Maxku ndadakaʼnu‑n santu
10
Ñani‑da kuʼa‑da,
juini‑da xa kutnuni ini koio‑n nax n‑ka yaʼa taxaʼnu tnetnu‑ro.
Ntdaa‑s n‑xo kandijun vikó Ianyuux.
Ntdaa‑s n‑ka yaʼa vaʼa ndute kaʼnu nani Mar Kueʼe.
2 Xa n‑ka xitandijun‑s vikó,
te xa n‑ka yaʼa‑s ndute kaʼnu,
kuu ná kuu xa n‑dajuendute Moisés se ijan,
xa kunduu koio‑s xiʼin Moisés.
3 Ntdaa‑s n‑ka xaxi xa n‑xiaʼan Ianyuux.
4 Ntdaa‑s n‑ka xiʼi xa n‑xiaʼan Ianyuux.
N‑ka xiʼi‑s ndute n‑xo kee xiti yuú kava.
Te kuu ná kuu xa kunduu kava jan xiʼin‑s,
ntdaa nuu n‑ka xikonuu‑s.
Te kava jan kuu Cristu.
5 Ko juini duʼa n‑kuu,
ko kueʼe‑s n‑ka kida xa ña tna ini Ianyuux,
te xijan kuu xa n‑danaa‑ia‑s,
na n‑ka xikonuu‑s nuu ñayo ñayiu io.
6 Duʼa n‑kuu,
xa dakuaʼa‑ro xa maxku kada mee‑ro ná n‑ka kida mee‑s.
Maxku kukajan ini mee‑ro xa uʼu,
ná n‑ka kukajan ini mee‑s xa uʼu.
7 Chi dava‑s n‑ka dandoo Ianyuux Ndito,
xa ndadakaʼnu koio‑s santu.
Jaʼan tnuʼu Ianyuux:
“N‑ka xo nukoo ñayiu jan xa kaxi‑i te koʼo‑i,
te n‑ka xo ndojuiin‑i xa kada‑i davaʼa nga xa juini‑i.”
Xijan kuu xa,
maxku kada koio mee‑n ná n‑ka kida mee‑i.
8 Maxku kidi‑ro xiʼin ñayiu ña n‑tnundaʼa xiʼin‑ro.
Duʼa n‑ka kida dava taxaʼnu tnetnu‑ro,
te n‑kida Ianyuux xa n‑ka xiʼí oko uni mil seyɨɨ idini kɨu.
9 Te maxku kototnuni‑ro Ianyuux,
ná n‑kida ñayiu jan.
Chi n‑tundaʼa Ianyuux koo,
xa danaa koio‑tɨ ñayiu jan,
te duʼa n‑kuu.
10 Te maxku jan kuechi koio mee‑n,
ná n‑ka kida ñayiu ijan.
N‑ka jan kuechi‑i nuu se n‑tundaʼa Ianyuux,
te n‑ka jan kuechi‑i nuu mee Ianyuux,
te ángel,
ia ka xinokuechi nuu Ianyuux,
n‑kida xa n‑ka naa ñayiu jan.
11 Te xaʼa kuu ɨɨn ichi maxku tnɨɨ koio mee‑ro.
N‑kida Ianyuux xa n‑xe kodotnuni nax n‑ka yaʼa taxaʼnu tnetnu‑ro,
xa dakuaʼa ñaʼa‑ia mee‑ro,
ñayiu xtuu vitna,
hora na ndadandaa‑ia ntdaa xa io.
12 Xijan kuu xa nux xani ini ɨɨn ñayiu xa vaʼa kutnuni ini‑i,
io xa koo‑i cuedado xa maxku ndua‑i.
13 Juini Satanás xa kadajuexa ñaʼa‑i mee‑n,
xa kada‑n xa uʼu.
Nani xitotnuni‑i ntdaa ñayiu,
dani xitotnuni ñaʼa‑i mee‑n.
Ko io xa koo koio‑n confianza nuu Ianyuux.
Chi ma juejoon Ianyuux xa kadajuexa ñaʼa kuiʼna xa kada‑n xa uʼu.
Hora kadatniu kuiʼna,
hora ijan ni,
dakaku ñaʼa Ianyuux mee‑n,
xa kuaʼa‑n xa kundee ini‑n xa kada‑n xa juini mee‑ia.
14 Xijan kuu xa,
maxku ndadakaʼnu koio mee‑n santu.
15 Jaʼan‑da nuu ñayiu ka kutnuni ini.
Kuaʼa‑n xa kototnuni koio‑n xa jaʼan‑da.
16 Kani ini koio‑n nanda kuu hora nataka‑ro.
Kunduu‑ro xiʼin Cristu,
te xijan kuu xa kunduu‑ro ɨɨn‑ro xiʼin ɨnka‑ro.
Xiʼi‑ro ndudi uva n‑taxi Cristu,
te xiaʼan‑ro xa n‑kutaʼu‑ro nuu Ianyuux,
xaxeʼe xa n‑xatu nɨñɨ Cristu xaxeʼe‑ro.
Taʼu dava‑ro tila xa kaxi‑ro,
te xiaʼan‑ro xa n‑kutaʼu‑ro nuu Ianyuux,
xaxeʼe xa n‑xiaʼan Cristu yɨkɨ kuñu mee‑ia,
hora n‑xiʼí‑ia xaxeʼe‑ro.
17 Xaxi‑ro,
ntdaa‑ro,
tila jan.
Xijan kuu xa juini kueʼe‑ro io,
ko xaxeʼe xa ka xaxi‑ro idini tila,
te idini xa kuu‑ro.
Kuu ná kuu xa idini yɨkɨ kuñu kuu‑ro.
18 Kani ini koio ka‑n.
Ñayiu Israel,
ka doko‑i kuñu nuu altar Ianyuux.
Hora ka xaxi‑i xa n‑ka doko‑i,
ka kunduu‑i xiʼin Ianyuux,
te ka kunduu‑i ɨɨn‑i xiʼin ɨnka‑i.
19 Dɨuni ñayiu ña ka jandixa Ianyuux,
ñayiu ka ndadakaʼnu santu.
Xini‑ro xa ña ndito santu.
Xini‑ro xa ɨɨn nuu kuu kuñu n‑ka doko ñayiu nuu santu,
xiʼin davaʼa nga ɨnka kuñu.
20 Xaʼa kuu xa jaʼan‑da.
Hora ka doko ñayiu kuñu nuu santu,
ka doko‑i kuñu jan nuu kuiʼna.
Ña ka doko‑i nuu Ianyuux Ndito.
Te ña juini‑da xa kunduu koio mee‑n xiʼin kuiʼna.
21 Ña kuaʼa‑n xa koʼo‑n ndudi uva n‑taxi Xtoʼo‑ro Jesucristu,
xiʼin xa doko ñayiu nuu kuiʼna.
Ña kuaʼa‑n xa kaa‑n tila n‑taxi Xtoʼo‑ro Jesucristu,
xiʼin xa doko ñayiu nuu kuiʼna.
22 Maxku kada‑ro xa kukuedi ini Ianyuux.
Yo ndaku ka mee‑ia dada mee‑ro.
Kulibre‑ro, ko io xa juemani‑ro ñayiu
23 Kulibre‑ro xa kada‑ro ntdaa,
ko ntdaa xa kada‑ro,
io xa kada‑ro xa kunduu naʼi ka‑ro xiʼin Cristu.
Kulibre‑ro,
ko maxku kada‑ro xa uʼu nuu ñani‑ro kuʼa‑ro.
24 Vaʼa ka xa chindee‑n ñani‑n kuʼa‑n,
xa kunduu naʼi koio ka‑i xiʼin Cristu,
dada xa kada‑n davaʼa nga xa juini mee‑n.
25 Kaa‑n davaʼa nga kuñu ka diko‑s nuyaʼu.
Ña ndoñuʼu xa kajan tnuʼu‑n‑sɨ nux kuu kuñu n‑ka doko ñayiu nuu santu.
26 N‑kidavaʼa Ianyuux ñuñayiu,
te n‑kidavaʼa‑ia ntdaa xa io ñuñayiu.
Kuenda mee‑ia kuu.
27 Nux jaʼan ñaʼa ɨɨn ñayiu ña jandixa Cristu,
xa kaa‑n xiʼin‑i,
te vatuka.
Nux juini‑n xa jɨʼɨn‑n,
juan naʼi‑n,
te kaa‑n davaʼa nga xa taxi‑i.
Ña ndoñuʼu xa kajan tnuʼu‑n nux xa xaa‑n kuu xa n‑ka doko ñayiu nuu santu.
28 Ko nux jaʼan ɨɨn ñayiu nukoo ijan xa xaa‑n kuñu n‑ka doko ñayiu nuu santu,
te maxku kaxi ka‑n.
Xaxeʼe seyɨɨ a ñadɨʼɨ duʼa n‑jaʼan,
te maxku kaxi ka‑n.
Maxku kada mee‑n xa tekuechi ñaʼa anu mee‑i.
29 Kulibre mee‑n xa kaa‑n,
ko hora ijan nux kaa‑n,
duʼa kada‑n xa uʼu nuu ɨnka ñayiu.
Xijan kuu xa maxku kaxi ka‑n.
Nux ka jaʼan‑n:
“¿Nakuenda duʼa kuu?”,
te jaʼan‑da xa kulibre mee‑da,
ko ma juejoon‑da xa ndadandaa ñaʼa ñani‑da kuʼa‑da ta xee ka xa kutuu libre‑i.
30 Xiʼin xa xiaʼan‑da xa n‑kutaʼu‑da nuu Ianyuux,
xaxi‑da.
Ma juejoon‑da xa jaʼan uʼu ñaʼa ni ɨɨn ñayiu,
xaxeʼe xa xaxi‑da.
31 Xijan kuu xa,
davaʼa nga xa kaa‑n,
o davaʼa nga xa koʼo‑n,
kaa‑n te koʼo‑n,
xa kada‑n xa na koo koio ñayiu xañuʼu nuu Ianyuux.
Davaʼa nga xa kada koio‑n,
kada koio‑n xa na juñaʼa ntdaa ñayiu xa n‑kutaʼu‑i nuu Ianyuux.
32 Maxku kada koio mee‑n xa ndua ni ɨɨn ñayiu xa kada‑i kuechi.
Ni ñayiu ka kuu ñayiu Israel,
ni ñayiu ña ka kuu ñayiu Israel,
ni ñani‑n kuʼa‑n,
ñayiu ka jandixa Cristu.
33 Kada koio mee‑n ná kida mee‑da.
Ntdaa xa kida‑da,
kida‑da xa chindee‑da ntdaa ñayiu,
xa na jandixa koio mee‑i Cristu.
Ñatu kidatniu‑da xa niʼi mee‑da.
Kidatniu‑da xa niʼi koio mee‑i,
xa dakaku ñaʼa Cristu,
xa ma kuú‑i xiʼin kuechi‑i.