N‑ka xijan tnuʼu juxtixia Israel Spalu nuu nax n‑kida‑s
23
N‑xo ndeʼa Spalu juxtixia Israel,
te n‑jaʼan‑s:
—Dito,
Ñani,
ñatu nujani‑da xa kida‑da xa taʼu tniu Ianyuux nuu‑da.
Kida‑da xaʼa vaxi,
te ñatu kune ini‑da.
2 Dutu taxnuni ka nani Ananías.
N‑taʼu tniu‑s nuu se xnii yatni nuu nujuiin Spalu xa na jani koio‑s yuʼu‑s.
3 Te xiaʼan Spalu nuu dutu jan:
—Mee‑n janñaʼa Ianyuux.
Nukoo‑n dian xa kadandaa‑n ná yodotnuni.
¿Nakuenda ña jandixa‑n ley jan xa daa taʼu tniu ka‑n xa janñaʼa koio ñayiu ya u?
Kida nga‑n xa jandixa‑n ley n‑chidotnuni Moisés.
4 N‑ka jaʼan dava se xtuu ijan nuu Spalu:
—¿Nakuenda dadavatnaʼa‑n xiʼin dutu taxnuni ka?
5 Xiaʼan Spalu:
—Ña xini‑da xa se dian kuu dutu taxnuni ka.
Maxku daa kada‑da n‑kuu chi ka xini‑ro xa yodotnuni:
“Maxku kuiʼa jaʼan‑n juxtixia ñuu‑n.”
6 Xaxeʼe xa xini Spalu xa dava se Israel ka kidandaa kuechi ka kuu se saduceu,
te se fariseu ka kuu dava‑s;
xijan kuu xa xee n‑jaʼan‑s:
—Se fariseu kuu‑da,
te ñayiu fariseu n‑ka kuu tadɨʼɨ‑da.
Xaxeʼe xa jandixa‑da xa nandoto ndɨyɨ,
xndeka ñaʼa‑n vaxi yaʼa xa kajan tnuʼu ñaʼa koio‑n nax kuu kuechi‑da.
7 Nu duʼa n‑jaʼan Spalu tnuʼu yaʼa,
n‑ka nukuita se fariseu xiʼin se saduceu ka jantnaʼa tnuʼu‑s,
te tuku n‑ka xani ini dava ñayiu xyuku ijan,
te tuku n‑ka xani ini dava ka‑i.
8 Ka jaʼan se saduceu xa ma nandoto ndɨyɨ.
Dɨuni ka jaʼan‑s xa ñayo ángel io,
ni espíritu,
ko se fariseu ntdaa xaʼa ka jandixa‑s.
9 Ntdaa‑s n‑ka kana,
te n‑ka ndojuiin dava se fariseu ka kuu maestru ka tuʼa vaʼa tnuʼu n‑chidotnuni Moisés,
te n‑ka jaʼan‑s mudu kutnuni ini‑s tnuʼu Ianyuux xa daxino ini‑s se ka kuu saduceu.
Ka xiaʼan‑s:
—Se yaʼa,
ña tuu nax n‑kida‑s.
Va ɨɨn espíritu a ɨɨn ángel duʼa n‑jaʼan nuu‑s —ka kuu‑s,
ka xiaʼan‑s.
10 Xaxeʼe xa loko ka jantnaʼa tnuʼu se yuku ijan,
n‑yuʼu comandante xa kada kuechi koio‑s Spalu.
Xijan kuu xa n‑taʼu tniu‑s nuu dava soldado‑s xa na jɨn nundeka ñaʼa koio‑s veʼe nuu xtuu‑s.
11 Xakuaa ijan n‑kɨu Ianyuux nuu tuu Spalu te n‑jaʼan‑ia:
—Maxku yuʼu‑n xa jaʼan‑n nuu ñayiu xa n‑jaʼan‑r.
Nani n‑jaʼan‑n xa kida‑r nuu ñayiu Jerusalén ya,
dani jaʼan‑n nuu ñayiu Roma.
N‑ka kida ɨnuu‑s xa kaʼni koio‑s Spalu
12 Kɨu kuu uu n‑ka kida ɨnuu se Israel xa kaʼni koio‑s Spalu.
N‑ka chinaa‑s xa ni ɨɨn xa ña tuu nax kaxi koio‑s,
ni ña tuu nax koʼo koio‑s.
Nde na kaʼni‑s Spalu,
ijan dada kaxi koio‑s.
N‑ka jaʼan‑s xa nux ma duʼa kada koio‑s,
na kaʼni ñaʼa Ianyuux.
13 Viʼi ka uu diko‑s duʼa n‑ka chinaa.
14 N‑ka xe juñaʼa‑s nuu dutu ka taxnuni xiʼin nuu juxtixia Israel xa n‑ka chinaa‑s.
Ka xiaʼan‑s:
—N‑ka chinaa‑da xa ni ɨɨn ña tuu nax kaxi koio‑da.
Nde na kaʼni koio‑da Spalu,
ijan dada kaxi koio‑da.
15 Juñaʼa koio ndixi xiʼin dava ka juxtixia Israel nuu comandante vitna xa na kandeka‑s Spalu kixi nuu‑n ya tnee.
Tnuʼu ni nga juñaʼa‑n xa juini‑n xa jini‑n nax kuu kuechi‑s chi ta jini ndaa ka‑n nax kuu kuechi‑s.
Na kuyatni‑s yaʼa te xá koo tuʼa koio‑da xa kaʼni‑da‑s —ka kuu‑s,
ka xiaʼan‑s.
16 Kaʼni koio‑s Spalu n‑kuu,
ko n‑teku daʼya kuʼa Spalu tnuʼu yaʼa te n‑xeʼen‑s nuu xtuu soldado xa n‑xian tnuʼu‑s Spalu xijan.
17 N‑kana Spalu ɨɨn centurión te xiaʼan‑s:
—Kandeka‑n solteru ya juaʼan nuu comandante chi io ɨɨn xa juña tnuʼu‑s‑sɨ.
18 Ndeka centurión solteru jan juaʼan nuu comandante jan,
te xiaʼan‑s:
—Se yɨndiʼu nani Spalu n‑kana ñaʼa,
te n‑jaʼan‑s xa na kandeka‑da solteru ya kixi nuu‑n chi io ɨɨn xa jaʼan‑s nuu‑n ne.
19 N‑tnɨɨ comandante jan ndaʼa solteru jan,
te ndeka dɨɨn ñaʼa‑s juaʼan ɨɨn lado,
te n‑xijan tnuʼu ñaʼa‑s:
—¿Nax juini‑n xa jaʼan‑n nuu‑r?
20 Xiaʼan solteru jan:
—N‑ka kida ɨnuu se Israel xiʼin juxtixia‑s xa jaʼan juxtixia jan nuu‑n xa kandeka‑n Spalu jɨʼɨn tnee nuu ka nataka‑s xa tnuʼu ni nga kajan tnuʼu‑s‑sɨ nuu nax n‑kida‑s xa jini ndaa‑s nax kuu kuechi‑s.
21 Maxku jandixa‑n xa jaʼan koio‑s chi viʼi ka uu diko se Israel xyɨvaʼa ichi yaʼa Spalu.
Xndetu‑s xa yaʼa‑s ijan,
te kaʼni ñaʼa koio‑s.
N‑ka chinaa‑s xa ña tuu nax kaxi‑s ni ña tuu nax koʼo‑s.
Nde na kaʼni ñaʼa koio‑s,
ijan dada kaxi koio‑s.
Diko nga xndetu‑s nuu janda na jaʼan‑n —kuu solteru jan,
xiaʼan‑s nuu comandante.
22 Ijan dada n‑jaʼan comandante jan xa na nuʼu‑s,
te maxku nde ku jaʼan‑s xijan.
N‑ka tundaʼa‑sɨ Spalu; vaxi‑s Cesarea
23 Ijan dada n‑kana comandante jan uu centurión,
te n‑taʼu tniu‑s xa na kada tuʼa koio‑s uu cientu soldado ka xika xeʼe xiʼin uni diko uxi soldado xyodo caballu xiʼin uu cientu soldado xneʼe lanza te na jɨʼɨn koio‑s Cesarea kaa ɨɨ́n xakuaa.
24 Dɨuni n‑taʼu tniu‑s xa na kada tuʼa koio‑s caballu kodo Spalu.
N‑taʼu tniu‑s xa na junuu vaʼa koio‑s‑sɨ,
te na xee vii na xee vaʼa‑s nuu gobernador nani Skueli.
25 N‑kidavaʼa‑s ɨɨn carta xneʼe soldado jan juaʼan nuu gobernador.
Duʼa yodotnuni:
26 “Daña kuu Claudio Lisias.
Vaʼa nga taʼu kuu‑n,
Dito.
Tnuʼu yaʼa jaʼan‑da nuu ndixi xa kuu‑n gobernador.
27 N‑ka tnɨɨ se Israel se yaʼa xa kaʼni koio‑s‑sɨ,
ko nu n‑teku‑da xa io tutu‑s xa se romano kuu‑s,
n‑xeʼen‑da xiʼin soldado‑da nuu n‑ka tnɨɨ‑s‑sɨ,
te n‑dakaku‑da‑s.
28 Xaxeʼe xa n‑juini‑da xa jini‑da nax kuu kuechi‑s ndeka‑da‑s n‑xeʼen nuu juxtixia Israel,
29 te n‑ka jaʼan‑s xa kuechi‑s kuu xa ñatu jandixa‑s ley‑s ɨɨn ɨɨn‑s ná ka jandixa mee‑s,
ko ñatu kuu xijan ɨɨn xa vaʼa viʼi xa kuú‑s a xa kɨndiʼu‑s vekaa.
30 Nu n‑teku‑da xa n‑ka kida ɨnuu se Israel xa kaʼni koio‑s‑sɨ,
nuniʼno ni n‑tundaʼa‑da‑s juan xee nuu‑n.
Te dɨuni xiaʼan‑da nuu se n‑ka xajan kuechi‑s xa na xee koio‑s nuu‑n de na jaʼan‑s nuu‑n nax n‑kida‑s.
Xaʼa kuu xa kachitnuʼu ñaʼa‑da,
Dito.”
31 Xakuaa ijan xndeka soldado jan Spalu vaxi ñuu nani Antipatris ná n‑taʼu tniu comandante.
32 Kɨu kuu uu,
n‑ka nangondita soldado ka xika xeʼe,
te soldado xyodo caballu,
dani ka kixi‑s xiʼin Spalu.
33 Nu n‑ka kixee‑s Cesarea,
xndeka‑s Spalu juaʼan nuu gobernador,
te n‑ka xiaʼan‑s carta jan.
34 Nu n‑yaʼa xa n‑kaʼu gobernador carta jan,
n‑xijan tnuʼu‑s nde se kuu Spalu.
Nu n‑teku‑s xa se Cilicia kuu‑s,
35 xiaʼan‑s nuu‑s:
—Na kixi koio se n‑ka xajan kuechi‑n,
ijan dada kadandaa‑r kuechi‑n —kuu‑s.
Ijan dada n‑taʼu tniu‑s xa kɨndiʼu Spalu ɨɨn cuartu veʼe Herodes,
se n‑taxnuni,
te na kundee ñaʼa soldado.