Xa taxi Espíritu Ianyuux nuu ɨɨn ɨɨn‑ro
12
Ñani‑da kuʼa‑da,
juini‑da xa kutnuni ini koio‑n nanda kidatniu Espíritu Ianyuux anu‑ro,
juini‑da xa kutnuni ini koio‑n nax taxi Espíritu Ianyuux nuu ɨɨn ɨɨn‑ro.
2 Vaʼa xini‑n nanda n‑ka kida‑n,
antecas xa jandixa‑n Jesucristu.
N‑ka jandixa‑n santu ña ndito.
3 Vitna,
juini‑da xa kutnuni ini vaʼa koio‑n.
Nux kuiʼa kakuneʼe ɨɨn ñayiu Jesús,
te duʼa xini‑ro xa ña kidatniu Espíritu Ianyuux anu‑i.
Nux jaʼan ɨɨn ñayiu xa Jesús kuu Xtoʼo‑i,
te duʼa xini‑ro xa kidatniu Espíritu Ianyuux anu‑i.
4 Io idini Espíritu Ianyuux.
Io ɨɨn xa xiaʼan‑ia nuu ɨɨn ñayiu,
te ɨnka xa xiaʼan‑ia nuu ɨnka ñayiu,
ko mee‑ia kuu idini.
5 Io idini Xtoʼo‑ro Jesús.
Io ɨɨn xa kida ɨɨn ñayiu,
te ɨnka xa kida ɨnka ñayiu,
ko ñayiu ka xinokuechi nuu Xtoʼo‑ro Jesús ka kuu‑ro,
ntdaa‑ro.
6 Idini Ianyuux io.
Ntdaa xa kida‑ro,
kuu xaxeʼe xa kidatniu Ianyuux anu‑ro.
Ntdaa‑ro,
kidatniu‑ia anu‑ro,
ko xa kidatniu‑ia anu‑ro,
ɨɨn ɨɨn‑ro,
ña ka kuu ɨɨn nuu.
7 Xiʼin xa taxi‑ia ɨɨn ɨɨn‑ro,
dandeʼa ñaʼa Espíritu Ianyuux xa kidatniu‑ia anu‑ro.
Kidatniu‑ia anu‑ro,
xa chindee tnaʼa‑ro,
ɨɨn‑ro xiʼin ɨnka‑ro.
8 Nuu ɨɨn‑ro,
kida Espíritu Ianyuux xa vaʼa kutnuni ini‑s xa kuu xandaa.
Kutnuni ini mee‑s xa jaʼan‑s nuu mee‑ro,
te duʼa chindee ñaʼa‑s ntdaa‑ro.
Ɨnka‑ro kuu se tuʼa vaʼa.
Kida Espíritu Ianyuux xa tuʼa vaʼa‑s,
te jaʼan‑s nuu mee‑ro,
te duʼa chindee ñaʼa‑s ntdaa‑ro.
9 Nuu ɨnka‑ro,
kida Espíritu Ianyuux xa io‑s confianza kaʼnu nuu Ianyuux,
xa kuaʼa‑s xa kajan‑s davaʼa nga xa ndoñuʼu‑ro.
Nuu ɨnka ñani‑ro kuʼa‑ro,
kida Espíritu Ianyuux xa kuaʼa‑s xa ndadavaʼa‑s ñayiu kuʼu.
10 Nuu ɨnka‑ro,
kida Espíritu Ianyuux xa kuaʼa‑s xa kada‑s milagru,
ná kida mee‑ia.
Nuu ɨnka ñani‑ro kuʼa‑ro,
xiaʼan Espíritu Ianyuux tnuʼu Ianyuux,
xa juña tnuʼu ñani‑ro kuʼa‑ro nuu ñayiu.
Te io ɨnka ñani‑ro kuʼa‑ro kuu tnaʼa xiʼin‑ro.
Hora kidatniu kuiʼna xa dandaʼu ñaʼa‑i mee‑ro,
te kida Espíritu Ianyuux xa kutnuni ini ñani‑ro kuʼa‑ro xa duʼa kuu,
te duʼa ka chindee ñaʼa‑s ntdaa‑ro.
Kida Espíritu Ianyuux xa ɨnka‑ro kuaʼa xa jaʼan‑s tnuʼu xee,
tnuʼu Espíritu Ianyuux.
Te kida Espíritu Ianyuux xa ɨnka‑ro kuaʼa xa dandee‑s tnuʼu jan.
11 Ko idini Espíritu Ianyuux io.
Kidatniu‑ia anu‑ro,
te taxi‑ia davaʼa nga xa juini mee‑ia nuu ɨɨn ɨɨn‑ro.
Idini yɨkɨ kuñu kuu‑ro xiʼin Cristu
12 Kani ini koio‑n nanda kuu yɨkɨ kuñu‑ro.
Io ndaʼa‑ro,
xeʼe‑ro,
dɨkɨ‑ro,
ko ntdaa xaʼa kuu idini yɨkɨ kuñu‑ro.
Dani Cristu tuku.
Xaxeʼe xa kunduu‑ro,
ntdaa‑ro,
xiʼin mee‑ia,
te kuu ná kuu xa idini yɨkɨ kuñu kuu‑ro xiʼin‑ia.
13 Dava‑ro ka kuu ñayiu Israel,
te dava‑ro ka kuu ñayiu ña ka kuu ñayiu Israel.
Dava‑ro ka kuu ñayiu kidatniu duʼa nuu ɨnka ñayiu,
te dava‑ro ka kuu ñayiu xtuu libre.
Ko idini xa kuu‑ro.
Na n‑ka xendute‑ro,
n‑ka tnɨɨ‑ro Espíritu Ianyuux,
te n‑kida mee‑ia xa idini xa kuu‑ro.
14 Ñadu idini xa kuu yɨkɨ kuñu‑ro,
chi kueʼe xa kuu.
15 Na kani ini‑ro nax koo,
nux kukuedi ini xeʼe‑ro nuu ndaʼa‑ro.
“Xaxeʼe xa ña kuu‑r ndaʼa,
ñatu xiniñuʼu‑r”,
kachi‑i.
Juini duʼa xani ini‑i,
ko xa jaʼan‑i ña kuu xandaa.
16 Na kani ini‑ro nax koo,
nux kukuedi ini doʼo nuu nduchi nuu‑ro.
“Xaxeʼe xa ña kuu‑r nduchi nuu,
ñatu xiniñuʼu‑r”,
kachi‑i.
Juini duʼa xani ini‑i,
ko xa jaʼan‑i ña kuu xandaa.
17 Nux nduchi nuu‑ro n‑kuu yɨkɨ kuñu‑ro,
te,
¿nanda kuu xa teku‑ro?
Nux doʼo‑ro n‑kuu yɨkɨ kuñu‑ro,
te,
¿nanda kuu xa xen ditni‑ro?
18 N‑kidavaʼa Ianyuux yɨkɨ kuñu‑ro.
Ɨɨn ɨɨn xa io‑ro,
n‑kida tuʼa‑ia,
xa ku kuu‑i,
ntdaa‑i,
idini yɨkɨ kuñu‑ro.
Duʼa n‑juini Ianyuux,
te duʼa n‑kida‑ia.
19 Nux n‑kidavaʼa‑ia ndaʼa ni‑ro n‑kuu,
te ma ku kuu yɨkɨ kuñu‑ro.
Nux n‑kidavaʼa‑ia nduchi nuu ni‑ro n‑kuu,
te ma ku kuu yɨkɨ kuñu‑ro.
20 Xijan kuu xa,
n‑kidavaʼa Ianyuux ntdaa xa io yɨkɨ kuñu‑ro.
Ko juini io kueʼe xa io‑ro,
ko idini yɨkɨ kuñu‑ro kuu.
21 Te nduchi nuu‑ro,
ña kuaʼa‑i xa jaʼan‑i nuu ndaʼa‑ro:
“Ña ndoñuʼu ñaʼa‑r.”
Te dɨkɨ‑ro,
ña kuaʼa‑i xa jaʼan‑i nuu xeʼe‑ro:
“Ña ndoñuʼu ñaʼa‑r.”
22 Io ɨɨn uu xa io yɨkɨ kuñu‑ro,
xa tu ini‑ro xa ñatu xiniñuʼu,
ko xijan kueʼe ka ndoñuʼu ka‑ro.
23 Io ɨnka xa io yɨkɨ kuñu‑ro,
xa xani ini‑ro xa ña vili kaa,
te ɨnka io xa juini‑ro xa dadaʼu‑ro.
Ko nuu xaʼa,
io‑ro kueʼe ka xañuʼu,
te dadaʼu vaʼa‑ro hora ndixi‑ro daʼma‑ro.
24 Te io kueʼe ɨnka xa io yɨkɨ kuñu‑ro,
xa ña ndoñuʼu xa dadaʼu‑ro.
Duʼa n‑kidavaʼa Ianyuux yɨkɨ kuñu‑ro,
te duʼa n‑kida‑ia xa koo‑ro kueʼe ka xañuʼu nuu xa xani ini‑ro xa ña vili kaa.
25 Chi ña n‑juini‑ia xa jantnaʼa koio‑i.
N‑juini‑ia xa chindee tnaʼa‑i,
ntdaa‑i.
26 Nux kueʼe vida yaʼa ndaʼa‑ro,
doʼo‑ro,
te duʼa kuu xa kueʼe vida yaʼa ntdaa xa io yɨkɨ kuñu‑ro.
Nux koo‑ro xañuʼu nuu ɨɨn xa io yɨkɨ kuñu‑ro,
te duʼa kuvete koio ntdaa xa io yɨkɨ kuñu‑ro.
27 Te mee‑n ka kuu yɨkɨ kuñu Cristu.
Juini kueʼe‑n io,
ko ka kuu‑n idini yɨkɨ kuñu‑ia.
28 Nuu ɨɨn ɨɨn‑n,
xá n‑taxi Ianyuux tniu mee‑n.
N‑jaʼan ñaʼa‑ia mee‑n,
xa ku kuu koio‑n ñayiu ka jandixa Cristu.
Ditna ka,
n‑kaxí‑ia se ka kuu se n‑tundaʼa Jesucristu.
Dada,
se ka xian tnuʼu tnuʼu Ianyuux nuu ñayiu.
Te dada,
se ka dakuaʼa tnuʼu Ianyuux nuu ñayiu.
N‑kida‑ia xa ɨnka‑n ka kida milagru,
te ɨnka‑n ka kuaʼa‑n xa ndadavaʼa‑n ñayiu kuʼu.
N‑kida‑ia xa ɨnka‑n ka chindee ñayiu ndoñuʼu,
te ɨnka‑n ka taʼu tniu nuu ñayiu.
Te n‑kida‑ia xa ɨnka‑n ka jaʼan tnuʼu xee n‑taxi Espíritu Ianyuux.
29 Ña ntdaa‑n ka kuu se n‑tundaʼa ñaʼa‑ia.
Ña ntdaa‑n ka kuu se xian tnuʼu tnuʼu‑ia nuu ñayiu.
Ña ntdaa‑n ka kuu se dakuaʼa tnuʼu Ianyuux nuu ñayiu.
Ña ntdaa‑n ka kida milagru.
30 Ña ntdaa‑n ndadavaʼa ñayiu kuʼu.
Ña ntdaa‑n kuaʼa‑n xa jaʼan tnuʼu xee,
te ña ntdaa‑n kuaʼa xa dandee‑n tnuʼu xee.
31 Ko io xa kajan koio‑n,
xa tnɨɨ koio‑n xa vaʼa ka.
Te dandeʼa ñaʼa‑da ɨɨn xa kuu xa vaʼa ka dada ntdaa xaʼa.