2 Nu n‑ka teku ñayiu jan xa hebreu jaʼan‑s,

te nanii nga n‑kuu,

te n‑jaʼan ka Spalu:

3 —Kuu‑da yatnuʼu Israel.

N‑kaku‑da Tarso,

ɨɨn ñuu katuu distrito Cilicia,

ko Jerusalén ya n‑xaʼnu‑da te yaʼa n‑kaʼu‑da.

Xkuela Gamaliel n‑kaʼu‑da.

N‑kaʼu‑da ntdaa tnuʼu Ianyuux yodotnuni n‑ka xo kaʼu xixitna‑ro,

te io ndaa io kuiti anu‑da xa xinokuechi‑da nuu Ianyuux ná io ndaa io kuiti anu ntdaa ndixi xa ka xinokuechi‑n nuu‑ia nde vitna.

4 N‑xokida uʼu‑da ñayiu n‑ka kukanu ini Jesús.

N‑xo tnɨɨ‑da‑i,

te n‑xo chindiʼu‑da‑i vekaa.

Nani n‑xo chindiʼu‑da seyɨɨ dani n‑xo chindiʼu‑da ñadɨʼɨ.

Dava‑i n‑xaʼni‑da.

5 Naʼa dutu taxnuni ka xiʼin ntdaa sexaʼnu ka taxnuni xaʼa chi mee‑s n‑ka taxi oficiu neʼe‑da juaʼan nuu se ka kuu yatnuʼu Israel xndaxio Damasco.

Kajan tnuʼu‑n‑sɨ te jini koio‑n xa ndaa ka.

N‑xeʼen‑da ijan xa nanduku‑da ñayiu n‑ka kukanu ini Jesucristu xa kandeka‑da‑i ndixi Jerusalén ya te kada uʼu‑da‑i.

6 ʼNu n‑kuyatni‑da Damasco,

naxa kaa x‑uu danaa n‑koko ɨɨn luz andɨu,

te ndeʼe n‑ndii nɨkanduu nuu nujuiin‑da.

7 N‑ndua‑da,

te n‑teku‑da n‑jaʼan:

“Saulo,

Saulo,

¿nakuenda kida uʼu‑n ñayiu ndeka‑r?

Kuenda kɨu mee‑r kida uʼu ñaʼa‑n xa kida uʼu‑n‑yɨ.”

8 N‑xijan tnuʼu‑da:

“¿Dito,

jundu kuu‑n?”

Te n‑jaʼan ka:

“Ruʼu kuu Jesús,

Ia Nazaret,

Ia kida uʼu‑n.”

9 Se juaʼan xiʼin‑da n‑ka xini‑s xa n‑ndii nuu nujuiin‑da,

ko ñayo‑s n‑ka teku xa n‑jaʼan.

10 N‑xijan tnuʼu‑da:

“¿Nax kada‑da,

Dito?”

Te n‑jaʼan Jesús,

Ia kuu Xtoʼo‑da:

“Ndojuiin te juaʼan naʼi Damasco.

Ijan kachitnuʼu ñaʼa ɨɨn se ijan nax kada‑n chi n‑tetutniu ñaʼa Ianyuux.”

11 Xaxeʼe xa n‑dakuaa ñaʼa luz ndeʼe n‑ndii jan,

n‑ka xe kuitañuʼu ñaʼa se xnetnaʼa xiʼin‑da xa juaʼan naʼi‑da Damasco.

12 ʼIjan tuu ɨɨn se nani Ananías.

Ntdaa ñayiu Israel xtuu Damasco ka najuen tnuʼu ñaʼa.

Ka jaʼan‑i xa vaʼa jandixa‑s ley n‑chidotnuni Moisés.

13 N‑xee Ananías nuu n‑xo tuu‑da,

te n‑jaʼan‑s:

“Saulo,

na nukondeʼa‑n.”

Hora ijan ni n‑nukondeʼa‑da te n‑xini‑da‑s.

14 Ijan te n‑jaʼan ka‑s nuu‑da:

“Xa daa nga n‑kaxí ñaʼa Ianyuux xixitnaʼa‑ro mee‑n xa jini‑n xa ñu ini‑ia xa kada‑ia xiʼin xa jini‑n Jesús,

Ia kida mee ni xandaa.

Dɨuni kunini‑n xa jaʼan‑ia.

15 Najani‑n nuu ñayiu xa n‑xini‑n xiʼin xa n‑teku‑n xa n‑kida‑ia.

16 Te vitna,

¿nax ndetu‑n?

Ndojuiin‑n te juendute‑n.

Kajan taʼu‑n nuu Ianyuux xa na taxkanu ini‑ia kuechi n‑kida‑n”,

kuu Ananías nuu‑da.

17 ʼN‑nxee‑da Jerusalén ya,

te n‑kixi‑da veñuʼu ya xa n‑xijan taʼu‑da nuu Ianyuux,

te n‑tuu‑da xa n‑xini‑da

18 Jesús,

Ia kuu Xtoʼo‑ro,

te n‑jaʼan‑ia nuu‑da:

“Kundu ini.

Yachi.

Ta kee Jerusalén ya,

chi mayo tna ini xa kakuneʼe ñaʼa‑n yaʼa”,

kuu‑ia.

19 ʼXiaʼan‑da nuu‑ia:

“Xnaʼa ñayiu xa n‑xo xeʼen‑da veñuʼu xndatuu ñuu xiʼin ñuu xa n‑xo tnɨɨ‑da ñayiu n‑ka kukanu ini ñaʼa mee‑n,

te n‑xo chindiʼu‑da‑i vekaa.

Dɨuni n‑xo kani‑da‑i.

20 Na n‑ka xaʼni ñayiu Steva,

se n‑xo jaʼan tnuʼu‑n nuu ñayiu,

n‑xo nujuiin‑da ijan,

te n‑kuu ɨnuu‑da xiʼin se n‑ka xaʼni ñaʼa.

Dɨuni n‑ñunuu‑da daʼma se n‑xaʼni ñaʼa jan.”

21 N‑jaʼan Jesús:

“Ma kutuu ka‑n yaʼa chi tundaʼa ñaʼa‑r jɨʼɨn nuu xndaxio ñayiu ña ka kuu yatnuʼu‑n.

Xika jɨʼɨn‑n”,

kuu‑ia —kuu Spalu,

n‑xiaʼan‑s nuu ñayiu.

22 Nu n‑yaʼa xa n‑ka xo nini ñayiu tnuʼu yaʼa,

te n‑ka ndixeʼe ntuku‑i xa ka kana‑i:

—Maxku kundito ka‑s,

chi ñadu xavaʼa kida‑s;

tuu‑s ya.

Na kuú‑s.

23 Dani ka kana‑i.

N‑ka tava‑i daʼma‑i,

te n‑ka dajane‑i.

Dɨuni n‑ka dakaa‑i ñuʼu yuchi andɨu xaxeʼe xa ka kiti ini‑i.

24 N‑taʼu tniu comandante jan xa na kandeka koio‑s Spalu kɨu veʼe nuu xtuu soldado,

te na jani koio‑s‑sɨ chirrión ñɨɨ na kuaʼa na jaʼan‑s nax n‑kida‑s xa daa ka kana ñayiu jan.

25 N‑ka duku‑s Spalu xa janñaʼa koio‑s n‑kuu,

ko n‑jaʼan Spalu nuu centurión:

—¿Io vaʼa xa jani koio‑n ɨɨn se io tutu xa kuu‑s se Roma juini ña ka xini‑n na kuechi n‑kida‑s a?

¿Daa io ley a?

26 Nu n‑teku centurión xaʼa,

n‑xe juña tnuʼu‑s comandante.

Xiaʼan‑s:

—¿Janda kada‑n?,

chi io tutu se yaʼa xa kuu‑s se romano.

27 N‑xetuʼa comandante Spalu te n‑xijan tnuʼu‑s:

—¿Ndaa xa io tutu‑n xa kuu‑n se romano a?

Xiaʼan Spalu:

—Joon.

28 Xiaʼan ntuku comandante jan:

—Ruʼu yo kueʼe tvini n‑xe juʼun‑r xa n‑kidakutu‑r tutu‑r xa nduu‑r se romano.

Xiaʼan ntuku Spalu:

—Daña chi nde na n‑kaku‑da,

io tutu‑da xa kuu‑da se romano.

29 Xaxeʼe xa duʼa n‑jaʼan Spalu,

n‑ka xika yata se juaʼan xa jani koio‑s‑sɨ.

Nu n‑teku comandante xa io tutu Spalu xa kuu‑s se romano,

n‑yuʼu‑s xaxeʼe xa n‑duku ñaʼa‑s cadena.

30 Kɨu kuu uu n‑juini comandante jan xa jini‑s nakuenda ka tekuechi se Israel Spalu.

N‑juini‑s xa jini ndaa jini kuiti‑s.

Xijan kuu xa n‑kineʼe‑sɨ Spalu veʼe soldado jan,

te n‑taʼu tniu‑s xa na nataka dutu ka taxnuni nuu ñayiu Israel xiʼin ntdaa se Israel ka kidandaa kuechi.

Ijan dada n‑kineʼe‑s Spalu te n‑xani‑s‑sɨ nuu‑s ntdaa‑s.