Kuenda kɨu ndɨyɨ n‑ka xo kuu‑ro xaxeʼe kuechi n‑ka xo kida‑ro
6
Vaa kachi koio‑n:
“Nux daa kuu na kada naʼi ka‑ro kuechi nudaa chi taxkanu ini Ianyuux xa kida‑ro xijan xaxeʼe xa kundaʼu ini ñaʼa‑ia.”
2 Ñadu xa daa ku kani ini koio‑n chi ña tuu ka nax ka io xa dadaʼan ñaʼa xa ku kada‑ro xavaʼa chi n‑ka dandoo‑ro xaloko xaduʼa n‑ka xo kida‑ro.
Ɨnka ñayiu nduu‑ro vitna.
3-4 Kuenda kɨu n‑ka xiʼí‑ro xiʼin Cristu Jesús te n‑ka yɨnduxi‑ro xiʼin‑ia xa n‑ka xendute‑ro.
Xa n‑nadandoto Ianyuux‑ia kuenda kɨu n‑nadandoto ñaʼa‑ia roo tuku,
te ma ku kuu ka‑ro ná n‑ka xo kuu‑ro.
N‑nadandoto Ianyuux‑ia chi kuaʼa‑ia xa daa kada‑ia.
5 Dɨuni xaxeʼe xa kuenda kɨu n‑ka xiʼí‑ro na n‑xiʼí Jesucristu,
nandoto‑ro kɨu na ndixi‑ia xaxeʼe xa n‑nandoto mee‑ia.
6 Xaxeʼe xa kuenda kɨu n‑ka xitakaa dika‑ro xiʼin‑ia na n‑xitakaa dika‑ia,
ñatuka kuu anu‑ro xa kada‑ro kuechi n‑ka xo kida‑ro.
Ñatuka kuu anu‑ro xa kada‑ro kuechi n‑ka xo kida‑ro chi n‑ka dandoo‑ro xijan.
Xnaʼa‑ro xa daa n‑yaʼa.
7 Dɨuni xaxeʼe xa kuenda kɨu n‑ka xiʼí‑ro xiʼin Cristu n‑dayaa ñaʼa‑ia nuu xijan.
8 Xaxeʼe xa kuenda kɨu n‑ka xiʼí‑ro xiʼin Cristu,
n‑ka kukanu ini‑ro xa kutuu‑ro nuu tuu‑ia nɨkava nɨkuita.
9 Xnaʼa‑ro xa n‑nandoto Cristu te ma kuú ka‑ia.
Ni ɨɨn nuu kueʼe ma kaʼni ñaʼa.
10 Ma kuú ntuku‑ia xaxeʼe kuechi n‑ka xo kida‑ro chi idii ni vuelta n‑xiʼí‑ia xaxeʼe xijan.
N‑nandoto‑ia te kida‑ia ntdaa xa juini Ianyuux.
11 Dani roo,
xaxeʼe xa n‑ka dandoo‑ro xaloko xaduʼa n‑ka xo kida‑ro,
kuenda kɨu xa n‑ka xiʼí‑ro te n‑ka nandoto‑ro te n‑ka nduu‑ro ɨnka ñayiu.
Xaxeʼe xijan ka kida‑ro xa juini Ianyuux vitna,
chi ka kunduu‑ro xiʼin Cristu Jesús.
12 Xaxeʼe xijan maxku juejoon koio ka‑n xa taxnuni xaloko nuu‑n na kuaʼa maxku kada ka‑n kuechi ka kida‑n vaxi,
chi ka kuu anu‑n xa kada‑n xaloko xaxeʼe xa ka kuu‑n ñayiu ñuñayiu.
13 Maxku kada ka‑n kuechi xaxeʼe yuʼu‑n,
ndaʼa‑n,
nduchi nuu‑n.
Naa xa kada ka‑n kuechi xaxeʼe ndruni xijan,
kada‑n xa taʼu tniu Ianyuux.
Kada‑n xavaʼa chi ñatuka kuu‑n ná n‑ka xo kuu‑n;
tuku ñayiu ka kuu‑n vitna.
14 Ñatuka kuu anu‑ro xa kada‑ro kuechi n‑ka xo kida‑ro chi ñatuka kuu anu‑ro xa kada‑ro xijan.
Xaxeʼe xa kundaʼu ini ñaʼa Ianyuux,
ñatuka taxnuni xijan nuu‑ro;
ñadu xaxeʼe xa ka jandixa‑ro ley ñatuka taxnuni xijan nuu‑ro.
Ná ka kuu ñayiu n‑ka xiaʼan tnuʼu‑i xtoʼo‑i xa kadatniu duʼa‑i ka kuu ñayiu ka jandixa Ianyuux
15 Vaa kachi koio‑n:
“Nux daa io na kada naʼi‑ro kuechi nudaa chi xaxeʼe xa kundaʼu ini ñaʼa Ianyuux xiʼin xa n‑taxkanu ini‑ia xa n‑ka kida‑ro kuechi nanitaʼu‑ro;
ñadu xaxeʼe xa jandixa‑ro ley.”
16 Ná ka kuu ñayiu n‑ka xiaʼan tnuʼu‑i nuu se ku kuu xtoʼo‑i xa kadatniu duʼa‑i,
te kada koio‑i xa taʼu tniu‑s nuu‑i ka kuu ñayiu ka kida xa taʼu tniu Ianyuux nuu‑i xiʼin ñayiu ka kida xaloko kuu anu‑i xa kada‑i.
Io xa jandixa koio ñayiu jan xtoʼo‑i hora taʼu tniu‑s nuu‑i chi n‑ka xiaʼan‑i tnuʼu‑i xa jandixa‑i‑sɨ.
Ñayiu ka kida xaloko kuu anu‑i xa kada‑i,
dandoo ñaʼa Ianyuux,
te ñayiu ka kida xa taʼu tniu Ianyuux ñatuka xndido xtau‑i kuechi‑i.
17 N‑ka xo kida‑n xaloko n‑kuu anu‑n xa kada‑n.
Ná ka kuu ñayiu ka xinokuechi nuu xtoʼo‑i kɨu xiʼin kɨu n‑ka xo kuu‑n.
Ko vitna,
n‑ka dandoo‑n xijan chi ka jandixa‑n xa ɨɨn xandaa kuu xa n‑ka dakuaʼa ñaʼa ñayiu ka kukanu ini Cristu Jesús,
te ñatuka xe tnɨɨ anu‑n.
Na kutaʼu‑ro nuu Ianyuux xa n‑ka jandixa‑n xa ɨɨn xandaa kuu xa n‑ka dakuaʼa ñaʼa ñayiu ijan.
18 Kuenda kɨu n‑ka yaa‑n nuu se kuu xtoʼo‑n xa ñatuka ka kida‑n xaloko xaduʼa.
N‑ka kixeʼe‑n ka xinokuechi‑n nuu Ianyuux vitna,
te ka kida‑n xa taʼu tniu‑ia nuu‑n.
19 Duʼa kakuneʼe‑da xa na kuaʼa na kutnuni ini koio‑n xa jaʼan‑da chi ñayiu ñuñayiu ka kuu‑n.
N‑ka xo kida‑n kuechi xaxeʼe yuʼu‑n,
ndaʼa‑n,
nduchi nuu‑n.
N‑ka xo kida‑n xaloko xaduʼa n‑ka xo kuu ini ndixi;
ñatu n‑ka xo kida‑n ná jaʼan ley.
Na xa kada koio ka‑n kuechi xaxeʼe ndruni xijan,
kada‑n xa taʼu tniu Ianyuux vitna,
te kadatniu ka‑ia anu‑n te kada ka‑n xa juini‑ia.
20 Tiempu ta dandoo ka‑n xaloko n‑ka xo kida‑n,
ña n‑kuu xa jandixa koio‑n ley Ianyuux chi n‑ka xo kida‑n xa n‑kuu anu‑n xa kada‑n.
Ná kuu ñayiu ka jandixa xtoʼo‑i n‑ka xo kuu‑n.
21 Ña tuu nax n‑ka kineʼe‑n xa n‑ka xo kida‑n xaloko xaduʼa.
Ka kujanuu‑n vitna xa n‑ka xo kida‑n xijan.
Dandoo Ianyuux ñayiu ka kida ná n‑ka xo kida‑n.
22 Kuenda kɨu ñayiu n‑ka yaa nuu xtoʼo‑i ka kuu‑n vitna te ka xinokuechi‑n nuu Ianyuux ná ka xinokuechi‑ro nuu ñayiu kuu xtoʼo‑ro.
Kadatniu ka‑ia anu‑n te kada ka‑n xa juini‑ia.
Xaxeʼe xijan kutuu koio‑n nuu tuu‑ya nɨkava nɨkuita.
23 Dandoo Ianyuux ñayiu dani ka kida xaloko xaduʼa kuu anu‑i xa kada‑i.
Te roo,
ñayiu ka xinokuechi nuu Ianyuux,
kutuu koio‑ro nuu tuu‑ia nɨkava nɨkuita xaxeʼe xa n‑xiʼí Cristu Jesús,
Ia kuu Xtoʼo‑ro xaxeʼe‑ro.
Xijan kuu taʼu‑ro.