N‑dadaʼan niʼno Spalu mee‑s nuu Skueli
24
Oʼon kɨu n‑kuu,
te n‑kixee dutu taxnuni ka nani Ananías xiʼin dava sexaʼnu ka taxnuni nuu ñayiu Israel xiʼin ɨɨn abogado nani Tértulo ñuu Cesarea.
N‑ka xeʼen‑s nuu gobernador xa tekuechi neñuu koio‑s Spalu.
2 Nu xndeka‑s Spalu n‑ka xee nuu‑s,
n‑kixeʼe Tértulo xa tekuechi neñuu‑s Spalu.
Xiaʼan‑s nuu se kuu gobernador jan:
—Dito,
xtuu vii xtuu vaʼa‑da chi vaʼa kida‑n.
Xaxeʼe xa vaʼa tuʼa‑n vaʼa ñunuu‑n ñuu‑da.
Xijan kuu xa kueʼe xavaʼa xe koo nación‑da juaʼan.
3 Yo nakutaʼu‑da xa kida‑n xaʼa ntdaa ñuu nuu taxnuni‑n.
4 Xa maxku taxkuee ñaʼa ka‑da,
Dito,
ma kakuneʼe ka‑da xijan,
te xijan taʼu‑da nuu‑n xa kada‑n xamani xa kunini‑n ununuu tnuʼu na jaʼan koio‑da.
5 N‑ka xini‑da xa daka niʼno se yaʼa ñayiu Israel chi dakuaʼa‑s‑yɨ xa n‑dakuaʼa ñaʼa ɨɨn se n‑xio Nazaret.
Nituʼu ñuñayiu,
daa kida‑s.
Ɨɨn kueʼe kuu‑s.
6-7 Juaʼan‑s xa kandeka‑s toʼo kɨu veñuʼu‑da.
Mudu yaʼa kuu xa ñatu xe ini‑s veñuʼu‑da.
Xijan kuu xa n‑ka tnɨɨ‑da‑s.
8 Kajan tnuʼu‑n‑sɨ te jini‑n ka xa ndaa xa ntdaa xaʼa kuu kuechi‑s —kuu Tértulo,
xiaʼan‑s.
9 Te n‑ka jaʼan dava se Israel xyuku ijan xa ndaa n‑kida Spalu ntdaa xaʼa.
10 N‑ndoneʼe ndaʼa gobernador xa na jaʼan Spalu,
te n‑jaʼan‑s:
—Xini‑da xa xá n‑kuu kuia kuu‑n juexi nación yaʼa.
Xaxeʼe xijan na jaʼan‑da nuu‑n xa ña tuu na kuechi‑da io,
te ña tuu nax kuu anu‑da.
11 Kajan tnuʼu‑n se n‑ka xajan kuechi‑da nuu nax n‑kida‑da te jini‑n nax kuu kuechi‑da.
Dijan n‑kuu uxi uu kɨu n‑naxee‑da Jerusalén xa n‑ndadakaʼnu‑da Ianyuux.
12 Ña ndaa xa n‑ka xini ñaʼa se yaʼa xa jantnaʼa tnuʼu‑da xiʼin ñayiu,
ni ñatu n‑dandandita‑da ñayiu nuu‑s xiti veñuʼu Jerusalén,
ni xiti ntaka veñuʼu kuechi,
ni ɨnka parti Jerusalén.
13 Ka tekuechi neñuu ñaʼa‑s.
Na kineʼe koio‑s testiu na kuaʼa na jini ndaa‑n.
14 Na jaʼan ndaa‑da xa kukanu ini‑da Jesús,
te xinokuechi‑da nuu Ianyuux xixitna‑da chi jandixa naʼi‑da ntdaa xa n‑chidotnuni Moisés xiʼin xa n‑ka kidavaʼa se n‑ka jaʼan tnuʼu Ianyuux nuu ñayiu,
ko ñatu daa ka jaʼan‑s chi ka jaʼan‑s xa tuku jandixa‑da.
15 Nani ñu ini‑da xa nadandoto Ianyuux ndɨyɨ,
dani xñu ini mee‑s ɨɨn ɨɨn‑s.
Nani nadandoto‑ia ñayiu vaʼa dani nadandoto‑ia ñayiu ñatu vaʼa.
16 Xijan kuu xa jandixa‑da xa taʼu tniu Ianyuux xa maxku kune ini‑da nuu‑ia na xee kɨu ijan,
ni nuu ñayiu.
17 ʼKuia n‑kuu ñatuka tuu‑da Jerusalén te n‑naxee‑da xa juñaʼa nga‑da ɨɨn xa juñaʼa nga‑da ñayiu ka kundaʼu xiʼin xa doko‑da ɨɨn xa doko‑da nuu Ianyuux.
18-19 Xaʼa kida‑da,
na n‑yaʼa xa n‑ndunini‑da na xneʼe tnɨɨ‑da vaxi.
N‑ka xini ñaʼa se Israel xndaxio Asia xiti veñuʼu Jerusalén.
Se ijan ka kuu se na kixi,
te na jaʼan‑s na kuechi n‑kida‑da.
Ñadu kueʼe ñayiu xyuku na n‑ka xini ñaʼa‑s,
te ni ɨɨn ñayo n‑ndandita nuu se ka taxnuni ya xaxeʼe‑da.
20 Nux ma kixi koio se ijan na jaʼan koio mee‑s janda n‑ka jaʼan juxtixia Israel nuu‑s na n‑ka xijan tnuʼu ñaʼa‑s.
21 Ña tuu na kuechi‑da io,
a xa xee n‑jaʼan‑da xa nandoto ndɨyɨ na n‑ka kidandaa‑s kuechi‑da:
“Ka kidandaa‑n kuechi‑da vitna xaxeʼe xa jandixa‑da xa nandoto ndɨyɨ”,
kuu‑da,
xiaʼan‑da nuu‑s.
¿Xijan kuu kuechi‑da u?
—kuu Spalu,
xiaʼan‑s.
22 Xaxeʼe xa xá xini Skueli nax kuu xa n‑kakuneʼe Spalu,
n‑jaʼan‑s xa na kundetu kuee.
Xiaʼan‑s nuu se Israel:
—Na kixi se kuu comandante nani Lisias,
dada na kajan tnuʼu ka‑r‑sɨ.
23 Te n‑taʼu tniu se kuu gobernador jan,
nuu centurión xa na kɨundiʼu naʼi Spalu,
ko na juejoon‑s xa kuikonuu‑s juera danaa danaa.
Dɨuni na juejoon‑s xa na kotoniʼni ñaʼa ñayiu kumani xiʼin‑s xa na juñaʼa‑i xa ndoñuʼu‑s.
24 Nu n‑yaʼa tɨtnɨ kɨu,
n‑naxee se kuu gobernador jan vetniu,
te ndeka‑s ñadɨʼɨ‑s n‑xee.
Drusila nani‑ña.
Ñá Israel kuu‑ña.
N‑taʼu tniu‑s xa n‑ka xe kueka‑s Spalu xa kunini koio‑s xa na jaʼan‑s.
Nu n‑xee Spalu nuu koio‑s n‑kakuneʼe‑s xa kukanu ini‑s Jesucristu.
25 N‑jaʼan Spalu xa ndoñuʼu xa kada ñayiu xandaa.
N‑jaʼan‑s xa maxku kada ñayiu xaloko xaduʼa;
na kundedi ini koio‑i.
N‑jaʼan‑s xa xee kɨu ndundaa kuechi‑i,
te n‑yuʼu se kuu gobernador jan.
Xaxeʼe xa n‑yuʼu‑s,
duʼa xiaʼan‑s:
—Juaʼan naʼi.
Ɨnka kɨu na kuyachi‑r,
te nakana ñaʼa ntuku‑r.