—Vatuu ka dadaʼan niʼno‑n mee‑n vitna.

N‑ndoneʼe ndaʼa Spalu xa na kunini ñayiu xa jaʼan‑s,

te n‑jaʼan‑s:

2 —Dito,

Ta Agripa,

kuvete‑da xa jaʼan‑da nuu ndixi xa kuu‑n se taxnuni,

ntdaa xa ka tekuechi ñaʼa se Israel vitna xa dadaʼan niʼno‑da mee‑da.

3 Xini ndixi na xa xneʼe tnɨɨ koio‑da xa ka kuu‑da yatnuʼu Israel,

te dɨuni xini‑n nax kuu xa ka jantnaʼa tnuʼu‑da.

Xijan kuu xa xijan taʼu‑da nuu‑n xa kada nde ini‑n xa kunini‑n tnuʼu na jaʼan‑da.

4 ʼNtdaa se ka kuu yatnuʼu Israel xini janda n‑xo kuu‑da ñuu‑da xiʼin Jerusalén na luchi‑da,

te dani ka xini‑s janda kuu‑da vitna.

5 Nde daa xini tnaʼa‑da xiʼin‑s,

te na jaʼan koio‑s nux ka juini‑s xa jaʼan‑s nax kida‑da chi jandixa‑da ley se Israel ka kuu fariseu.

6 Te vitna xndeka ñaʼa‑s n‑ka kixee yaʼa xaxeʼe xa ñu ini‑da xa yaʼa ɨɨn xa n‑chinaa Ianyuux nuu xixitna‑da ntdaa‑da xa ka kuu‑da daʼya dana Israel xa yaʼa.

7 Ka xinokuechi‑da xa ka kuu‑da daʼya dana uxi uu daʼya yɨɨ Israel nuu Ianyuux xa na niʼi koio‑da xa xndetu‑da,

te xaʼa kida xa ka jaʼan‑s xa io kuechi‑da.

8 ¿A ña jandixa ndixi xa kuaʼa Ianyuux xa nadandoto‑ia ndɨyɨ a?

9 ʼN‑xo xani ini‑da xa io vaʼa xa kida uʼu‑da ñayiu ka kukanu ini Jesús,

Ia n‑xio Nazaret.

Kueʼe xa n‑kida‑da ñayiu ijan.

10 Daa n‑kida‑da Jerusalén.

N‑taʼu tniu dutu ka taxnuni xa n‑chindiʼu‑da kueʼe ñayiu n‑kida Ianyuux xa n‑ka nduu‑i ñayiu ii vekaa,

te nu n‑ka xo xaʼni‑s‑yɨ n‑xo ku ɨnuu‑da xiʼin‑s.

11 Kueʼe vuelta n‑kida uʼu‑da ñayiu,

te n‑kidajuexa‑da‑i xa na jan kuiʼa‑i Jesús.

Ntdaa veñuʼu kuechi ñayiu Israel n‑xo kida‑da xaʼa.

N‑xo kiti ini‑da nuu ñayiu ka kukanu ini Jesucristu,

te nde ñuu toʼo n‑xo kandijun‑da‑i n‑xo xeʼen.

12 ʼXaxeʼe xijan neʼe‑da orde n‑ka taxi dutu ka taxnuni juaʼan ñuu Damasco xa kada uʼu‑da ñayiu ka kukanu ini Jesucristu ijan.

13 Ichi juaʼan‑da naxa kaa x‑uu n‑xini‑da ɨɨn xa ndii andɨu.

Ndeʼe ka n‑ndii xijan dada ngandii.

N‑ndii nɨkanduu nuu juaʼan‑da xiʼin se juaʼan xiʼin‑da.

14 N‑ka ndua‑da ntdaa‑da,

te n‑teku‑da xa n‑jaʼan.

Hebreu n‑jaʼan.

Duʼa n‑jaʼan:

“Saulo,

Saulo,

¿nakuenda kida uʼu‑n ñayiu ndeka‑r?

Kuenda kɨu ngutu xeñi ditni arado hora kidatniu‑tɨ kuu‑n,

te datnukueʼe ñaʼa‑tnu.”

15 ʼIjan dada n‑jaʼan‑da:

“¿Jundu kuu ndixi?”

Te n‑jaʼan‑ia:

“Ruʼu kuu Jesús,

Ia kida uʼu‑n.

16 Ndojuiin.

Xaxeʼe xa n‑kaxí ñaʼa‑r xa junukuechi‑n nuu‑r,

xijan kuu xa ndeʼa ñaʼa‑n,

te jini‑n xa kada‑r.

Najani‑n nuu ñayiu xa n‑xini‑n vitna xiʼin xa jini ka‑n.

17 Tundaʼa ñaʼa‑r jɨʼɨn nuu ñayiu ka kuu yatnuʼu Israel xiʼin nuu ñayiu ñatu ka kuu yatnuʼu Israel,

te dakaku ñaʼa‑r nuu‑i.

18 Jaʼan‑n nuu‑i jundu kuu Ianyuux xa na kutnuni ini‑i jundu kuu‑ia,

te ma kutuu ka‑i nuu nee.

Kada‑r xa jandixa‑i‑ia;

ma taxnuni ka Kuiʼna nuu‑i.

Taxkanu ini‑ia xa n‑ka kida‑i kuechi,

te nanitaʼu‑i xiʼin dava ka ñayiu kukanu ini ñaʼa n‑kida‑ia xa n‑ka nduu‑i ñayiu ii”,

kuu Jesús,

Ia kuu Xtoʼo‑da,

n‑jaʼan‑ia.

19 ʼN‑jandixa‑da xa n‑jaʼan‑ia nuu‑da na n‑xini‑da ɨɨn xa n‑xini‑da andɨu;

ñatu n‑kida yata‑da‑ia.

20 Kiʼna nu ka nuu ñayiu Damasco n‑jaʼan‑da xa na natu ini koio‑i xa n‑ka kida‑i kuechi,

te na kukanu ini‑i Ianyuux.

Dɨuni n‑jaʼan‑da xa na kada koio‑i xavaʼa xa na kundeʼa koio dava ka ñayiu xa n‑ka natu ini‑i xa n‑ka kida‑i kuechi.

Ijan dada n‑jaʼan‑da xaʼa nuu ñayiu Jerusalén xiʼin nituʼu región Judea xiʼin nuu ñayiu ñatu ka kuu yatnuʼu Israel.

21 Xaxeʼe xaʼa,

n‑ka tnɨɨ ñaʼa se Israel xiti veñuʼu Jerusalén,

te n‑ka juini‑s xa kaʼni ñaʼa koio‑s,

22 ko n‑chindee ñaʼa Ianyuux xa ñatu n‑ka xaʼni ñaʼa‑s,

te kakuneʼe naʼi‑da‑ia nuu ñayiu ndandɨʼɨ xiʼin nuu ñayiu ñatu ndandɨʼɨ.

Ñadu xa xani ini mee‑da jaʼan‑da chi jaʼan‑da xa n‑ka jaʼan se n‑ka jaʼan tnuʼu Ianyuux nuu ñayiu xiʼin xa n‑chidotnuni Moisés na n‑kakuneʼe‑s nuu nax yaʼa.

23 N‑ka jaʼan se jan xa io xa kuú Ia kuu Cristu,

te dɨu‑ia kuu Ia kiʼna nu nandoto xa kuú‑ia.

Ijan dada nandoto ñayiu ka xiʼí.

N‑ka jaʼan‑s xa kada‑ia xa teku ñayiu Israel xiʼin ñayiu ñatu kuu yatnuʼu Israel tnuʼu‑ia.

Duʼa n‑ka chidotnuni‑s —kuu Spalu,

xiaʼan‑s.

24 Nu n‑yaʼa xa n‑dadaʼan niʼno‑s mee‑s,

n‑kana Festo:

—Va nduloko‑n,

Palu.

Xaxeʼe xa yo kaʼu‑n,

xijan kuu xa ndulilu dɨkɨ‑n.

25 Te xiaʼan Spalu nuu Festo:

—Ñatu ndulilu‑da,

Dito,

chi xandaa kuu xa jaʼan‑da.

Tnuʼu ñukax ini kuu.

26 Xini vaʼa To Agripa de xa kakuneʼe‑da.

Xijan kuu xa ñatu yuʼu‑da xa jaʼan‑da xaʼa.

Naʼa‑da xa n‑xo teku‑s tnuʼu kakuneʼe‑da chi nuu kanda n‑kuu xaʼa.

Xiaʼan ntuku Spalu nuu se taxnuni nani Agripa jan:

27 —Dito,

¿jandixa‑n xa n‑ka jaʼan se n‑ka jaʼan tnuʼu Ianyuux nuu ñayiu a?

Jandixa‑n.

Nax kuu ñaʼa.

28 Xiaʼan Agripa jan:

—¿Xani ini‑n xa xaxeʼe uni koon ni tnuʼu jaʼan‑n de,

xino ini‑r xa kukanu ini‑r Jesucristu a?

29 Xiaʼan Spalu:

—Juini uni koon ni tnuʼu n‑jaʼan‑da nuu‑n a kueʼe n‑jaʼan‑da,

xijan taʼu‑da nuu Ianyuux xa ñadu mee ni‑n xee ku kuu ná kuu‑da ya chi xijantaʼu‑da xa ntdaa ñayiu xnini xaʼa vitna xee ku kuu ná kuu‑da,

ko ñadu duʼa kutnɨɨ‑i cadena,

te kɨndiʼu koio‑i ná yɨndiʼu daña vitna —kuu‑s,

xiaʼan‑s.

30 Ijan dada n‑ndojuiin Agripa xiʼin Festo xiʼin Berenice xiʼin ntdaa se xyuku ijan.

31 Te n‑ka kee dɨɨn‑s xa ndatnuʼu koio‑s.

Ka xiaʼan tnaʼa‑s:

—Ña tuu nax n‑kida se yaʼa xa kuú‑s,

ni ñatu io xa kɨndiʼu‑s vekaa.

32 Te xiaʼan Agripa nuu Festo:

—Nu ña n‑xijan niʼno mee‑s xa kundaa kuechi‑s nuu emperador,

dayaa‑n‑sɨ n‑kuu.