Tnuʼu xee taxi Espíritu Ianyuux
14
Io xa kukajan ini koio‑n xa juemani‑n Ianyuux xiʼin ñayiu.
Dɨuni io xa kukajan ini koio‑n xa tnɨɨ koio‑n xa taxi Espíritu Ianyuux.
Te io xa yo kukajan ini koio‑n xa tnɨɨ koio‑n tnuʼu Ianyuux,
xa juña tnuʼu koio‑n tnuʼu‑ia nuu ñayiu.
2 Hora ka jaʼan‑n tnuʼu xee n‑taxi Espíritu Ianyuux,
duʼa ka jaʼan‑n nuu Ianyuux.
Ñatu ka jaʼan‑n nuu ñayiu,
chi ña ka kutnuni ini ñayiu tnuʼu ka jaʼan‑n.
Xiʼin Espíritu Ianyuux,
ka jaʼan‑n xa kuu xa naʼi.
3 Ko nux juña tnuʼu koio‑n tnuʼu Ianyuux nuu ñayiu,
duʼa chindee vaʼa‑n‑yɨ.
Dakuaʼa‑n‑yɨ,
te chindee‑n‑yɨ xa kundee ini‑i xa jandixa naʼi ka‑i Xtoʼo‑ro Jesucristu,
te xiaʼan‑n tnuʼu kanu ini nuu‑i.
4 Ɨɨn seyɨɨ,
nux jaʼan‑s tnuʼu xee,
duʼa chindee‑s meni mee‑s.
Ko nux juña tnuʼu‑s tnuʼu Ianyuux nuu ñayiu,
duʼa chindee‑s ñani‑s kuʼa‑s tuku.
5 Vatuka xa jaʼan koio‑n,
ntdaa‑n,
tnuʼu xee taxi Espíritu Ianyuux,
ko vaʼa ka xa juña tnuʼu koio‑n tnuʼu Ianyuux nuu ñayiu.
Yaʼu ka se xian tnuʼu tnuʼu Ianyuux nuu ñayiu,
dada se jaʼan ni tnuʼu xee xiaʼan Espíritu Ianyuux.
Ko nux jaʼan‑s tnuʼu xee‑s te dada dandee‑s tnuʼu jan,
te vatuka,
chi duʼa chindee‑s ntdaa ñayiu ka jandixa Cristu.
6 Ñani‑da kuʼa‑da,
nux vitna naxee‑da ñuu‑n,
te jaʼan‑da tnuʼu xee‑da,
te,
¿nax xiniñuʼu?
Ko nux dakuaʼa ñaʼa‑da te vatuka.
Dakuaʼa ñaʼa‑da ɨɨn xa n‑dandeʼa ñaʼa Ianyuux mee‑da.
O dakuaʼa ñaʼa‑da ɨɨn xa tuʼa vaʼa mee‑da.
O kachitnuʼu‑da tnuʼu Ianyuux nuu‑n.
Ntdaa xaʼa,
chindee ñaʼa‑da mee‑n.
7 Kani ini koio‑n ná kuu ɨɨn flauta,
ɨɨn yolii.
Juini ña ndito‑tnu,
ko kande‑tnu.
Ko nux ma tɨu ɨɨn seyɨɨ flauta,
o nux ma dakande ɨɨn seyɨɨ yolii,
te,
¿nanda koo xa vili kande‑tnu xa kunini‑ro?
8 Dɨuni trompeta.
Nux ma dandaʼi xee ɨɨn seyɨɨ trompeta,
te,
¿nanda kada tuʼa koio seyɨɨ xa dadaʼan koio‑s ñuu‑s?
9 Mee‑n tuku.
Nux jaʼan koio‑n tnuʼu xee n‑taxi Espíritu Ianyuux,
ko ma dandee koio‑n tnuʼu jan,
te,
¿nanda kutnuni ini koio ñayiu nax ka jaʼan‑n?
Duʼa ñatu xiniñuʼu tnuʼu‑n.
10 Nuu dɨɨn tnuʼu ka jaʼan ñayiu ñuñayiu.
Tuku ka jaʼan ñayiu,
ɨɨn ɨɨn ñuu.
Ko juini kueʼe tnuʼu io,
ko vaʼa kutnuni ini ñayiu ɨɨn ɨɨn ñuu,
hora jaʼan ɨɨn seyɨɨ xa kuu tnuʼu mee‑i.
11 ¿Ko nax koo,
nux ña kutnuni ini‑da tnuʼu jaʼan ɨɨn seyɨɨ?
Duʼa kuu mee‑da se ña jaʼan vaʼa nuu mee‑s,
te duʼa kuu mee‑s se ña jaʼan vaʼa nuu mee‑da.
12 Mee‑n tuku.
Ka kukajan ini‑n xa tnɨɨ‑n xa taxi Espíritu Ianyuux.
Vatuka.
Ko vaʼa ka xa kukajan ini‑n xa tnɨɨ‑n xa kuaʼa‑n xa chindee‑n ñayiu ka jandixa Cristu.
13 Xijan kuu xa,
nux jaʼan‑n tnuʼu xee n‑taxi Espíritu Ianyuux,
io xa kajan taʼu‑n nuu Ianyuux,
xa na kada‑ia xa dandee‑n tnuʼu xee‑n nuu ñayiu.
14 Nux xijan taʼu‑da tnuʼu xee‑da,
duʼa xijan taʼu‑da xiʼin anu ni‑da,
ko ña xani ini vaʼa‑da tnuʼu jaʼan‑da.
15 Xijan kuu xa,
¿nax koo?,
¿nax io xa kada‑da?
Kajan taʼu‑da xiʼin anu‑da,
ko dɨuni kani ini vaʼa‑da hora kajan taʼu‑da.
Kata‑da xiʼin anu‑da,
ko dɨuni kani ini vaʼa‑da hora kata‑da.
16 Nux kajan taʼu‑n xiʼin anu ni‑n,
te,
¿nanda kuaʼa xa kajan taʼu ɨnka ñayiu xiʼin‑n?
Hora xiaʼan‑n xa n‑kutaʼu‑n nuu Ianyuux,
te ña kuaʼa‑i xa jaʼan‑i:
“¡Duʼa na koo!”,
chi ña kutnuni ini‑i tnuʼu jaʼan‑n.
17 Xandaa kuu xa vaʼa xiaʼan‑n xa n‑kutaʼu‑n nuu Ianyuux,
ko ñatu chindee‑n ñani‑n kuʼa‑n.
18 Na kutaʼu‑da Ianyuux xa jaʼan‑da tnuʼu xee‑da n‑taxi Espíritu Ianyuux.
Kueʼe ka jaʼan mee‑da dada ntdaa mee‑n.
19 Ko hora jaʼan‑da nuu ñayiu ka jandixa Jesucristu,
juini‑da xa dakuaʼa‑da‑i.
Juini‑da xa kani ini‑da,
te jaʼan‑da oʼon ni tnuʼu,
te duʼa chindee‑da ñayiu ka jandixa Jesucristu,
dada xa jaʼan‑da uxi mil tnuʼu xee‑da,
te duʼa kuu xa ma chindee‑da‑i ni itaʼu.
20 Ñani‑da kuʼa‑da,
maxku kani ini koio ka‑n ná ka xani ini sekuechi.
Ko vatuka xa ku kuu koio mee‑n ná kuu seyɨjɨn,
xa maxku kada koio ka‑n xa uʼu.
Ko hora kani ini‑n,
io xa kani ini vaʼa‑n,
ná ka xani ini sexaʼnu.
21 Jaʼan tnuʼu Ianyuux:
“Tnuʼu xee jaʼan‑da nuu ñayiu yaʼa,
jaʼan‑da tnuʼu setoʼo nuu‑i,
ko dani ña ka chinuu‑i tnuʼu jaʼan‑da nuu‑i.”
22 Xijan kuu xa,
xa kida Espíritu Ianyuux xa jaʼan‑n tnuʼu xee‑n n‑taxi‑ia,
kuu xa kida‑ia ɨɨn milagru nuu ñayiu ña ka jandixa Jesucristu.
Te xa kida‑ia xa xian tnuʼu‑n tnuʼu Ianyuux nuu ñayiu,
kuu xa kida‑ia ɨɨn milagru nuu ñayiu ka jandixa Jesucristu.
Nuu ñayiu ka jandixa‑ia,
kida‑ia ɨɨn.
Nuu ñayiu ña ka jandixa‑ia,
kida‑ia ɨnka.
23 Kani ini koio‑n.
Nux nataka‑n ntdaa‑n,
te jaʼan‑n ntdaa‑n tnuʼu xee n‑taxi Espíritu Ianyuux,
te ijan kɨu ɨɨn ñayiu ta tnɨɨ ka tnuʼu xee,
o ñayiu ña jandixa Jesucristu,
te,
¿nax koo?
Jaʼan ñayiu jan xa n‑ka nduloko‑n.
24 Ko nux juña tnuʼu‑n,
ntdaa‑n,
tnuʼu Ianyuux nuu ñayiu,
te ijan kɨu ɨɨn ñayiu ta tnɨɨ ka tnuʼu xee,
o ɨɨn ñayiu ña jandixa Jesucristu,
te,
¿nax koo?
Xiʼin tnuʼu‑n,
koo xa kada‑n ntdaa‑n xa kutnuni ini ñayiu jan xa kuu mee‑i ñayiu kida xa uʼu.
25 Dandeʼa Espíritu Ianyuux xa naʼi io anu‑i,
te nujuiin ndeyu‑i nuu Ianyuux xa koo‑i xañuʼu nuu‑ia,
te jaʼan ndaa‑i xa xandaa kuu xa tuu Ianyuux meʼñu mee‑n.
Maxku kada koio ka‑n pletu
26 Ñani‑da kuʼa‑da,
xijan kuu xa,
¿nax koo?
Hora nataka koio‑n,
io xa chindee tnaʼa koio‑n xa jandixa ka‑n,
ntdaa‑n,
Jesucristu.
Kata koio‑n alabanza nuu Ianyuux.
Dakuaʼa tnaʼa koio‑n.
Juña tnuʼu tnaʼa‑n nax n‑dandeʼa ñaʼa Ianyuux mee‑n.
Jaʼan‑n tnuʼu xee n‑taxi Espíritu Ianyuux,
te dandee‑n tnuʼu jan nuu ñani‑n kuʼa‑n.
Ko ntdaa xa kada koio‑n,
ɨɨn ɨɨn‑n,
io xa kada‑n xa chindee tnaʼa‑n xa jandixa ka‑n,
ntdaa‑n,
Jesucristu.
27 Nux jaʼan‑n tnuʼu xee n‑taxi Espíritu Ianyuux,
diko ni uu uni ni jaʼan‑n.
Ditna ka ɨɨn‑n,
te dada ɨnka‑n.
Te io xa dandee ɨɨn ñani‑n ɨɨn kuʼa‑n tnuʼu‑n nuu ntdaa ñayiu nataka ijan.
28 Nux ña yoo ɨɨn ñayiu kuaʼa xa dandee‑i tnuʼu‑n,
te maxku jaʼan‑n tnuʼu xee hora nataka ñayiu ka jandixa Jesucristu.
Vatuka xa naʼi jaʼan‑n tnuʼu xee anu mee‑n xiʼin Ianyuux.
29 Dɨuni na jaʼan uu uni ni se ka xian tnuʼu tnuʼu Ianyuux nuu ñayiu.
Te na jaʼan dava ka ñani‑n kuʼa‑n nux jaʼan‑s tnuʼu Ianyuux,
o nux kidatniu kuiʼna meʼñu‑n,
xa dandaʼu ñaʼa‑i xiʼin tnuʼu jaʼan‑s.
30 Te se kuu uu,
xiʼin se kuu uni.
Hora juñaʼa Ianyuux ɨɨn tnuʼu xa juña tnuʼu mee‑s nuu ñayiu,
te io xa nkoo se jaʼan kiʼna nuu,
xa ndojuiin se kuu uu,
xa jaʼan mee‑s.
Te dada nkoo se kuu uu,
te ndojuiin se kuu uni,
xa jaʼan mee‑s.
31 Nux duʼa kada koio‑n,
te kuaʼa xa jaʼan‑n,
ntdaa‑n,
tnuʼu Ianyuux n‑ka tnɨɨ‑n.
Ditna ka ɨɨn‑n,
te dada ɨnka‑n.
Duʼa dakuaʼa‑n ntdaa‑n,
te tnɨɨ‑n ntdaa‑n tnuʼu kanu ini.
32 Chi kuaʼa‑n,
ntdaa‑n,
xa kada maxu‑n,
hora kuaʼa xa jaʼan‑n,
te hora ma kuaʼa xa jaʼan‑n.
33 Chi nuncas ma kada Ianyuux xa koo pletu meʼñu mee‑n,
ni ma kada‑ia xa uu uni‑n juña tnuʼu tnuʼu‑ia nuu ñayiu idini vuelta.
Io xa kada koio mee‑n,
ná ka kida ñayiu ka jandixa Jesucristu ntdaa ñuu.
Ñayiu n‑kida dɨɨn Ianyuux ka kuu‑n.
34 Hora nataka koio‑n,
te maxku ndatnuʼu koio ñadɨʼɨ.
Maxku juejoon koio‑n xa ndatnuʼu koio‑ña.
Na kada koio‑ña ná jaʼan tnuʼu Ianyuux,
na jandixa koio‑ña yɨɨ‑ña.
35 Nux juini‑ña xa kutnuni ini vaʼa ka‑ña,
na kajan tnuʼu‑ña nuu yɨɨ‑ña veʼe,
chi ña kuu xa vaʼa xa ndatnuʼu koio ñadɨʼɨ hora nataka koio‑n.
36 Najaʼan koio‑n xa ɨnka ñayiu n‑ka kachitnuʼu tnuʼu vaʼa Ianyuux nuu‑n.
Dɨuni najaʼan koio‑n xa n‑ka tnɨɨ ɨnka ñayiu tnuʼu‑ia tuku.
37 Ka xani ini‑n xa se ka xian tnuʼu tnuʼu Ianyuux nuu ñayiu ka kuu‑n.
Ka jaʼan‑n xa n‑ka tnɨɨ‑n xa n‑taxi Espíritu Ianyuux.
Nux duʼa kuu,
te io xa jandixa koio‑n xa xa kidavaʼa mee‑da kuu xa taʼu tniu Xtoʼo‑ro nuu‑n.
38 Nux ña ka juini‑n xa tnɨɨ‑n tnuʼu‑da,
ña ka kuu‑n se n‑ka tnɨɨ tnuʼu Ianyuux,
ña ka kuu‑n se n‑ka tnɨɨ xa taxi Espíritu Ianyuux.
39 Ñani‑da kuʼa‑da,
xijan kuu xa,
io xa kukajan ini koio‑n xa tnɨɨ koio‑n tnuʼu Ianyuux,
xa juña tnuʼu koio‑n tnuʼu‑ia nuu ñayiu.
Te maxku jaʼan koio‑n xa maxku jaʼan ñani‑n kuʼa‑n tnuʼu xee n‑xiaʼan Espíritu Ianyuux.
40 Hora nataka koio‑n,
io xa kada koio‑n xa vaʼa,
maxku kada ka‑n pletu meʼñu mee‑n.