N‑ka nataka ñayiu ka kukanu ini Jesucristu Jerusalén, te n‑ka ndatnuʼu‑i nax kada‑i
15
Tiempu ijan n‑ka kixee ka se Israel Antioquía.
N‑ka kixeʼe‑s xa jaʼan‑s nuu se ka kukanu ini Jesucristu xa ma nanitaʼu koio‑s nuxa ma juejoon‑s xa taʼnde ndodo ñɨɨ nuu ii‑s ná n‑chidotnuni Moisés.
2 N‑ka jantnaʼa tnuʼu Spalu xiʼin Bernabé xiʼin se ijan xaxeʼe xa duʼa ka jaʼan‑s.
Xaxeʼe xa ñatu n‑ka kuu ɨnuu‑s,
xijan kuu xa n‑ka nduku‑s dava se xyuku ijan xa jɨʼɨn koio‑s xiʼin Spalu xiʼin Bernabé Jerusalén xa kada ɨnuu koio‑s xiʼin dava ka se n‑tundaʼa ñaʼa Jesús xiʼin sexaʼnu ka taxnuni nuu ñayiu ka kukanu ini Jesucristu ñuu Jerusalén nuu janda koo.
3 Ijan dada n‑ka tundaʼa‑s‑sɨ xa juaʼan koio‑s ijan.
Nu n‑ka yaʼa‑s región Fenicia xiʼin distrito Samaria,
n‑ka najani‑s nuu ñayiu ka kukanu ini Jesucristu io ijan xa n‑ka dandoo ñayiu ñatu ka kuu yatnuʼu Israel kuechi n‑ka kida‑i,
te n‑ka kukanu ini‑i Jesucristu.
Nu n‑ka teku ñayiu ijan xaʼa,
yo n‑ka kuvete‑i.
4 Nu n‑ka xee Spalu xiʼin Bernabé Jerusalén,
n‑ka kuvaʼa anu ñayiu ka kukanu ini Jesucristu jan xiʼin se n‑tundaʼa ñaʼa Jesús xiʼin sexaʼnu ka taxnuni nuu ñayiu ka kukanu ini‑ia nuu‑s ɨɨn ɨɨn‑s.
Ijan dada n‑ka najani‑s xa yo n‑kidatniu Ianyuux na n‑ka kida‑s tniu‑ia.
5 N‑ka ndojuiin dava se fariseu ka kukanu ini Jesucristu,
te n‑ka jaʼan‑s:
—Se ka kukanu ini Jesucristu te ñatu kuu‑s yatnuʼu Israel,
io xa taʼnde ndodo ñɨɨ nuu ii‑s te dɨuni io xa jandixa‑s ley n‑chidotnuni Moisés.
6 Ijan dada n‑ka nataka ntuku se n‑tundaʼa ñaʼa Jesús xiʼin sexaʼnu ka taxnuni nuu ñayiu ka kukanu ini Jesucristu xa kada ɨnuu‑s nuu janda koo xaʼa.
7 Nu n‑yaʼa xa naʼa ka ndatnuʼu‑s,
ijan dada n‑ndojuiin Spedru te n‑jaʼan‑s:
—Dito,
Ñani,
xnaʼa mee‑n xa xá n‑kunaʼa n‑kaxi ñaʼa Ianyuux daña nuu‑n xa jaʼan‑da tnuʼu‑ia nuu ñayiu ñatu ka kuu yatnuʼu Israel xa na jandixa koio‑i Jesucristu.
8 Kida Ianyuux,
Ia xini janda kuu anu ñayiu,
xa n‑ka tuu ini dava ñayiu ñatu kuu ñayiu Israel xa xe ini‑ia‑i chi n‑kida‑ia xa n‑keé ñaʼa Espíritu‑ia ná n‑kida‑ia xa n‑keé ñaʼa Espíritu‑ia roo.
9 Ñatu jaʼan‑ia xa vaʼa ka roo dada ñayiu ijan chi n‑kida‑ia xa n‑ka ndunini‑i xaxeʼe xa ka kukanu ini‑i Jesucristu.
10 Maxku ku kototnuni‑n Ianyuux xa jini‑n nu jɨn tnaʼa tnuʼu‑ia a ñaʼa.
Ka jaʼan‑n xa na jandixa koio ñayiu ñatu kuu yatnuʼu Israel n‑ka kukanu ini Jesucristu ɨɨn xa ni roo,
ni xixitna‑ro ña n‑ka jandixa.
11 Nani n‑dananitaʼu duʼa ñaʼa Taa‑ro Ianyuux xaxeʼe xa vaʼa‑ia,
dani n‑dananitaʼu duʼa‑ia ñayiu ijan —kuu Spedru,
xiaʼan‑s.
12 Ijan dada ñatu n‑ka jaʼan ka‑s.
Te nanii nga n‑ka xo nini‑s xa n‑ka jaʼan Bernabé xiʼin Spalu.
N‑ka najani Bernabé xiʼin Spalu xa n‑kida Ianyuux xa n‑ka kida‑s milagru xa kundeʼa ñayiu ñatu ka kuu yatnuʼu Israel.
13 Nu ndɨʼɨ n‑jaʼan‑s,
n‑jaʼan Jacob:
—Dito,
Ñani,
kunini koio‑n xa na jaʼan‑da.
14 N‑najani Simón janda n‑kixeʼe Ianyuux xa kundaʼu ini‑ia ñayiu ñatu ka kuu yatnuʼu Israel,
te n‑kudaʼya‑ia‑i.
15 N‑nakaxtnaʼa xa n‑najani‑s xiʼin xa n‑ka chidotnuni se n‑ka xo jaʼan tnuʼu Ianyuux nuu ñayiu.
Duʼa n‑chidotnuni ɨɨn‑s:
16 Jaʼan Ianyuux:
“Na yaʼa xaʼa te xee ntuku‑r te kada‑r xa taxnuni daʼya dana David ɨnka vuelta.
Kuenda kɨu veʼe jungoio ka kuu daʼya dana‑s.
Ndadavaʼa xee‑r xa n‑tɨu.
Ndoneʼe xee‑r xa jungoio.
17 Xaʼa kada‑r xa na kuaʼa najini dava ka ñayiu xndaxio nación ñuñayiu jundu kuu‑r.
Te kundeka‑r‑yɨ.
Duʼa jaʼan mee‑r,
Ia kada xaʼa”,
kuu‑ia,
n‑jaʼan‑ia.
18 Xa ama n‑jaʼan‑ia xaʼa.
19 ʼÑayiu ñatu ka kuu yatnuʼu Israel,
te n‑ka dandoo‑i kuechi n‑ka kida‑i,
te jandixa‑i Ianyuux,
tu ini‑da xa ñatu io vaʼa xa taʼu tniu‑ro nuu‑i xa jandixa koio‑i ntdaa ley Moisés chi ma ndaku‑i xa jandixa‑i.
20 Diko ni xaʼa na chidotnuni‑ro nuu tutu jɨʼɨn nuu‑i xa na jandixa‑i:
Maxku kaxi koio‑i kuñu n‑yodo yuku nuu altar‑yɨ.
Maxku kava seyɨɨ,
ni ñadɨʼɨ xiʼin ñayiu ñatu n‑tnundaʼa xiʼin‑s.
Dɨuni maxku kaxi‑i kuñu kɨtɨ n‑xeʼne,
ni maxku kaxi koio‑i nɨñɨ kɨtɨ
21 chi xa daa nga,
ka kaʼu ndodo ñayiu ka xeʼen veñuʼu jan xaʼa ntnaʼa ɨɨn ɨɨn ñuu nuu xndatuu veñuʼu ñayiu Israel ntnaʼa kɨu ndetatu‑ro —kuu Jacob,
xiaʼan‑s.
N‑ka tundaʼa ñayiu n‑ka nataka Jerusalén carta nuu ñayiu ka kukanu ini Jesucristu ñatu ka kuu ñayiu Israel
22 N‑ka kendoo se n‑tundaʼa ñaʼa Jesús xiʼin sexaʼnu ka taxnuni nuu ñayiu ka kukanu ini Jesucristu xiʼin ntdaa ñayiu ka kukanu ini‑ia xa kaxí‑s se tundaʼa‑s jɨʼɨn xiʼin Spalu,
Bernabé Antioquía.
N‑ka kaxí‑s Silas xiʼin Judas.
Dɨuni nani Judas Barsabás.
Ka kuu‑s se ndandɨʼɨ nuu ñayiu ka kukanu ini Jesucristu.
23 Duʼa n‑ka chidotnuni‑s nuu carta n‑ka tundaʼa‑s:
“Dito,
Ñani,
xa ka kuu‑n ñayiu ka kukanu ini Jesucristu,
te xndaxio‑n Antioquía,
Siria xiʼin Cilicia.
Ndajan tnuʼu ñaʼa ntdaa daña,
se n‑tundaʼa ñaʼa Jesús xiʼin sexaʼnu ka taxnuni nuu‑da.
24 N‑ka teku tnuʼu‑da xa dava ñayiu xndaxio yaʼa n‑ka xee dian,
te ka daka niʼno ñaʼa‑i chi tuku ka dakuaʼa ñaʼa‑i.
Ñayo‑da n‑tundaʼa‑i.
25 Xijan kuu xa n‑ka kida ɨnuu‑da xa n‑ka kaxi‑da se tundaʼa koio‑da juan xee dian xiʼin Bernabé xiʼin Spalu,
se unu mani xiʼin‑ro.
26 Ña tuu nax viʼi koio se yaʼa vida‑s juini na kuú‑s xaxeʼe Jesucristu,
Ia kuu Xtoʼo‑ro.
27 N‑ka tundaʼa‑da Judas xiʼin Silas juan xee dian xa na kachitnuʼu ñaʼa koio‑s xaʼa.
28 Ntdaa daña xiʼin Espíritu Ianyuux ka xani ini xa maxku taʼu tniu‑da xa jandixa koio‑n ɨɨn xa ma ndaku‑n xa jandixa‑n.
29 Xa io xa jandixa koio‑n kuu xaʼa:
Maxku kaxi koio‑n kuñu n‑yodo yuku nuu santu.
Maxku kaxi koio‑n nɨñɨ,
ni kuñu kɨtɨ n‑ka xeʼne.
Maxku kava seyɨɨ,
ni ñadɨʼɨ xiʼin ñayiu ñatu n‑tnundaʼa xiʼin‑s.
Nuxa na jandixa koio‑n ntdaa xaʼa kee koio‑n xavaʼa”,
kuu tutu n‑ka chidotnuni‑s.
30 Ijan dada n‑ka xanu ichi‑s Bernabé xiʼin Spalu xiʼin se n‑ka kaxí‑s xa vaxi koio‑s Antioquía.
Nu n‑ka xee‑s ijan nadataka‑s ntdaa ñayiu ka kukanu ini Jesucristu,
te n‑ka xiaʼan‑s carta jan.
31 Nu n‑ka kaʼu ñayiu ka kukanu ini Jesucristu carta jan,
n‑ka teku‑i tnuʼu kanu ini xyodotnuni,
te n‑ka kuvete‑i.
32 Naʼa n‑ka jaʼan Judas xiʼin Silas nuu ñayiu xyuku ijan xa na kukanu ini ka‑i Jesucristu te n‑ka xiaʼan‑s nuu‑i xa na kokaʼnu anu koio‑i.
Dɨuni se ka jaʼan nuu ñayiu tnuʼu n‑jaʼan Ianyuux ka kuu‑s.
33-34 Jeen kɨu n‑ka ndoo‑s ijan.
Ijan dada n‑ka najanu ichi ñaʼa ñayiu ka kukanu ini Jesucristu io Antioquía jan,
te n‑ka jaʼan‑i xa na nuʼu koio‑s xandaa xavatu nuu se n‑ka tundaʼa ñaʼa.
35 Spalu xiʼin Bernabé n‑ka ndoo Antioquía,
te kueʼe ñayiu ka kukanu ini Jesucristu xndaxio ijan n‑ka dakuaʼa xiʼin‑s dava ka ñayiu ñuu jan.
N‑ka xo jaʼan‑s tnuʼu Ianyuux nuu‑i xa na nanitaʼu koio‑i.
Ñatu n‑kuu ɨnuu Spalu xiʼin Bernabé
36 N‑yaʼa tɨtnɨ kɨu te n‑jaʼan Spalu nuu Bernabé:
—Na nkoto‑ro ñayiu ka kukanu ini Jesucristu ntdaa ñuu xa n‑xeʼen‑ro nuu n‑dakuaʼa‑ro ñayiu tnuʼu Ianyuux nuu janda xtuu‑i.
37 N‑juini Bernabé xa kandeka koio ntuku‑s Sua kixi.
Dɨuni ka dandee ñayiu Sua ya Smarku.
Daa n‑juini Bernabé,
38 ko ñatu n‑juini Spalu xaxeʼe xa n‑dandoo ñaʼa‑s distrito Panfilia.
N‑nangondita Sua,
te ña n‑kandeka tnaʼa ka‑s xa kadatniu kaʼnu‑s.
39 N‑ka jantnaʼa tnuʼu Spalu xiʼin Bernabé chi ña n‑kuu ɨnuu‑s.
Nudɨɨn kixi ntuku‑s.
Ndeka naʼi Bernabé Smarku vaxi ntuku.
N‑ka keé‑s barcu xa vaxi ntuku‑s Chipre.
40 Spalu n‑kaxí Silas xa kunduu‑s xiʼin‑s.
N‑ka xijan taʼu ñayiu ka kukanu ini Jesucristu nuu Ianyuux xa na chindee‑ia‑s,
te n‑ka kee‑s ñuu Antioquía.
41 N‑ka kexio‑s Siria,
te n‑ka nxee‑s ñuu kuechi distrito Cilicia.
N‑ka jaʼan‑s tnuʼu Ianyuux nuu ñayiu ijan xa na kukanu ini koio ka‑i Jesucristu.