N‑nandoto Cristu
15
Ñani‑da kuʼa‑da,
juini‑da xa kutnuni ini koio‑n tnuʼu vaʼa n‑kachitnuʼu‑da.
N‑ka tnɨɨ‑n tnuʼu vaʼa jan,
te xaxeʼe tnuʼu jan,
ka kunduu‑n xiʼin Cristu.
2 Xaxeʼe xa n‑ka tnɨɨ‑n tnuʼu vaʼa Jesucristu,
te n‑dakaku ñaʼa Ianyuux mee‑n,
xa ma kuú koio‑n xiʼin kuechi‑n.
Io xa kundee ini koio‑n,
xa jandixa naʼi ka koio‑n tnuʼu n‑kachitnuʼu‑da.
¿O kuu xa ña n‑ka jandixa‑n Jesucristu a?
3 N‑jaʼan‑da nuu mee‑n xa n‑tnɨɨ mee‑da.
Xa kiʼna nuu,
kuu xa n‑xiʼí Cristu xaxeʼe kuechi mee‑ro.
Duʼa n‑kida Cristu ntdaa ná io ná juaʼan tnuʼu Ianyuux n‑ka chidotnuni seyɨɨ xá n‑kuu kueʼe kuia.
4 N‑ka kuxi ñayiu yɨkɨ kuñu ndi Jesús,
te nuu uni kɨu n‑kida Ianyuux xa n‑nandoto‑ia.
Duʼa n‑ka chidotnuni seyɨɨ xá n‑kuu kueʼe kuia.
5 Na n‑yaʼa xa n‑nandoto Cristu,
te n‑xini Spedru mee‑ia.
Dada n‑kixee Cristu nuu se tundaʼa‑ia.
6 Ijan dada n‑kixee‑ia nuu n‑ka xo nataka oʼon cientu ñani‑ro kuʼa‑ro.
N‑ka xini‑s‑ia,
ntdaa‑s.
Te juini ɨɨn uu‑s xá n‑ka xiʼí,
ko tuu naʼi dava ka‑s xiʼin‑ro nde vitna.
7 Dada n‑kixee‑ia nuu Jacobo,
dada nuu ntdaa se tundaʼa‑ia.
8 Te dada n‑kixee Cristu nuu mee‑da tuku.
Ña n‑xo tuu‑da xiʼin‑ia,
na n‑xo tuu‑ia ñuñayiu yaʼa.
Ná kuu ɨɨn se kuee n‑kaku kuu mee‑da.
9 Se luchi ka kuu‑da nuu ntdaa se n‑tundaʼa‑ia.
Xaxeʼe xa n‑kida‑da kueʼe xa uʼu nuu ñayiu ka jandixa Cristu,
ñatu yaʼu‑da xa danani ñaʼa‑ia se tundaʼa‑ia.
10 Xiʼin xamani‑ia,
n‑kida Ianyuux xa kuu mee‑da ɨɨn se tundaʼa Jesucristu.
Te vaʼa xiniñuʼu xamani‑ia,
chi kueʼe ka n‑kidatniu mee‑da,
dada ntdaa se n‑tundaʼa‑ia.
Ko meni mee‑da ñaʼa,
chi xaxeʼe xamani mee‑ia duʼa n‑kuu.
11 Xijan kuu xa,
nux jaʼan mee‑da,
o nux jaʼan koio ɨnka se n‑tundaʼa‑ia,
ko ka jaʼan‑da,
ntdaa‑da,
xa n‑nandoto Cristu.
Te n‑ka jandixa mee‑n tnuʼu n‑ka jaʼan‑da.
Nandoto koio ndɨyɨ
12 Nux xa ka xian tnuʼu‑da nuu ñayiu,
kuu xa n‑kida Ianyuux xa n‑nandoto Cristu,
te,
¿nax kuu xa ka jaʼan dava mee‑n xa ña kuaʼa xa nandoto yɨkɨ kuñu ndɨyɨ?
13 Nux ña kuaʼa xa nandoto yɨkɨ kuñu ndɨyɨ,
duʼa ña n‑nandoto Cristu nda vi.
14 Nux ña n‑nandoto Cristu,
te duʼa ñatu xiniñuʼu xa kachitnuʼu‑da,
te ñatu xiniñuʼu xa ka jandixa‑n.
15 Nux duʼa kuu,
te kuu xa mee‑da ka kuu se ña n‑jaʼan ndaa,
chi n‑ka jaʼan‑da xa n‑kida Ianyuux xa n‑nandoto Cristu.
Ko nux xandaa kuu xa ma nandoto yɨkɨ kuñu ndɨyɨ,
te duʼa ña n‑kida Ianyuux xa n‑nandoto Cristu.
16 Nux ma kada Ianyuux xa nandoto koio ndɨyɨ,
te nde Cristu ña n‑nandoto tuku.
17 Te nux ña ndito Cristu,
te ña yaʼu ni ɨɨn xa ka jandixa‑n‑ia.
Nux duʼa kuu,
te dani xtuu‑n xiʼin kuechi‑n.
18 Nux duʼa kuu,
te ñani‑ro kuʼa‑ro xá n‑ka n‑xiʼí,
xá n‑ka juaʼan daʼu ni‑s andea.
Juini n‑ka kunduu mee‑s xiʼin Cristu,
ko nux ña ndito Cristu,
te duʼa n‑ka xiʼí‑s xiʼin kuechi‑s.
19 Nux n‑dandoo‑ro ntdaa xa io ñuñayiu,
xa kunduu‑ro xiʼin Cristu,
te ña n‑nandoto‑ia,
te kuu mee‑ro ñayiu ndaʼu ka dada ntdaa ñayiu.
20 ¡Ko vitna xa n‑kida Ianyuux xa n‑nandoto Cristu!
Xandaa kuu xa Cristu Jesús kuu se n‑nandoto kiʼna nuu,
te kutnuni ini‑ro xa ñayiu n‑ka xiʼí,
nandoto koio‑i tuku.
21 Nani n‑kida Ianyuux xa kuú koio ntdaa ñayiu,
xaxeʼe xa n‑kida idini seyɨɨ xa uʼu,
dani kada‑ia xa nandoto koio ñayiu,
xaxeʼe xa n‑nandoto idini seyɨɨ.
22 Nani ka xiʼí ntdaa ñayiu xaxeʼe Adán,
dani nandoto koio ntdaa ñayiu xaxeʼe Cristu.
23 Ko ɨɨn ni ɨɨn ni.
Ditna ka Cristu,
te dada ntdaa ñayiu ka kunduu xiʼin‑ia hora ndixi‑ia ñuñayiu.
24 Te dada daxinokava Cristu ntdaa xa kida‑ia vitna.
Kada‑ia xa ma koo ka se kunxaʼnu ka nuu ñayiu,
ni se taxnuni nuu ñayiu,
ni se ndaku ka nuu ñayiu.
Kada‑ia xa ma taxnuni ka ni ángel nuu ñayiu,
ni kuiʼna nuu ñayiu.
Te dada juñaʼa Cristu ntdaa nuu xa taxnuni mee‑ia nuu Taa‑ia Ianyuux.
25 Io xa taxnuni Cristu,
nde xa kada maxu‑ia ntdaa xa xini uʼu tnaʼa xiʼin‑ia.
26 Ná kuu ɨɨn se ndaku ka xini uʼu tnaʼa xiʼin Cristu,
duʼa kuu xa io xa kuú koio ntdaa ñayiu.
Ko ndaku ka Cristu dada se ijan.
Xaxeʼe xa n‑nandoto Cristu,
n‑niʼi‑ia xa nandoto koio ñayiu ka kunduu xiʼin‑ia.
27 Koo ná jaʼan tnuʼu Ianyuux n‑ka chidotnuni seyɨɨ xá n‑kuu kueʼe kuia.
Jaʼan tnuʼu Ianyuux xa xá n‑kida‑ia xa taxnuni Cristu nuu ntdaa xa io.
Ko xa n‑jaʼan‑ia xa taxnuni Cristu nuu ntdaa xa io,
ña juini kachi xa taxnuni Cristu nuu Taa‑ia Ianyuux.
Kunxaʼnu ka Taa‑ia Ianyuux dada Cristu,
chi Taa‑ia kuu Ia n‑kida xa taxnuni Cristu nuu ntdaa xa io.
28 Na yaʼa xa juñaʼa nga Ianyuux ntdaa xa io nuu Cristu,
hora ijan ni,
juñaʼa nga Cristu mee‑ia nuu Taa‑ia,
xa taxnuni naʼi Taa‑ia nuu Cristu,
xiʼin nuu ntdaa xa io.
29 Io ñayiu ka xendute xaxeʼe ñayiu n‑ka xiʼí.
¿Nakuenda duʼa ka kida‑i?
Nux ma nandoto koio ndɨyɨ,
te,
¿nakuenda ka xendute ñayiu xaxeʼe ñayiu n‑xiʼí?
30 Nux ma nandoto‑ro,
te,
¿nakuenda kadatniu koio ka‑da?
¿Nakuenda yaʼa koio ka‑da xa yo io kuu,
kɨu xiʼin kɨu?
31 Ñani‑da kuʼa‑da,
nux io xa kuú‑da vitnadii,
te vatuka.
Juini‑da xa kutnuni ini koio mee‑n xa duʼa kuu.
Xandaa kuu xa najuen tnuʼu mee‑da xaxeʼe mee‑n,
xaxeʼe xa ka kunduu‑n xiʼin Xtoʼo‑ro Jesucristu.
Te dɨuni xandaa kuu,
xa io tuʼa‑da xa kuú‑da,
kɨu xiʼin kɨu.
32 Juini‑da xa kani ini koio‑n.
Na n‑xian tnuʼu‑da tnuʼu vaʼa Jesucristu nuu ñayiu ñuu nani Éfeso,
n‑kuu ná kuu xa n‑jantnaʼa‑da xiʼin kɨtlavichi yo ndeʼe.
Te,
¿naxa xiniñuʼu xa duʼa n‑kidatniu‑da?
¿Nax n‑niʼi‑da ñuñayiu yaʼa?
Nux ma nandoto‑ro,
te kada mee‑ro ná ka kida ɨnka ñayiu:
“Na kaxi‑ro,
na koʼo‑ro vitna,
chi kuú‑ro tnee,
te ma koo ka.”
¡Ko ña ndaa!
33 Maxku juejoon koio ka‑n xa dandaʼu ñaʼa koio‑s.
Xandaa kuu,
xa nux kunduu‑ro xiʼin se ka kida xa uʼu,
te koo xa mee‑ro tuku kada‑ro xa uʼu,
chi kadajuexa ñaʼa mee‑s.
34 Io xa kani ini vaʼa koio‑n,
te maxku kada koio ka‑n xa uʼu.
Dava mee‑n,
ta jini ka‑n Ianyuux.
Io xa kujanuu koio‑n xa duʼa kuu.
¿Nanda koo xa nandoto koio ndɨyɨ?
35 N‑teku‑da xa ka jaʼan‑n xa ña kutnuni ini‑n nanda kada Ianyuux xa nandoto koio ndɨyɨ.
N‑teku‑da xa juini‑n xa jini‑n nanda kava yɨkɨ kuñu ñayiu,
hora na ndixi‑i.
36 ¡Se lilu ka kuu‑n!
Io xa kani ini koio‑n nanda kuu,
hora dakeé‑ro tata.
Nde kuxi‑ro tata,
dada kane itu xee.
37 Hora dakeé‑n itu‑n,
ta koo ka ndɨdɨ.
Diko ni tata nuni kuu.
O davaʼa nga ɨnka tata dakeé‑n.
38 Ko kida Ianyuux xa dada koo ndɨdɨ.
Hora io ndɨdɨ,
kuu ná kuu xa n‑xiaʼan Ianyuux xa xee nuu tata xa ndɨʼɨ.
Nani n‑xani ini‑ia,
dani kida‑ia,
xa xiaʼan‑ia xa xee nuu ɨɨn ɨɨn tata.
39 Ña ka kuu ɨɨn nuu,
ntdaa xa io.
Yɨkɨ kuñu ñayiu kuu ɨɨn,
te yɨkɨ kuñu kɨtɨ kuu ɨnka.
Yɨkɨ kuñu chilidaa kuu ɨɨn,
te yɨkɨ kuñu chaka kuu ɨnka.
40 Io xa io andɨu,
te io xa io ñuñayiu.
Te vili kaa xa io andɨu,
te vili kaa xa io ñuñayiu.
Ka kuu‑i,
nduu‑i,
xa vili kaa,
ko tuku ka kuu ɨɨn ɨɨn‑i,
ña ka kuu ɨɨn nuu‑i,
nduu‑i.
41 Ndii ngandii,
te ndii yoo,
ko ña ndii ɨɨn nuu ngandii xiʼin yoo.
Dɨuni ndii chudini.
Ko tuku ndii ɨɨn ɨɨn‑tɨ.
42 Duʼa kuu ntdaa xaʼa,
te duʼa koo hora nandoto koio ndɨyɨ.
Yɨkɨ kuñu se ndito vitna kuu ɨɨn,
te yɨkɨ kuñu se n‑nandoto kuu ɨnka.
Hora kuxi‑ro ndɨyɨ,
te vax ndɨʼɨ yɨkɨ kuñu‑i.
Xa teʼyu kuu.
Ko hora kada Ianyuux xa nandoto‑i,
te nuncas ma jɨn ndɨʼɨ yɨkɨ kuñu xee‑i.
43 Kuxi‑ro ɨɨn xa ñatuka vili kaa.
Kada Ianyuux xa nduu‑i ɨɨn xa yo vili kaa.
Kuxi‑ro ɨɨn xa ña ndaku ka.
Kada Ianyuux xa yo ndundaku‑i.
44 Kuxi‑ro ɨɨn xa n‑xo tuu ñuñayiu.
Kada Ianyuux xa nduu‑i ɨɨn xa kuaʼa xa kutuu andɨu.
Nux io yɨkɨ kuñu kuaʼa xa xtuu‑i ñuñayiu,
dɨuni io yɨkɨ kuñu kuaʼa xa kutuu‑i andɨu.
45 Ná jaʼan tnuʼu Ianyuux,
duʼa kuu.
N‑kidavaʼa Ianyuux Adán.
Se kiʼna nuu n‑kuu Adán.
Se ndito n‑kuu‑s,
ɨɨn se n‑xo tuu vaʼa ñuñayiu.
Ná kuu Adán kuu uu,
kuu Cristu.
N‑kida Ianyuux xa kada Cristu xa kutuu vaʼa mee‑ro xiʼin Ianyuux andɨu.
46 Ko xa nandoto‑ro,
ña kuu xa kiʼna nuu.
Ditna ka ndito‑ro xa kutuu‑ro ñuñayiu yaʼa,
te dada nandoto‑ro xa kutuu‑ro andɨu.
47 Xiʼin ñuʼu ñuñayiu,
n‑kidavaʼa Ianyuux Adán.
Se kiʼna nuu n‑kuu‑s.
Andɨu,
n‑kixi Cristu.
Se kuu uu n‑kuu mee‑ia.
48 Ná kuu Adán kuu‑ro,
hora tuu‑ro ñuñayiu.
Ná kuu Cristu ku kuu‑ro,
hora kutuu‑ro andɨu.
49 Nani kuu‑ro ná n‑kuu Adán,
se ñuñayiu,
dani ku kuu‑ro ná kuu Cristu,
se n‑kixi nde andɨu.
50 Ñani‑da kuʼa‑da,
jaʼan‑da nuu‑n xa ña kuaʼa xa kutuu yɨkɨ kuñu‑ro io vitna nuu taxnuni Ianyuux.
Xa vax ndɨʼɨ,
ma kuaʼa‑i xa kutuu‑i nuu ma jɨn ndɨʼɨ ni ɨɨn.
51 Juini‑da xa chinuu koio‑n vitna,
chi jaʼan‑da ɨɨn xa naʼi nuu‑n.
Ma ntdaa‑ro kuú‑ro antecas xa ndixi Jesucristu,
ko hora na ndixi‑ia,
ndada xee ñaʼa Ianyuux ntdaa‑ro.
52 Ña ndoñuʼu Ianyuux kueʼe tiempo xa ndada xee ñaʼa‑ia.
Ɨɨn nunuu ni,
te natnɨɨ‑ro yɨkɨ kuñu xee.
Kuu ná kuu xa najuene‑ro,
te najaan‑ro nduchi nuu‑ro,
te duʼa koo.
Na dandaʼi ángel,
ia xinokuechi nuu Ianyuux,
trompeta idinga vuelta,
te kada Ianyuux xa nandoto koio ndɨyɨ,
xa nuncas ma kuú koio ka‑i.
Nuniʼno ni nadama ñaʼa‑ia mee‑ro,
ntdaa‑ro.
53 Yɨkɨ kuñu‑ro io vitna vax ndɨʼɨ.
Ndoñuʼu xa na taxi Ianyuux yɨkɨ kuñu xee ma jɨn ndɨʼɨ.
Vitna ka xiʼí‑ro,
ntdaa‑ro.
Ndoñuʼu xa kada Ianyuux xa kutuu vaʼa‑ro xiʼin‑ia kuia ma jɨn ndɨʼɨ.
54 Yɨkɨ kuñu‑ro io vitna vax ndɨʼɨ.
Vitna ña kuaʼa xa kutuu‑ro kuia ma jɨn ndɨʼɨ.
Ko na taxi Ianyuux yɨkɨ kuñu xee,
te kutuu vaʼa‑ro xiʼin‑ia kuia ma jɨn ndɨʼɨ.
Kɨu ijan,
koo ná n‑jaʼan Ianyuux,
hora n‑jaʼan‑ia nuu se n‑ka chidotnuni tnuʼu‑ia xá n‑kuu kueʼe kuia.
Ná kuu xa n‑jaʼan‑ia nuu ɨɨn seyɨɨ xini uʼu tnaʼa xiʼin‑ia n‑kuu.
Se xini uʼu tnaʼa xiʼin‑ia,
kuu xa io xa kuú koio ntdaa ñayiu.
N‑jaʼan Ianyuux nuu se ijan:
“Xá n‑xaxi ñaʼa‑r,
xaxeʼe xa n‑ndaku‑r nuu‑n.
55 N‑kida‑n xa n‑ka xiʼí‑i,
ntdaa‑i,
ko vitna kutuu koio‑i xiʼin mee‑r kuia ma jɨn ndɨʼɨ.
Ma niʼi ka‑n ni ɨnka‑i,
ma kaxi ka‑n ni ɨnka‑i.”
Duʼa n‑jaʼan Ianyuux.
56 Xaxeʼe xa n‑ka kida seyɨɨ xa uʼu,
kuu xa io xa kuú koio‑s.
Xaxeʼe xa n‑ka tnɨɨ‑s tnuʼu n‑chidotnuni Moisés,
kuu xa taxnuni ñaʼa kuechi‑s.
57 ¡Ko na kutaʼu‑ro Ianyuux!
Xaxeʼe Xtoʼo‑ro Jesucristu,
kida Ianyuux xa nandoto‑ro,
xa kutuu vaʼa‑ro xiʼin‑ia kuia ma jɨn ndɨʼɨ.
58 Ñani mani‑da,
kuʼa mani‑da,
xijan kuu xa kunduu koio ka‑n xiʼin Cristu.
Kundee ini naʼi ka‑n,
xa jandixa naʼi ka‑n Cristu.
Kɨu xiʼin kɨu kada koio naʼi ka‑n tniu n‑taxi Xtoʼo‑ro Jesucristu,
chi xini vaʼa koio‑n xa nux kadatniu koio ka‑n,
dada tnɨɨ koio‑n ntdaa xa juini Xtoʼo‑ro xa taxi‑ia.