N‑dadaʼan niʼno Spalu mee‑s nuu Festo
25
Nu n‑kuu uni kɨu netniu Festo xa kuu‑s gobernador,
n‑kee‑s;
juaʼan‑s Jerusalén.
2 Nu n‑xee‑s ijan,
te n‑ka jaʼan dutu ka taxnuni xiʼin se ka taxnuni ñuu Israel nuu Festo nax n‑kida Spalu.
3 Ka xiaʼan se Israel jan xa na kada Festo ɨɨn xamani xa na taʼu tniu‑s xa na nuʼu Spalu Jerusalén.
Xaxeʼe xa n‑ka kida ɨnuu‑s xa kaʼni koio‑s Spalu ichi nuʼu‑s,
xijan kuu xa duʼa n‑ka jaʼan‑s,
4 ko xiaʼan Festo nuu‑s xa Cesarea kuu nuu yɨndiʼu Spalu,
ñadu Jerusalén.
Dɨuni n‑jaʼan‑s xa ndixi‑s Cesarea nuu uu a nuu uni kɨu.
5 —Nux daa io,
na jɨʼɨn‑ro Cesarea te ijan jaʼan koio‑n na kuechi n‑kida se ijan nux ndaa n‑kida‑s ɨɨn xa n‑kida‑s —kuu Festo,
xiaʼan‑s nuu se ka taxnuni jan.
6 Una uxi ka kɨu n‑xo tuu Festo Jerusalén.
Ijan dada n‑nxee‑s Cesarea,
te n‑ka kixee se ka taxnuni nuu ñayiu Israel ijan.
Kɨu kuu uu nukoo Festo nuu silla nuu taxnuni‑s,
te n‑taʼu tniu‑s xa n‑ka xe kueka soldado Spalu.
7 Nu n‑kɨu Spalu vetniu,
te n‑ka nanduku nduu ñaʼa se n‑ka kixi nde Jerusalén jan,
te n‑ka jaʼan‑s nax n‑kida‑s.
Kueʼe xa n‑ka dakuido kuechi ñaʼa‑s,
ko ñatu n‑jandixa Festo xijan xaxeʼe xa ña yoo na testiu.
8 N‑dadaʼan niʼno Spalu mee‑s.
Xiaʼan‑s:
—Daña ñatu kuxee ini‑da chi jandixa‑da ley ñayiu Israel,
te dɨuni jandixa‑da emperador.
Ña ndaa xa ñatu xe ini‑da veñuʼu Jerusalén.
9 Xaxeʼe xa na ku kuvaʼa anu se Israel nuu Festo,
n‑xijan tnuʼu‑s Spalu:
—¿Kuu ini‑n xa nuʼu‑n Jerusalén,
te kadandaa‑r kuechi‑n ijan u?
10 Xiaʼan Spalu:
—Vetniu nuu taxnuni se romano tuu‑da,
te yaʼa kuu nuu kajan tnuʼu ñaʼa‑n nax n‑kida‑da.
Xini mee‑n xa jandixa‑da ley ñayiu Israel,
te ñatu kuxee ini‑da nuu Ianyuux.
11 Nuxa n‑kida‑da ɨɨn kuechi kaʼnu,
te xaxeʼe kuechi ijan io xa kuú‑da,
na kuú‑da,
ko nuxa kuechi neñuu kuu ñatu io ley jaʼan xa nadayaʼa ñaʼa‑n nuu‑s xa kajan tnuʼu ñaʼa ntuku‑s Jerusalén.
Xijan niʼno‑da xa mee emperador na kadandaa kuechi‑da —kuu Spalu.
12 N‑ndatnuʼu Festo xiʼin sexaʼnu,
te n‑xian tnuʼu‑s nuu janda koo.
Ijan dada xiaʼan‑s nuu Spalu:
—Xaxeʼe xa xijan niʼno‑n xa jɨʼɨn‑n nuu emperador,
nuu emperador jɨʼɨn‑n.
N‑najani Festo nuu Agripa xa yaʼa Spalu
13 Nu n‑yaʼa tɨtnɨ kɨu,
n‑kixee se taxnuni nani Agripa xiʼin Berenice Cesarea xa kotoniʼni‑s Festo.
14 Nu n‑kuu tɨtnɨ kɨu xtuu‑s ijan,
te n‑najani Festo nuu Agripa xa yaʼa Spalu.
Xiaʼan‑s:
—Yaʼa tuu ɨɨn se yɨndiʼu vekaa chi ñatu n‑kineʼe ñaʼa Skueli na n‑xo netniu‑s.
15 Kɨu na n‑xeʼen‑da Jerusalén,
n‑ka xajan dutu ka taxnuni ka xiʼin sexaʼnu ka taxnuni nuu ñayiu Israel kuechi se yaʼa,
te ka xijan niʼno‑s xa kuú‑s.
16 Xiaʼan‑da xa juxtixia Roma,
ñatu mudu‑s xa kaʼni‑s ñayiu xidokuechi ɨɨn xa xidokuechi‑i nuxa ñatu nitnaʼa nuu‑i xiʼin ñayiu n‑ka xajan kuechi‑i xa na kuaʼa na dadaʼan niʼno‑i mee‑i.
17 Xijan kuu xa nu n‑ka kixi se Israel yaʼa,
kɨu kuu uu n‑xeʼen‑da vetniu.
N‑nadataka‑da juxtixia,
te n‑taʼu tniu‑da xa n‑ka xe kueka soldado se yaʼa.
18 Nu n‑ka kixee se n‑ka xajan kuechi‑s,
tuku xa n‑ka kakuneʼe‑s;
ñatu n‑ka kakuneʼe‑s kuechi n‑xani ini‑da.
19 Xa ka kakuneʼe‑s kuu mudu ka jandixa‑s,
te ka jaʼan‑s xa kuechi Spalu kuu xa jaʼan‑s xa ɨɨn se nani Jesús n‑nandoto,
te mee‑s ka jaʼan xa ña ndaa.
20 Xaxeʼe xa ñatu niʼi‑da mudu kadandaa‑da kuechi Spalu,
xijan kuu xa n‑xijan tnuʼu‑da‑s nuu vatuu ka nuʼu‑s Jerusalén xa kundaa kuechi‑s ijan,
21 ko n‑xijan niʼno‑s xa na kadandaa mee emperador kuechi‑s.
Xijan kuu xa n‑taʼu tniu‑da xa na kɨndiʼu naʼi‑s nde na tundaʼa‑da‑s jɨʼɨn nuu César.
22 Ijan dada xiaʼan Agripa nuu‑s:
—Juini‑da xa ndatnuʼu‑da xiʼin‑s tuku —kuu‑s,
xiaʼan‑s.
—Tnee kunini‑n na jaʼan‑s nuda —kuu Festo,
xiaʼan‑s.
N‑dadaʼan niʼno Spalu mee‑s nuu Agripa
23 Kɨu kuu uu ndeka tnaʼa Agripa xiʼin Berenice xiʼin comandante xiʼin dava ka se ka taxnuni ñuu jan n‑ka xee vetniu.
Niʼno Agripa xiʼin Berenice daʼma vaʼa te n‑kukutu.
N‑taʼu tniu Festo xa n‑xe kueka soldado Spalu.
24 Nu n‑xee Spalu,
n‑jaʼan Festo nuu Agripa xiʼin nuu ntdaa ñayiu n‑ka nataka ijan:
—Ndixi xa n‑ka kixee‑n yaʼa,
na se ka xijan niʼno ntdaa se Israel xa kadandaa‑da kuechi‑s yaʼa.
Nani ka jaʼan‑s Jerusalén,
dani ka jaʼan‑s yaʼa.
Ka xijan niʼno‑s xa na nadayaʼa‑da‑s juxtixia,
te ka kana‑s xa io xa kuú‑s.
25 Xani ini‑da xa ña tuu na kuechi n‑kida‑s xa kuú‑s,
ko xijan niʼno mee‑s xa kadandaa emperador kuechi‑s te n‑xino ini‑da xa tundaʼa‑da‑s jɨʼɨn nuu‑s,
26 ko xaxeʼe xa ña tuu nax chidotnuni‑da nuu tutu tundaʼa‑da jɨʼɨn nuu emperador,
xijan kuu xa n‑xe kueka‑da‑s xa kajan tnuʼu ndixi,
Dito Ta Agripa xiʼin dava ka ndixi,
ñayiu n‑ka nataka yaʼa nax n‑kida‑s na kuaʼa daa kadavaʼa‑da tutu jɨʼɨn nuu emperador.
27 Xani ini‑da xa ñatu io vaʼa xa tundaʼa‑da ɨɨn presu jɨʼɨn nuu‑s nux ma kodotnuni ɨɨn xa n‑kida‑s —kuu Festo,
n‑xiaʼan‑s.