2 Diko nga xa kee ɨɨn barcu n‑kee Adramitio xa kixi‑i yuʼu mar Asia.

N‑ka keé‑da barcu jan.

Aristarco nani ɨɨn se tnaʼa nuu se xndeka tnaʼa xiʼin‑da vaxi.

Se distrito Macedonia kuu‑s.

Tesalónica nani ñuu‑s.

3 Kɨu kuu uu n‑ka kixee‑da yuʼu ñuu Sidón.

Vaʼa n‑kida Skuliu chi n‑xejoon‑s xa n‑xitoniʼni Spalu ñayiu xini tnaʼa xiʼin‑s xa n‑ka xiaʼan‑i xa n‑ndoñuʼu‑s.

4 N‑ka ndee‑da Sidón;

vaxi koio‑da xiʼin barcu yatni yuʼu isla Chipre xaxeʼe xa kane tachi do nuu vaxi barcu jan.

5 N‑ka yaʼa ndaa‑da yatni yuʼu mar io yatni Cilicia xiʼin Panfilia,

te n‑ka kixee‑da distrito Licia,

te n‑nujuiin barcu ñuu nani Mira.

N‑ka nane‑da barcu ijan.

6 Mira jan n‑niʼi Skuliu ɨɨn barcu Alejandría vaxi Italia.

N‑jaʼan‑s xa na keé koio‑da barcu ijan,

te n‑ka keé‑da.

7 Jeen kɨu n‑xika barcu jan.

Ñatu n‑kuu xa kaka yachi‑i xaxeʼe xa kane tachi do nuu vaxi‑i.

Kuee xa kuee,

dada n‑ka kixee‑da yatni nuu nani Gnido.

Xaxeʼe xa dani kane tachi do nuu vaxi koio‑da ña n‑kuu ka kixi‑da do nuu n‑xio xa yaʼa‑da,

ko n‑ka kixee‑da isla nani Creta,

te n‑ka xiko nduu‑da país jan xa n‑ka yaʼa‑da Salmón.

8 Ñatu n‑kuu xa dakaka yachi koio‑s barcu xaxeʼe xa dani kane tachi jan.

Nikanduu yuʼu mar Creta jan n‑ka kixi‑da,

te n‑ka kixee‑da ñuu nani Yuʼu Ndute Vaʼa (Buenos Puertos) yatni nuu katuu ñuu nani Lasea.

9 Yo kueʼe tiempo n‑ka dakuita‑da.

Io kuu xa vaxi koio‑da xaxeʼe xa n‑kuyatni yoo vixi,

te n‑yaʼa kɨu ñatu xaxi ñayiu Israel xaxeʼe xa xneʼe ii‑i.

Xaxeʼe xa yo io kuu,

xiaʼan Spalu nuu se ka dakaka barcu jan xiʼin nuu centurión jan:

10 —Dito,

yo io kuu xa vaxi‑ro.

Dakuita‑ro barcu ya xiʼin xa ndido‑i,

te ñadu ni xaʼa kuita chi nde mee‑ro kuú.

11 Juini daa n‑jaʼan Spalu ñatu n‑jandixa ñaʼa centurión jan chi naa xa n‑jandixa‑s xa n‑jaʼan Spalu n‑jandixa‑s xa n‑jaʼan se kuu xtoʼo barcu jan xiʼin se taxnuni nuu se ka dakaka barcu jan.

12 Xaxeʼe xa ñatu io vaʼa yuʼu mar ñuu nani Yuʼu Ndute Vaʼa jan xa kunukoo barcu jan yoo vixi,

xijan kuu xa nadaa nga‑s ndoñuʼu xa ntdaa‑s jaʼan xa vaʼa ka nux na kixi naʼi koio‑da,

te na kadayɨka se ka dakaka barcu jan xa na kixee koio‑da ɨnka ñuu país Creta jan.

N‑ka kendoo‑s xa kunukoo barcu ijan yoo vixi.

Fenice nani ñuu ijan.

Do nuu keé ngandii ndeʼa yuʼu mar ñuu ijan.

13 N‑ka jaʼan‑s xa vatuka kixi naʼi koio‑da chi n‑ka xani ini‑s xa ña tuu nax yaʼa xaxeʼe xa n‑nukuita kane vii tachi xajan‑i do norte.

N‑ka natava‑s ancla xa na nakaka barcu jan,

te vaxi naʼi koio‑da nikanduu yuʼu mar Creta jan.

14 Dijan xaku n‑kuu kane vii tachi xajan‑i do norte,

te n‑kane ndeʼe tachi xajan‑i do suroeste,

te n‑ñuʼu‑i barcu jan.

15 N‑kixeʼe ndeka‑i barcu jan juaʼan.

Xaxeʼe xa ña ndaku xa kixi ka‑i do nuu vaxi‑i,

n‑ka xejoon‑s xa ndeka ñaʼa tachi jan juaʼan do nuu juaʼan‑i.

16 N‑ka yaʼa‑da do sur isla nani Clauda nuu yɨndido.

Xaxeʼe xa dani kane tachi jan,

ndaʼu n‑ka yaʼa‑da xa n‑ka dandaa‑da barcu luchi dakaku ñayiu.

17 Nu n‑yaʼa xa n‑ka dandaa‑da barcu luchi jan,

n‑ka xetniu se ka dakaka barcu yoʼo xa n‑ka duku‑s barcu kaʼnu jan xa maxku ñaʼa tnanu.

Xaxeʼe xa n‑ka yuʼu‑s xa na ñaʼa jɨʼɨn‑i nuu kaa ñuʼu kuchi nuu nani Sirte te nduxi‑i ijan,

xijan kuu xa n‑ka natuniʼno‑s daʼma barcu jan xa maxku kaka niʼi ka‑i.

N‑ka xejoon ntuku‑s xa ndeka ñaʼa tachi jan juaʼan do nuu juaʼan‑i.

18 Kɨu kuu uu ndeʼe ka ntuku kane tachi,

te ndeʼe xendita barcu jan.

Xaxeʼe xa daa ntuku kuu n‑ka kixeʼe‑s xa ka dakeé‑s xa ndido barcu jan nuu mar.

19 Te kɨu kuu uni xiʼin ndaʼa mee‑s n‑ka dakeé‑s ndatniu xetniu barcu hora xika‑i nuu mar xa nduñama ka‑i.

20 Jeen kɨu ña n‑ka xini‑da ngandii ni chudini.

Xaxeʼe xa yo ndeʼe kane tachi te ndeʼe n‑juun dau ñatuka n‑ka ñu ini‑da xa kaku koio‑da.

21 Jeen kɨu n‑kuu ña tuu nax ka xaxi‑da.

Ijan dada n‑ndojuiin Spalu nuu‑da ntdaa‑da,

te n‑jaʼan‑s:

—Nuu n‑ka jandixa‑n xa n‑jaʼan‑da,

ma ndee‑ro Creta n‑kuu,

te ma duʼa yaʼa‑ro,

ni ma tɨu xa ndido barcu ya.

22 Juini daa n‑kuu,

ko maxku yoo‑n chi ini ka,

chi ni ɨɨn‑ro ma kuú.

Diko ni barcu ya kuita.

23 Xini‑da xa duʼa yaʼa chi ingini n‑ki kachitnuʼu ñaʼa ɨɨn ángel,

ia xinokuechi nuu Ianyuux,

Ia ndeka ñaʼa mee‑da,

te xinokuechi‑da nuu‑ia.

24 N‑jaʼan ángel jan nuu‑da:

“Maxku yuʼu‑n,

Palu,

chi io xa jɨʼɨn‑n nuu Emperador.

Xaxeʼe ndoʼo dakaku Ianyuux ntdaa se xñuʼu xiʼin‑n barcu ya”,

kuu‑ia.

25 Xijan kuu xa koo kaʼnu anu koio‑n.

Xaxeʼe xa kukanu ini‑da Ianyuux,

jandixa‑da xa ndaa yaʼa ná n‑jaʼan ángel nuu‑da.

26 Diko ni xa kandeka tachi barcu ya jɨʼɨn ɨɨn isla,

te nduxi‑i ijan —kuu Spalu,

n‑jaʼan‑s.

27 Nu xaʼun kɨu dada n‑ka kixee‑da mar nani Adria.

Nde yaʼa nde ijan ndeka ñaʼa tachi juaʼan.

Naxa niu dava n‑ka tutnuni ini se ka dakaka barcu jan xa vax kuyatni koio‑da yuʼu mar jan.

28 N‑ka dakeé‑s yoʼo nuu ndute xa jini‑s nuu nadaa ndaʼa kunu kaa‑té,

te n‑ka xini‑s xa oko ndaʼa kunu kaa‑té.

N‑xika ka barcu jan itaʼu,

te n‑ka dakeé ntuku‑s yoʼo jan ɨnka vuelta.

N‑ka xendaʼa‑s,

te n‑ka xini‑s xa xaʼun ndaʼa kunu kaa‑té ijan.

29 Xaxeʼe xa n‑ka yuʼu‑s xa na ñaʼa kajuʼun tnaʼa barcu jan xiʼin toto xndaa nuu mar,

xijan kuu xa n‑ka dakeé‑s koon ancla nuu mar do yata barcu jan xa na nujuiin‑i,

te n‑ka xo ndetu‑s xa na tuu chi n‑ka yuʼu‑s na ñaʼa yaʼa koio‑s.

30 Xaxeʼe xa n‑juini se ka dakaka barcu jan xa dakaku‑s mee‑s n‑ka nukuita‑s ka dandeé‑s barcu luchi dakaku ñayiu nuu mar.

N‑ka kida nga‑s xa ancla ka dandeé‑s nuu mar do nuu barcu jan,

ko ña ndaa.

31 Xaxeʼe xa daa ka kida se ijan,

xiaʼan Spalu nuu centurión xiʼin nuu soldado‑s:

—Nuxa ma ndoo koio se yaʼa xiti barcu ya,

mayo ndixi kaku koio.

32 Ijan dada n‑ka xaʼnde soldado jan yoʼo ndijun barcu luchi dakaku ñayiu,

te n‑ka dayaa‑s xa juan keé‑i nuu mar.

33 Ntanene ka n‑jaʼan Spalu xa kaxi koio‑da.

N‑jaʼan‑s nuu‑da ntdaa‑da:

—Xa n‑kuu xaʼun kɨu ñayo‑n ka kidi,

te ña tuu nax ka xaxi‑n.

Diko ni xa jini‑n nuu nax yaʼa‑n xñu ini‑n.

34 Xijan taʼu‑da nuu‑n xa kaxi koio‑n chi ndoñuʼu xa kaxi koio‑n na kuaʼa na kundito‑n,

chi ni ɨɨn‑ro ña tuu nax yaʼa.

35 Nu n‑yaʼa xa n‑jaʼan Spalu tnuʼu yaʼa,

n‑tnɨɨ‑s ɨɨn tila te n‑jaʼan‑s xa n‑kutaʼu‑s nuu Ianyuux nuu‑da ntdaa‑da.

Ijan dada n‑taʼu‑s tila jan te n‑nukuita‑s xaxi‑s.

36 Ijan dada n‑ka kukaʼnu anu dava ka se xndeka tnaʼa xiʼin‑da vaxi,

te n‑ka xaxi‑s tuku.

37 Uu cientu uni diko xaun ɨɨn‑da xa ntdaa‑da.

38 Nu n‑yaʼa xa n‑ka xaxi‑da xa nde n‑ka chitu xiti‑da,

n‑ka dakeé‑s trɨu ndido barcu jan nuu mar xa na nduñama ka‑i.

39 Nu n‑tuu,

te n‑ka xini se ka dakaka barcu jan ñuʼu yichi,

ko ñayo‑s n‑ka najini ijan,

ko n‑ka xini‑s xa n‑kuyatni‑s yuʼu mar.

N‑ka kida ɨnuu‑s xa dakaka koio ka‑s barcu jan jɨʼɨn nu ma ndaku‑s xa xee koio‑s yuʼu mar jan.

40 N‑ka xaʼnde‑s yoʼo xndijun ancla,

te n‑ka dandoo‑s nuu mar.

Dɨuni n‑ka dataya‑s yutnu xetniu‑ro xa dakaka‑ro barcu.

Ijan dada n‑ka nakata‑s daʼma nuu yutnu xndodo nuu barcu jan xa na kaka‑i kixi yuʼu mar jan.

41 Ijan dada n‑xee‑i nuu n‑kɨu‑i meʼñu uu nuu xika ndute xiti mar,

te n‑xee‑i nuu io ñuʼu kuchi.

Ijan n‑nduxi nuu‑i.

Ña n‑kuu ka xa kaka ka‑i.

N‑kixeʼe kukuechi diu‑i juaʼan xaxeʼe xa yo ndeʼe tuxindee ñaʼa ndute.

42 N‑ka juini soldado xa kaʼni koio‑sɨ presu xndeka‑s vaxi,

xa maxku yoo se ijan kadanadari nuu ndute te kunu koio‑s,

43 ko ñatu n‑xejoon centurión chi n‑juini‑s xa kakú Spalu xa kuú‑s.

N‑taʼu tniu‑s xa se ka tuʼa xa kada nadari‑s,

kiʼna ka‑s na keé koio nuu ndute xa na xee koio‑s nde nuu ñuʼu yichi,

44 te se ña ka tuʼa xa kadanadari‑s,

na nkodotuu koio‑s nuu yutnu n‑ñuʼu xiti barcu jan xiʼin ntaka yutnu n‑kee xa n‑tnanu‑i xa kandijun‑s se n‑ka xe juindodo nuu.

Duʼa n‑ka kida‑da xa n‑ka kakú‑da ntdaa‑da xa kuú‑da,

te n‑ka xee‑da ɨɨn isla.