Carta kiʼna nuu n‑kidavaʼa Spalu nuu ñayiu Corinto
Kidavaʼa Spalu nuu ñayiu ñuu Corinto
1
Mee‑da kuu Spalu.
N‑kida Ianyuux xa n‑jaʼan ñaʼa Jesucristu mee‑da xa ku kuu‑da ɨɨn se n‑tundaʼa‑ia.
Carta yaʼa kidavaʼa‑da xiʼin ñani‑ro Sóstenes.
2 Kidavaʼa‑da nuu mee‑n ka kuu ñayiu ka jandixa Ianyuux ñuu nani Corinto.
Xaxeʼe xa ka kunduu‑n xiʼin Cristu Jesús,
te n‑kida Ianyuux xa ka kuu‑n ñayiu dɨɨn nuu mee‑ia.
Xá n‑jaʼan ñaʼa‑ia mee‑n xa ku kuu koio‑n ñayiu ka kida xa juini mee‑ia.
Ntdaa ñuu ñuñayiu n‑jaʼan‑ia ñayiu xa jandixa koio‑i Xtoʼo‑ro Jesucristu.
Xtoʼo mee‑i kuu‑ia,
te Xtoʼo mee‑ro kuu‑ia.
3 Na taxi Taa‑ro Ianyuux xiʼin Xtoʼo‑ro Jesucristu xamani‑ia nuu‑n,
te na kada‑ia xa kutuu vaʼa koio‑n.
Ntdaa kɨu xiaʼan‑da xa n‑kutaʼu‑da nuu Ianyuux
4 Ntdaa kɨu xiaʼan‑da xa n‑kutaʼu‑da nuu Ianyuux,
xaxeʼe mee‑n.
Hora n‑ka jandixa‑n Cristu Jesús,
te n‑taxi Ianyuux xamani‑ia nuu‑n,
te xaxeʼe xijan xiaʼan‑da xa n‑kutaʼu‑da nuu mee‑ia.
5 Xaxeʼe Cristu Jesús,
kuu ná kuu xa n‑ka nduu‑n ñayiu kuika.
Xá n‑ka tnɨɨ‑n xakuika Ianyuux.
Kida‑ia xa ka xian tnuʼu‑n tnuʼu‑ia nuu ɨnka ñayiu,
te kida‑ia xa ka kutnuni ini‑n tnuʼu‑ia.
6 N‑jaʼan ndaa‑da xaxeʼe Cristu nuu mee‑n,
te n‑ka xeka vaʼa‑n tnuʼu‑da.
7 Ña ka ndoñuʼu ka‑n ni ɨɨn,
chi xa n‑ka tnɨɨ‑n ntdaa xa n‑taxi Ianyuux.
Diko ni xndetu‑n nakɨu ndixi Xtoʼo‑ro Jesucristu,
xa dandeʼa ñaʼa‑ia mee‑ia nuu mee‑n.
8 Kada‑ia xa kundee ini koio ka‑n,
xa jandixa naʼi ka‑n‑ia nde na ndixi‑ia,
xa maxku dakuido datau‑n anu‑n kɨu ndadandaa Xtoʼo‑ro Jesucristu ntdaa xa io.
9 N‑jaʼan ñaʼa Ianyuux mee‑n,
xa kunduu koio‑n xiʼin Daʼya Yɨɨ‑ia.
Daʼya Yɨɨ‑ia kuu Xtoʼo‑ro Jesucristu.
Ka kuaʼa‑n xa koo koio‑n confianza nuu Ianyuux,
xa daxinokava‑ia ntdaa xa n‑kixeʼe‑ia.
Maxku jantnaʼa ka‑n
10 Ñani‑da kuʼa‑da,
ka jaʼan mee‑n xa ka jandixa‑n Xtoʼo‑ro Jesucristu.
Xijan kuu xa,
xijan‑da nuu‑n xa ɨɨn nuu jaʼan koio‑n,
ntdaa‑n.
Maxku jantnaʼa tnuʼu‑n,
kutuu mani koio‑n,
ɨɨn‑n xiʼin ɨnka‑n.
Na koo xa ɨɨn nuu kani ini koio‑n,
ntdaa‑n.
11 Ñani‑da kuʼa‑da,
duʼa jaʼan‑da,
xaxeʼe xa n‑ka kachitnuñaʼa ñayiu veʼe Cloé xa ka jantnaʼa tnuʼu‑n.
12 Jaʼan‑da xa ka jantnaʼa tnuʼu‑n chi jaʼan ɨɨn‑n:
“Kunduu mee‑r xiʼin Spalu”,
te jaʼan ɨnka‑n:
“Kunduu mee‑r xiʼin Apolos.”
Te ɨnka‑n jaʼan:
“Ko kunduu mee‑r xiʼin Spedru”,
te ɨnka‑n:
“Kunduu mee‑r xiʼin Cristu.”
13 Kuu ná kuu xa n‑ka dakexio nuu tnaʼa‑n Cristu.
¿N‑xitakaa Spalu nuu curuxi xaxeʼe‑n a?
¿N‑ka xendute‑n xa kunduu koio‑n xiʼin Spalu a?
Ñaʼa.
14 Xiaʼan‑da xa n‑kutaʼu‑da nuu Ianyuux xa mee‑da,
ña n‑dajuendute ñaʼa‑da ni ɨɨn‑n.
Diko ni se nani Crispo xiʼin se nani Gayo n‑dajuendute‑da.
15 Xijan kuu xa,
ñayo‑n kuaʼa xa jaʼan‑n xa n‑ka xendute‑n xa kunduu‑n xiʼin mee‑da.
16 Te dɨuni n‑dajuendute‑da ñayiu veʼe Estéfanas.
Ña najaʼan‑da nux n‑dajuendute ka‑da ɨnka ñayiu.
17 Ña n‑tundaʼa ñaʼa Cristu mee‑da xa dajuendute‑da ñayiu,
n‑tundaʼa ñaʼa‑ia xa juña tnuʼu‑da tnuʼu vaʼa‑ia ñayiu.
Ña n‑tundaʼa ñaʼa‑ia,
xa jaʼan‑da tnuʼu ɨɨn nuu xiʼin tnuʼu ka xani ini ñayiu.
N‑tundaʼa ñaʼa‑ia,
xa juña tnuʼu‑da ñayiu xa n‑xiʼí Cristu nuu curuxi,
xa ma kuú koio ñayiu xiʼin kuechi‑i.
Vaʼa naʼa Ianyuux te vaʼa taxnuni‑ia
18 Nuu ñayiu jɨʼɨn koio andea,
xa kakuneʼe‑da curuxi Cristu,
kuu ná kuu xa jaʼan‑da tnuʼu lilu.
Ko mee‑ro,
ñayiu dakaku ñaʼa Ianyuux xa ma jɨʼɨn‑ro andea,
xa kakuneʼe‑da curuxi Cristu,
kuu xa jaʼan‑da xa xá n‑kida Ianyuux xa ma kuú‑ro xiʼin kuechi‑ro.
19 Nani jaʼan tnuʼu Ianyuux,
dani kuu:
Danaa‑r tnuʼu se ka jaʼan xa ka tuʼa vaʼa‑s.
Daxio‑r tnuʼu se ka xani ini xa vaʼa ka kutnuni ini‑s.
20 ¿Nde io se xani ini xa kutnuni ini‑s?
¿Nde io se tuʼa vaʼa?
¿Nde io se vaʼa jaʼan tnuʼu ka xani ini ñayiu ñuñayiu?
Xá n‑kida Ianyuux xa tnuʼu lilu kuu ntdaa xa ka jaʼan‑s.
21 Vaʼa naʼa Ianyuux xa ñatu xiniñuʼu xa ka xani ini ñayiu,
xa jini koio ñayiu Ianyuux.
N‑tna ini Ianyuux xa tundaʼa ñaʼa‑ia mee‑da,
xa juña tnuʼu koio‑da tnuʼu mee‑ia nuu ñayiu.
Juini tnuʼu mee‑da kaa ná kaa tnuʼu lilu nuu mee‑i,
ko xiʼin tnuʼu jan,
dakaku Ianyuux ñayiu ka jandixa mee‑ia,
xa ma kuú koio‑i xiʼin kuechi‑i.
22 Se Israel,
ka juini‑s xa jini‑s milagru.
Se ña ka kuu ñayiu Israel,
se ka jaʼan tnuʼu griegu,
xnduku‑s se vaʼa jaʼan xa ka xani ini ñayiu ñuñayiu.
23 Ko mee‑da,
kachitnuʼu koio‑da Cristu,
Ia n‑xitakaa.
Ñayiu Israel,
ka kiti ini‑i xaxeʼe tnuʼu‑da.
Ná kuu ɨɨn toto kaʼnu katuu ichi,
xa jɨn kɨʼɨ‑i te ndua ndeyu‑i,
kuu tnuʼu mee‑da.
Nuu ñayiu ña ka kuu ñayiu Israel,
tnuʼu mee‑da kuu ná kuu tnuʼu lilu.
24 Ko ñayiu n‑jaʼan Ianyuux xa kunduu‑i xiʼin mee‑ia,
ka kutnuni ini‑i tnuʼu jaʼan‑da.
Juini ka kuu‑i ñayiu Israel,
a ñayiu ña ka kuu ñayiu Israel,
ko ka kutnuni ini‑i xa n‑xiʼí Cristu xaxeʼe mee‑i.
Ka kutnuni ini‑i xa duʼa n‑dakaku Ianyuux mee‑i,
xa ma kuú‑i xiʼin kuechi‑i.
Ka kutnuni ini‑i xa vaʼa naʼa‑ia te vaʼa taxnuni‑ia nuu‑i.
25 Xa n‑kida Ianyuux,
kaa ná kaa xa lilu nuu ñayiu ñuñayiu,
ko yo vaʼa ka xa n‑kida mee‑ia dada ntdaa xa ka xani ini mee‑i.
Nuu mee‑i,
kaa Ianyuux ná kaa Ia ña ndaku,
ko yo ndaku ka mee‑ia dada mee‑i.
26 Ñani‑da,
najaʼan koio jundu kuu‑n.
Se tuʼa vaʼa xa xani ini ñayiu ñuñayiu ña ka kuu‑n.
Ni se taxnuni nuu ñayiu ña ka kuu‑n,
ni se kuika ña ka kuu‑n.
Ko n‑jaʼan ñaʼa Ianyuux mee‑n,
xa kunduu koio mee‑n xiʼin mee‑ia.
27 N‑kaxí‑ia se kaa ná kaa se lilu nuu ñayiu ñuñayiu,
xa kada‑ia xa kujanuu koio se ñuñayiu nuu mee‑ia.
Ka xani ini‑s xa se tuʼa vaʼa ka kuu‑s,
ko kujanuu koio ka mee‑s nuu Ianyuux.
N‑kaxí‑ia se kaa ná kaa se ña ndaku nuu ñayiu ñuñayiu,
xa kada‑ia xa kujanuu koio se ñuñayiu nuu mee‑ia.
Se taxnuni nuu ñayiu ñuñayiu ka kuu‑s,
ko kujanuu koio‑s nuu Ianyuux.
28 N‑kaxí‑ia ñayiu kundaʼu kukee,
xiʼin ñayiu ñatu xiniñuʼu.
Nde ñayiu ña tuu nax kuu,
n‑kaxí‑ia.
N‑kaxí‑ia mee‑i,
xa kada‑ia xa se ka taxnuni nuu ñayiu ñuñayiu maxku yaʼu ka ni ɨɨn.
29 Duʼa n‑kida‑ia,
xa ni ɨɨn ñayiu ma kuaʼa xa najuen tnuʼu‑i mee‑i nuu mee‑ia.
30 N‑kida‑ia xa kunduu koio mee‑n xiʼin Cristu Jesús.
N‑kida Jesucristu xa nduu‑ro ñayiu ka xini Ianyuux.
Xaxeʼe xa xini Jesucristu Ianyuux,
kida‑ia xa xini mee‑ro Ianyuux.
Xaxeʼe Jesucristu,
n‑taxkanu ini ñaʼa Ianyuux mee‑ro.
N‑kida Jesucristu xa kuu‑ro ñayiu dɨɨn nuu Ianyuux,
te n‑kida‑ia xa juini‑ro xa kada‑ro xa juini Ianyuux.
N‑chiyaʼu Jesucristu kuechi‑ro,
te n‑kida‑ia xa xtuu libre‑ro.
31 Xijan kuu xa,
na koo ná jaʼan tnuʼu Ianyuux:
“Ni ɨɨn ñayiu ma kuaʼa xa jaʼan vaʼa‑i xaxeʼe mee‑i.
Na jaʼan vaʼa koio ñayiu xaxeʼe Xtoʼo‑ro Jesucristu.”