11
Kada koio mee‑n ná kida mee‑da,
chi kida mee‑da ná n‑kida Cristu.
Ñadɨʼɨ ka jandixa Cristu, ¿nax io xa kada koio‑ña?
2 Tna ini‑da xa ka najaʼan ñaʼa‑n.
Tna ini‑da xa ka jandixa naʼi‑n ntdaa tnuʼu n‑jaʼan‑da nuu‑n.
3 Ko io ɨnka xa juini‑da xa kutnuni ini koio‑n.
Juini‑da xa kutnuni ini koio‑n xa taxnuni Cristu nuu ɨɨn ɨɨn seyɨɨ,
te ka taxnuni seyɨɨ nuu ñadɨʼɨ‑s,
te taxnuni Ianyuux nuu Cristu.
4 Ɨɨn seyɨɨ,
maxku juʼun‑s lelu‑s hora xijan taʼu‑s nuu Ianyuux.
Maxku juʼun‑s lelu‑s hora xian tnuʼu‑s tnuʼu Ianyuux nuu ñayiu.
Nux dadaʼu ɨɨn seyɨɨ dɨkɨ‑s,
duʼa ña io‑s xañuʼu dɨkɨ‑s,
chi dandeʼa‑s ñayiu xa ɨɨn nuu kuu mee‑s xiʼin ñadɨʼɨ.
5 Ko ñadɨʼɨ,
nux ma dadaʼu‑ña dɨkɨ‑ña,
duʼa ña io‑ña xañuʼu dɨkɨ‑ña.
Dandeʼa‑ña ñayiu xa ɨɨn nuu kuu mee‑ña xiʼin ñadɨʼɨ ña tuu na idi dɨkɨ,
ñadɨʼɨ kida ná ka kida seyɨɨ,
ñadɨʼɨ ka kida xa uʼu.
Xijan kuu xa,
na dadaʼu koio ñadɨʼɨ dɨkɨ‑ña,
hora xijan taʼu‑ña nuu Ianyuux o xian tnuʼu‑ña tnuʼu Ianyuux nuu ñayiu.
6 Nux juini‑ña xa kada‑ña ná ka kida seyɨɨ,
nux ña juini‑ña xa dadaʼu‑ña dɨkɨ‑ña,
te na dete‑ña dɨkɨ‑ña.
Ko nux kujanuu‑ña xa dete‑ña dɨkɨ‑ña,
xa ma tuu na idi dɨkɨ‑ña koo,
te io xa kada‑ña ná ka kida ñadɨʼɨ,
io xa dadaʼu‑ña dɨkɨ‑ña.
7 Maxku dadaʼu koio seyɨɨ dɨkɨ‑s.
Chi ná kuu Ianyuux,
da kuu seyɨɨ.
N‑kidavaʼa‑ia‑s xa taxnuni‑s.
Ko ña n‑kidavaʼa‑ia ñadɨʼɨ xa taxnuni‑ña.
N‑kidavaʼa‑ia ñadɨʼɨ xa chindee koio‑ña yɨɨ‑ña.
8 Chi na n‑kidavaʼa Ianyuux seyɨɨ xiʼin ñadɨʼɨ,
ditna ka n‑kidavaʼa‑ia seyɨɨ.
Ijan dada,
xiʼin ɨɨn yɨkɨ naʼa seyɨɨ,
n‑kidavaʼa‑ia ñadɨʼɨ.
9 Chi ña n‑kidavaʼa‑ia seyɨɨ xaxeʼe ñadɨʼɨ.
N‑kidavaʼa‑ia ñadɨʼɨ xaxeʼe seyɨɨ.
10 Xijan kuu xa vatuka xa dadaʼu ñadɨʼɨ dɨkɨ‑ña.
Duʼa dandeʼa‑ña ángel,
ia ka xinokuechi nuu Ianyuux,
xa Ianyuux xiʼin yɨɨ‑ña taxnuni nuu‑ña.
11 Ko ñadɨʼɨ xiʼin seyɨɨ,
nduu‑s ka kunduu xiʼin Xtoʼo‑ro Jesucristu.
Ndoñuʼu ñadɨʼɨ seyɨɨ,
te ndoñuʼu seyɨɨ ñadɨʼɨ.
12 Na n‑kidavaʼa Ianyuux ñadɨʼɨ,
n‑kidavaʼa‑ia‑ña xiʼin yɨkɨ naʼa seyɨɨ,
ko vitna kida‑ia xa ñadɨʼɨ xajan seyɨɨ.
Ianyuux kuu Ia n‑kidavaʼa nduu‑s.
13 Kototnuni koio mee‑n tnuʼu yaʼa.
¿Vatuka xa ña dadaʼu ñadɨʼɨ dɨkɨ‑ña,
hora xijan taʼu‑ña nuu Ianyuux,
a ñaʼa?
14 Na n‑kidavaʼa Ianyuux ntdaa xa io,
n‑kida‑ia xa kujanuu seyɨɨ xa kani idi dɨkɨ‑s.
15 Ko n‑kida‑ia xa na kokani idi dɨkɨ ñadɨʼɨ,
chi xadiñu‑ña kuu.
N‑xiaʼan‑ia idi dɨkɨ‑ña xa daʼu vaʼa dɨkɨ‑ña.
16 Jaʼan‑da xa xijan xetniu‑ro,
ntdaa mee‑ro ka kuu ñayiu jandixa Cristu.
Maxku kuxee ini koio mee‑n.
Ka jaʼan‑n xa ka xaxi‑n ndeyu Xtoʼo‑ro, ko ña ndaa
17 Ko io ɨnka xa ña tna ini‑da.
N‑teku‑da xa hora nataka koio‑n veñuʼu,
ñatu ka chindee tnaʼa‑n xa kunduu koio naʼi ka‑n xiʼin Cristu.
N‑teku‑da xa ka kida tnaʼa‑n xa uʼu.
18 Juini ka nataka‑n xa ndadakaʼnu koio‑n Ianyuux,
ko ñatu ka kida ɨɨn nuu‑n,
chi jantnaʼa tnuʼu‑n,
ɨɨn‑n xiʼin ɨnka‑n.
N‑teku‑da xa dava‑n ka kida ɨɨn xa kida‑n,
te dava ka‑n ka kida ɨnka xa kida‑n.
Te dava tnuʼu n‑teku‑da,
jandixa‑da.
19 Ka xaʼnde tnaʼa‑n,
xa dandeʼa tnaʼa‑n jundu ka kuu se ndaa kunduu xiʼin Cristu.
20 Juini ka nataka‑n,
te ka jaʼan‑n xa ka xaxi‑n ndeyu Xtoʼo‑ro Jesucristu,
ko ña ndaa.
21 N‑teku‑da xa ka xaxi ɨɨn ɨɨn‑n ndeyu xneʼe mee‑n,
te ñatu dakexio nuu tnaʼa‑n.
Na yaʼa xa n‑ka xaxi‑n,
te dava‑n ña n‑ka xaxi‑n,
te dava‑n diko n‑ka xini‑n.
22 ¡Ay!
¿Ña tuu na veʼe‑n,
nuu kaa‑n nuu koʼo‑n?
Ñatu ndaxio‑n xañuʼu nuu Ianyuux,
ni nuu ñayiu ka jandixa‑ia.
Ka xiaʼan‑n xa januu nuu ñani‑n kuʼa‑n ka kundaʼu.
¿Nax io xa jaʼan‑da nuu‑n?
Jaʼan‑da xa ña tna ini‑da,
jaʼan‑da xa ka kida mee‑n xa uʼu.
Ndeyu Xtoʼo‑ro Jesucristu
23 Chi nani n‑dakuaʼa ñaʼa Xtoʼo‑ro Jesús mee‑da,
dani n‑dakuaʼa ñaʼa mee‑da mee‑n.
N‑jaʼan‑da nax n‑kuu xakuaa ijan,
hora n‑diko Judas Iscariote Xtoʼo‑ro Jesús nuu se n‑ka xaʼni ñaʼa.
N‑jaʼan‑da xa xakuaa ijan,
n‑tnɨɨ Xtoʼo‑ro Jesús tila.
24 Na n‑xiaʼan‑ia xa n‑kutaʼu‑ia nuu Ianyuux,
n‑taʼu dava‑ia tila,
te n‑jaʼan‑ia:
“Tnɨɨ koio,
te kaa‑n.
Xaʼa kuu yɨkɨ kuñu mee‑r.
Juejoon‑r xa kaʼni ñaʼa koio‑s mee‑r,
xaxeʼe mee‑n.
Kax koio tila ya,
te duʼa ku najaʼan ñaʼa koio‑n mee‑r.”
25 Na n‑yaʼa xa n‑xaxdini‑ia xiʼin se dakuaʼa‑ia,
n‑tnɨɨ‑ia ɨɨn taxa ñuʼu ndudi uva,
te n‑jaʼan‑ia:
“Ndudi uva yaʼa kuu nɨñɨ mee‑r.
Xa kuú mee‑r xaxeʼe mee‑n,
kuu xa ndoneʼe Ianyuux ɨɨn tratu xee.
Koʼo koio ndudi uva yaʼa,
te duʼa ku najaʼan ñaʼa koio‑n mee‑r.”
26 Xijan kuu xa ntna vuelta kax koio‑n tila yaʼa te koʼo koio‑n ndudi uva yaʼa,
duʼa dandeʼa koio‑n ñayiu xa n‑xiʼí Xtoʼo‑ro Jesucristu xaxeʼe‑ro.
Xijan kuu xa,
ku kada naʼi koio‑n xaʼa,
nde na ndixi mee‑ia.
Io xa koo koio‑n xañuʼu hora xaa‑n ndeyu Xtoʼo‑ro
27 Xijan kuu xa koo koio‑n cuedado,
xa xandaa kuu xa xndaxio‑n xañuʼu nuu Xtoʼo‑ro Jesús,
hora xaa‑n tila yaʼa te xiʼin ndudi uva yaʼa.
Maxku kada koio ka‑n xa uʼu nuu tila kuu yɨkɨ kuñu Xtoʼo‑ro,
maxku kada koio ka‑n xa uʼu nuu ndudi uva kuu nɨñɨ Xtoʼo‑ro.
28 Kototnuni mee‑n,
ɨɨn ɨɨn‑n.
Dada kuaʼa‑n xa kaa‑n tila yaʼa te koʼo‑n ndudi uva yaʼa.
29 Xijan kuu xa,
io xa kutnuni ini koio‑n nax kuu xa kida‑n,
io xa koo koio‑n cuedado xa koo‑n xañuʼu nuu Xtoʼo‑ro Jesucristu,
hora xaa‑n tila yaʼa te xiʼi‑n ndudi uva yaʼa.
Nux ña ndaxio‑n xañuʼu nuu mee‑ia,
te koo xa kada uʼu ñaʼa Ianyuux mee‑n.
30 Xijan kuu xa,
dava‑n ka kuita vitna,
te dava‑n ka kuʼu.
Te dava‑n xá n‑ka xiʼí.
Duʼa kida uʼu ñaʼa Ianyuux mee‑n.
31 Nux vaʼa na kototnuni‑ro mee‑ro,
te ma ndoñuʼu xa kada uʼu ñaʼa Ianyuux.
32 Chi na kida uʼu ñaʼa Ianyuux mee‑ro,
kuu ná kuu xa kida uʼu ɨɨn seyɨɨ daʼya yɨɨ‑s xemani ka‑s.
Kida uʼu ñaʼa‑ia mee‑ro vitna,
xa maxku ndada uʼu ñaʼa‑ia mee‑ro,
hora ndada uʼu‑ia ñayiu ña ka jandixa mee‑ia.
33 Ñani‑da kuʼa‑da,
hora nataka koio‑n xa kaa‑n ndeyu Xtoʼo‑ro Jesús,
io xa kundetu tnaʼa‑n,
ɨɨn‑n xiʼin ɨnka‑n.
34 Nux ña kuaʼa‑n xa kundetu tnaʼa‑n,
kaa‑n te koʼo‑n veʼe mee‑n.
Nux juini‑n xa nataka koio‑n,
nataka vaʼa koio‑n.
Maxku kada koio‑n xa io xa kada uʼu ñaʼa ka Ianyuux.
Te nux io ɨnka xa ka juini‑n xa kajan tnuʼu koio‑n,
te jaʼan ka‑ro hora xee‑da ñuu‑n.