N‑ka tundaʼa ñayiu Antioquía Spalu xiʼin Bernabé xa kixi‑s tɨtnɨ ñuu
13
Dava ñayiu kukanu ini Jesucristu xtuu Antioquía,
ka kuu se ka jaʼan tnuʼu Ianyuux nuu ñayiu,
te dava‑i ka kuu se ka dakuaʼa ñayiu.
Duʼa xnani dava‑s:
Bernabé,
Simeón,
Lucio,
Manaén,
Saulo du.
Simeón ya,
n‑ka xo dandee ñaʼa ñayiu Se Ñɨɨ Tnuu.
Lucio kuu se Cirene.
Manaén n‑xaʼnu dava xiʼin Herodes,
se n‑taxnuni Galilea.
2 N‑ka xo ndadakaʼnu‑s Ianyuux te n‑ka xo xio ndite‑s.
Ɨɨn vuelta nɨni daa ka kida‑s n‑jaʼan Espíritu Ianyuux nuu‑s:
—Kineʼe dɨɨn Bernabé xiʼin Saulo xa nkada‑s tniu‑r ɨnka ñuu chi xaxeʼe xijan n‑kaxi‑r‑sɨ.
3 Nu n‑yaʼa xa n‑ka xijan taʼu‑s nuu Ianyuux xiʼin xa n‑ka xio ndite‑s,
n‑ka xajan ndodo‑s ndaʼa‑s dɨkɨ Bernabé xiʼin Saulo,
te n‑ka jaʼan‑s nuu‑s xa na jɨʼɨn koio‑s ɨnka ñuu.
N‑ka dakuaʼa Bernabé xiʼin Saulo ñayiu país Chipre
4-5 N‑tundaʼa ñaʼa Espíritu Ianyuux xa kixi‑s ñuu xiʼin ñuu.
N‑ka kee‑s.
Vaxi koio‑s ñuu Seleucia.
Xndeka‑sɨ Sua vaxi xa chindee ñaʼa‑s.
N‑ka keé‑s barcu Seleucia xa vaxi koio‑s ñuu nani Salamina país nani Chipre.
N‑ka kixeʼe‑s ka jaʼan‑s tnuʼu Ianyuux xiti veñuʼu ñayiu Israel xndaxio ijan.
6 Nɨkani yuʼu mar n‑ka kixi‑s xa nde n‑ka kixee‑s ñuu nani Pafos.
Ijan n‑ka xe juntnaʼa‑s xiʼin ɨɨn se Israel kida magia.
N‑xo jaʼan‑s xa tnuʼu Ianyuux jaʼan‑s,
ko ña ndaa.
Barjesús nani‑s.
Dɨuni nani‑s Elimas.
7 Kunduu‑s xiʼin gobernador nani Sergio Paulo.
Yo kaxi ini Sergio Paulo jan.
N‑kana‑s Bernabé xiʼin Saulo chi n‑juini‑s xa kunini‑s tnuʼu Ianyuux.
8 Dɨu Elimas kuu Magia.
Elimas jan n‑dadaʼan xa jaʼan ka Bernabé xiʼin Saulo tnuʼu Ianyuux nuu gobernador jan,
xa na ñaʼa jandixa ka‑s xa n‑ka jaʼan‑s.
9 Saulo ya,
dɨuni nani‑s Spalu.
Ñuʼu ñaʼa Espíritu Ianyuux.
N‑nukondeʼa‑s se kida magia jan.
10 Te n‑jaʼan‑s:
—Daʼya Kuiʼna kuu‑n.
Xini uʼu‑n ntdaa xavaʼa.
Mee ni xa dandaʼu‑n ñayiu.
Mee ni xa ña ndaa kida‑n.
¿Nakuenda ña nujani‑n xa jaʼan‑n xa tnuʼu Ianyuux kuu tnuʼu vete?
11 Kada uʼu ñaʼa Ianyuux vitna.
Kuaa‑n te ma kuu xa kundeʼa ka‑n xa ndii nde na xee kɨu nukondeʼa‑n.
Hora ijan ni n‑kuaa Elimas,
te n‑nduku‑s ɨɨn ñayiu kuitañuʼu ñaʼa.
12 Xaxeʼe xa n‑tna ini gobernador jan xa n‑jaʼan Saulo xa n‑kida Cristu,
Ia kuu Xtoʼo‑ro,
xiʼin xaxeʼe xa n‑xini‑s xa n‑yaʼa Elimas,
n‑kukanu ini‑s Cristu.
N‑ka dakuaʼa Bernabé xiʼin Saulo ñayiu ñuu Antioquía, distrito Pisidia
13 N‑ka keé Spalu xiʼin se xndeka tnaʼa xiʼin‑s barcu ñuu Pafos.
N‑ka kixee‑s ñuu Perge,
distrito Panfilia.
Ijan n‑dandoo Sua Spalu xiʼin Bernabé,
te n‑xiko‑s.
Juan nuʼu‑s Jerusalén.
14 N‑ka yaʼa Spalu xiʼin Bernabé Perge,
te n‑ka kixee‑s ñuu Antioquía,
distrito Pisidia.
N‑ka kɨu‑s veñuʼu ñayiu ka kuu yatnuʼu Israel kɨu ka ndetatu‑i,
te n‑ka nukoo‑s.
15 Nu n‑yaʼa n‑kaʼu ndodo tnuʼu n‑chidotnuni Moisés xiʼin tnuʼu se n‑ka jaʼan tnuʼu Ianyuux nuu ñayiu,
n‑ka jaʼan se ka kida veñuʼu jan nuu Spalu xiʼin nuu Bernabé:
—Dito,
nux io ɨɨn xa jaʼan‑n nuu ñayiu xa jan doʼo‑n‑yɨ,
jaʼan koio‑n vitna.
16 N‑ndojuiin Spalu te n‑ndoneʼe ndaʼa‑s nuu ñayiu xyuku ijan xa na kunini koio‑i xa jaʼan‑s.
Te n‑jaʼan‑s:
—Dito,
Didi,
kunini koio ndixi,
ñayiu ñatu kuu daʼya dana Israel,
te ka jandixa‑n Ianyuux xiʼin ndixi,
ñayiu ka kuu daʼya dana Israel.
17 N‑kaxi Ianyuux xixitna roo,
ñayiu Israel,
xa ku kuu‑i daʼya‑ia,
te n‑kida‑ia xa n‑xini daʼya dana‑i,
te n‑kuu ñuu n‑ka xo tuu‑i país Egipto ɨɨn ñuu kaʼnu.
Ijan dada n‑kida‑ia xa n‑ka kee‑i nación ijan.
18 N‑kundee ini Ianyuux xa ñatu n‑ka jandixa ñaʼa xixitna‑ro,
na n‑ka xo tuu‑i nuu ñayo ñayiu io te ñatu nga juun dau uu diko kuia.
19 N‑danaa Ianyuux uxa nación kuechi Canaán xa n‑xiaʼan‑ia ñuʼu ijan xixitna‑ro.
20 Koon yodo cientu kuia n‑kuu ntdaa xaʼa.
ʼIjan dada n‑kida Ianyuux xa n‑ka taxnuni se ka kuu juexi nuu ñayiu Israel nde kɨu n‑xo tuu Samuel,
se n‑jaʼan tnuʼu Ianyuux nuu‑i.
21 Ijan dada n‑ka xijan se Israel nuu Ianyuux ɨɨn rey taxnuni nuu‑s,
te n‑xiaʼan Ianyuux Saul,
se kuu daʼya yɨɨ Cis,
daʼya dana Benjamín.
Uu diko kuia n‑taxnuni‑s.
22 Ijan dada n‑kineʼe‑ia‑s,
te n‑jantuu‑ia David.
Duʼa n‑jaʼan‑ia xa n‑kakuneʼe‑ia‑s:
“Xini‑r xa David,
daʼya yɨɨ Isaí,
tna ini‑s xa tna ini‑r,
te kada‑s ntdaa xa juini‑r”,
kuu Ianyuux.
23 N‑kida Ianyuux xa ɨɨn daʼya dana David ya kuu Ia dananitaʼu ñaʼa roo xa ka kuu‑ro daʼya dana Israel na n‑jaʼan‑ia.
24 ʼNa ta kixeʼe ka Jesús xa kada‑ia tniu Ianyuux,
xá n‑xo jaʼan Sua tnuʼu Ianyuux nuu ñayiu Israel.
N‑xo jaʼan‑s xa na natu ini koio‑i xa n‑ka kida‑i kuechi,
te na juendute‑i.
25 Nu n‑kuyatni xa jɨn ndɨʼɨ tniu Sua,
te n‑jaʼan‑s:
“Tuku se kuu‑r,
ñadu se ka xani ini‑n xa kuu‑s kuu‑r.
Na jɨn ndɨʼɨ tniu‑r,
kixi ɨɨn ia ndandɨʼɨ ka dada ruʼu.”
Xaxeʼe xa ndandɨʼɨ‑ia,
ni xa nandaxi‑r correa ndixa yɨʼɨ‑ia ñatu natau.
26 ʼNtdaa‑ro n‑ka teku xa n‑jaʼan Ianyuux xa nanitaʼu koio‑ro.
Nani daña xa ka kuu‑da daʼya dana Abraham,
dani ndixi ñayiu ñatu ka kuu daʼya dana Israel ka jandixa Ianyuux.
27 Ñayiu n‑ka xio Jerusalén xiʼin se n‑ka taxnuni nuu‑i,
ña n‑ka kutnuni ini‑i xiʼin‑s jundu kuu Jesús,
ni ña n‑ka kutnuni ini‑i tnuʼu n‑chidotnuni se n‑ka jaʼan tnuʼu Ianyuux nuu ñayiu juini n‑ka xo kaʼu‑i libru yodotnuni tnuʼu‑s xiti veñuʼu ntnaʼa kɨu n‑ka xo ndetatu‑i.
N‑xetnaʼa xa xyodotnuni nuu libru‑s ná n‑ka jaʼan‑i nuu se ka taxnuni nuu‑i jan xa kaʼni‑s Jesús.
28 Juini n‑ka xo naʼa‑i xa ñatu io xa kuú‑ia chi ña tuu na kuechi‑ia n‑xio,
n‑ka jaʼan‑i nuu Pilato xa kaʼni‑s‑ia.
29 Nu n‑yaʼa ntdaa xa xyodotnuni xa yaʼa‑ia,
n‑ka nuneʼe‑s‑ia nuu curuxi,
te n‑ka chinduxi‑s‑ia yau kava,
30 ko n‑nadandoto Ianyuux‑ia.
31 Tɨtnɨ vuelta n‑ka xini ñaʼa ñayiu n‑kunduu xiʼin‑ia nde Galilea xiʼin nde Jerusalén,
te dɨu‑i ka najani xa n‑ka xini‑i xa n‑nandoto‑ia nuu ñayiu.
32 ʼXa ka najani daña vitna,
xijan n‑jaʼan Ianyuux nuu xixitna‑ro xa yaʼa.
33 N‑xetnaʼa xaʼa xaxeʼe roo xa ka kuu‑ro daʼya dana Abraham na n‑nadandoto‑ia Jesús ná yodotnuni nuu Salmo kuu uu.
Duʼa yodotnuni:
“Ndoʼo ku kuu Daʼya Yɨɨ‑r vitna,
chi mee‑r n‑nduu taa‑n.”
34 Xa daa nga n‑jaʼan Ianyuux xa nadandoto‑ia Jesús te ma tɨu yɨkɨ kuñu‑ia.
Dɨuni yodotnuni:
“N‑xiaʼan‑r tnuʼu‑r David xa chindee chituu ñaʼa‑r,
te xandaa xakuita kada‑r xijan.”
35 Dɨuni yodotnuni:
“Ma juejoon‑n xa tɨu yɨkɨ kuñu Ia ii.”
36 N‑xinokuechi David nuu ñayiu ñuu‑s na n‑xo tuu‑s ná n‑taʼu tniu Ianyuux nuu‑s xa junukuechi‑s.
Ijan dada n‑xiʼí‑s te n‑xe konduxi‑s nuu n‑ka xe konduxi taa‑s xiʼin xixitna‑s te n‑tɨu yɨkɨ kuñu‑s,
37 ko Jesús,
n‑nadandoto ñaʼa Ianyuux,
te ña n‑tɨu yɨkɨ kuñu‑ia.
38 Xijan kuu xa kachitnuʼu ñaʼa‑da xa taxkanu ini Ianyuux kuechi n‑ka kida‑ro xaxeʼe xa n‑xiʼí Jesús.
Ñatu kida ley n‑chidotnuni Moisés xa ndunini koio‑n,
39 ko n‑kida Ianyuux xa ntdaa ñayiu ka kukanu ini Jesús n‑ka ndunini.
40 Koo koio‑n cuedado xa maxku yaʼa koio‑n ná n‑ka chidotnuni se n‑ka jaʼan tnuʼu Ianyuux nuu ñayiu.
Duʼa n‑ka chidotnuni‑s:
41 Ndoʼo,
ñayiu ña xe ini tnuʼu jaʼan‑r,
kunini koio xa na jaʼan‑r.
Kunaʼa koio‑n xa yaʼa ɨɨn xa yaʼa,
te kɨ ini koio‑n.
Naa koio‑n.
Kunaʼa koio‑n xa kueʼe xa kada‑r,
te yuʼu koio‑n.
Nde na yaʼa xijan,
ijan dada kuú koio‑n.
Juini na jaʼan ɨɨn ñayiu nuu nax yaʼa kɨu ijan,
ma jandixa‑n xa daa yaʼa
—kuu Spalu,
n‑xiaʼan‑s nuu ntdaa ñayiu xyuku ijan.
42 Nu n‑kee Spalu xiʼin se xnetnaʼa xiʼin‑s veñuʼu ñayiu ka kuu yatnuʼu Israel,
te n‑ka jaʼan se ñatu ka kuu yatnuʼu Israel nuu‑s xa na jaʼan ntuku‑s tnuʼu yaʼa ɨnka sabado.
43 Nu n‑tuʼu veñuʼu te kueʼe ñayiu ka kuu daʼya dana Israel xiʼin ñayiu xneʼe tnɨɨ mudu ñayiu Israel n‑ka xe kuitandijun Spalu xiʼin Bernabé.
N‑ka jaʼan‑s nuu ñayiu ijan xa na jandixa koio ka‑i tnuʼu Ianyuux,
te na kada naʼi‑i xa juini‑ia.
44 Na xee una kɨu te nadaa nga ñayiu ñuu ijan n‑ndoñuʼu xa ntdaa‑i nataka koio xa kunini koio‑i tnuʼu Ianyuux,
45 ko nu n‑ka xini dava se ka kuu daʼya dana Israel xa kueʼe ñayiu n‑ka nataka,
n‑ka kukuedi ini‑s,
te n‑ka kixeʼe‑s ka jan tnuʼu‑s Spalu,
te n‑ka jaʼan‑s xa ñatu jaʼan‑s tnuʼu ñukax ini.
46 Ña n‑yuʼu Spalu xiʼin Bernabé xa jaʼan‑s te ka xiaʼan‑s:
—Kiʼna ka nuu ndixi xa ka kuu‑n daʼya dana Israel io xa jaʼan koio‑da tnuʼu Ianyuux,
ko xaxeʼe xa ñatu ka xe ini‑n tnuʼu‑ia xyodotnuni,
te ka xani ini‑n xa ña natau xa kutuu‑n xiʼin‑ia nɨkava nɨkuita,
xijan kuu xa jɨʼɨn koio‑da ñuu ñayiu ñatu ka kuu yatnuʼu‑ro xa jaʼan koio‑da tnuʼu Ianyuux nuu‑i
47 chi duʼa n‑taʼu tniu Ianyuux nuu‑da.
N‑jaʼan‑ia:
N‑tetutniu ñaʼa‑r xa ku kuu‑n kuenda kɨu ɨɨn xa datnuni nuu ñayiu ña ka kuu yatnuʼu Israel.
Juña tnuʼu‑n nɨkaxiko ñuñayiu nax io xa kada ñayiu xa na nanitaʼu koio‑i
—kuu Spalu,
xiaʼan‑s.
48 Nu n‑ka teku ñayiu ñatu ka kuu yatnuʼu Israel tnuʼu yaʼa n‑ka kuvete‑i,
te n‑ka nukuita‑i ka najuen tnuʼu‑i Ianyuux.
Ntdaa ñayiu n‑ñu ini Ianyuux xa kutuu koio‑i nɨkava nɨkuita andɨu,
n‑ka kukanu ini Jesucristu.
49 Nituʼu región ijan n‑ka teku ñayiu tnuʼu Ianyuux.
50 Juini kueʼe ñayiu n‑ka teku tnuʼu‑ia,
ko dava ñayiu Israel n‑ka dajaʼan‑i ñadɨʼɨ ndandɨʼɨ ña ka jandixa Ianyuux xiʼin se unu ndandɨʼɨ ñuu‑i xa kada uʼu koio‑ña xiʼin‑s Spalu xiʼin Bernabé,
te n‑ka xijun ñaʼa‑i región ijan.
51-52 Ijan n‑kineʼe Spalu xiʼin Bernabé ndixa‑s te n‑ka kɨdɨ‑s xeʼe‑s xa na kee ñuyaka ñuu jan xa najini ñayiu jan xa kuechi kuu xa n‑ka kida‑i,
te n‑ka ndee‑s.
Vichi n‑ka kuvete ñayiu ka kukanu ini Jesucristu,
te ñuʼu ñaʼa Espíritu Ianyuux.
Te juaʼan Spalu xiʼin Bernabé ñuu nani Iconio.