Juan nuʼu Spalu Jerusalén
21
Nu n‑ka dandoo‑da se ka kukanu ini Jesucristu jan,
n‑ka ndeé‑da barcu,
te n‑ka yaʼa ndaa‑da nde yuʼu mar nuu nani Cos.
Ijan dada n‑ka ndee‑da Cos,
te kɨu kuu uu n‑ka xee‑da yuʼu mar nuu nani Rodas.
Ijan dada n‑ka xee‑da nuu nani Pátara.
2 Pátara jan n‑ka niʼi‑da ɨnka barcu jɨʼɨn distrito Fenicia,
te n‑ka keé‑da.
3 Dikonga xa xee‑da Fenicia n‑ka yaʼa‑da do sur isla Chipre,
te n‑ka xeʼen‑da do Siria.
N‑ka xee‑da Tiro,
te n‑ka nane‑da barcu jan.
Barcu xñuʼu‑da juaʼan jan io xa jɨn neʼe‑i xa ndido‑i ijan.
4 Tiro n‑ka nitnaʼa‑da xiʼin se ka kukanu ini Jesucristu.
Uxa kɨu n‑ka ndoo‑da veʼe ɨɨn‑s.
N‑ka xian tnuʼu‑sɨ Spalu xa n‑jaʼan Espíritu Ianyuux xa maxku nuʼu ka‑s Jerusalén,
5 ko nu n‑yaʼa uxa kɨu,
n‑ka ndee‑da ijan.
Ntdaa se ijan xiʼin ñadɨʼɨ‑s xiʼin daʼya‑s n‑ka xe dayaʼa ñaʼa nde yuʼu mar.
N‑ka xe juiin xiti‑da ntdaa‑da,
te n‑ka xijan taʼu koio‑da nuu Ianyuux.
6 N‑ka jaʼan‑da nuu ñayiu ijan xa ndee koio‑da Tiro.
Ijan dada n‑ka ndeé‑da barcu,
te n‑ka xiko ñayiu jan;
ka nuʼu‑i veʼe‑i.
7 Dani juaʼan koio‑da,
te n‑ka xee‑da ñuu Tolemaida:
—Vaʼa nga taʼu kuu koio‑n —kuu‑da,
ka xiaʼan‑da nuu ñayiu ka kukanu ini Jesucristu xndaxio ijan.
N‑ka ndoo‑da xiʼin‑i ɨɨn kɨu.
8 Kɨu kuu uu n‑ka ndeé ntuku‑da barcu,
te n‑ka xee‑da Cesarea.
Ijan xndaxio uxa tnaʼa se ka jaʼan nuu ñayiu nax io xa kada koio‑i xa na kuaʼa nanitaʼu‑i,
te n‑ka ndoo‑da veʼe ɨɨn‑s.
Slipe nani‑s.
9 Koon daʼya dɨʼɨ‑s io.
Mee ni soltera ka kuu‑i.
Dichi ka jaʼan tnuʼu Ianyuux nuu ñayiu ka kuu‑i.
10 Nuu n‑kuu tɨtnɨ kɨu xtuu‑da ijan,
te n‑xee ɨɨn se Judea nani Agabo.
Se jaʼan tnuʼu Ianyuux nuu ñayiu kuu‑s tuku.
11 Nuu n‑xee‑s nuu xtuu‑da,
te n‑tnɨɨ‑s cinturón Spalu.
N‑duku‑s ndaʼa‑s xiʼin xeʼe‑s,
te n‑jaʼan‑s:
—Jaʼan Espíritu Ianyuux xa duʼa duku koio ñayiu Israel se kuu xtoʼo cinturón ya Jerusalén,
te kandeka ñaʼa‑i jɨʼɨn nuu se ñatu kuu yatnuʼu‑ro te diko ñaʼa koio‑i.
12 Nuu n‑ka teku daña xiʼin ñayiu Cesarea xaʼa,
n‑ka xijan taʼu‑da nuu Spalu xa maxku nuʼu‑s Jerusalén.
13 Juini n‑ka xijan taʼu‑da nuu‑s xa maxku nuʼu‑s ijan,
ko n‑jaʼan‑s:
—¿Nakuenda ka ndaʼi‑n te datnau ini ñaʼa‑n?
Io anu‑r xa daa yaʼa‑r,
te ñadu ni xa kuduku‑r xiʼin xa kɨndiʼu‑r vekaa io anu‑r chi dɨuni io anu‑r xa kuú‑r Jerusalén xaxeʼe Jesús,
Ia kuu Xtoʼo‑ro.
14 Ñayo‑da n‑kundee tnuʼu xa daxino ini‑da‑s,
te n‑ka jaʼan‑da:
—Na kuu na juini Taa‑ro Ianyuux.
15 Nu n‑yaʼa xaʼa,
n‑ka kidatuʼa‑da mee‑da xa n‑ka ndee‑da xiʼin‑s ijan,
te juaʼan koio‑da Jerusalén.
16 N‑ka kunduu‑da xiʼin dava ñayiu ka kukanu ini Jesucristu xndaxio Cesarea juaʼan Jerusalén.
Ñayiu yaʼa xndeka ñaʼa n‑ka xeʼen veʼe ɨɨn se nani Mnason xa n‑ka ndoo‑da ijan.
Se Chipre kuu‑s.
Xa n‑kuu naʼa,
daa nga kukanu ini se yaʼa Jesucristu.
N‑ndatnuʼu Spalu xiʼin Santiago
17 N‑ka xee‑da Jerusalén,
te n‑ka kuvete ñayiu ka kukanu ini Jesucristu xa n‑ka xee‑da.
18 Kɨu kuu uu n‑ka xeʼen‑da ntdaa‑da xiʼin Spalu nuu tuu Jacob.
Ijan xtuu sexaʼnu ka taxnuni nuu ñayiu ka kukanu ini Jesucristu:
19 —Vaʼa nga taʼu kuu koio‑n —kuu Spalu,
xiaʼan‑s nuu ñayiu ijan.
Ijan dada n‑najane‑s xa yo n‑kidatniu Ianyuux anu ñayiu ñatu ka kuu yatnuʼu Israel n‑ka teku tnuʼu‑s chi n‑ka jandixa‑i xa n‑jaʼan‑s.
Kayuchi kandiʼi n‑najane‑s.
20 Nuu n‑ka teku sexaʼnu ka taxnuni nuu ñayiu kukanu ini Jesucristu jan,
n‑ka najuen tnuʼu‑s Ianyuux,
te n‑ka jaʼan‑s nuu Spalu:
—Ñani,
naʼa‑n xa kueʼe xa kueʼe ñayiu Israel ka kukanu ini Jesucristu io,
te ka kidajuexa‑i xa jandixa naʼi‑ro ley n‑chidotnuni Moisés.
21 Ka najani ñayiu yaʼa xa jaʼan‑n xa maxku chinuu koio ñayiu ka kuu yatnuʼu Israel xndaxio ñuu toʼo ley n‑chidotnuni Moisés.
Nunxa xiaʼan‑n nuu‑i xa maxku kaʼnde ndodo‑i ñɨɨ nuu ii daʼya yɨɨ‑i,
ni maxku kada‑i nax xndijun tnɨɨ‑ro vaxi.
22 Xaxeʼe xa n‑ka teku‑i xaʼa,
hora na teku‑i xa n‑nxee ntuku‑n,
¿nax jaʼan‑ro nuu‑i hora na kajan tnuʼu ñaʼa‑i nu ndaa daa n‑kida‑n a ñaʼa?
23 Na kachitnuʼu ñaʼa koio‑da nuu janda kada‑n.
Yaʼa xtuu koon se xa io xa kada koio‑s ɨɨn xa n‑ka chinaa‑s nuu Ianyuux.
24 Kandeka‑n‑sɨ jɨʼɨn veñuʼu xa ndunini‑n xiʼin‑s,
te chiyaʼu‑n.
Ijan dada na dete dɨkɨ‑s na kuaʼa na jini ñayiu Israel xa vete ñayiu n‑ka najani xijan nuu‑i,
te jini‑i xa jandixa naʼi‑n ley n‑chidotnuni Moisés.
25 Xa n‑ka tundaʼa‑da tutu juaʼan nuu ñayiu ka kukanu ini Jesucristu ñatu ka kuu yatnuʼu Israel xa n‑ka kida ɨnuu‑ro xa maxku kaxi koio‑i kuñu n‑ka doko‑i nuu santu.
Maxku kaxi‑i nɨñɨ.
Maxku kaxi koio‑i kuñu kɨtɨ n‑ka xeʼne.
Ni maxku kava koio seyɨɨ,
ni ñadɨʼɨ xiʼin ñayiu ñatu n‑tnundaʼa xiʼin‑ña —kuu sexaʼnu jan,
ka xiaʼan‑s nuu Spalu.
26 Ijan dada ndeka Spalu nkoon se ijan juaʼan xa ndunini koio‑s xiʼin‑s.
Nu n‑ka daxinokava Spalu xiʼin‑s xa n‑ka ndunini‑s kɨu ijan,
te n‑xeʼen‑s veñuʼu xa juña tnuʼu‑s dutu na kɨu daxinokava‑s xijan xiʼin xa na kɨu doko‑s nuu Ianyuux xa io xa doko koio se ijan.
N‑ka tnɨɨ presu‑s Spalu
27 Diko nga xa daxinokava koio‑s xijan,
n‑ka xini se ka kuu yatnuʼu Israel xndaxio Asia Spalu veñuʼu,
te n‑ka dataka‑s ñayiu.
N‑ka kida‑s xa n‑ka kana n‑ka kau‑i,
te n‑ka tnɨɨ‑s Spalu.
28 Ka kana‑s xa na xee koio dava ka se Israel xyuku ijan.
Ka xiaʼan‑s:
—Chindee ñaʼa koio‑n na tnɨɨ‑ro se yaʼa chi ntdantuʼu ñuu nuu xikonuu‑s jan tnuʼu ñaʼa‑s.
Jaʼan‑s nuu ñayiu xa ña xiniñuʼu ley n‑chidotnuni Moisés,
ni veñuʼu‑ro ya.
Te vitna ndeka‑s se griegu n‑xeʼen veñuʼu‑ro.
Duʼa kuu xa ñatu xe ini‑s veñuʼu ii‑ro.
29 Xaxeʼe xa n‑ka xini‑s xa ndeka tnaʼa Spalu xiʼin ɨɨn se Éfeso xikonuu xiti ñuu Jerusalén,
xijan kuu xa duʼa n‑ka jaʼan‑s te n‑ka xani ini‑s xa ndeka‑s‑sɨ n‑xeʼen veñuʼu.
Trófimo nani se ijan.
30 Ntdantuʼu ñayiu ñuu jan n‑ka kana n‑ka kau.
N‑ka kendava‑i,
te n‑ka xee‑i nuu nujuiin Spalu.
N‑ka tnɨɨ dava‑s Spalu,
te n‑ka kineʼe‑s‑sɨ veñuʼu jan.
Hora ijan ni n‑ka nakadɨ‑s yeñuʼu jan.
31 N‑teku comandante ɨɨn batallón xa ntdantuʼu ñayiu Jerusalén n‑ka ndandita nuu Spalu xiʼin xa ka kuu anu‑i xa kaʼni koio‑i‑sɨ,
32 te n‑nadataka‑s soldado‑s xiʼin soldado ka taxnuni.
N‑ka kendava‑s;
ka xeʼen‑s nuu xyuku ñayiu jan.
Nu n‑ka xini ñayiu jan comandante xiʼin soldado‑s,
n‑ka nujani‑i xa ka jani‑i Spalu.
33 Ijan dada n‑xe tuʼa comandante jan Spalu.
N‑tnɨɨ ñaʼa‑s,
te n‑taʼu tniu‑s xa na duku ñaʼa koio soldado‑s uu cadena.
Ijan dada n‑xijan tnuʼu‑s ñayiu nuu nde se kuu‑s,
te nax n‑kida‑s.
34 Dava ñayiu n‑ka jaʼan ɨɨn tnuʼu,
dava‑i n‑ka jaʼan ɨnka tnuʼu.
Xaxeʼe xa yo n‑ka kana n‑ka kau ñayiu jan,
xijan kuu xa ña n‑kuu xa kajan tnuʼu comandante Spalu nax n‑kida‑s.
Xaxeʼe xijan n‑taʼu tniu‑s xa kandeka koio soldado jan Spalu jɨʼɨn veʼe nuu xtuu‑s.
35 Nu n‑ka naxee soldado jan escalera veʼe nuu xtuu‑s,
n‑ka xido‑s Spalu xaxeʼe xa yo ka kundeʼe ñayiu jan.
36 Ntdantuʼu‑i xndijun ñaʼa te ka kana‑i:
—Na kuu‑s.
N‑dadaʼan niʼno Spalu mee‑s
37 Diko nga xa ndɨu koio‑s xiʼin Spalu veʼe jan,
n‑xijan tnuʼu Spalu comandante jan:
—¿Vatuka ndatnuʼu‑ro itaʼu a?
Xiaʼan comandante jan nuu‑s:
—¿Tuʼa‑n griegu a?
38 ¿Ñadu ndoʼo kuu se Egipto n‑kixi yaʼa xa dandandita‑n ñayiu nuu gobierno kuia xa uni,
kuia xa koon a?
¿Ñadu ndoʼo ndeka koon mil se ka xaʼni ndɨyɨ n‑xeʼen nuu ñatu nga juun dau,
te ñayo io a?
39 Xiaʼan Spalu:
—Ñaʼa,
chi yatnuʼu Israel kuu‑da.
Ñuteyu‑da kuu Tarso,
distrito Cilicia.
Kuu‑da ñayiu ɨɨn ñuu ndandɨʼɨ.
¿Vatuu ka xa jaʼan‑da nuu ñayiu ya u?
40 N‑xejoon comandante xa jaʼan Spalu.
N‑xani soldado jan Spalu escalera,
te n‑ndoneʼe ndaʼa‑s xa maxku jaʼan koio ka ñayiu xndijun ñaʼa jan.
Ña tuu ka nax n‑ka jaʼan‑i,
te n‑jaʼan‑s hebreu.
Xiaʼan‑s: