N‑dakuaʼa Spalu ñayiu Corinto
18
Nu n‑yaʼa xaʼa,
n‑ndee Spalu Atenas te vaxi‑s Corinto.
2 Ijan n‑nitnaʼa‑s xiʼin ɨɨn se kuu yatnuʼu Israel nani Áquila xiʼin ñadɨʼɨ‑s.
Priscila nani‑ña.
Se Ponto kuu‑s.
Dijan xaku n‑kuu n‑ka xee‑s Corinto xa n‑ka xo tuu‑s Roma,
país Italia.
N‑ka ndee‑s yaʼa xaxeʼe xa n‑taʼu tniu se kuu emperador nani Claudio xa kee ntdaa ñayiu ka kuu yatnuʼu Israel Roma.
N‑xe kotoniʼni Spalu se yaʼa xiʼin ñadɨʼɨ‑s.
3 N‑ndoo‑s xiʼin Áquila xa kadatniu kaʼnu‑s xiʼin‑s nduu‑s xiʼin ñadɨʼɨ‑s chi ɨɨn ni tniu ka kida‑s ndruni‑s.
Veʼe idi nchiva ka kidavaʼa‑s.
4 Ntnaʼa kɨu ndetatu ñayiu ka kuu yatnuʼu Israel,
n‑xo xeʼen Spalu veñuʼu‑i,
te n‑xo ndatnuʼu‑s xiʼin‑i xiʼin ñayiu ñatu ka kuu yatnuʼu Israel n‑ka xo nataka ijan.
N‑ka jantnaʼa tnuʼu‑s xiʼin dava‑i,
te n‑ka jaʼan‑s nuu‑i xa io xa kukanu ini koio‑i Jesucristu.
5 Nu n‑xee Silas xiʼin Timoteo Corinto xa n‑ka xo tuu‑s Macedonia,
te n‑jaʼan Spalu tnuʼu Ianyuux nuu ñayiu ka kuu yatnuʼu Israel ijan,
te n‑xian tnuʼu‑s‑yɨ xa Jesús kuu Cristu.
Ñatu n‑kida‑s ɨnka tniu.
6 N‑ka jaʼan se ka kuu yatnuʼu Israel jan xa ñatu jaʼan ndaa Spalu,
te n‑ka nukuita‑s kuiʼa ka jaʼan‑s‑sɨ.
Xijan kuu xa n‑kɨdɨ Spalu daʼma‑s xaxeʼe xa ña n‑tna ini‑s xijan.
Te n‑jaʼan‑s nuu se ka kuu yatnuʼu Israel jan:
—Kuechi mee‑n ka kuu xa ma nanitaʼu koio‑n;
ña tuu na kuechi‑da.
Ma dakuaʼa ñaʼa ka‑da;
jɨʼɨn‑da nuu se ñatu ka kuu yatnuʼu Israel vitna —kuu Spalu,
xiaʼan‑s.
7 N‑ndee‑s veñuʼu jan te juaʼan‑s veʼe ɨɨn se ñatu kuu yatnuʼu Israel,
ko jandixa‑s Ianyuux.
Ticio Justo nani‑s.
Kandetnaʼa veʼe‑s xiʼin veñuʼu ñayiu Israel.
8 N‑ka kukanu ini se kida veñuʼu nani Crispo xiʼin familia‑s Jesucristu.
Nu n‑ka teku dava ka ñayiu Corinto tnuʼu Ianyuux,
n‑ka kukanu ini‑i Jesucristu,
Ia kuu Xtoʼo‑ro,
te n‑ka xendute‑i.
9 N‑kida Ianyuux xa n‑xini Spalu ɨɨn xa n‑xini‑s ɨɨn xakuaa,
te n‑jaʼan Ianyuux nuu‑s:
—Maxku yuʼu‑n.
Jaʼan naʼi tnuʼu‑r nuu ñayiu;
maxku nujani‑n xa jaʼan,
10 chi kunduu‑ro nuu xikonuu‑n,
te ni ɨɨn mayo tnɨɨ ñaʼa xa kada uʼu ñaʼa‑i.
Kueʼe ñayiu ndeka‑r io ñuu yaʼa.
11 Xijan kuu xa n‑xo tuu‑s ɨɨn yodo kuia Corinto xa n‑jaʼan‑s tnuʼu Ianyuux nuu ñayiu ijan.
12 Na n‑xo kuu Galión gobernador Acaya,
n‑ka nataka se ka kuu yatnuʼu Israel xa kada uʼu‑s Spalu.
Xndeka‑s‑sɨ juaʼan nuu se ka kidandaa kuechi ñayiu.
13 Ka xiaʼan‑s nuu gobernador:
—Se yaʼa kuu se dajaʼan ñayiu xa na tuku nakuetu koio‑i nuu Ianyuux.
Ñadu duʼa jaʼan ley nuu‑da ɨɨn ɨɨn‑da.
14 Xa juaʼan Spalu xa jaʼan‑s,
te n‑jaʼan Galión nuu se Israel:
—Nuxa na ɨɨn kuechi n‑kida‑s a ndɨyɨ xido kuechi‑s,
kunini‑r tnuʼu ka jaʼan ndoʼo xa ka kuu‑n yatnuʼu Israel n‑kuu,
15 ko xaxeʼe xa diko ni dɨu ɨɨn ñayiu xiʼin ley koio‑n kakuneʼe‑s,
kadandaa koio mee‑n kuechi‑s chi ñatu kuu ini‑r xa kadandaa‑r xijan —kuu Galión,
xiaʼan‑s nuu se ka kuu yatnuʼu Israel.
16 Te n‑xijun Galión se Israel nuu se ka kidandaa kuechi ñayiu jan.
17 Antecas xa n‑ndee koio‑s ijan,
ntdaa‑s n‑ka tnɨɨ ɨɨn se kida veñuʼu nani Sóstenes.
N‑ka jani‑s‑sɨ nuu se ka kidandaa kuechi ñayiu jan,
ko ñatu n‑chinuu Galión xijan.
N‑nangondita ntuku Spalu Antioquía, distrito Siria
18 Tɨtnɨ ka kɨu n‑ndoo Spalu Corinto.
Ijan dada n‑jaʼan‑s nuu ñayiu ka kukanu ini Jesucristu xa xá io xa nuʼu‑s distrito Siria.
N‑keé‑s xiʼin Priscila xiʼin Áquila barcu,
te n‑ka xee‑s ñuu Cencrea.
Diko nga xa ndee koio‑s barcu,
te n‑dete ndɨɨ dɨkɨ Spalu chi n‑xiaʼan‑s tnuʼu‑s Ianyuux xa juñaʼa‑s‑ia ɨɨn xa juñaʼa‑s‑ia.
Ijan dada n‑ka ndeé‑s barcu xa nuʼu koio‑s ñuu nani Éfeso.
19 Nu n‑xee Spalu Éfeso,
n‑dandoo‑s Priscila xiʼin Áquila te juaʼan‑s veñuʼu yatnuʼu Israel xa ndatnuʼu‑s xiʼin‑i.
20 N‑ka jaʼan‑i nuu‑s xa jeen kɨu ka na ndoo‑s xiʼin‑i,
ko ña n‑juini‑s.
21 Xiaʼan‑s nuu‑i:
—Na kachi Ianyuux,
kixi‑da ɨnka vuelta.
Ku jaʼan‑ro —kuu‑s,
xiaʼan‑s.
Ijan dada n‑ndeé ntuku‑s barcu te n‑ndee‑s Éfeso.
Te juan nuʼu‑s Cesarea.
Ijan dada n‑ndee‑s ijan, te
22 juan nuʼu ntuku‑s Jerusalén xa kotoniʼni‑s ñayiu kukanu ini Jesucristu ijan.
Ijan dada juan ndixi‑s Antioquía.
23 Naʼa n‑xo tuu‑s ijan.
Ijan dada n‑kee ntuku‑s xa kixi‑s ɨnka vuelta ntaka ñuu xndatuu región Galacia xiʼin Frigia xa kotoniʼni‑s ñayiu kukanu ini Jesucristu xndaxio ijan.
N‑jaʼan‑s nuu ñayiu ka kukanu ini Jesucristu xa na kukanu ini naʼi‑i‑ia,
te vaʼa ka n‑ka kukanu ini‑i‑ia.
24 Tiempu ijan n‑xee ɨɨn se kuu yatnuʼu Israel Éfeso.
Apolos nani‑s.
N‑xe kotuu‑s Alejandría.
Tuʼa vaʼa‑s,
te vaʼa katnaʼa tnuʼu jaʼan‑s.
Vaʼa tuʼa‑s tnuʼu Ianyuux yodotnuni
25 chi n‑dakuaʼa ñaʼa ñayiu,
te n‑kutnuni ini‑s.
Dɨuni dakuaʼa‑s ñayiu.
N‑kakuneʼe‑s tnuʼu‑ia,
te n‑jaʼan‑s xiʼin nde yɨkɨ nde tuchi‑s.
Kakuneʼe‑s xa n‑kida Jesús,
te jaʼan‑s na n‑kuu na n‑xino,
ko diko ni xa n‑dajuendute Sua ñayiu n‑ka natu ini xa n‑ka kida‑i kuechi xini‑s.
Ñatu xini‑s xa dɨuni keé ñaʼa Espíritu Ianyuux.
26 N‑kixeʼe Apolos xa jaʼan‑s nuu ñayiu ka kuu yatnuʼu Israel xiti veñuʼu‑i,
te ña n‑yuʼu‑s.
Nuu n‑teku Áquila xiʼin Priscila xa n‑jaʼan‑s,
n‑ka kana‑ña‑s,
te n‑ka dakuaʼa‑ña‑s xa na kutnuni vaʼa ka ini‑s tnuʼu Ianyuux yodotnuni.
27 N‑jaʼan Apolos xa kixi‑s distrito Acaya,
te n‑ka jaʼan ñayiu kukanu ini Jesucristu xa io vaʼa ni xa kixi‑s.
N‑ka kidavaʼa ñayiu ka xeʼen veñuʼu ijan ɨɨn tutu vaxi nuu ñayiu ka kukanu ini Jesucristu xndaxio Acaya xa na kunini koio‑i xa jaʼan Apolo.
Nu n‑kixee‑s Acaya,
ndeʼe n‑chindee‑s ñayiu ijan xa kutnuni ka ini‑i tnuʼu Ianyuux.
Xa daa nga n‑kida Ianyuux xa n‑ka kukanu ini‑i Cristu.
Daa n‑kida‑ia chi vaʼa‑ia.
28 N‑xo ndatnuʼu‑s xiʼin se ka kuu yatnuʼu Israel nuu ka nataka‑s.
N‑jantnaʼa tnuʼu‑s xiʼin‑s.
N‑kaʼu ndodo‑s tnuʼu Ianyuux kakuneʼe Jesús,
te n‑dandeʼa‑s‑sɨ nuu yodotnuni xa dɨu‑ia kuu Cristu.
N‑kunuu tnuʼu‑s chi n‑xaʼnu‑s tnuʼu ñayiu ijan,
te n‑ka jandixa‑i.