N‑ka xee Pablo xiʼin Bernabé ñuu Iconio
14
N‑ka xee‑s Iconio,
te n‑ka xeʼen‑s veñuʼu ñayiu Israel nani xko kida‑s xa dakuaʼa‑s ñayiu ijan.
Kueʼe ñayiu kuu yatnuʼu Israel xiʼin ñayiu Grecia n‑ka kukanu ini Jesucristu chi kaxi n‑ka jaʼan‑s.
2 N‑ka dajaʼan ñayiu ka kuu yatnuʼu Israel ña n‑ka kukanu ini Jesucristu ñayiu ñatu ka kuu yatnuʼu Israel jan xa jini uʼu‑i ñayiu ka kukanu ini Jesucristu.
3 Tɨtnɨ kɨu n‑ndoo Spalu xiʼin Bernabé ijan.
Ñatu n‑ka yuʼu‑s xa jaʼan‑s tnuʼu Ianyuux chi n‑ka kukanu ini‑s xa chindee ñaʼa‑ia.
N‑ka jaʼan‑s xa dananitaʼu Ianyuux ñayiu juini n‑kida‑i kuechi,
te n‑kida‑ia xa n‑ka kida‑s milagru xa jini ñayiu jan xa vaʼa‑ia.
4 Ñatu ɨnuu n‑ka xani ini ñayiu ñuu jan.
Dava‑i n‑ka nujuiin xiʼin xiʼin ñayiu Israel,
dava‑i n‑ka nujuiin xiʼin xiʼin se n‑tundaʼa ñaʼa Jesús.
5 N‑ka kida ɨnuu ñayiu ñatu kuu yatnuʼu Israel xiʼin ñayiu kuu yatnuʼu Israel xiʼin juxtixia xa kada uʼu koio‑s se n‑tundaʼa ñaʼa Jesús,
te janñaʼa koio‑s yuú xa kaʼni ñaʼa‑s.
6 Nu n‑teku Spalu xiʼin Bernabé,
te n‑ka xino‑s.
Juaʼan koio‑s ñuu nani Listra xiʼin ñuu nani Derbe,
distrito Licaonia.
Ijan dada n‑ka xeʼen‑s ntaka ñuu xndaxio región ijan.
7 Dɨuni n‑ka jaʼan‑s nuu ñayiu ijan nax io xa kada koio‑i xa na nanitaʼu‑i.
N‑ka jani ñayiu ñuu Listra Spalu yuú
8 Ñuu Listra io ɨɨn se ña kuu kaka chi daa n‑kaku‑s.
9 N‑xee‑s nuu dakuaʼa Spalu ñayiu ñuu ijan,
xa kunini‑s tnuʼu jaʼan‑s,
te n‑ndakoto ndee ñaʼa Spalu,
te n‑tuu ini‑s xa kukanu ini se ijan xa ndadavaʼa ñaʼa Ianyuux.
10 Ijan dada xee n‑jaʼan Spalu.
Xiaʼan‑s nuu‑s:
—Ndojuiin‑n,
te kunujuiin ndaa‑n.
Nuniʼno ni n‑ndojuiin se ijan.
N‑xe kandava‑s,
te n‑xika‑s.
11 Nu n‑ka xini ñayiu xa n‑kida Spalu,
n‑ka nukuita‑i ka kana‑i.
Yuʼu mee‑i n‑ka xetniu‑i.
Ka xiaʼan‑i:
—N‑ka juun ianyuux ñuu‑ro.
Ná xndaa seyɨɨ xndaa‑ia.
12 N‑ka xani ini‑i xa Bernabé kuu ianyuux nani Júpiter te Spalu kuu ianyuux nani Mercurio xaxeʼe xa kueʼe ka n‑jaʼan Spalu dada Bernabé.
13 Xndeka dutu ndadakaʼnu ianyuux nani Júpiter xiʼin ñayiu ñuu jan nkutu n‑ka xee veñuʼu katuu yuʼu ñuu nuu kɨu‑ro xa kaʼni koio‑s‑tɨ xa ndadakaʼnu koio‑s se n‑tundaʼa ñaʼa Jesús n‑kuu.
Dɨuni xneʼe‑s corona ita n‑ka xee.
14 Nu n‑ka xini Spalu xiʼin Bernabé xa ka kuu ñayiu ijan xiʼin dutu jan xa ndadakaʼnu ñaʼa koio‑i,
n‑ka ndata‑s duʼnu‑s chi ña n‑juini‑s xa daa kada‑i,
te n‑ka kendava‑s.
N‑ka xee‑s nuu xyuku‑i.
N‑ka kana‑s:
15 —¿Nakuenda xa daa ka kuu‑n xa kada koio‑n u?
Ñayiu ka kuu‑da,
ná ka kuu‑n de.
N‑ka kixee‑da xa jaʼan‑da xa dandoo koio‑n xa ka kida‑n chi ñadu xavaʼa kuu,
te io xa kukanu ini‑n Ianyuux ndixa.
Na kachitnuʼu ñaʼa‑da jundu kuu Ianyuux ndixa,
Ia n‑kidavaʼa andɨu,
ñuñayiu,
mar xiʼin ntdaa xa io nuu ndruni xaʼa xa na jini‑n jundu kuu‑ia.
16 Juini n‑xejoon Ianyuux xa n‑ka tnɨɨ‑n xiʼin dava ka ñayiu ñuñayiu nudɨɨn ichi te ñayo‑n n‑ka tnɨɨ ichi‑ia,
17 ko dani kida ñaʼa‑ia xavaʼa xa na jini koio‑n jundu kuu‑ia.
Dɨu‑ia dajuun dau ñuu‑n,
te kida‑ia xa kane nuu ñuʼu‑n.
Mee‑ia kida xa xe kandita xa ka xaxi‑n te ka kudɨ ini‑n —kuu Spalu,
xiaʼan‑s nuu ñayiu jan.
18 Juini duʼa n‑ka jaʼan‑s ntdaa xaʼa,
ko xaku nga ma jandixa ñaʼa koio‑i chi dani ka kuu‑i xa kaʼni‑i nkutu jan xa ndadakaʼnu ñaʼa koio‑i.
19 Nu n‑xika kɨu n‑ka xee se ka kuu yatnuʼu Israel xndaxio Antioquía xiʼin Iconio ñuu Listra xa n‑ka dajaʼan‑s ñayiu Listra jan xa jani koio‑i Spalu yuú.
Te daa n‑ka kida‑i.
N‑ka xani ini‑i xa n‑ka xaʼni‑i‑sɨ,
te n‑ka ñuʼu ñaʼa‑i xa n‑ka kineʼe ñaʼa‑i yuʼu ñuu jan,
20 ko nuu n‑ka naduku nduu ñayiu ka kukanu ini Jesucristu nuu katuu Spalu,
n‑ndokoo‑s.
Ñatu n‑xiʼí‑s.
Te juan ndɨu ntuku‑s ɨnka vuelta ñuu jan.
Kɨu kuu uu n‑ndee‑s xiʼin Bernabé ijan,
te ka xeʼen‑s ñuu Derbe.
21 N‑ka jaʼan‑s nuu ñayiu Derbe nax kada‑i xa nanitaʼu‑i,
te kueʼe‑i n‑ka kukanu ini Jesucristu,
te juan ndixi koio‑s ñuu Listra.
Ijan dada n‑ka ndixi‑s Iconio,
te n‑ka ndixi‑s ñuu nani Antioquía katuu Pisidia.
22 Ntdaa ñuu yaʼa n‑ka jaʼan‑s nuu ñayiu ka jandixa Jesucristu xa na kukanu ini naʼi‑i‑ia;
maxku kande ini‑i‑ia.
N‑ka jaʼan‑s nuu ñayiu jan xa yo ndaʼu yaʼa koio‑i xa kɨu tnaʼa‑i nuu ñayiu jandixa xa taxnuni Ianyuux nuu‑i.
23 Dɨuni n‑ka kaxi niʼno‑s se taxnuni koio nuu ñayiu kukanu ini Jesucristu ntaka ñuu n‑ka xeʼen‑s.
N‑ka xijan taʼu‑s xiʼin ñayiu ntaka ñuu n‑ka xeʼen‑s nuu Ianyuux,
te dɨuni n‑ka xio ndite‑s xiʼin‑i.
Ntaka ñuu nuu n‑ka xeʼen‑s n‑ka dandoo‑s se taxnuni koio jan ndaʼa Ianyuux,
Ia n‑ka kukanu ini‑s.
N‑ka nangondita Spalu xiʼin Bernabé Antioquía, distrito Siria
24 N‑ka ndee‑s Pisidia.
N‑ka ndixi‑s Panfilia,
te n‑ka ndixi‑s Perge.
25 Nu n‑yaʼa n‑ka jaʼan‑s tnuʼu Ianyuux nuu ñayiu ñuu ijan,
ijan dada juan nuʼu‑s Atalia.
26 Ijan n‑ka keé‑s barcu xa juan nuʼu‑s Antioquía,
Siria,
ñuu nuu n‑ka xijan taʼu ñayiu nuu Ianyuux xa chindee ñaʼa‑ia xa kada‑s nduu‑s tniu dijan n‑ka daxinokava‑s.
27 Nu n‑ka naxee‑s Antioquía,
n‑nadataka‑s ntdaa ñayiu ka kukanu ini Jesucristu te n‑ka najani‑s xa yo n‑kidatniu Ianyuux anu ñayiu hora n‑ka kida‑s tniu‑ia.
Dɨuni n‑ka najani‑s xa n‑kida‑ia xa ñayiu ñatu kuu daʼya dana Israel n‑ka teku tnuʼu‑ia te n‑ka kukanu ini‑i Jesús.
28 Naʼa n‑ka xo tuu Spalu xiʼin Bernabé ñuu Antioquía xiʼin ñayiu ka kukanu ini Jesucristu.