Ná n‑jaʼan Ianyuux xa kada‑ia, kada‑ia
3
Vaa mee‑n xa ka kuu‑n ñayiu Israel,
kachi koio‑n:
“Nux daa io,
¿nax kineʼe‑ro xa ka kuu‑ro daʼya dana Israel nudaa?
¿Nax vaʼa xa n‑taʼnde ndodo ñɨɨ nuu ii‑ro?”
2 Kueʼe xa kineʼe‑ro.
Kueʼe xa kineʼe‑ro chi ka kaʼu‑ro tnuʼu Ianyuux n‑ka chidotnuni xixitna‑ro,
te n‑kukanu ini ñaʼa Ianyuux roo xa dakuaʼa‑ro ñayiu.
3 ¿Nax kada Ianyuux xa ñatuka kukanu ini dava ñayiu Israel‑ia?
Xaxeʼe xa ña n‑ka kukanu ini‑i‑ia,
¿ma kada‑ia xa n‑jaʼan‑ia xa kada‑ia u?
4 Kada naʼi‑ia xa n‑jaʼan‑ia xa kada‑ia chi ñatu vete‑ia na vete ntdaa ñayiu ñuñayiu.
Xandaa xakuiti xetnaʼa tnuʼu‑ia.
Duʼa yodotnuni xa n‑jaʼan ɨɨn se n‑jaʼan nuu Ianyuux,
te n‑chidotnuni‑s:
Na jaʼan ñayiu xa kidandaa‑n hora ndadandaa‑n kuechi‑i.
Dɨuni na jaʼan‑i xa vaʼa n‑kida‑n xa n‑ndadandaa‑n kuechi‑i,
kuu‑s,
n‑xiaʼan‑s nuu Ianyuux.
5 Xaxeʼe xa ka kida ñayiu kuechi,
dayaʼa Ianyuux‑yɨ juxtixia te xaxeʼe xijan jaʼan koio‑i:
“Vaʼa kida Ianyuux xa ndadandaa‑ia kuechi‑ro ntdaa‑ro,
te dayaʼa ñaʼa‑ia juxtixia.”
Najuen tnuʼu koio‑i Ianyuux xa daa ka jaʼan‑i.
Ɨɨn xavaʼa kuu.
Vaa ku jaʼan koio‑ro:
“Xaxeʼe xa ka najuen tnuʼu‑i‑ia,
ñatu io vaʼa xa kiti ini‑ia nuu‑i,
ni ñatu io vaʼa xa ndadandaa‑ia kuechi‑i,
ni xa yaʼa‑i juxtixia.”
(Daa ku jaʼan‑ro chi ñayiu ka kuu‑ro,
ñadu Ianyuux.)
Maxku kani ini‑ro xa ñatu kida‑ia ná juxtixia kuu‑ia.
6 Nu ñatu kida ndaa‑ia xa ndadandaa‑ia kuechi ñayiu,
ma ndadandaa‑ia kuechi‑i n‑kuu.
7 Ka najuen tnuʼu ñayiu kidavaʼa tnuʼu vete Ianyuux chi ka jaʼan‑i xa ñatu vete‑ia ná vete mee‑i.
¿Nakuenda xa ndadandaa‑ia kuechi‑i?,
te adichi ka najuen tnuʼu ñaʼa.
8 Ka jaʼan ñayiu xa ka jaʼan‑da nuu dava ka ñayiu:
“Na kada naʼi‑ro kuechi chi xaxeʼe xijan najuen tnuʼu ñayiu Ianyuux hora ndadandaa‑ia kuechi‑ro te yaʼa‑ro juxtixia.”
Ka jaʼan‑i xa duʼa ka jaʼan‑da,
ko ña ndaa.
Niʼi ñayiu duʼa ka jaʼan taʼu‑i.
Ni ɨɨn ñayiu ñatu vaʼa
9 Ñadu xaxeʼe xa ka kuu‑ro daʼya dana Israel vaʼa ka‑ro dada ñayiu ñatu ka kuu daʼya dana‑s.
Maxku daa kani ini koio‑n chi xá n‑jaʼan‑da xa ntdaa ñayiu ka kida kuechi.
10 Duʼa yodotnuni tnuʼu Ianyuux:
Ni ɨɨn ñayiu ñayo kida ntdaa xa juini Ianyuux,
juini nga ɨɨn‑i.
11 Ñayo ñayiu kida ná io ná juaʼan.
Ni ñayo‑i nduku tnuʼu xa jini‑i janda kuu‑ia.
12 Ntdaa‑i n‑ka dandoo Ianyuux.
Mee ni xaloko xaduʼa ka kida‑i.
Ñayo ka‑i ka kida xavaʼa;
juini nga ɨɨn‑i na kada xavaʼa.
13 Kuenda kɨu ndɨyɨ xndaa yau kava ka kuu yaa‑i xa ndeʼe kuiʼa ka jaʼan‑i.
Dandaʼu tnaʼa‑i chi unu vete‑i.
Kuiʼa ka jaʼan tnaʼa‑i,
te ka jan kuiʼa tnaʼa‑i.
14 Mee ni xaloko xaduʼa xñuʼu yuʼu‑i chi ndeʼe kuiʼa ka jaʼan tnaʼa‑i.
Ndeʼe ka jaʼan deen nuu tnaʼa‑i chi ka xini uʼu tnaʼa‑i.
15 Yo ka kuu anu‑i xa kaʼni‑i ndɨyɨ.
16 Ka xanu‑i,
ka taʼu‑i,
ka kachi‑i davaʼa nga xa ka niʼi‑i xaxeʼe xa unu loko‑i.
Dɨuni ka kida uʼu tnaʼa‑i,
te ndaʼu ka yaʼa‑i.
17 Ña yoo‑i ka xini xa kutuu mani koio‑i.
18 Dɨuni ñayo‑i ka xini xa koo‑i xañuʼu nuu Ianyuux,
ni ña ka yuʼu‑i nuu‑ia.
Duʼa yodotnuni.
19 Ka xini‑ro xa ñayiu n‑kendoo xa kaʼu koio‑i tnuʼu Ianyuux yodotnuni kuu ñayiu io xa jandixa‑i‑ia.
Ni ɨɨn ñayiu maxku jaʼan xa ña tuu na kuechi kida‑i;
nani ka kida ñayiu ñatu kuu ñayiu Israel kuechi,
dani ka kida ñayiu Israel kuechi.
Xijan kuu xa io xa ndadandaa Ianyuux kuechi ntdandituʼu ñayiu,
te yaʼa koio‑i juxtixia chi ntdaa‑i xndido xtau kuechi n‑ka kida‑i.
20 Ñadu xa ma kundido kutau ka‑ro kuechi‑ro kuu xa jandixa‑ro ley n‑chidotnuni Moisés chi xa kida ley n‑chidotnuni‑s kuu xa ka xini‑ro xa kuechi kuu ɨɨn xaloko ka kida‑ro.
Ñatuka xndido xtau ñayiu kukanu ini Jesucristu kuechi n‑ka kida‑i
21-22 N‑jaʼan Ianyuux nuu ñayiu nax kada‑i xa ma kundido kutau ka‑i kuechi n‑ka kida‑i.
N‑jaʼan‑ia xa ma kundido kutau ka‑i kuechi n‑ka kida‑i nux kukanu ini‑i Jesucristu.
Ñadu xaxeʼe xa n‑ka jandixa‑i ley‑ia ma kundido kutau ka‑i kuechi n‑ka kida‑i.
Ni ñatu n‑chidotnuni Moisés xiʼin se n‑ka jaʼan tnuʼu Ianyuux nuu ñayiu xa ley kada xa ma kundido kutau ka‑i kuechi n‑ka kida‑i.
Davaʼa nga ñayiu kukanu ini Jesucristu ñatuka xndido xtau‑i kuechi‑i;
idii ni xaʼa io xa kada‑i te ma kundido kutau ka‑i kuechi‑i.
23 Xaxeʼe xa ntdantuʼu‑ro ka kida kuechi,
ɨnuu ka kuu‑ro nuu Ianyuux.
Ñayo‑ro vaʼa xa najuen tnuʼu ñaʼa‑ia.
24 Jaʼan Ianyuux xa ñatuka xndido xtau dava ñayiu kuechi‑i xaxeʼe xa n‑chiyaʼu Cristu Jesús kuechi‑i.
Daa n‑kida Ianyuux chi kundaʼu ini‑ia‑i.
25-26 N‑kida Ianyuux xa n‑xiʼí Jesús xa n‑chiyaʼu‑ia kuechi‑ro.
Na kada‑ro kuenda xa kɨtɨ n‑ka xo doko roo,
ñayiu Israel nuu altar Ianyuux n‑kuu‑ia na n‑doko‑ia mee‑ia na n‑xiʼí‑ia.
Mudu yaʼa n‑dakenaa‑ia kuechi‑ro xaxeʼe xa ka jandixa‑ro xa n‑chiyaʼu‑ia kuechi‑ro xiʼin nɨñɨ‑ia.
Daa n‑kida Ianyuux xa na kunaʼa‑ro xa ndaa kada‑ia hora ndadandaa‑ia kuechi ñayiu te jaʼan‑ia xa ñatuka xndido xtau‑ro kuechi‑ro xaxeʼe xa n‑ka kukanu ini‑ro Jesucristu.
Antes ñatu n‑ndadandaa‑ia kuechi ñayiu dava ka país chi n‑xo ndetu kuee‑ia.
27 Maxku ku ku iʼni daʼya dana Israel xa ka jandixa‑i ley n‑chidotnuni Moisés chi ñayo‑ro ndaku.
Na ku ku iʼni‑ro xaxeʼe xa ka kukanu ini‑ro Jesucristu.
28 Maxku ku iʼni‑ro xaxeʼe xijan chi xá ka xini‑ro xa ñadu xaxeʼe xa jandixa‑ro ley n‑chidotnuni Moisés ñatuka xndido xtau‑ro kuechi‑ro chi xaxeʼe xa ka kukanu ini‑ro Cristu Jesús.
29 Ñadu diko ni daʼya dana Israel ndeka‑ia chi dɨuni ndeka‑ia kueʼe ñayiu ñatu kuu daʼya dana Israel vitna;
30 xandaa xakuiti idii ni‑ia ndeka ñaʼa ntdaa‑ro.
Te ñatu chinuu‑ia nuu n‑taʼnde ndodo ñɨɨ nuu ii seyɨɨ a ñaʼa.
Jaʼan Ianyuux xa ntdaa ñayiu ka kukanu ini Cristu Jesús ñatuka xndido xtau kuechi‑i.
31 Juini nanitaʼu‑ro xaxeʼe xa kukanu ini‑ro Jesucristu,
maxku yoo‑ro kani ini xa ñatu xiniñuʼu ley n‑chidotnuni Moisés chi dani xiniñuʼu.
Xaxeʼe xa kukanu ini‑ro‑ia,
ndaku‑ro xa jandixa‑ro ley jan vitna.