N‑dakuaʼa Spalu xiʼin Silas ñayiu ñuu Tesalónica
17
Do Anfípolis xiʼin Apolonia ka kixi Spalu xiʼin Silas xa n‑ka kixee‑s ñuu nani Tesalónica nuu io ɨɨn veñuʼu ñayiu Israel.
2 Nani xko kida Spalu ntnaʼa sabado nuu n‑xo xeʼen‑s,
dani n‑kida‑s Tesalónica.
N‑xo tuu‑s ñuu ijan oko kɨu,
te ndruni sabado n‑xeʼen‑s veñuʼu ñayiu Israel.
N‑ndatnuʼu‑s xiʼin ñayiu Israel,
te n‑kakuneʼe‑s tnuʼu Ianyuux yodotnuni.
3 N‑xian tnuʼu‑s‑yɨ xa n‑xio xa ndaʼu yaʼa Cristu te na yaʼa xa kuu‑ia nandoto‑ia.
N‑kaʼu ndodo‑s nuu‑i nuu daa yodotnuni.
Te n‑jaʼan ka‑s:
—Cristu kuu Jesús,
Ia kakuneʼe‑da.
4 N‑ka jandixa dava ñayiu ka kuu yatnuʼu Israel xiʼin kueʼe ñayiu Grecia ka jandixa Ianyuux xiʼin kueʼe ñá ndandɨʼɨ xa n‑jaʼan Spalu,
te n‑ka xeka tnaʼa‑i xiʼin‑s xiʼin Silas.
5 Xaxeʼe xaʼa n‑ka kukuedi ini dava se ka kuu yatnuʼu Israel ña n‑ka jandixa Jesucristu,
te n‑ka dataka‑s se loko ka xikonuu ni nga nuu yaʼu xa n‑ka kida‑s xa n‑ka ndandita ñayiu nuu se ka taxnuni,
te n‑ka kana n‑ka kau‑i.
N‑ka kɨu ndeʼe se Israel jan veʼe Jasón xa ka nanduku‑s Spalu xiʼin Silas xa kineʼe ñaʼa koio‑s te kandeka ñaʼa koio‑s jɨʼɨn nuu ñayiu n‑ka taka,
6 ko ñayo‑s n‑ka naniʼi ñaʼa.
Te n‑ka tnɨɨ‑s Jasón xiʼin dava ñayiu n‑ka kukanu ini Jesucristu.
Ndeka ñaʼa juexa‑s juaʼan nuu juxtixia ñuu jan.
Ka kana‑s:
—Se yaʼa ka kida xa ka ndandita ñayiu ñuñayiu nuu se ka taxnuni nuu‑i,
te n‑ka kixee‑s xa dani kada‑s yaʼa,
7 te n‑xeka ñaʼa se nani Jasón ya veʼe‑s.
Ñayo‑s ka jandixa xa taʼu tniu emperador Roma chi ka jaʼan‑s xa io ɨnka se taxnuni.
“Jesús nani‑s”,
ka jaʼan‑s —ka kuu‑s,
ka xiaʼan‑s nuu juxtixia jan.
8 Nu n‑ka teku juxtixia xiʼin ñayiu xyuku ijan tnuʼu ijan,
n‑ka kana n‑ka kau‑i.
9 N‑ka chiyaʼu Jasón jan xiʼin dava ka ñayiu kukanu ini Jesucristu,
te n‑ka dayaa ñaʼa juxtixia.
N‑ka dakuaʼa Spalu xiʼin Silas ñayiu Berea
10 Nu n‑kunee,
te hora ijan n‑ka xanu ichi ñayiu ka kukanu ini Jesucristu Spalu xiʼin Silas xa vaxi koio‑s ñuu Berea.
Nu n‑ka kixee‑s ijan,
juaʼan koio‑s veñuʼu ñayiu ka kuu yatnuʼu Israel.
11 Ñayiu ka kuu yatnuʼu Israel xndaxio ijan,
unu vaʼa ka‑i dada ñayiu xndaxio Tesalónica.
N‑ka xe ini‑i tnuʼu Ianyuux n‑jaʼan Spalu,
te n‑ka kuvaʼa anu‑i xa n‑ka teku‑i.
Juan kɨu juan ñuu n‑ka xo kaʼu‑i libru yodotnuni tnuʼu‑ia xa jini‑i nuu ndaa kuu xa ka jaʼan Spalu xiʼin Silas a ñaʼa.
12 Te kueʼe ñayiu ka kuu daʼya dana Israel n‑ka kukanu ini Jesús.
Dɨuni kueʼe seyɨɨ xiʼin ñá ndandɨʼɨ xndaxio Grecia n‑ka kukanu ini‑ia.
13 N‑ka teku ñayiu ka kuu yatnuʼu Israel ña ka kukanu ini Jesucristu xndaxio Tesalónica xa jaʼan Spalu tnuʼu Ianyuux nuu ñayiu Berea,
te n‑ka kixee‑i Berea xa n‑ka daka niʼno‑i ñayiu ijan,
te n‑ka kana n‑ka kau ñayiu jan.
14 Hora ijan ni n‑ka xanu ichi ñayiu ka kukanu ini Jesucristu Spalu xiʼin se ka kunduu xiʼin‑s xa juaʼan koio‑s yuʼu mar.
Silas xiʼin Timoteo,
n‑ka ndoo‑s Berea.
15 N‑xe ndeka ñaʼa se n‑ka kunduu xiʼin Spalu Atenas,
te n‑jaʼan Spalu nuu‑s xa na juña tnuʼu koio‑s Silas xiʼin Timoteo xa nuniʼno ni na jɨʼɨn‑s Atenas xa nanitnaʼa‑s xiʼin Spalu ijan,
te n‑ka nangondita se ijan.
N‑dakuaʼa Spalu ñayiu Atenas
16 Nɨni ndetu Spalu xa xee Silas xiʼin Timoteo Atenas yo n‑kiti ini‑s xa n‑xini‑s xa nituʼu xiti ñuu jan xdika santu xndeñuʼu ñayiu Atenas jan.
17 N‑xo ndatnuʼu‑s xiʼin ñayiu ka kuu yatnuʼu Israel xiʼin ñayiu ñatu ka kuu yatnuʼu Israel ka jandixa Ianyuux xiti veñuʼu ñayiu Israel.
Ntdantuʼu kɨu n‑xo ndatnuʼu‑s xiʼin davaʼa nga ñayiu n‑xo taka nuu yaʼu.
18 N‑ka nukuita se ka tuʼa vaʼa xa ndatnuʼu‑s xiʼin Spalu.
Ná ka xani ini ñayiu xyɨtnaʼa nuu ñayiu ka kuu epicúreo ka xani ini dava‑s,
te dava‑s ka xani ini ná ka xani ini ñayiu xyɨtnaʼa nuu ñayiu ka kuu estoico,
te n‑ka xiaʼan tnaʼa se ijan:
—¿Nax jaʼan se yaʼa xa yo kueʼe jaʼan‑s?,
te ñatu katnaʼa tnuʼu‑s u.
Te dava‑s n‑ka jaʼan:
—Axa va se ka kakuneʼe ɨnka ntuku ianyuux kuu‑s —ka kuu dava se ka tuʼa vaʼa jan.
Xaʼa n‑ka jaʼan‑s xaxeʼe xa n‑kakuneʼe Spalu xa n‑kida Jesús xiʼin xa n‑kakuneʼe‑s xa n‑nandoto‑ia.
19 Ijan dada xndeka‑s Spalu juaʼan Areópago nuu ka nataka se ka taxnuni.
Te ka xiaʼan‑s:
—¿Vatuka kachitnuʼu ñaʼa‑n nax kuu xa kakuneʼe‑n a?,
chi ñayo‑da ka xini xijan.
20 Naka tuku ka xani ini‑n.
Ka juini‑da xa kutnuni ini‑da nax kuu xa jaʼan‑n ka kuu se ka tuʼa vaʼa,
—ka xiaʼan‑s nuu Spalu.
21 Daa n‑ka jaʼan‑s chi se Atenas xiʼin setoʼo xtuu ijan,
mee ni xa dijan n‑ka teku‑s xiʼin xa dijan n‑ka xani ini‑s ka kakuneʼe‑s.
Tnuʼu ndichi kuu.
22 N‑ndojuiin Spalu meʼñu se xyuku ijan,
te n‑jaʼan‑s:
—Ndixi xa ka kuu‑n se Atenas kunini koio‑n xa na jaʼan‑da.
N‑xikonuu‑da ñuu‑n te n‑xini‑da ianyuux xndeñuʼu‑n.
N‑xini‑da xa kueʼe vuelta ka ndadakaʼnu‑n‑ia.
23 Dɨuni n‑xini‑da xa duʼa duʼa xdika santu ka chiñuʼu‑n nuu n‑xikonuu‑da.
Dɨuni n‑xini‑da kueʼe altar.
Ɨɨn altar yodotnuni tnuʼu yaʼa:
“Na ndadakaʼnu‑ro Ianyuux ña ka xini‑ro.”
Ianyuux kakuneʼe‑da nuu‑n;
ñayo‑n ka xini‑ia,
te Ia ijan ka ndadakaʼnu‑n.
24 ʼKuu‑ia Ianyuux n‑kidavaʼa ñuñayiu xiʼin ntdaa xa io ñuñayiu.
Kuu‑ia xtoʼo andɨu xiʼin ñuñayiu.
Ñatu io‑ia veñuʼu ka kidavaʼa ñayiu,
25 ni ñatu ndoñuʼu xa kadavaʼa ɨɨn ñayiu ɨɨn xa kadavaʼa‑i xa kuu xiʼin‑ia,
chi mee‑ia kida xa xndito‑ro ntdaa‑ro.
Taxi‑ia tachi najuen tachi‑ro xiʼin ntdaa ka xa io.
26 ʼIdii ni seyɨɨ n‑kidavaʼa‑ia xa n‑kuu‑s taa‑ro xiʼin ntdaa ñayiu ñuñayiu xa koo koio‑ro,
te kutuu koio‑ro nituʼu ñuñayiu,
te n‑datnuni‑ia tiempo xtuu‑ro ntdaa‑ro xiʼin nuu kutuu koio‑ro.
27 Xaʼa n‑kida Ianyuux xa na nduku ini koio‑ro xa jini‑ro jundu kuu‑ia te kudana,
kutnuni ini‑ro jundu kuu‑ia,
chi xandaa xakuiti,
ñatu xika tuu‑ia.
28 Kida‑ia xa xndaxio‑ro te kanda‑ro.
Na jaʼan‑da xa n‑ka jaʼan dava se ñuu‑n,
se n‑ka xo jaʼan poesía:
“Daʼya Ianyuux ka kuu‑ro chi n‑kidavaʼa ñaʼa‑ia.”
29 Xaxeʼe xa ka kuu‑ro daʼya‑ia,
ka kuu‑ro ná kuu‑ia;
xijan kuu xa maxku kani ini‑ro xa kuu‑ia oro a plata a yuú na ka xani ini ñayiu xa kaa‑ia.
Ka kidavaʼa‑i xijan,
ko ñadu xijan kuu Ianyuux ndixa.
30 Ña n‑chinuu Ianyuux ñayiu xanaʼa,
ñayiu ña n‑kutnuni ini jundu kuu‑ia,
ko vitna taʼu tniu‑ia xa ntdandituʼu ñayiu ñuñayiu natu ini koio‑i xa n‑ka kida‑i kuechi.
31 N‑xantuu Ianyuux kɨu ndadandaa‑ia kuechi n‑ka kida ñayiu,
te ndaa kada‑ia.
Kada‑ia xa xaʼa kada ɨɨn se kada.
Kuu‑s Ia n‑kaxí dɨɨn‑ia.
Ka xini‑da xa daa yaʼa chi n‑nadandoto Ianyuux‑ia —kuu Spalu,
xiaʼan‑s.
32 Nu n‑ka teku se xyuku ijan xa nandoto koio ndɨyɨ,
dava‑s n‑ka xakundee Spalu,
ko dava‑s n‑ka jaʼan:
—Ɨnka kɨu dada na kunini koio‑da xa jaʼan‑n de.