Xa ka doko ñayiu nuu santu
8
Vitna kakuneʼe‑da xa ka doko ñayiu nuu santu.
Ka jaʼan mee‑n xa vaʼa kutnuni ini‑n xa santu ña ka kuu Ianyuux Ndaa.
Te xijan kuu xa,
ka jaʼan xa vatuka,
nux kaa‑n xa ka doko ñayiu nuu santu.
Ko juini kutnuni ini‑ro xa duʼa kuu,
ko ñatu xiniñuʼu xa duʼa najuen tnuʼu‑ro mee‑ro.
Xa xiniñuʼu,
kuu xa juemani‑ro ntdaa ñayiu,
xa chindee‑ro‑i.
2 Nux xani ini ɨɨn seyɨɨ xa kutnuni ini vaʼa‑s,
dani ta kutnuni ka ini‑s ni ɨɨn.
3 Ko nux xemani ɨɨn seyɨɨ Ianyuux,
te da kuu xa xini Ianyuux mee‑s.
4 Xijan kuu xa,
ku kani ini‑ro xa ka doko ñayiu nuu santu.
Naʼa‑ro xa ña kanda santu,
naʼa‑ro xa santu ña ka kuu Ianyuux.
Naʼa‑ro xa idini Ianyuux Ndito io.
5 Ka jaʼan ñayiu xa io kueʼe ianyuux,
ianyuux xtuu andɨu,
xiʼin ianyuux xtuu ñuñayiu.
Ka jandixa‑i kueʼe ianyuux,
te danani‑i‑yɨ xtoʼo‑i.
6 Ko naʼa mee‑ro xa idini Ianyuux io,
Taa‑ro Ianyuux kuu‑ia.
N‑kidavaʼa‑ia ntdaa xa io,
te xtuu mee‑ro ñuñayiu xa kada‑ro xa juini‑ia.
Jandixa‑ro idini Jefe,
Xtoʼo‑ro Jesucristu.
Xiʼin mee‑ia,
n‑kidavaʼa Taa‑ia ntdaa xa io,
te xaxeʼe mee‑ia,
xtuu mee‑ro.
7 Ko dava ñani‑ro kuʼa‑ro,
ta xee ka‑i xa kutuu libre‑i.
N‑ka jandixa‑i santu,
xiʼin ntdaa anu‑i.
Juini n‑ka dandoo‑i santu,
xa kunduu‑i xiʼin Cristu,
ko ta xee ka‑i xa kutuu libre‑i.
Nde vitna,
nux kaxi‑i kuñu n‑ka doko ñayiu nuu santu,
te tekuechi‑i anu mee‑i.
8 Xa xaxi‑ro,
ma kada xa kueka vaʼa ñaʼa Ianyuux mee‑ro.
Xa ña xaxi‑ro,
ña kuu xa kida‑ro xa uʼu.
Dɨuni xa xaxi‑ro,
ña kuu xa kida‑ro xavaʼa.
Nux xaxi‑n,
te vatuka,
o nux ña xaxi‑n,
te vatuka.
9 Ka jaʼan mee‑n xa io libre‑n xa kaa‑n kuñu n‑ka doko ñayiu nuu santu.
Vatuka,
ko maxku kada koio mee‑n xa kada koio ñani‑n kuʼa‑n xa uʼu.
Ka xani ini mee‑i xa kada‑i xa uʼu,
nux kaxi‑i kuñu n‑ka doko ñayiu nuu santu.
10 Jaʼan mee‑n xa vaʼa kutnuni ini‑n,
ko,
¿nax kuu,
nux jini ñaʼa ñani‑n kuʼa‑n,
hora nukoo‑n veñuʼu santu,
xa kaa‑n ndeyu n‑ka doko ñayiu nuu santu?
Nux kaxi mee‑i tuku,
xaxeʼe xa n‑ka xaxi mee‑n,
te dada tekuechi koio‑i anu mee‑i.
11 Xani ini‑n xa ndaku mee‑n te ña ndaku mee‑i.
Xaxeʼe xa xani ini‑n xa vaʼa kutnuni ini‑n,
te kada‑n xa danaa‑n ñani‑n kuʼa‑n.
Te xaxeʼe mee‑i,
n‑xiʼí Cristu.
12 Xijan kuu xa kida‑n xa uʼu nuu ñani‑n kuʼa‑n,
te duʼa kida‑n xa uʼu nuu Cristu.
Na kida‑n xa tekuechi‑i anu‑i,
kida‑n xa uʼu nuu mee‑i,
te kida‑n xa uʼu nuu Cristu.
13 Xijan kuu xa nux ndua ñani‑da kuʼa‑da,
xaxeʼe xa xaxi mee‑da kuñu,
te nuncas ma kaxi‑da kuñu.
Chi ña juini‑da xa kada‑da xa ndua ñani‑da kuʼa‑da.