Carta kuu uu n‑kidavaʼa Spalu nuu ñayiu Corinto
Kidavaʼa Spalu nuu ñayiu ka jandixa Jesucristu ñuu nani Corinto
1
Mee‑da,
Spalu,
xaxeʼe xa da n‑juini Ianyuux,
kuu‑da ɨɨn se n‑tundaʼa Jesucristu.
Xiʼin ñani‑ro Timoteo,
kidavaʼa‑da carta yaʼa nuu ñayiu ka jandixa Ianyuux ñuu nani Corinto.
Dɨuni kidavaʼa‑da nuu ntdaa ñayiu n‑kaxí Ianyuux xndaxio nituʼu distrito Acaya.
N‑kida dɨɨn ñaʼa Ianyuux mee‑n,
xa kada koio‑n xa juini mee‑ia.
2 Na taxi Taa‑ro Ianyuux xiʼin Xtoʼo‑ro Jesucristu xamani‑ia nuu‑n,
te na kada‑ia xa kutuu vaʼa koio‑n.
Kueʼe vida n‑yaʼa Spalu
3 Na kutaʼu‑ro Ianyuux.
Taa Xtoʼo‑ro Jesucristu kuu‑ia.
Nani kundau ini ɨɨn seyɨɨ daʼya‑s,
dani kundau ini ñaʼa Ianyuux mee‑ro.
Nujuiin‑ia diñi‑ro xa taxi‑ia tnuʼu kanu ini.
4 Davaʼa nga xa yaʼa‑da,
te taxi‑ia tnuʼu kanu ini.
Taxi‑ia tnuʼu kanu ini mee‑da,
xa kuaʼa‑da xa juñaʼa‑da tnuʼu kanu ini nuu ɨnka ñayiu.
Davaʼa nga xa io xa yaʼa koio mee‑i,
te kuaʼa‑da xa juñaʼa‑da tnuʼu kanu ini nuu mee‑i,
xaxeʼe xa n‑taxi Ianyuux tnuʼu kanu ini nuu mee‑da.
5 Kueʼe vida n‑yaʼa Cristu,
te xaxeʼe xa kunduu‑da xiʼin Cristu,
kueʼe vida yaʼa mee‑da tuku.
Ko nujuiin Cristu diñi‑da xa taxi‑ia tnuʼu kanu ini,
xa kundee ini‑da.
Nani yaʼa‑da xa yaʼa ka‑da kueʼe vida,
dani taxi‑ia xa taxi ka‑ia kueʼe tnuʼu kanu ini,
xa kundee ini‑da.
6 Kueʼe vida yaʼa mee‑da,
xa kutuu koio mee‑n xiʼin Ianyuux kuia ma jɨn ndɨʼɨ.
Te nujuiin‑da diñi‑n,
xa taa‑da tnuʼu kanu ini,
xa kunduu naʼi koio ka‑n xiʼin Ianyuux.
Nujuiin Cristu diñi mee‑da,
xa kada‑ia xa kundee ini mee‑da,
te kunujuiin‑ia diñi mee‑n,
xa kada‑ia xa kundee ini koio mee‑n.
Duʼa kutuu vaʼa koio mee‑n xiʼin Ianyuux kuia ma jɨn ndɨʼɨ.
Te duʼa kundee ini koio‑n hora kueʼe vida ka yaʼa mee‑n ná kueʼe vida ka yaʼa mee‑da.
7 Xndaxio‑da kueʼe confianza nuu‑n.
Xnaʼa‑da xa nani ka kunduu‑n xiʼin‑da hora kueʼe vida ka yaʼa‑da,
dani ka kunduu‑n xiʼin‑da hora ka tnɨɨ‑da tnuʼu kanu ini taxi Ianyuux.
8 Ñani‑da kuʼa‑da,
juini‑da xa kutnuni ini koio‑n xa yo kueʼe vida n‑yaʼa‑da hora n‑xo tuu‑da Asia.
Kueʼe xa kueʼe vida n‑yaʼa‑da.
Nde n‑xee xa ña n‑kundee ini ka‑da,
te n‑xani ini‑da xa kuú‑da.
9 N‑ka xo naʼa‑da xa io xa kuú‑da xaxeʼe xa kunduu‑da xiʼin Cristu.
Ko duʼa n‑kuu xa koo‑da confianza nuu Ianyuux.
Ia nadandoto ndɨyɨ kuu‑ia.
10 Xá n‑dakaku ñaʼa‑ia,
te vitna dakaku ñaʼa‑ia,
xa duʼa ma kuú koio‑da.
Te xndaxio‑da confianza nuu‑ia xa dani dakaku ñaʼa‑ia.
11 Mee‑n tuku,
kuaʼa‑n xa chindee ñaʼa‑n.
Kajan taʼu koio‑n xaxeʼe‑da.
Nux kueʼe‑n na kajan taʼu xaxeʼe‑da,
dani kueʼe‑n juñaʼa koio xa n‑kutaʼu‑n nuu Ianyuux hora dakaku ñaʼa‑ia.
Nakuenda n‑kukuee Spalu xa jɨʼɨn‑s ñuu Corinto
12 Io ɨɨn xa kida xa yo kuvete‑da.
Ña tuu nax tekuechi ñaʼa anu‑da.
Meni xavaʼa n‑ka kida‑da ñuñayiu yaʼa,
ña n‑ka dandaʼu ñaʼa‑da ni mee‑n ni ɨnka ñayiu.
N‑chindee ñaʼa Ianyuux xa duʼa xtuu‑da.
Ñadu xaxeʼe xa vaʼa ka xani ini mee‑da,
kuu xaxeʼe xa n‑taxi Ianyuux xamani‑ia.
13 Kaxi kaxi kidavaʼa‑da nuu‑n,
xa kaʼu koio‑n,
te kutnuni ini koio‑n tnuʼu‑da.
Juini‑da xa kutnuni ini vaʼa koio‑n.
14 Na n‑xo tuu‑da xiʼin‑n,
n‑ka kixeʼe‑n xa kutnuni ini‑n xa jaʼan‑da,
xa kida‑da,
ko dava ni.
Juini‑da xa vaʼa ka kutnuni ini koio‑n.
Kɨu na ndixi Xtoʼo‑ro Jesucristu,
te juini‑da xa kuaʼa‑n xa jaʼan vaʼa koio mee‑n xaxeʼe mee‑da,
ná jaʼan vaʼa koio mee‑da xaxeʼe mee‑n.
15 N‑xo naʼa‑da xa kuvete koio‑n nux kotoniʼni ñaʼa‑da.
Xijan kuu xa n‑xani ini‑da xa xee‑da ñuu mee‑n kiʼna nuu.
Te duʼa kuvete koio‑n xa kotoniʼni ñaʼa‑da uu vuelta.
16 N‑xani ini‑da xa kiʼna ka mee‑n kotoniʼni ñaʼa‑da,
hora na yaʼa‑da xa jɨʼɨn‑da Macedonia.
Te dada kotoniʼni ñaʼa‑da ɨnka vuelta,
hora na ndixi‑da xa n‑xeʼen‑da Macedonia.
Nux duʼa n‑kuu,
te n‑ka kuaʼa‑n xa chindee ñaʼa‑n xa jɨʼɨn‑da Judea.
17 ¿Ka xani ini‑n xa n‑juini‑da xa dandaʼu ñaʼa‑da u?
¿Ka xani ini‑n xa uu tnuʼu‑da io a?
Ña ndaa.
Ñatu jaʼan mee‑da ná ka jaʼan ñayiu ña ka jandixa Cristu,
ñatu jaʼan‑da “joon” ni ña jaʼan‑da “ñaʼa” idini vuelta.
18 Nani jaʼan Ianyuux,
dani jaʼan mee‑da.
Nux jaʼan‑ia “joon”,
te “joon” kuu.
Te nux jaʼan‑ia “ñaʼa”,
“ñaʼa” kuu.
Te duʼa jaʼan mee‑da tuku.
19 Mee‑da xiʼin Silvanu xiʼin Timoteo,
n‑ka kachitnuʼu‑da tnuʼu vaʼa Jesucristu nuu‑n.
Jesucristu kuu Daʼya Yɨɨ Ianyuux,
te mee‑ia,
ñatu jaʼan‑ia “joon” ni ña jaʼan‑ia “ñaʼa” idini vuelta.
Nux ɨɨn xa jaʼan‑ia xa kada‑ia,
te duʼa kida‑ia.
20 Chi kida Jesucristu ntdaa ná io ná juaʼan ntdaa tnuʼu n‑taxi Ianyuux.
¡Xijan kuu xa jaʼan‑ro xa duʼa na koo!
Xaxeʼe Jesucristu xiaʼan‑ro xa n‑kutaʼu‑ro nuu Ianyuux.
21 Kida Ianyuux xa kunduu‑ro xiʼin Cristu.
Kida‑ia xa ka kunduu mee‑da xiʼin‑ia,
te kida‑ia xa kunduu koio mee‑n xiʼin‑ia.
N‑kaxí ñaʼa‑ia mee‑ro,
xa ku kuu‑ro ñayiu mee‑ia.
22 Kuu ná kuu xa n‑dakeé tnuni ñaʼa Ianyuux xiʼin ɨɨn sellu.
Xá n‑taxi‑ia Espíritu Ii,
xa kadatniu‑ia anu‑ro.
Xiʼin Espíritu Ii,
n‑taxi‑ia tnuʼu‑ia,
xa kutuu vaʼa‑ro xiʼin‑ia.
23 Naʼa Ianyuux xa kida‑da,
te jaʼan ndaa‑ia xaxeʼe‑da nakuenda kuu xa ta xee ka‑da Corinto.
Xaxeʼe mee‑n ta xee ka‑da,
chi ña juini‑da xa kudeen ñaʼa‑da.
Te io anu‑da xa kuú‑da nux ña ndaa ntdaa xa jaʼan‑da.
24 Ñadu juini‑da xa taxnuni‑da nuu‑n xa jandixa koio‑n.
Chi vaʼa naʼa‑da xa ka jandixa‑n Jesucristu te ka kunduu‑n xiʼin‑ia.
Xa juini‑da kuu xa chindee ñaʼa‑da,
xa kuvete koio ka‑n.