini Jesucristu xndaxio Roma,
xá ama n‑ka teku tnuʼu‑i xa vaxi koio‑da,
te n‑ka xetnaʼa ñaʼa‑i nde ñuu nani Apio xiʼin ñuu nani Uni Taberna.
Nu n‑xini Spalu‑i,
n‑jaʼan‑s xa n‑kutaʼu‑s nuu Ianyuux,
te n‑kukaʼnu anu‑s.
16 Nu n‑ka kixee‑da Roma,
n‑xejoon centurión xa kutuu dɨɨn Spalu ɨɨn veʼe,
te n‑xo ndee ñaʼa ɨɨn soldado xa maxku kee‑s.
N‑dakuaʼa Spalu ñayiu Roma
17 Nu n‑kuu uni kɨu tuu Spalu Roma,
n‑kana‑s se ka kuu yatnuʼu Israel ndandɨʼɨ xndaxio Roma.
Nu n‑ka taka se ijan n‑jaʼan‑s nuu‑s:
—Ñani,
ndixi xa ka kuu‑n ñayiu Israel,
ña tuu nax n‑kida‑da ñayiu ka kuu yatnuʼu‑ro,
ni ñatu n‑dajaʼan‑da‑i xa n‑dandoo‑i mudu xixitna‑ro,
ko n‑ka tnɨɨ ñaʼa se Israel,
te n‑ka kida‑s xa tnɨɨ ñaʼa koio se Roma ka taxnuni Jerusalén.
18 Nu n‑yaʼa xa n‑xijan tnuʼu ñaʼa se romano,
n‑ka juini‑s xa dayaa ñaʼa koio‑s chi n‑kutnuni ini‑s xa ña tuu na kuechi‑da io xa kaʼni ñaʼa koio‑s.
19 N‑ka dadaʼan se Israel xa dayaa ñaʼa se romano;
xijan kuu xa n‑xijan niʼno‑da xa kadandaa emperador kuechi‑da,
ko ñadu kuechi se nación‑ro vax ki kajan‑da chi xa kadandaa emperador kuechi‑da vaxi‑da.
20 Xaxeʼe xa daa ka kida ñaʼa se ka kuu yatnuʼu‑ro n‑kana ñaʼa‑da xa ndatnuʼu‑ro xiʼin xa na jini tnaʼa‑ro.
Xaxeʼe xa kakuneʼe‑da xa nadandoto Ianyuux ndɨyɨ,
xijan kuu xa ndijun‑da cadena yaʼa.
Xijan xñu ini roo xa ka kuu‑ro yatnuʼu Israel xa yaʼa.
21 Ka xiaʼan se ijan nuu Spalu:
—Ñayo se Judea tundaʼa ɨɨn tutu nuu daña ɨɨn ɨɨn‑da xa kakuneʼe ñaʼa‑s ndixi,
ni ñatu n‑ka ki najani‑s xa n‑kida‑n ɨɨn xa n‑kida‑n.
22 Juini‑da xa kachitnuʼu ñaʼa‑n nuu nax jandixa‑n chi ka teku tnuʼu‑da xa ñayiu ndandituʼu ñuu ka jan tnuʼu ñayiu ka jandixa ná jandixa‑n.
23 Te n‑ka xantuu‑s kɨu nataka koio‑s.
Kueʼe ka ñayiu n‑ka taka nuu tuu Spalu kɨu n‑ka xantuu‑s,
te nyakanyaa n‑ka xo yuku‑i ijan.
N‑jaʼan‑s nuu‑i xa taxnuni Ianyuux,
te dɨuni n‑kakuneʼe‑s xa n‑chidotnuni Moisés xiʼin xa n‑ka chidotnuni se n‑ka jaʼan tnuʼu Ianyuux nuu ñayiu xa daxino ini‑s‑yɨ xa na kukanu ini‑i Jesús.
24 N‑ka jandixa dava‑i xa n‑jaʼan‑s,
ko dava‑i ña n‑ka jandixa.
25 Xaxeʼe xa ña n‑ka kuu ɨnuu dava ñayiu jan n‑ka ndee‑i xa nuʼu koio‑i veʼe‑i,
te xiaʼan Spalu nuu‑i:
—Ndaa n‑jaʼan Espíritu Ianyuux nuu Isaías,
se n‑jaʼan tnuʼu Ianyuux nuu ñayiu xa n‑jaʼan‑ia nuu xixitna‑ro:
26 Juaʼan ñuu yaʼa,
te duʼa juñaʼa‑n nuu ñayiu ijan:
Juini dani na kunini koio‑n,
ko mayo‑n kutnuni ini.
Juini dani na kundeʼa koio‑n,
ko mayo‑n jini nax kuu.
27 Ma jandixa ñayiu xa ɨɨn xa ndaa kuu xa teku‑i chi unu xe ini‑i.
Ñatu ke ini‑i,
ni ñatu kutnuni ini‑i.
Kuenda kɨu n‑xadɨ‑i doʼo‑i xa maxku kunini koio‑i.
Kuenda kɨu n‑xadɨ‑i nuu‑i xa maxku kundeʼa‑i.
Duʼa kida‑i chi ñatu juini‑i xa kutnuni ini‑i,
ni ñatu juini‑i xa natu ini‑i xa n‑ka kida‑i kuechi na kuaʼa taxkanu ini‑r‑yɨ te dananitaʼu‑r‑yɨ.
Duʼa n‑chidotnuni‑s.
28-29 ʼKunaʼa koio‑n xa tnuʼu Ianyuux ya xitendodo juaʼan ñuu nuu xndaxio ñayiu ñatu ka kuu yatnuʼu‑ro,
te ñayiu ijan xnini tnuʼu ya,
te ka jandixa‑i xa jaʼan‑ia —kuu Spalu,
n‑xiaʼan‑s nuu ñayiu jan.