—¿N‑keé ñaʼa Espíritu Ianyuux na n‑ka kukanu ini‑n Jesucristu a?

Ka xiaʼan se ijan:

—Ñatu n‑keé ñaʼa‑ia,

ni ñayo‑da ka xini xa io Espíritu Ianyuux.

3 N‑xijan tnuʼu ntuku Spalu‑s:

—¿Nux ñatu n‑keé ñaʼa‑ia na n‑ka xendute‑n,

nakuenda n‑ka xendute‑n?

¿Jundu n‑kachitnuʼu ñaʼa xa io xa juendute koio‑n?

Te ka xiaʼan‑s:

—N‑ka xendute‑da xaxeʼe xa n‑ka natu ini koio‑da xa n‑ka kida‑da kuechi chi daa n‑jaʼan Sua nuu ñayiu Israel xa kada koio‑i,

te n‑dajuendute‑s ñayiu n‑ka natu ini xa n‑ka kida‑i kuechi.

4 Xiaʼan Spalu:

—Xaxeʼe xa n‑ka natu ini‑i xa n‑ka kida‑i kuechi,

xijan kuu xa n‑dajuendute ñaʼa Sua,

ko ñadu xijan ni n‑kida‑s chi dɨuni n‑xo jaʼan‑s nuu‑i xa na kukanu ini koio‑i Ia vaxi yata‑s,

Ia kuu Jesús.

5 Nu n‑ka teku se ijan tnuʼu yaʼa,

te n‑ka najuendute‑s xaxeʼe xa n‑ka kukanu ini‑s Jesús,

Ia kuu Xtoʼo‑ro.

6 N‑xajan ndodo Spalu ndaʼa‑s dɨkɨ‑s ɨɨn ɨɨn‑s,

te n‑keé ñaʼa Espíritu Ianyuux.

N‑ka nukuita‑s ka jaʼan‑s ɨnka yuʼu,

te n‑ka jaʼan‑s xa n‑jaʼan Ianyuux nuu ñayiu.

7 Naxa uxi uu‑s xa ntdaa‑s.

8 Uni yoo n‑xo tuu Spalu Éfeso,

te n‑xo xeʼen‑s veñuʼu ñayiu Israel xa n‑xo jaʼan‑s tnuʼu Ianyuux nuu ñayiu.

Ñatu n‑yuʼu‑s xa n‑xo jaʼan‑s.

N‑xo daxino ini‑s ñayiu xa jandixa‑i tnuʼu n‑xo jaʼan‑s.

N‑kakuneʼe‑s janda kada koio‑i xa kɨu tnaʼa‑i nuu ñayiu jandixa xa taxnuni Ianyuux nuu‑i,

9 ko n‑xio ñayiu ñatu n‑jandixa.

Ña n‑juini‑i xa kukanu ini‑i Jesucristu.

N‑ka jaʼan‑i nuu ñayiu n‑ka xo nataka xa ñatu xiniñuʼu xa n‑xo jaʼan Spalu.

Xijan kuu xa n‑dandoo Spalu ñayiu ijan.

Ndeka‑s ñayiu n‑ka kukanu ini Jesucristu juaʼan vexcuela ɨɨn se nani Tirano.

Ijan n‑xo dakuaʼa‑s‑yɨ ntdaa kɨu n‑xo tuu‑s ijan.

10 Duʼa n‑kida‑s uu kuia.

Xijan kuu xa ntdaa ñayiu xndaxio ñuu kuechi xndaxio distrito Asia,

n‑ka teku tnuʼu Ianyuux,

nani ñayiu ka kuu yatnuʼu Israel,

dani ñayiu ñatu ka kuu ñayiu Israel.

11 N‑xetniu Ianyuux Spalu xa kada‑ia milagro

12 xa nde pañitu a mandili n‑xe kajuʼun Spalu xneʼe ñayiu juaʼan nuu ñayiu ka kuʼu.

Te n‑ka ndvaʼa ñayiu ka kuʼu jan.

Dɨuni n‑ka xo kee xaloko anu‑i.

13 Dava se Israel n‑ka xo xikonuu Éfeso xa ka kineʼe‑s xaloko xñuʼu anu ñayiu.

N‑ka xo juini‑s xa kineʼe‑s xaloko jan xa n‑ka xo kakuneʼe‑s dɨu Jesús.

N‑ka xo jaʼan‑s:

—Xaxeʼe xa n‑tundaʼa ñaʼa Jesús,

Ia kakuneʼe Spalu,

xa kada‑r tniu‑ia,

taʼu tniu‑r xa kee koio‑n anu ñayiu yaʼa —n‑ka xo kuu se ijan.

14 Xaʼa ka kida uxa daʼya yɨɨ ɨɨn se Israel nani Eseva.

Kuu‑s dutu taxnuni.

15 Nanga ɨnka vuelta n‑ka juini‑s xa kakuneʼe‑s dɨu Jesús xa kineʼe koio‑s xaloko ñuʼu anu ɨɨn se ñuʼu ñaʼa xaloko,

te n‑ka jaʼan xaloko nuu‑s ɨɨn ɨɨn‑s:

—Xini‑r Jesús.

Xini‑r jundu kuu Spalu,

ko ndoʼo ɨɨn ɨɨn‑n,

ñatu xini ñaʼa‑r.

16 Hora ijan ni n‑ndava ndee se ñuʼu ñaʼa xaloko jan uxa ñani tnaʼa‑s.

Ndaku ka se ñuʼu ñaʼa xaloko jan dada ntdaa se ijan.

Xaxeʼe xa loko n‑jani‑s se ka kineʼe xaloko jan,

n‑ka kee‑s veʼe se n‑ñuʼu ñaʼa xaloko jan,

te n‑ka kendava‑s.

N‑ka kuvichi‑s,

te n‑ka tnukueʼe‑s.

17 Ntdaa ñayiu xndaxio Éfeso n‑ka teku xaʼa,

nani n‑ka teku ñayiu ka kuu yatnuʼu Israel,

dani n‑ka teku ñayiu ñatu ka kuu yatnuʼu Israel,

te loko n‑ka yuʼu‑i.

Duʼa n‑kuu xa kueʼe ñayiu n‑ka najuen tnuʼu Jesús,

Ia kuu Xtoʼo‑ro.

18 Kueʼe ñayiu n‑ka kukanu ini Jesucristu jan,

n‑ka xo nataka,

te n‑ka xo naʼma‑i kuechi n‑ka kida‑i.

19 Kueʼe ñayiu n‑ka xo nataka jan n‑ka xo kida magia,

te xneʼe‑i libru‑i n‑ka xee xa na kundeʼa ntdaa ñayiu n‑ka nataka jan te n‑ka teñuʼu‑i libru‑i.

N‑ka kida‑s cuenta yaʼu libru n‑kayu jan.

Naxa uu diko uxi mil tvini kuu plata kuu yaʼu libru jan xa ntdaa.

20 Duʼa n‑kuu xa kueʼe ñuu n‑ka teku ka ñayiu tnuʼu Jesucristu,

Ia kuu Xtoʼo‑ro,

juaʼan.

N‑kunuu tnuʼu‑ia.

21 Nu n‑yaʼa ntdaa xaʼa,

n‑xani ini Spalu xa kixi ntuku‑s Macedonia xiʼin Acaya,

te ijan dada nuʼu‑s Jerusalén.

Te n‑xo jaʼan‑s:

—Na yaʼa xa nuʼu‑r Jerusalén,

io xa jɨʼɨn‑r Roma.

22 Ijan n‑tundaʼa‑s Timoteo xiʼin se nani Erasto vaxi ntuku Macedonia nɨni ndoo ka mee‑s ɨɨn uu ka yoo distrito Asia.

Se yaʼa ka kuu se ka chindee ñaʼa.

23-24 Tiempu ijan,

n‑nadataka ɨɨn se nani Demetrio ñayiu Éfeso.

N‑kida‑s xa n‑ka kana,

n‑ka kau‑i xaxeʼe tnuʼu Ianyuux.

Kidavaʼa‑s veñuʼu kuechi lii xa naneʼe‑s veñuʼu ianyuux nani Artemisa.

Kueʼe tvini niʼi‑s xiʼin se ka kidavaʼa xiʼin‑s xijan.

25 N‑nadataka‑s se ɨɨn ni tniu ka kida xiʼin‑s.

N‑jaʼan‑s nuu se n‑ka nataka jan:

—Dito,

ka xini‑n xa xtuu vaʼa‑ro xa ka kida‑ro tniu ka kida‑ro.

26 Ka xini‑n te ka teku‑n xa ɨɨn se nani Spalu xikonuu yaʼa,

te jaʼan‑s nuu ñayiu xa ianyuux ka kidavaʼa ñayiu ñuñayiu ñatu kuu‑ia ianyuux.

Duʼa jaʼan‑s te kueʼe ñayiu dajaʼan‑s,

te dandaʼu‑s‑yɨ.

Ñadu ni ñuu‑ro kida‑s xaʼa chi diko nga xa ndexio‑s ntdaa ñuu kuechi Asia.

27 Ñadu xavaʼa kuu xa kida‑s,

chi dakuita‑s tniu‑ro,

te dɨuni mayo ka ñayiu chinuu veñuʼu Artemisa,

ia yo ndandɨʼɨ,

ia ka ndadakaʼnu ntdaa ñayiu xndaxio Asia xiʼin nɨkaʼnu ñuñayiu.

Dɨuni mayo ka‑i ku jaʼan xa ndandɨʼɨ‑ia,

ni mayo ka jandixa xa kuu‑ia ianyuux —kuu Demetrio,

xiaʼan‑s.

28 Nu n‑ka teku se n‑ka nataka jan tnuʼu yaʼa,

yo n‑ka kiti ini‑s,

te n‑ka kana‑s:

—¡Yo ndandɨʼɨ ianyuux ñuu‑ro,

ia kuu Artemisa!

29 N‑ka kana n‑ka kau ntuku ñayiu ñuu jan ɨnka vuelta.

N‑ka tnɨɨ se Éfeso se nani Gayo xiʼin se nani Aristarco,

te xndeka ñaʼa‑s juaʼan nuu xko nataka ñayiu ñuu jan.

Se Macedonia n‑ka kunduu xiʼin Spalu ka kuu‑s.

30 N‑juini Spalu xa kɨu tnaʼa‑s ijan xa jaʼan‑s nuu ñayiu jan,

ko ña n‑ka xejoon ñayiu ka kukanu ini Jesucristu xa chitnaʼa‑s.

31 Dani n‑ka jaʼan se ka kuu juxtixia distrito Asia ka xini tnaʼa xiʼin Spalu nuu ɨɨn se kuu ndaʼa xeʼe‑s xa na juña tnuʼu‑sɨ Spalu xa maxku chitnaʼa‑s.

32 Ka kana ñayiu n‑ka nataka jan.

Dava‑i ka kana ɨɨn tnuʼu,

dava‑i ka kana ɨnka tnuʼu,

te kueʼe‑i ña xini nakuenda xa n‑ka nataka‑i.

33 Dava se ka kuu yatnuʼu Israel n‑ka tundaʼa ɨɨn se nani Alejandro nuu ntdaa ñayiu jan,

te n‑ka xian tnuʼu dava se xyuku jan nax jaʼan‑s nuu ñayiu xyuku jan.

Ijan n‑ndoneʼe ndaʼa‑s nuu ñayiu xa maxku jaʼan koio ka‑i,

te n‑jaʼan‑s nax kuu xa ndaa nuu ñayiu ñuu jan.

34 Nu n‑ka xini ñayiu jan xa se Israel kuu Alejandro jan,

uu hora n‑ka kana‑i ntdaa‑i:

—¡Yo ndandɨʼɨ ianyuux ñuu‑ro,

ia kuu Artemisa!

35 Ɨɨn se netniu ñuu jan n‑kida xa n‑kunaʼi ñayiu jan,

te n‑jaʼan‑s:

—Ndixi xa ka kuu‑n ñayiu Éfeso,

kunini koio‑n xa na jaʼan‑da.

Ntdaa‑ro xnaʼa xa xñunuu‑ro veñuʼu ianyuux kuu Artemisa,

ia yo ndandɨʼɨ n‑juun andɨu.

36 Te xaʼa mayo jaʼan xa ña ndaa.

Kundetu koio‑n itaʼu.

Maxku ñaʼa kada koio‑n.

Kiʼna ka kani ini vaʼa koio‑n.

37 Se xndeka‑n n‑ka kixee yaʼa,

maxku kandeka‑n‑sɨ kixi n‑kuu chi ñayo‑s n‑ka duʼu ndatniu io xiti veñuʼu,

ni ña kuiʼa ka jaʼan‑s ianyuux‑ro.

38 Nuxa Demetrio xiʼin se ɨɨn ni tniu ka kida xiʼin‑s,

ka juini xa tekuechi‑s ɨɨn ñayiu,

io juexi xiʼin vetniu.

Na jɨʼɨn koio‑s ijan;

kajan‑s kuechi‑i.

39 Nux ɨnka xa ka juini‑n,

na kada‑ro junta na jaʼan ley‑ro xa kiʼna ka ndatnuʼu koio‑ro nuu nax kada‑ro.

40 Xaxeʼe xa n‑ka kana‑n n‑ka kau‑n vitna,

vaa ni kada uʼu ñaʼa gobierno romano nux ma taxkanu ini ñaʼa‑s.

¿Nax jaʼan‑ro nuu‑s xa dadaʼan niʼno‑ro mee‑ro?

41 Nu n‑yaʼa n‑jaʼan‑s xijan,

te n‑jaʼan‑s nuu ñayiu xa na nandute‑i.