Ñani‑ro kuʼa‑ro ka kundaʼu
16
N‑ka kakuneʼe mee‑n tvini ka xiaʼan‑n nuu ñani‑ro kuʼa‑ro ka kundaʼu.
Jaʼan‑da nuu mee‑n,
nani n‑jaʼan‑da nuu ñayiu ka jandixa Jesucristu,
distrito Galacia.
2 Kɨu kiʼna nuu,
ɨɨn ɨɨn semana,
kunevaʼa‑n,
ɨɨn ɨɨn‑n,
xa juini‑n xa juñaʼa nga‑n.
Nani niʼi‑n,
dani juñaʼa‑n,
ntna una kɨu.
Te duʼa ma koo xa io xa dataka‑ro tvini jan,
hora nde na xee‑da ñuu‑n.
3 Na xee‑da,
te tundaʼa‑da davaʼa nga seyɨɨ kaxí koio mee‑n,
xa jɨʼɨn koio‑s ñuu nani Jerusalén.
Kaneʼe koio‑s jɨʼɨn xa xiaʼan nga mee‑n nuu ñani‑ro kuʼa‑ro Jerusalén.
Tundaʼa‑da‑s jɨʼɨn‑s xiʼin carta kadavaʼa mee‑da.
4 O nux vatuka xa jɨʼɨn mee‑da tuku,
te jɨʼɨn koio‑da xiʼin‑s.
Jɨʼɨn‑da distrito Macedonia
5 Ko ditna ka,
io xa jɨʼɨn‑da distrito Macedonia.
Te dada,
xee‑da ñuu mee‑n.
6 Nux vatuka,
te ndoo‑da xiʼin‑n yoo vixi,
xa kuaʼa xa chindee ñaʼa koio‑n mee‑da,
xa jɨʼɨn naʼi‑da davaʼa nga ñuu jɨʼɨn‑da.
7 Chi ña juini‑da xa yaʼa‑da ñuu‑n vitna,
xa kotoniʼni tnaʼa‑ro uni koon ni kɨu.
Juini‑da xa ndoo‑da xiʼin‑n,
nux juejoon Xtoʼo‑ro Jesucristu.
8 Kutuu‑da ñuu nani Éfeso,
vitna xiʼin nde viko Pentecostés.
9 Chi kuu ná kuu xa io ɨɨn yeʼe najaan vaʼa nuu‑da.
Kuaʼa‑da xa juña tnuʼu‑da tnuʼu vaʼa Ianyuux nuu kueʼe xa kueʼe ñayiu vitna.
Ko dɨuni,
io kueʼe ñayiu ka xini uʼu ñaʼa.
10 Nux na xee Timoteo ñuu‑n,
te io xa kueka vaʼa koio‑n‑sɨ.
Dandeʼa‑n‑sɨ xa ña ndoñuʼu‑s xa yuʼu‑s xaxeʼe‑n.
Kida‑s tniu n‑taʼu tniu Xtoʼo‑ro Jesucristu.
Nani kida mee‑da,
dani kida mee‑s.
11 Xijan kuu xa koo koio‑n xañuʼu nuu‑s.
Chindee mani‑n‑sɨ,
xa kuiko‑s ndixi‑s nuu‑da,
chi ndetu‑da xa ndixi‑s xiʼin ñani‑ro kix koio.
12 Ñani‑ro nani Apolos tuku.
Kueʼe n‑xijan‑da nuu‑s,
xa jɨʼɨn‑s ñuu‑n xiʼin ɨnka ñani‑ro jɨʼɨn vitna.
Ko n‑jaʼan mee‑s xa ña juini‑s xa jɨʼɨn‑s ñuu‑n vitna.
Jaʼan‑s xa xee‑s ñuu‑n nakɨu kuaʼa‑s.
Ntdaa ñayiu ka jandixa Jesucristu ka tundaʼa xanyuux nuu‑n
13 Koo koio‑n cuedado,
xa maxku dandaʼu ñaʼa ni ɨɨn.
Jandixa naʼi koio ka‑n tnuʼu Jesucristu.
Kada koio mee‑n ná ka kida se vaʼa,
se ndaku.
Te kundee ini naʼi koio ka‑n.
14 Ntdaa xa kada‑n,
kada‑n xaxeʼe xa xemani‑n Ianyuux te xemani‑n ñayiu.
15 Ñani‑da kuʼa‑da,
ka xini‑n Estéfanas xiʼin familia‑s.
Ka xini‑n xa ka kuu‑s ñayiu kiʼna nuu n‑ka kunduu xiʼin Cristu,
distrito Acaya.
Ka xini‑n xa ka kida‑s ntdaa xa kuaʼa‑s,
xa chindee‑s ñayiu ka jandixa Jesucristu.
16 Xijan‑da nuu‑n xa jandixa koio‑n xa jaʼan mee‑s,
xijan‑da nuu‑n xa jandixa koio‑n ntdaa ñani‑ro kuʼa‑ro ka kida tniu n‑xiaʼan Xtoʼo‑ro Jesucristu.
17 Kudɨ ini‑da xa xá n‑kixee Estéfanas,
xiʼin Fortunato,
xiʼin Acaico.
N‑ka taxi mee‑s ntdaa xa ña n‑ka kuaʼa mee‑n xa taxi‑n.
18 Xá n‑ka taxi‑s tnuʼu kanu ini,
te xini‑da xa n‑ka taxi‑s tnuʼu kanu ini mee‑n tuku.
Io xa kueka vaʼa koio‑n se ijan,
te koo koio‑n xañuʼu nuu‑s.
19 Ntdaa ñayiu ka jandixa Jesucristu,
ñuu xiʼin ñuu Asia,
ka ndajan tnuñaʼa‑i.
Ndajan tnuñaʼa Áquila xiʼin Priscila tuku,
xaxeʼe xa ka jandixa mee‑n Jesucristu,
nani ka jandixa mee‑s mee‑ia.
20 Dɨuni ntdaa ñayiu ka jandixa Jesucristu nataka veʼe‑s ka ndajan tnuñaʼa‑i.
Io xa tnɨtnandaʼa vaʼa‑n.
21 Xiʼin ndaʼa mee‑da kidavaʼa‑da vitna.
22 Nux ña xemani ɨɨn ñayiu Xtoʼo‑ro Jesucristu,
na jɨʼɨn‑i andea.
Yachi na ndixi Xtoʼo‑ro Jesucristu.