Xtuu ndaa xtuu vatu ñayiu ñatu xndido xtau ka kuechi n‑ka kida‑i
5
Xaxeʼe xa kukanu ini‑ro Jesucristu ñatuka xndido xtau‑ro kuechi n‑ka kida‑ro,
te xaxeʼe xa ñatuka xndido xtau‑ro kuechi n‑ka kida‑ro ñatuka kiti ini Ianyuux nuu‑ro,
te kundaa kuvatu anu‑ro.
Xa maxku ku kiti ini ka Ianyuux nuu‑ro n‑xiʼí Jesucristu,
Ia kuu Xtoʼo‑ro.
2 Dɨuni xaxeʼe xa n‑xiʼí‑ia xaxeʼe kuechi‑ro,
n‑kundaʼu ini ñaʼa Ianyuux,
te dani ku kundaʼu ini ñaʼa‑ia.
Xaxeʼe xa n‑ka kukanu ini‑ro Ianyuux xa dananitaʼu ñaʼa‑ia,
daa n‑kida ñaʼa‑ia.
Ka kudɨ ini‑ro chi ñu ini‑ro xa kada‑ia xa nduu koio‑ro ñayiu vaʼa.
3 Dɨuni kudɨ ini‑ro xaxeʼe xa ndaʼu ka yaʼa‑ro xaxeʼe‑ia,
te xaxeʼe xijan dani kundee ini‑ro vaxi nuu xijan.
4 Xaxeʼe xa dani kundee ini‑ro vaxi,
nduu‑ro ñayiu vaʼa.
Xaxeʼe xa nduu‑ro ñayiu vaʼa,
ka xini‑ro xandaa xakuiti najuen tnuʼu ñaʼa‑ia.
5 Xñu ini‑ro xa najuen tnuʼu ñaʼa‑ia,
te ma dandaʼu ñaʼa‑ia xaxeʼe xa yo vichi xemani ñaʼa‑ia.
N‑kida‑ia xa n‑keé Espíritu Ianyuux anu‑ro xa na kunaʼa‑ro xa xemani ñaʼa‑ia.
6 Tiempu ta jini ka‑ro xa kada‑ro xavaʼa n‑xiʼí Cristu xaxeʼe ñayiu ka kida kuechi.
Xa daa nga n‑xantuu Ianyuux xa tiempo ijan kuú‑ia.
7 Ñayo ñayiu xadɨ nuu ɨnka ñayiu vaʼa io xa kuú‑i.
Dɨuni xaku ni ñayiu kuyɨɨ xa kuú‑i nuu ɨɨn ñayiu vaʼa n‑kida ñaʼa.
8 Ñayo daa ka kida,
ko Ianyuux,
n‑kida‑ia xa n‑xiʼí Cristu xaxeʼe‑ro juini n‑ka xo kida‑ro kuechi xaxeʼe xa xemani ñaʼa‑ia.
9 N‑xiʼí Cristu Jesús xa maxku kundido kutau ka‑ro kuechi‑ro;
naka vitna ma ku kada‑ia xa maxku kiti ini Ianyuux nuu‑ro.
10 N‑kumani Ianyuux xiʼin‑ro xaxeʼe xa n‑xiʼí daʼya yɨɨ‑ia xaxeʼe‑ro.
Kɨu ka n‑xo kiti ini Ianyuux nuu‑ro n‑kida‑ia xa n‑kumani‑ro xiʼin‑ia,
naka vitna xa ndito Daʼya Yɨɨ‑ia,
ma ku kada‑ia xa niʼi‑ro taʼu‑ro.
11 Te ñadu xaʼa ni kuu ntdaa xa n‑kida Jesucristu,
Ia n‑kida xa n‑kumani‑ro xiʼin Ianyuux,
chi dɨuni n‑kida‑ia xa ka kudɨ ini‑ro xaxeʼe xa kunduu‑ro xiʼin Ianyuux.
Adán xiʼin Cristu
12 Xaxeʼe kuechi idii seyɨɨ,
n‑xe koo kuechi ñuñayiu.
N‑kida‑s kuechi te n‑xiʼí‑s.
Xaxeʼe kuechi idii se ijan,
ntdaa‑ro ka kida kuechi te ntdaa‑ro ka xiʼí.
13 Xa daa nga n‑ka xo kida ñayiu kuechi,
na ta koo ka ley n‑chidotnuni Moisés.
Xa daa nga n‑ka xo kida ñayiu kuechi,
ko ñatu n‑jaʼan Ianyuux tiempo daa xa ñatu n‑ka jandixa ñayiu ley chi ta koo ka ley.
14 Nde na n‑xo tuu Adán xiʼin nde tiempo n‑xo tuu Moisés ñuñayiu,
n‑ka xo xiʼí ñayiu xaxeʼe kuechi n‑ka kida‑i.
Ka xiʼí‑i,
ko ñadu xaxeʼe xa n‑ka kida‑i kuechi n‑kida Adán.
Xaxeʼe Adán ka kida ñayiu kuechi,
te xaxeʼe Jesús,
Ia n‑kixi,
kueʼe ñayiu ka kida xavaʼa.
15 Tuku n‑kida ñaʼa Adán,
te tuku n‑kida ñaʼa Ianyuux;
ñatu ɨnuu kuu.
Xaxeʼe kuechi n‑kida idii seyɨɨ kueʼe ñayiu n‑ka xiʼí,
te xaxeʼe idii ni xa n‑kida Jesucristu,
vaʼa Ianyuux nuu ñayiu ka kukanu ini‑ia.
N‑kida‑ia xa ñatuka xndido xtau‑ro kuechi‑ro.
16 Kueʼe xa ka yaʼa‑ro xaxeʼe Adán,
te vaʼa kida ñaʼa Ianyuux.
Xaxeʼe idii kuechi n‑kida se yaʼa n‑xio xa chiyaʼu‑ro ntdaa‑ro kuechi‑ro.
Kueʼe kuechi n‑ka kida‑ro,
ko n‑kida Ianyuux xa ñatuka xndido xtau‑ro kuechi n‑ka kida‑ro,
te ña tuu nax jenyaʼu‑ia.
17 Xaxeʼe idii kuechi n‑kida se yaʼa ka xiʼí ñayiu,
te xaxeʼe idii Ia kuu Jesucristu,
vichi vaʼa Ianyuux nuu ñayiu ka kukanu ini‑ia.
N‑kida Ianyuux xa ñatuka xndido xtau‑ro kuechi‑ro xiʼin xa kutuu‑ro nɨkava nɨkuita andɨu.
Dɨuni n‑kida‑ia xa taxnuni koio‑ro,
te ña tuu nax jenyaʼu‑ia xa daa n‑kida‑ia.
18 Na jaʼan ntuku‑da xa xá n‑jaʼan‑da.
Xaxeʼe idii kuechi n‑kida ɨɨn seyɨɨ n‑xio xa chiyaʼu ntdaa ñayiu kuechi n‑ka kida‑i,
dani xaxeʼe ɨɨn xa n‑kida Jesucristu ñatuka xndido xtau dava‑i kuechi‑i te kueʼe‑i kutuu nuu tuu‑ia nɨkava nɨkuita.
19 Xaxeʼe xa ñatu n‑jandixa ɨɨn seyɨɨ Ianyuux,
kueʼe ñayiu ka kida kuechi;
te xaxeʼe xa idii Ia n‑kuu se n‑jandixa ley Ianyuux,
kueʼe ñayiu ka jandixa‑ia.
20 Xa na jini ñayiu xa kuechi kuu ɨɨn xaloko ka kida‑i,
n‑xe koo ley n‑chidotnuni Moisés.
Nu n‑ka xini‑i xa kuechi kuu ɨɨn xaloko ka kida‑i,
kueʼe ka kuechi n‑ka kida‑i.
Xaxeʼe xa yo kueʼe ka kuechi ka kida ñayiu juaʼan,
n‑kundaʼu ini ñaʼa ka Ianyuux.
21 Ka kida‑ro kuechi,
te ka xiʼí‑ro xaxeʼe xijan.
Xaxeʼe xa ka xiʼí‑ro n‑kundaʼu ini ñaʼa Ianyuux,
te n‑kida‑ia xa nduu‑ro ñayiu ñatuka xndido xtau kuechi n‑ka kida na kuaʼa kutuu‑ro nuu tuu‑ia nɨkava nɨkuita.
Xaxeʼe xa n‑kida Jesucristu,
Ia kuu Xtoʼo‑ro ɨɨn xa n‑kida‑ia,
xijan kuu xa daa n‑kida ñaʼa Ianyuux.