3 Xaʼa kuu xa dadaʼan‑da mee‑da nuu se ka xitotnuni ñaʼa.

4 ¿Ña io libre‑da,

xa tnɨɨ‑da davaʼa nga xa ka taxi mee‑n,

xa kaxi‑da xa koʼo‑da u?

5 ¿Ña io libre‑da,

xa tnundaʼa‑da xiʼin ɨɨn ñadɨʼɨ?

Ɨɨn ñadɨʼɨ jandixa Xtoʼo‑ro Jesucristu,

xa kandeka‑da‑ña jɨʼɨn nuu juña tnuʼu‑da tnuʼu vaʼa Cristu.

Duʼa ka kida dava ka se n‑tundaʼa Ianyuux,

duʼa ka kida ñani Xtoʼo‑ro,

te duʼa kida Spedru.

6 Ka xiaʼan mee‑n xa kaxi‑s xa ndixi‑s nuu ɨnka se n‑tundaʼa Ianyuux.

¿Kuu xa meni mee‑da xiʼin Bernabé,

io xa kadatniu koio‑da xiʼin ndaʼa‑da,

hora juña tnuʼu‑da tnuʼu vaʼa Ianyuux nuu ñayiu a?

7 Io xa kani ini koio‑n.

Nux juini ɨɨn se kunxaʼnu ka xa jantnaʼa ɨɨn soldado xaxeʼe‑s,

te io xa chiyaʼu‑s‑sɨ.

Nux ɨɨn seyɨɨ dandeé yutnu tata juun xavidi,

io libre‑s xa kaxi‑s xavidi jan.

Nux ñunuu ɨɨn seyɨɨ nchiva,

io libre‑s xa koʼo‑s dɨku‑tɨ.

Xijan kuu xa,

xini‑ro xa nux kidatniu ɨɨn seyɨɨ,

te vatuka xa niʼi‑s xa ndoñuʼu‑s.

8 Duʼa xetniu ñayiu,

te duʼa jaʼan tnuʼu Ianyuux.

9 Tnuʼu n‑taʼu tniu Moisés jaʼan:

“Maxku chiʼi koio‑n ñunu yuʼu kɨtɨ,

hora xadi‑tɨ trɨu.”

¿Ka xani ini‑n xa n‑kakuneʼe Ianyuux meni kɨtɨ a?

10 Xani ini‑da xa n‑jaʼan‑ia xaxeʼe mee‑ro tuku.

Joon,

xaxeʼe mee‑ro,

n‑ka chidotnuni‑s tnuʼu jan.

Se kidatniu ñuʼu‑s,

xiʼin se xadi trɨu,

nduu‑s kidatniu xa niʼi‑s xa kax koʼo‑s.

11 Dɨuni mee‑da.

N‑ka kachitnuʼu‑da tnuʼu vaʼa Cristu,

te vatuka xa taa‑n xa kaxi‑da xa kundixi‑da.

12 Nux ɨnka seyɨɨ ka tnɨɨ xa xiaʼan‑n,

te vatuka xa na tnɨɨ mee‑da xa taa‑n.

Ko ña n‑xejoon‑da xa taa‑n xa kaxi‑da xa kundixi‑da.

N‑kundee ini‑da,

xa xiʼin ndaʼa mee‑da n‑kidatniu‑da,

chi n‑juini‑da xa tax nga‑da tnuʼu vaʼa Cristu.

Ña juini‑da xa tekuechi ñaʼa ni ɨɨn ñayiu xa niʼi‑da tvini,

hora kachitnuʼu‑da tnuʼu vaʼa Cristu.

13 Ka xini mee‑n xa dutu ñayiu Israel,

ka xaxi‑s kuñu xiʼin trɨu ka doko ñayiu Israel nuu Ianyuux.

N‑taʼu tniu Ianyuux xa kax koio dutu xa ka doko ñayiu.

14 Dɨuni se ka xian tnuʼu tnuʼu vaʼa Cristu nuu ñayiu.

N‑taʼu tniu Xtoʼo‑ro Jesucristu xa na niʼi koio‑s xa ndoñuʼu‑s,

hora xian tnuʼu‑s tnuʼu vaʼa‑ia.

15 Ko duʼa ña n‑kida mee‑da.

Te ña kidavaʼa‑da tnuʼu yaʼa vitna,

xa tax koio mee‑n xa kaxi‑da xa kundixi‑da.

Vaʼa ka xa kuú‑da,

dada xa taxi ɨɨn ñayiu xa ndoñuʼu‑da.

Juini‑da xa jaʼan naʼi ka‑da xa xiaʼan nga‑da tnuʼu vaʼa Cristu nuu ntdaa ñayiu.

16 Chi ña kuaʼa‑da xa najuen tnuʼu‑da mee‑da xaxeʼe xa kachitnuʼu‑da tnuʼu vaʼa Cristu.

N‑kidajuexa ñaʼa Ianyuux xa juña tnuʼu‑da tnuʼu vaʼa‑ia nuu ñayiu.

Kada uʼu ñaʼa Ianyuux mee‑da,

nux ma juña tnuʼu‑da tnuʼu‑ia nuu ñayiu.

17 Nux kachitnuʼu‑da tnuʼu‑ia xaxeʼe xa juini mee‑da,

te duʼa koo xa kadatniu‑da xa kada‑da ná io ná juaʼan tniu n‑taxi mee‑ia.

18 ¿Te nax kuu premiu‑da u?

Xa xiaʼan nga‑da tnuʼu vaʼa Xtoʼo‑ro Jesucristu nuu ntdaa ñayiu.

Hora kachitnuʼu‑da tnuʼu‑ia,

ña juini‑da xa niʼi‑da ni ɨɨn.

Jaʼan tnuʼu Ianyuux xa vatuka xa niʼi‑da,

ko mee‑da,

ña juini‑da.

19 Kulibre‑da,

ni ɨɨn ñayiu ña kida kuenda ñaʼa.

Ko juini kulibre‑da,

ko kida‑da ná ka kida se kidatniu duʼa nuu ɨnka ñayiu,

chi juini‑da xa niʼi ka‑da ñayiu,

xa kunduu koio mee‑i tuku xiʼin Cristu.

20 Na n‑xian tnuʼu‑da tnuʼu vaʼa Ianyuux nuu ñayiu Israel,

n‑xo tuu mee‑da ná xtuu mee‑i,

xa na kueka vaʼa koio mee‑i tnuʼu Cristu.

Nani n‑ka jandixa mee‑i tnuʼu n‑taʼu tniu Moisés,

dani n‑jandixa mee‑da tuku.

Juini ña ndoñuʼu xa kada mee‑da ná io ná juaʼan tnuʼu n‑taʼu tniu Moisés,

ko n‑jandixa‑da tnuʼu Moisés,

xa kueka vaʼa koio ñayiu jan tnuʼu Cristu.

21 Na n‑xian tnuʼu‑da tnuʼu vaʼa Ianyuux nuu ñayiu ña n‑ka tnɨɨ‑i tnuʼu n‑taʼu tniu Moisés,

n‑xo tuu mee‑da ná xtuu mee‑i,

xa na kueka vaʼa koio mee‑i tnuʼu Cristu.

Xijan ña juini kachi xa n‑daxio‑da tnuʼu n‑taʼu tniu Ianyuux.

Xaxeʼe xa jandixa‑da tnuʼu n‑taʼu tniu Ianyuux,

duʼa jandixa‑da tnuʼu taʼu tniu Cristu,

te kunduu‑da xiʼin Cristu.

22 Na n‑xo tuu‑da xiʼin ñani‑ro kuʼa‑ro ta xee ka xa kutuu libre‑i,

n‑xo tuu mee‑da ná xtuu mee‑i,

xa chindee‑da‑i xa kunduu naʼi ka mee‑i xiʼin Cristu.

Kida‑da xa kuu mee‑da ná kuu ntdaa ñayiu,

xa dakaku‑da‑i,

xa ma kuú‑i xiʼin kuechi‑i.

Davaʼa nga xa ndoñuʼu ka mee‑i,

kida mee‑da,

xa na kueka vaʼa koio mee‑i tnuʼu Cristu.

23 Ntdaa xa kida‑da,

kida‑da xaxeʼe tnuʼu vaʼa Cristu,

xa kada‑da xa io ná juaʼan xa kunduu mee‑da xiʼin Cristu.

24 Kani ini koio‑n nanda kuu hora io ɨɨn carrera.

Ka xino‑s,

ntdaa‑s,

ko idini‑s niʼi premiu.

Io xa kunu vaʼa koio mee‑n,

ɨɨn ɨɨn‑n,

xa niʼi mee‑n premiu.

25 Se xino carrera,

ka kundaa‑s mee‑s.

Ntdaa xa kida‑s,

kida‑s xa kuaʼa‑s xa kunu vaʼa‑s.

Te vax ndɨʼɨ premiu niʼi mee‑s.

Ko premiu niʼi koio mee‑ro,

koo naʼi kuia ma jɨn ndɨʼɨ.

26 Xijan kuu xa,

kunduu naʼi ka mee‑da xiʼin Cristu.

Xiʼin ntdaa anu‑da,

jandixa‑da mee‑ia,

xa kada‑da xa juini mee‑ia.

Kuu ná kuu xa xino‑da xa xino ka‑da,

nde niʼi‑da.

Kuu ná kuu xa kani‑da te kani ka‑da,

te ma kuita‑da,

nde niʼi‑da.

27 Juini‑da xa kada‑da xa juini Cristu.

Ña juini‑da xa kada‑da xa uʼu.

Xijan kuu xa kida maxu‑da mee‑da.

¡Naka uʼu,

nux na juña tnuʼu‑da tnuʼu vaʼa Cristu nuu ɨnka ñayiu,

ko ma niʼi mee‑da xa kunduu mee‑da xiʼin Cristu!