N‑kukanu ini Abraham Ianyuux
4
Vaa ka xijan tnuʼu tnaʼa ndixi xa ka kuu‑n ñayiu Israel:
“¿Janda nanitaʼu Taa‑ro Abraham n‑xani ini‑s?”
2 Ñadu xaxeʼe xa n‑jandixa Abraham ley Ianyuux ñatuka n‑xo ndido tau‑s kuechi n‑kida‑s.
Nuu n‑jandixa‑s ley‑ia,
vatuka najuen tnuʼu‑s mee‑s n‑kuu,
ko ñadu nuu Ianyuux.
3 Duʼa yodotnuni tnuʼu Ianyuux:
“Ñatuka ndido tau Abraham kuechi n‑kida‑s xaxeʼe xa n‑kukanu ini‑s Ianyuux.”
4 Ñadu kutaʼu ɨɨn ñayiu kidatniu nuu xtoʼo‑i tvini chiyaʼu ñaʼa‑s chi yaʼu‑i kuu.
5 Ñayiu ñatu ka kida xa juini Ianyuux,
ni ñatu ka jandixa‑i ley‑ia,
te ka jandixa‑i xa kada‑ia xa ma kundido kutau ka ñayiu ka kukanu ini‑ia kuechi n‑ka kida‑i,
kuenda kɨu ka jandixa‑i ley‑ia.
6 Nakaxtnaʼa xaʼa xiʼin xa n‑chidotnuni David.
N‑chidotnuni‑s xa ka kudɨ ini dava ñayiu n‑ka kida kueʼe kuechi xaxeʼe xa n‑jaʼan Ianyuux xa ñatuka xndido xtau‑i kuechi‑i.
N‑jaʼan‑ia xa ñatuka xndido xtau‑i kuechi‑i,
ko ñadu xaxeʼe xa n‑ka kida‑i xavaʼa.
Duʼa n‑chidotnuni‑s:
7 Naka taʼu ñayiu n‑taxkanu ini Ianyuux kuechi n‑ka kida‑i.
Ma chinuu ka‑ia kuechi n‑kida‑i.
8 Naka taʼu‑i chi kuenda kɨu ña tuu na kuechi n‑kida‑i chi ñatuka jaʼan‑ia xa io kuechi‑i.
9 Ñadu mee ni se jandixa xa io xa taʼnde ndodo ñɨɨ nuu ii‑s kuu se taʼu kuu chi dɨuni taʼu kuu se ñatu ka xini xa daa kada‑s.
Xa n‑jaʼan‑da xa yodotnuni xa:
“Ñatuka n‑xo ndido tau Abraham kuechi‑s xaxeʼe xa n‑kukanu ini‑s Ianyuux.”
10 ¿Ñatu xnaʼa‑n xa na ta taʼnde ndodo ka ñɨɨ nuu ii‑s n‑jaʼan Ianyuux xa ñatuka ndido tau‑s kuechi‑s a?
11 Xa na kunaʼa‑s xa xaxeʼe xa n‑kukanu ini‑s Ianyuux ñatuka n‑xo ndido tau‑s kuechi‑s,
n‑taʼnde ndodo ñɨɨ nuu ii‑s.
Xaʼa n‑kida‑ia xa na kuaʼa ku kuu‑s taa nuu ntdaa se ka kukanu ini Ianyuux te ñatu n‑taʼnde ndodo ñɨɨ nuu ii‑s.
Kuu‑s taa‑s ntdaa‑s xiʼin daʼya dana‑s chi dɨu‑s kuu se kiʼna nuu n‑kukanu ini Ianyuux xa na kukanu ini ntdaa ñayiu‑ia tuku,
te ma kundido kutau ka‑i kuechi n‑ka kida‑i.
12 Kuu‑s taa nuu ntdaa se ka taʼnde ndodo ñɨɨ nuu ii‑s xaxeʼe xa dɨu‑s kuu se kiʼna nuu n‑taʼnde ndodo ñɨɨ nuu ii‑s.
Dɨuni kuu‑s taa nuu koio se yaʼa xaxeʼe xa dɨu‑s kuu se kiʼna nuu n‑kukanu ini Ianyuux xa na kukanu ini koio‑s xiʼin daʼya‑s‑ia.
13 N‑xiaʼan Ianyuux tnuʼu‑ia Abraham xa kendoo‑s xiʼin dava daʼya dana‑s xiʼin ñuñayiu.
Ñadu xaxeʼe xa n‑jandixa‑s ley‑ia kendoo koio‑i xiʼin ñuñayiu.
Kendoo koio‑i xiʼin ñuñayiu,
ko xaxeʼe xa ñatuka xndido xtau‑i kuechi n‑ka kida‑i.
Ñatuka xndido xtau‑i kuechi‑i xaxeʼe xa n‑ka kukanu ini‑i‑ia.
14 Nuu n‑xio xa jandixa‑ro ley Ianyuux niʼi‑ro taʼu‑ro,
ñatu n‑xio xa kukanu ini‑ro‑ia te ma taxi‑ia tnuʼu‑ia xa taxi‑ia ɨɨn xa taxi‑ia n‑kuu.
15 Xaxeʼe xa io ley te ña tuu jandixa‑ro,
kiti ini Ianyuux nuu‑ro,
ko nu ña tuu na ley n‑xio n‑kuu,
ma jaʼan Ianyuux xa ñatu n‑jandixa‑ro ley.
16 Xaxeʼe xa ka kukanu ini‑ro‑ia,
xijan kuu xa n‑jaʼan‑ia xa taxi‑ia ɨɨn xa taxi‑ia.
Ña tuu nax jenyaʼu‑ia kɨu na taxi‑ia xa n‑jaʼan‑ia xa taxi‑ia xaxeʼe xa kundaʼu ini ñaʼa‑ia.
Xaxeʼe xijan ntdaa ñayiu kukanu ini‑ia xa juñaʼa‑ia‑i xa n‑jaʼan‑ia xa juñaʼa‑ia‑i ná n‑kukanu ini Abraham‑ia xa juñaʼa‑ia xa n‑jaʼan‑ia;
ñadu mee ni ñayiu ka kaʼu ley‑ia kuu ñayiu niʼi xa n‑xiaʼan‑ia xa juñaʼa‑ia.
Taa‑ro ntdaa‑ro xiʼin ñayiu ijan kuu‑s.
17 Duʼa yodotnuni xa n‑jaʼan Ianyuux nuu Abraham:
“Kada‑r xa kueʼe daʼya dana‑n koo,
te kueʼe nación koo xaxeʼe xa koo‑i.”
N‑jandixa Abraham xa daa kada Ianyuux.
Kuu‑ia Ia kida xa nandoto ndɨyɨ,
te kani ini‑ia ɨɨn xa ta koo ka.
18 Juini ñatuka n‑xio xa koo daʼya Abraham xiʼin ñadɨʼɨ‑s,
ko n‑kukanu ini‑s Ianyuux xa kada‑ia xa ku kuu‑s xixitna kueʼe daʼya dana‑s ná n‑jaʼan‑ia nuu‑s.
Dɨuni n‑jaʼan‑ia nuu‑s:
“N‑jaʼan‑r xa koo daʼya dana‑n,
te koo‑i.”
19 Xaxeʼe xa n‑kukanu ini‑s xa jɨn tnaʼa xa n‑jaʼan Ianyuux,
n‑ñu ini‑s xa koo daʼya‑s juini n‑yɨɨ‑s,
te juini xaku nga xa chitu‑s ɨɨn cientu kuia te juini n‑yɨɨ Sara tuku.
20 Ñatu n‑xe tnɨɨ anu‑s chi n‑xani ini‑s xa ndaa jɨn tnaʼa tnuʼu Ianyuux.
N‑kukanu ini‑s xa jɨn tnaʼa tnuʼu n‑jaʼan‑ia nuu‑s chi n‑jandixa‑s‑ia.
N‑kuvete‑ia xa daa n‑xani ini‑s.
21 N‑jandixa‑s xa koo daʼya‑s xiʼin ñadɨʼɨ‑s ná n‑jaʼan Ianyuux chi n‑xo naʼa‑s xa kuaʼa‑ia xa kada‑ia davaʼa nga xa juini‑ia.
22 Xaxeʼe xa n‑kukanu ini‑s‑ia,
n‑jaʼan‑ia xa ñatuka ndido tau‑s kuechi‑s.
23 Ñadu ni Abraham n‑jaʼan‑ia xa ma kundido kutau ka kuechi‑s
24 chi dani roo xa ka kuu‑ro ñayiu ka jandixa xa n‑nadandoto‑ia Jesús,
Ia kuu Xtoʼo‑ro,
ma kundido kutau‑ro kuechi‑ro.
25 Mee‑ia kuu Ia n‑xiʼí xaxeʼe kuechi‑ro te n‑nandoto‑ia xa ma kundido kutau ka‑ro kuechi‑ro.