Kidandaa Ianyuux hora ndadandaa‑ia kuechi ñayiu
2
Dava‑n ka jan tnuʼu ñayiu ka kida kuechi,
te ka jaʼan‑n xa io xa yaʼa‑i juxtixia.
¿Nakuenda xa duʼa ka jaʼan‑n?,
te dɨuni ka kida‑n tnaʼa kuechi ka jaʼan‑n xa ka kida‑i.
Xndido xtau‑n ɨɨn ɨɨn‑n kuechi ka kida‑n xaxeʼe xa ka kida‑n na ka kida ñayiu ijan.
2 Xaxeʼe xa naʼa Ianyuux xa duʼa ka kida‑n,
xijan kuu xa ndadandaa‑ia kuechi‑n,
te yaʼa koio‑n juxtixia.
Xa xnaʼa‑ro xa daa kada‑ia.
3 ¿Nakuenda ka jaʼan‑n xa yaʼa koio ñayiu juxtixia te dɨuni ka kida‑n ná ka kida‑i?
Kunaʼa koio‑n xa ndadandaa Ianyuux kuechi mee‑n,
te yaʼa koio‑n juxtixia.
Ma kaku‑n xa jɨʼɨn‑n nuu uʼu nuu ndaʼu.
4 ¿Nakuenda ña ka chinuu‑n xa taxi‑ia tiempo xa natu ini koio‑n xa n‑ka kida‑n kuechi?
Vaʼa‑ia xa daa kida‑ia.
¿Nakuenda ña ka chinuu‑n xa ndetu kuee‑ia,
ni ña ka chinuu‑n xa kaʼnu anu‑ia?
5 Xaxeʼe xa unu xee ini‑n xiʼin xaxeʼe xa ña ka jandixa‑n Ianyuux xiʼin xaxeʼe xa ñayo‑n ka natu ini xa n‑ka kida‑n kuechi,
dakiti ini ka‑n Ianyuux juaʼan.
Xee kɨu kachitnuʼu ñaʼa‑ia xa kiti ini‑ia nuu‑n,
te kɨu ijan jini‑n xa kidandaa‑ia hora ndadandaa‑ia kuechi ñayiu,
te yaʼa koio‑n juxtixia.
6 Ka chiyaʼu ñayiu n‑ka kida xaloko xaduʼa kuechi‑i,
te niʼi ñayiu vaʼa taʼu‑i.
7 Ñayiu ka kida xavaʼa te ka teyɨka‑i mee‑i xa kada‑i xijan xa na najuen tnuʼu ñaʼa Ianyuux,
kada‑ia xa kutuu koio‑i xiʼin‑ia nɨkava nɨkuita.
Ka kida‑i xavaʼa,
te ka teyɨka‑i mee‑i xa kada‑i xijan xa maxku naa koio‑i xiʼin xa na nduu koio‑i ñayiu vaʼa,
te kueʼe xa juñaʼa‑ia‑i.
8 Ñayiu ña tuu nax viʼi dava ka ñayiu,
te ñatu ka kundaʼu ini‑i‑yɨ te ña ka jandixa‑i xa ka jaʼan‑da,
kada uʼu ñaʼa Ianyuux chi yo vichi kiti ini‑ia nuu‑i.
Kada uʼu‑ia‑i xaxeʼe xa ka tna ini‑i xa kada koio‑i xaloko xaduʼa tuku.
9 Ndaʼu yaʼa koio‑i,
te ndeʼe yuʼu koio‑i kɨu ijan.
Nani ndaʼu yaʼa ñayiu Israel,
dani ndaʼu yaʼa ñayiu ñatu ka kuu ñayiu Israel.
10 Ñayiu ka kida xavaʼa,
kada Ianyuux xa nduu koio‑i ñayiu vaʼa ka,
te najuen tnuʼu ñaʼa‑ia,
te kueʼe xa juñaʼa‑ia‑i.
Dɨuni ndumani‑ia xiʼin‑i xaxeʼe xa n‑ka natu ini‑i xa n‑ka kida‑i kuechi.
Nani kada‑ia ñayiu Israel,
dani kada‑ia ñayiu ñatu kuu ñayiu Israel
11 chi ñatu kaxí‑ia ñayiu.
12 Nux ka kida ñayiu ña n‑ka xini ley n‑chidotnuni Moisés kuechi,
naa koio‑i.
Naa koio‑i,
ko ñadu xaxeʼe xa ñatu n‑ka jandixa‑i ley jan.
Nux ka kida ñayiu ka xini ley n‑chidotnuni Moisés kuechi,
ndadandaa Ianyuux kuechi‑i,
te chiyaʼu‑i kuechi‑i ná chiyaʼu ñayiu n‑ka xini ley n‑chidotnuni Moisés kuechi‑i.
Ndadandaa‑ia kuechi‑i xaxeʼe xa ña n‑ka jandixa‑i ley jan.
13 Ñayiu ka jandixa ley n‑chidotnuni‑s kuu ñayiu ña tuu ka na kuechi xndido xtau,
ñadu ñayiu xnini ni ley n‑chidotnuni‑s.
14 Juini ñatu ka xini ñayiu ñatu ka kuu ñayiu Israel ley n‑chidotnuni Moisés,
ka kida dava‑i na jaʼan ley jan xaxeʼe xa dɨuni xndaxio xaxtnuni‑i,
te ka xani ini‑i.
15 Xijan kuu xa ka xini‑i ndeda xa kuu xavaʼa ndeda xa kuu xaloko.
Ka kune ini‑i nux ka kida‑i ɨɨn kuechi,
te nux ña tuu nax ka kida‑i,
ña tuu nax ka kuu anu‑i.
Nux ñatu ndaa n‑ka kida‑i ɨɨn xa ka xidokuechi‑i ma kune ini‑i.
Nux ndaa n‑ka kida‑i xa ka xidokuechi‑i ka kune ini‑i.
16 Xee kɨu kada Ianyuux xa ndadandaa Jesucristu kuechi n‑ka kida ñayiu.
Nde ñayiu naʼi n‑ka kida ɨɨn xa n‑ka kida‑i ndundaa kuechi‑i.
Dɨuni xaʼa ka xian tnuʼu‑da ñayiu vaxi.
Ka xani ini ñayiu Israel xa ka jandixa‑i ley n‑chidotnuni Moisés
17 Dava‑n ka jaʼan iʼni xa ka kuu‑n daʼya dana Israel xiʼin xa ndeka ñaʼa Ianyuux.
Dɨuni ka jaʼan‑n xa nanitaʼu koio‑n xaxeʼe xa ka xini‑n ley n‑chidotnuni Moisés.
18 Xá xnaʼa‑n nax tna ini Ianyuux xa kada‑ro,
te ka xini‑n ndeda xa kuu xavaʼa ndeda xa kuu xaloko chi ka kaʼu‑n ley n‑chidotnuni Moisés.
19 Ka dakuaʼa‑n ñayiu xa n‑chidotnuni Moisés,
chi ka xani ini‑n xa yo vaʼa ka tuʼa‑n ley jan.
Kuenda kɨu ñayiu kuaa ka kuu ñayiu dakuaʼa‑n.
Dɨuni ka xani ini‑n xa kuenda kɨu luz ka kuu‑n xa dakutnuni‑n nuu ñayiu ka kuu ná ka kuu ñayiu ka xikonuu xakuaa.
20 Dɨuni ka dakuaʼa‑n dava ñayiu ta jini ka ley Ianyuux n‑chidotnuni Moisés xiʼin ñayiu ka kuu ná kuu sekuechi xaxeʼe xa ka xani ini‑n xa yo vaʼa ka tuʼa‑n.
Ka kaʼu‑n libru yodotnuni ley n‑chidotnuni Moisés,
te ka xini‑n xa ɨɨn xandaa kuu.
21 Nux ka dakuaʼa‑n ñayiu xa n‑chidotnuni Moisés,
¿nakuenda ña ka jandixa mee‑n xijan?
Ka jaʼan‑n nuu ñayiu xa ña io vaʼa xa duʼu‑ro,
te ka duʼu‑n.
22 Ka jaʼan‑n nuu ñayiu xa ña vaʼa xa kava‑ro xiʼin ñayiu ñatu kuu ñadɨʼɨ‑ro,
te xndaa‑n xiʼin ñadɨʼɨ ñatu ka kuu ñadɨʼɨ‑n.
Ka xini uʼu‑n ianyuux ñayiu,
te ka duʼu‑n ndatniu yaʼu io veñuʼu nuu xdika xijan.
23 Ka kuu iʼni‑n xa ka tuʼa‑n xa n‑chidotnuni Moisés,
ko,
¿nakuenda ñatu ka jandixa‑n ley jan?
Daa kuu xa ñatu io‑n xañuʼu nuu Ianyuux.
24 Nakaxtnaʼa xa ka kida‑n xiʼin xa n‑jaʼan Ianyuux te yodotnuni.
Duʼa yodotnuni:
“Kuiʼa ka jaʼan ñayiu ñatu ka kuu daʼya dana Israel Ianyuux xaxeʼe xa ka kida‑n xaloko.”
25 Se ka jandixa ley n‑chidotnuni Moisés xiniñuʼu xa ka taʼnde ndodo ñɨɨ nuu ii‑s,
ko se n‑taʼnde ndodo ñɨɨ nuu ii‑s te ña jandixa‑s ley jan na kada‑s kuenda xa ñatu n‑taʼnde ndodo ñɨɨ nuu ii‑s.
26 Se ña n‑taʼnde ndodo ñɨɨ nuu ii‑s te jandixa‑s ley jan na kada‑s kuenda xa n‑taʼnde ndodo ñɨɨ nuu ii‑s.
27 Se ñatu n‑ka taʼnde ndodo ñɨɨ nuu ii‑s,
te ka kida‑s na jaʼan ley jan kadandaa koio‑s kuechi mee‑n xa ka kuu‑n se n‑taʼnde ndodo ñɨɨ nuu ii xaxeʼe xa ñatu jandixa‑n ley jan juini ka kaʼu‑n libru yodotnuni.
28 Nux ñatu jandixa se ka kuu daʼya dana Israel ley n‑chidotnuni Moisés kuenda kɨu ñatu ka kuu‑s daʼya dana‑s juini n‑ka taʼnde ndodo ñɨɨ nuu ii‑s.
29 Xaxeʼe xa vaʼa anu dava‑n dani ka kuu‑n ñayiu Israel,
ñadu xaxeʼe xa n‑taʼnde ndodo ñɨɨ nuu ii‑n.
Ñadu xaxeʼe xa ka kaʼu‑ro ntaka xa n‑chidotnuni Moisés najuen tnuʼu ñaʼa Ianyuux;
najuen tnuʼu ñaʼa‑ia,
ko xaxeʼe xa ka kida‑ro xa juini‑ia.
Mee‑ia kuu Ia najuen tnuʼu ñaʼa,
ñadu ñayiu.