Xa vii xa vaʼa ka kuu xa xemani‑ro Ianyuux xiʼin ñayiu
13
Xa kuu xa vaʼa ka kuu xa xemani‑ro Ianyuux te xemani‑ro ñayiu.
Nux kuaʼa‑da xa jaʼan‑da ntdaa tnuʼu ka jaʼan ñayiu,
xiʼin nde tnuʼu ka jaʼan ángel,
ia ka xinokuechi nuu Ianyuux,
ko ñatu xemani‑da ñayiu,
te xijan kuu xa ñatu xiniñuʼu tnuʼu jaʼan‑da.
Nux ña xemani‑da ñayiu,
te duʼa kuu‑da ná kuu ɨɨn xa kupaa ni,
kuu‑da ná kuu ɨɨn kaa ña kande vaʼa.
2 Nux xian tnuʼu‑da tnuʼu Ianyuux nuu ñayiu,
ko ña xemani‑da‑i,
te duʼa ñatu yaʼu‑da ni ɨɨn.
Nux kaʼu‑da tnuʼu Ianyuux,
nde kutnuni ini‑da ntdaa xa n‑dandeʼa ñaʼa‑ia mee‑ro,
ko ñatu xiniñuʼu‑da ni itaʼu,
nux ña xemani‑da ñayiu.
Nux io‑da kueʼe confianza nuu Ianyuux,
nde xa kuaʼa‑da xa kajan‑da nuu‑ia xa dakanda‑ia yuku te najantuu‑ia yuku ɨnka lado,
ko ña yaʼu‑da ni ɨɨn,
nux ña xemani‑da ñayiu.
3 Nuxa xiaʼan nga‑da ntdaa xaxii‑da ñayiu kundaʼu,
ko ña xemani‑da‑i,
te duʼa ña kida‑da ni ɨɨn xavaʼa.
Nux juñaʼa‑da mee‑da,
xa teñuʼu ñaʼa koio ñayiu nde kaʼni ñaʼa‑i,
ko ña xemani‑da ñayiu,
te duʼa koo xa ña n‑kida‑da ni ɨɨn xa kuu xavaʼa.
4 Ɨɨn seyɨɨ xemani ñayiu,
io‑s pacencia nuu‑i.
Se vaʼa kuu‑s,
te chindee‑s ntdaa ñayiu.
Ña kukuedi ini mee‑s ntdaa xa io.
5 Xemani‑s ntdaa ñayiu,
ña kuiʼa jaʼan‑s,
ña kuiʼa kuu‑s.
Ñatu jaʼan‑s xa io xa kada‑ro xa juini mee‑s.
Ñatu kiti ini‑s nuu ñayiu,
ña kuu‑s se kundeʼe nuu ñayiu.
Ña kida kuenda‑s xa uʼu ka kida ñaʼa ñayiu.
6 Xemani‑s ntdaa ñayiu.
Kukoʼyo ini‑s hora ka kida‑i xa uʼu,
te kuvete‑s hora ka jandixa‑i xa kuu xandaa.
7 Xemani‑s ñayiu.
Ña jan tnuʼu‑s kuechi‑i.
Io‑s confianza nuu‑i,
jandixa‑s xa kada‑i xavaʼa.
Nux io xa kueʼe vida yaʼa mee‑s xaxeʼe mee‑i,
duʼa kada‑s,
te taxkanu ini naʼi ka‑s‑yɨ.
8 Xemani‑s ñayiu.
Nde ma jɨn ndɨʼɨ xa xemani‑s‑yɨ.
Vax ndɨʼɨ xa xian tnuʼu‑ro tnuʼu Ianyuux nuu ñayiu.
Vax ndɨʼɨ xa jaʼan‑ro tnuʼu xee,
tnuʼu taxi Espíritu Ianyuux.
Vax ndɨʼɨ xa kaʼu‑ro tnuʼu Ianyuux,
xa kutnuni ini‑ro xa n‑dandeʼa ñaʼa‑ia.
Ko nuncas ma jɨn ndɨʼɨ xa xemani‑ro Ianyuux xiʼin ñayiu.
9 Vitna kutnuni ini‑ro itaʼu ni.
Te juini xian tnuʼu‑ro tnuʼu Ianyuux nuu ñayiu,
ko ta kutnuni ini ka‑ro ntdaa xa jaʼan‑ia.
10 Ko na koo xa daxinokava Ianyuux ntdaa xa kida‑ia ñuñayiu,
te ndixi Xtoʼo‑ro Jesús,
te hora ijan vaʼa kutnuni ini‑ro.
11 Na luchi‑da,
n‑xo jaʼan‑da ná jaʼan ɨɨn seluchi.
N‑xo xani ini‑da ná xani ini sekuechi,
te n‑xo kutnuni ini‑da ná kutnuni ini sekuechi.
Ko na n‑xaʼnu‑da,
te n‑dandoo‑da xa xani ini sekuechi.
12 Vitna ña kutnuni vaʼa ini‑ro,
kuu ná kuu xa ndeʼa‑ro nuu spejo.
Ɨɨn kɨu,
kutnuni vaʼa ini‑ro,
chi jini‑ro Ianyuux nuu xiʼin nuu.
Vitna,
itaʼu ni xini‑ro‑ia.
Kɨu ijan,
jini vaʼa‑ro mee‑ia,
ná xini ñaʼa mee‑ia mee‑ro.
13 Xijan kuu xa,
vitna jandixa‑ro Ianyuux,
io‑ro confianza nuu‑ia xa ntdaa xa kida ñaʼa‑ia kuu xavaʼa,
te xemani‑ro mee‑ia xiʼin ñayiu.
Ndruni xaʼa io,
te nuncas ma jɨn ndɨʼɨ.
Ko xa vii xa vaʼa ka,
kuu xa xemani‑ro Ianyuux te xemani‑ro ñayiu.