N‑xeka tnaʼa Timoteo xiʼin Spalu xiʼin Silas
16
Ijan dada n‑ka kixee‑s ñuu Derbe xiʼin Listra.
Ijan io ɨɨn se kukanu ini Jesucristu nani Timoteo.
Dɨʼɨ‑s kuu ɨɨn ñá kuu yatnuʼu Israel.
Dɨuni kukanu ini‑ña Jesucristu.
Taa‑s kuu se Grecia.
2 Ka jaʼan ñayiu ka kukanu ini Jesucristu ñuu Listra xiʼin Iconio xa vaʼa Timoteo.
3 Xaxeʼe xa n‑juini Spalu xa kunduu‑s xiʼin Timoteo n‑jaʼan‑s xa taʼnde ndodo ñɨɨ nuu ii‑s xa maxku tu uʼu ñayiu ka kuu yatnuʼu Israel xndaxio ijan chi ntdaa‑i ka xini xa taa‑s kuu se Grecia.
4 Ntdaa ñuu nuu n‑ka yaʼa‑s,
n‑ka xian tnuʼu‑s ñayiu ka kukanu ini Jesucristu nax n‑ka kida ɨnuu se n‑tundaʼa‑ia xiʼin sexaʼnu ka taxnuni nuu ñayiu ka kukanu ini‑ia io Jerusalén.
Dɨuni n‑ka jaʼan‑s xa na jandixa koio‑i xijan.
5 Xijan kuu xa n‑ka kukanu ini ka ñayiu jan Jesucristu,
te kɨu xiʼin kɨu n‑ka kɨu tnaʼa ka ñayiu nuu‑i.
N‑tutuku Spalu xa n‑xini‑s ɨɨn se Macedonia
6 Xaxeʼe xa ña n‑juini Espíritu Ianyuux xa jaʼan koio‑s tnuʼu‑ia ñuu kuechi provincia nani Asia,
xijan kuu xa n‑ka kixee‑s región Frigia xiʼin Galacia.
7 Ijan dada n‑ka kixee‑s distrito Misia.
N‑ka juini‑s xa jɨʼɨn koio‑s región Bitinia,
ko ñatu n‑xejoon Espíritu Jesús xa jɨʼɨn koio‑s ijan.
8 N‑ka yaʼa‑s dava ñuu kuechi Misia,
te n‑ka kixee‑s ñuu nani Troas.
9 Xakuaa ijan n‑kida Ianyuux xa n‑xini Spalu ɨɨn se distrito Macedonia xa nujuiin‑s te n‑jaʼan‑s:
“Xee‑n Macedonia te chindee ñaʼa‑n ntdaa daña,
ñayiu xndaxio ijan.”
10 Nu n‑yaʼa xa n‑tutuku Spalu xa n‑xini‑s ɨɨn se n‑xini‑s,
te hora ijan ni n‑ka kidatuʼa‑da mee‑da xiʼin‑s xa kixi koio‑da Macedonia.
N‑ka kutnuni ini‑da xa Ianyuux n‑kana ñaʼa xa na jaʼan koio‑da nuu ñayiu ñuu ijan nax kada‑i xa nanitaʼu‑i.
Xa n‑yaʼa Spalu xiʼin Silas ñuu Filipos
11 N‑ka keé‑da barcu yuʼu mar Troas,
n‑ka yaʼa ndaa‑da nde Samotracia,
te kɨu kuu uu n‑ka kixee‑da ñuu Neápolis.
12 N‑ka ndee‑da Neápolis te n‑ka kixee‑da ñuu Filipos,
ñuu kunuu nuu ñuu kuechi xndatuu distrito Macedonia.
Jeen kɨu n‑ka xo tuu‑da ijan.
13 Kɨu ndetatu ñayiu ka kuu yatnuʼu Israel n‑ka xeʼen‑da yuʼu ndute xika deʼva yuʼu ñuu Filipos nuu ka xko nataka ñayiu ka kuu yatnuʼu Israel xndaxio ijan xa ka xijan taʼu‑i chi kuu tnuʼu xa ijan ka nataka‑i.
N‑ka nukoo‑da,
te n‑ka dakuaʼa‑da ñadɨʼɨ xyuku ijan.
14 Ñá Tiatira kuu ɨɨn‑ña,
te Lidia nani‑ña.
Diko‑ña daʼma tndee te yaʼu.
Xko ndadakaʼnu‑ña Ianyuux.
N‑kida‑ia xa n‑xo nini vaʼa‑ña tnuʼu n‑jaʼan Spalu.
15 Te n‑xendute‑ña xiʼin ntdaa familia‑ña.
Ijan dada n‑jaʼan‑ña nuu‑da ntdaa‑da:
—Nux ka xani ini‑n xa xandaa xakuiti kukanu ini‑da Jesús,
Ia kuu Xtoʼo‑ro,
na jɨʼɨn‑ro veʼe‑da,
te ndoo koio‑n ijan —kuu‑ña.
Juexa n‑kida‑ña xa n‑ka ndoo‑da veʼe‑ña.
N‑ka kɨundiʼu Spalu xiʼin Silas vekaa
16 Ɨɨn vuelta ka xeʼen‑da nuu ka xijan taʼu‑da xiʼin‑ña nuu Ianyuux,
te n‑ka xe juntnaʼa‑da xiʼin ɨɨn dichi dɨʼɨ ñuʼu ñaʼa ɨɨn espíritu kida xa xinitnuni‑i.
Kueʼe tvini n‑ka xo niʼi ñayiu ka kuu xtoʼo‑i.
17 N‑xe kuitandijun ñaʼa‑i ntdaa‑da xiʼin Spalu,
te kana‑i:
—Te yaʼa ka kuu te ka xinokuechi nuu Ianyuux ndixa tuu andɨu,
Ia taxnuni ka,
te n‑ka kixee‑te xa jaʼan‑te nuu‑n nax kada koio‑n xa nanitaʼu‑n —kuu‑i,
kana‑i.
18 Jeen kɨu n‑xo kandijun ñaʼa‑i,
te daa n‑xo kana‑i.
Nanga ɨnka vuelta daa kana‑i te n‑kiti ini Spalu,
te n‑ngokoo‑s,
te n‑jaʼan‑s nuu espíritu ñuʼu anu‑i:
—Xaxeʼe xa n‑tundaʼa ñaʼa Jesucristu taʼu tniu‑r nuu‑n:
“Ta ndee anu‑i” —kuu Spalu,
xiaʼan‑s.
Te hora ijan ni n‑dandoo espíritu jan dichi ijan.
19 Nu n‑ka xini xtoʼo‑i xa ma kuu ka xa niʼi‑s tvini xaxeʼe xa xinitnuni‑i,
n‑ka tnɨɨ‑s Spalu xiʼin Silas te xndeka ñaʼa‑s juaʼan nuu yaʼu kaʼnu nuu xyuku juxtixia.
20 Ijan dada xndeka ñaʼa‑s juaʼan nuu juexi.
Ka xiaʼan‑s:
—Yo ka daka niʼno se ka kuu yatnuʼu Israel ya ñayiu ñuu‑ro te n‑kida‑s xa n‑ka ndandita‑i nuu se ka taxnuni ñuu‑ro
21 chi ɨnka mudu ka dakuaʼa‑s‑yɨ.
Mayo‑ro jandixa xijan,
ni ma tnɨɨ‑ro mudu‑s chi xndaxio tutu‑ro xa ka kuu‑ro ñayiu romano.
22 N‑ka nataka ñayiu ñuu jan te dani n‑ka jaʼan‑i tuku.
Ijan dada n‑ka taʼu tniu juexi xa dita koio policía daʼma Spalu xiʼin Silas xa janñaʼa koio‑s vara.
23 Nu n‑yaʼa xa ndeʼe n‑ka janñaʼa‑s,
n‑ka chindiʼu ñaʼa‑s vekaa.
N‑ka taʼu tniu juexi nuu se xndee vekaa xa vaʼa na kundee koio‑s Spalu xiʼin Silas xa na ñaʼa kee koio‑s.
24 Nu n‑ka teku se xndee vekaa xa duʼa n‑taʼu tniu nuu‑s,
n‑ka chindiʼu‑s Spalu xiʼin Silas ɨɨn cuartu xiti vekaa kaʼnu,
te n‑ka chiʼi‑s xeʼe‑s yutnu kuu cepo xa maxku kunu koio‑s.
25 Nu n‑kuu niu dava,
n‑ka xijan taʼu Spalu xiʼin Silas nuu Ianyuux.
Dɨuni n‑ka xita‑s xa ndadakaʼnu‑s‑ia.
Nɨni ka nakuetu‑s xnini dava se xyɨndiʼu vekaa jan.
26 Dana ini ndeʼe n‑tnaa xa nde cimientu vekaa jan n‑kanda,
te hora ijan ni najaan mee ntdaa yekaa jan te n‑ka nandaxi mee cadena xndijun xeʼe ntdaa se xyɨndiʼu vekaa jan.
27 Nu n‑ndoto ɨɨn se ndee vekaa jan,
n‑xini‑s xa xnune yekaa jan,
te n‑tava‑s espada‑s xa kaʼni‑s mee‑s,
chi n‑xani ini‑s xa n‑ka xino se xyɨndiʼu jan,
28 ko ña n‑kuu xaxeʼe xa n‑kana Spalu xa xiaʼan‑s nuu‑s:
—Maxku ñaʼa kada‑n mee‑n,
chi ntdaa‑da xyuku naʼi.
29 Ijan dada n‑xijan se ndee vekaa jan ɨɨn xa kutnuni,
te n‑kendava‑s.
Juaʼan‑s cuartu Spalu xiʼin Silas,
te n‑kɨu‑s.
N‑nɨʼɨ‑s xaxeʼe xa n‑yuʼu‑s,
te n‑xe juiin xiti‑s nuu‑s nduu‑s.
30 N‑kineʼe‑s Spalu xiʼin Silas,
te n‑xijan tnuʼu‑s‑sɨ:
—¿Nax kada‑da xa nanitaʼu‑da u?
31 Xiaʼan Spalu xiʼin Silas:
—Kukanu ini‑n Jesús,
Ia kuu Xtoʼo‑da,
te nanitaʼu‑n xiʼin ñayiu xtuu nukee nuveʼe‑n.
32 Te n‑ka jaʼan‑s tnuʼu Ianyuux nuu se ndee vekaa jan xiʼin nuu ntdaa ñayiu xtuu veʼe‑s.
33 Xakuaa ijan n‑najini se ndee vekaa jan nuu n‑tnukueʼe Spalu xiʼin Silas.
Ijan dada n‑xendute‑s xiʼin ntdaa familia‑s.
34 Ijan dada n‑ka kɨu‑s ntdaa‑s xiʼin Spalu xiʼin Silas veʼe‑s,
te n‑xiaʼan‑s xa n‑ka xaxi‑s.
Yo n‑ka kuvete se ndee vekaa jan xiʼin ñayiu xtuu nukee nuveʼe‑s xaxeʼe xa n‑ka kukanu ini‑s Jesucristu.
Ijan dada n‑ka nangondita‑s vekaa.
35 N‑tuu datne,
te n‑ka tundaʼa juexi policía‑s xa na dayaa‑s Spalu xiʼin Silas.
36 N‑ka xee‑s ijan,
te n‑ka xian tnuʼu‑s Spalu xa n‑jaʼan juexi.
Ka xiaʼan‑s:
—N‑ka tundaʼa ñaʼa se ka kuu juexi xa dayaa ñaʼa‑da nduu‑n.
Xijan kuu xa ta kee‑n,
te jɨʼɨn‑n xandaa xavatu.
37 Xiaʼan Spalu nuu policía jan:
—Ase xá n‑ka janñaʼa,
daña se xndaxio tutu xa ka kuu‑da se romano,
nuu xyuku ñayiu te n‑ka chindiʼu ñaʼa‑s vekaa,
te ña n‑xijan tnuʼu ñaʼa‑s kiʼna ka nax n‑ka kida‑da.
Te vitna nax kuu xa ka juini‑s xa dana ini dayaa ñaʼa koio‑s.
Vaa ñaʼa xu.
Na kixi koio mee‑s te na kineʼe ñaʼa‑s.
38 Ka nuʼu policía,
te n‑ka najani‑s tnuʼu yaʼa nuu se ka kuu juexi.
Yo n‑ka yuʼu‑s xa n‑ka teku‑s xa se romano ka kuu Spalu xiʼin Silas.
39 N‑ka xeʼen juexi vekaa xa jaʼan koio‑s xa na taxkanu ini Spalu xiʼin Silas xa daa n‑ka kida ñaʼa‑s xiʼin xa na kee koio‑s ñuu jan.
40 Nu n‑kee Spalu xiʼin Silas vekaa jan,
n‑ka xeʼen‑s veʼe Lidia nuu ka nataka ñayiu ka kukanu ini Jesucristu.
N‑ka jaʼan‑s xa na kokaʼnu anu‑i.
Te n‑ka ndee‑s ñuu Filipos.