N‑xo tuu Spalu Macedonia xiʼin Grecia
20
Nu n‑yaʼa xa n‑ka kana n‑ka kau ñayiu,
n‑kana Spalu ñayiu ka kukanu ini Jesucristu xa jaʼan doʼo‑s‑yɨ.
Ijan dada n‑jaʼan‑s nuu‑i xa ndee‑s te kixi ntuku‑s Macedonia,
te n‑ndee‑s Éfeso.
2 Ntdaa ñuu kuechi xndaxio ijan n‑xikonuu ntuku‑s.
Naʼa n‑jaʼan‑s xa n‑jan doʼo‑s ñayiu kukanu ini Jesucristu.
Ijan dada n‑kixi ntuku‑s Grecia.
3 Uni yoo n‑xo tuu‑s ijan.
Diko nga xa keé‑s barcu xa nuʼu‑s Siria,
te n‑teku‑s xa n‑ka kida ɨnuu se ka kuu yatnuʼu Israel xa kaʼni ñaʼa koio‑s.
Xijan kuu xa n‑xani ini‑s xa nayaʼa‑s do nuu ñuʼu te nayaʼa ntuku‑s ɨnka vuelta Macedonia.
4 N‑kunduu‑s xiʼin Sópater,
Aristarco,
Segundo du xa n‑ka nangondita‑s Macedonia.
Sópater kuu se Berea.
Piroo nani taa‑s.
Aristarco xiʼin Segundo kuu se Tesalónica.
N‑ka kunduu‑s xiʼin Gayo,
Timoteo,
Tíquico,
Trófimo du.
Gayo kuu se Derbe.
Tíquico xiʼin Trófimo ka kuu se Asia.
5 N‑ka xe juindodo nuu se yaʼa juaʼan Troas,
te n‑ka xo ndetu ñaʼa‑s ñuu Troas.
6 Nu n‑yaʼa viko ka xaxi ñayiu tila ña n‑kɨu levadura,
daña xiʼin Spalu,
n‑ka ndeé‑da barcu xa ndee koio‑da Filipos.
Te kɨu kuu oʼon dada n‑ka nanitnaʼa‑da ntdaa‑da Troas.
Uxa kɨu n‑ka ndoo koio‑da ijan.
N‑nadandoto Spalu Eutico
7 Kɨu kiʼna nuu semana n‑ka nataka‑da xiʼin Spalu xa kaxi koio‑da xiʼin‑s tila ña n‑kɨu levadura,
te n‑jaʼan‑s nuu daña,
ñayiu ka kukanu ini Jesucristu.
Xaxeʼe xa io xa ndee‑s kɨu kuu uu,
xijan kuu xa naʼa n‑jaʼan‑s.
8 Xyuku‑da ɨɨn cuarto piso kuu uni.
Kueʼe candil ka koko ijan.
9 Naʼa n‑kuu n‑jaʼan Spalu.
N‑kuu niu dava,
te n‑kuu nuu ɨɨn solteru nani Eutico nukoo yuʼu ventana xa kidi.
N‑kidi naa‑s,
te n‑xidokava‑s nde nuu ñuʼu.
N‑xiʼí‑s,
te n‑ka ndoneʼe ñaʼa ñayiu.
10 Ijan dada n‑nuu Spalu.
N‑xe kava ndodo‑s solteru jan,
te n‑nundee ñaʼa‑s.
N‑jaʼan‑s nuu ñayiu kukanu ini Jesucristu:
—Maxku yuʼu koio‑n,
chi n‑nandoto‑s.
11 Ijan dada juan ndaa Spalu,
te n‑ka xaxi‑da xiʼin‑s tila ña n‑kɨu levadura jan.
Dani n‑jaʼan‑s xa nde n‑tuu.
Ijan dada n‑ka ndee‑da xiʼin‑s ñuu jan.
12 Xndeka ñayiu jan solteru jan juan nuʼu veʼe‑s te n‑ka kuvete‑i chi n‑nandoto‑s.
N‑dayaa tnaʼa Spalu xiʼin sexaʼnu ka taxnuni nuu ñayiu ka kukanu ini Jesucristu ñuu Éfeso
13 N‑ka keé‑da xiʼin se n‑ka xo kunduu xiʼin Spalu barcu xa juaʼan koio‑da do Asón,
te juan nuʼu xeʼe Spalu ijan chi ña n‑juini‑s xa kandeka tnaʼa kaʼnu‑da xiʼin‑s nuʼu xaxeʼe xa n‑juini‑s xa nuʼu xeʼe‑s.
N‑ka xe juindodo nuu‑da,
te n‑nanitnaʼa‑da xiʼin‑s ijan.
14 Nu n‑ka nanitnaʼa‑da xiʼin‑s Asón,
n‑ka ndeé‑da xiʼin‑s barcu,
te juaʼan koio‑da xiʼin‑s Mitilene.
15 N‑ka ndee‑da ijan te kɨu kuu uu n‑ka yaʼa‑da yuʼu mar ndeʼa tnaʼa xiʼin Quio.
Ɨnka kɨu,
dada n‑ka xee‑da yuʼu mar yɨndaʼa Samos.
Dani juaʼan koio‑da xiʼin barcu.
Kɨu kuu uu n‑ka xee‑da xiʼin‑s Mileto.
16 Xa maxku kutuu naʼa Spalu distrito Asia,
ña n‑juini‑s xa nuʼu‑s Éfeso chi n‑juini‑s xa naxee yachi‑s Jerusalén nu ma kuu xa na naxee‑s antecas xa xee viko Pentecostés.
17 Na n‑ka xo tuu‑da Mileto,
n‑kana Spalu sexaʼnu Éfeso ka taxnuni nuu ñayiu kukanu ini Jesucristu xndaxio ijan.
18 Nu n‑ka xee se taxnuni jan n‑jaʼan Spalu nuu‑s:
—Ndixi ka xini janda n‑xo tuu n‑xo nukoo‑da ntdaa kɨu n‑xo tuu‑da ñuu kuechi Asia,
te dɨuni xnaʼa‑n xa n‑xo kida‑da.
Daa n‑xo kuu‑da nde kɨu n‑kixee‑da xiʼin nde kɨu n‑ndee‑da.
19 Ntdaa kɨu n‑xo tuu‑ro n‑xo xinokuechi‑da nuu Ianyuux xandaʼu xakee,
te ndeʼe n‑xo ndaʼi‑da.
Ndaʼu n‑xo yaʼa‑da xaxeʼe xa n‑ka xo juini dava se ka kuu yatnuʼu Israel xa kaʼni ñaʼa koio‑s.
20 Juini daa n‑yaʼa‑da,
ko n‑jaʼan naʼi‑da nax kada koio‑n xa nanitaʼu‑n.
Dɨuni n‑xo jaʼan‑da tnuʼu Ianyuux nuu‑n veʼe‑n ɨɨn ɨɨn‑n xiʼin nuu n‑ka xo nataka‑n.
21 N‑jaʼan‑da xaʼa nuu ñayiu ka kuu yatnuʼu Israel xiʼin nuu mee‑n,
ñayiu ñatu ka kuu yatnuʼu Israel.
Dɨuni n‑jaʼan‑da xa na natu ini koio‑n xa n‑ka kida‑n kuechi xiʼin xa na kukanu ini‑n Jesús,
Ia kuu Xtoʼo‑ro.
22 Te vitna nuʼu‑da Jerusalén.
Jaʼan Espíritu Ianyuux xa kidayɨka‑i xa nuʼu‑da ijan.
Ña kutnuni nax yaʼa‑da ijan.
23 Xa xini‑da kuu xa nituʼu ñuu nuu juaʼan‑da jaʼan Espíritu Ianyuux xa ndetu ñaʼa vekaa te kueʼe xa yaʼa‑da.
24 Ña tuu nax juun‑da vida‑da.
Xa ñu ini‑da kuu xa na daxinokava‑da tniu n‑taxi Jesús,
Ia kuu Xtoʼo‑ro.
Ndu ini‑da xa kada ndɨʼɨ‑da xaʼa xiʼin xa kachitnuʼu ñaʼa‑da xa taxkanu ini Ianyuux kuechi n‑ka kida ñayiu xaxeʼe xa vaʼa‑ia.
25 ʼNi ɨɨn ndixi,
ñayiu n‑ka teku tnuʼu n‑jaʼan‑da na n‑xikonuu‑da xa n‑kakuneʼe‑da xa taxnuni Ianyuux nuu ñayiu,
mayo ka jini ñaʼa.
26 Kachitnuʼu ñaʼa‑da vitna xa ñadu kuechi daña kuu nux ma nanitaʼu‑n chi n‑jaʼan‑da.
27 N‑xo jaʼan‑da nax n‑kida Ianyuux xa nanitaʼu koio‑n.
Ni ɨɨn xa ña tuu nax n‑chidaʼu‑da.
28 Kundeʼa koio‑n xa maxku dandoo ñayiu ka kukanu ini Jesucristu Ianyuux chi n‑tetutniu ñaʼa Espíritu Ianyuux xa junuu‑n‑yɨ.
Dani mee‑n ɨɨn ɨɨn‑n,
maxku dandoo‑n‑ia.
Xa ku kuu‑n ntdaa‑n daʼya‑ia n‑xiʼí Jesús.
29 Na yaʼa xa nuʼu‑da,
kixi koio ɨnka‑s.
Xandaa xakuiti daa yaʼa.
Dajaʼan ñaʼa‑s dava‑n xa ma kukanu ini ka‑n Jesús.
Kada koio‑s xa duʼa duʼa kute niʼno koio‑n ná kida ñaña ndeʼe tkachi.
30 Dava‑n dakuaʼa ñayiu ka kukanu ini Jesucristu ɨɨn xa ña ndaa xa na jandixa ñaʼa koio‑i.
31 Jun ini koio‑n xa maxku jandixa‑n ɨɨn xa ña ndaa.
Xnaʼa‑n xa uni kuia tɨtɨɨ,
nduu niu n‑xo jan doʼo ñaʼa‑da,
te n‑xo ndaʼi‑da xaxeʼe‑n.
32 ʼNa kutuu koio‑n xiʼin Ianyuux,
te na junuu ñaʼa‑ia.
Xa n‑ka teku‑n xa dananitaʼu ñaʼa Ianyuux xaxeʼe xa n‑kundaʼu ini ñaʼa‑ia.
Io xa kutnuni ini‑n tnuʼu yaʼa na kuaʼa na kukanu ini ka‑n Jesús te taxi‑ia taʼu‑n ɨɨn ɨɨn‑n andɨu ná n‑xiaʼan‑ia taʼu ñayiu n‑kida‑ia xa n‑ka nduu‑i ñayiu ii.
33 ʼÑatu n‑kukajan ini‑da tvini‑n xiʼin daʼma‑n.
34 Xa xnaʼa mee‑n xa n‑kidatniu‑da xa n‑xo niʼi‑da xa n‑ndoñuʼu‑da xiʼin xa n‑ndoñuʼu se n‑ka kunduu xiʼin‑da nuu tniu Ianyuux.
35 ʼDɨuni n‑xo jaʼan‑da xa kadatniu‑n ná kida daña xa na kuaʼa chindee‑n ñayiu ka kundaʼu.
Na najaʼan‑ro tnuʼu n‑jaʼan Jesús,
Ia kuu Xtoʼo‑ro:
“Vaʼa ka kuu anu‑ro xa xiaʼan‑ro ɨɨn xa xiaʼan‑ro ñayiu dada xa taxi‑i” —kuu Spalu,
xiaʼan‑s.
36 Nu n‑yaʼa xa n‑jaʼan Spalu ntdaa tnuʼu yaʼa n‑ka xe juiin xiti koio‑da xiʼin‑s,
te n‑ka xijan taʼu‑da nuu Ianyuux.
37 Ntdaa‑s n‑ka ndaʼi te n‑ka nundee‑s Spalu te n‑ka teyuʼu‑s‑sɨ.
38 Yo n‑ka kukoʼyo ini‑s xa daa n‑jaʼan‑s,
ko ndeʼe ka n‑ka kukoʼyo ini‑s xaxeʼe xa n‑jaʼan Spalu xa mayo ka‑s jini ñaʼa.
Ijan dada n‑ka xe dayaʼa‑s Spalu nde nuu nukoo barcu.