Na kidi ɨɨn seyɨɨ xiʼin ñadɨʼɨ mee‑s, na kidi ɨɨn ñadɨʼɨ xiʼin yɨɨ mee‑ña
7
Xá n‑tnɨɨ‑da tutu n‑ka kidavaʼa‑n.
Vitna kachitnuʼu‑da ntdaa xa n‑ka xijan tnuʼu ñaʼa‑n.
2 Ɨɨn seyɨɨ,
vaʼa ka xa ma tnundaʼa‑s.
Ko maxku koo xa kidi‑s xiʼin ñayiu ña n‑tnundaʼa xiʼin‑s.
Xijan kuu xa,
vaʼa ka xa tnundaʼa ɨɨn seyɨɨ xiʼin ɨɨn soltera ku kuu ñadɨʼɨ mee‑s,
te vaʼa ka xa tnundaʼa ɨɨn soltera xiʼin ɨɨn se ku kuu yɨɨ mee‑i.
3 Na kidi ɨɨn seyɨɨ xiʼin ñadɨʼɨ mee‑s.
Na kidi ɨɨn ñadɨʼɨ xiʼin yɨɨ mee‑ña.
4 Yɨkɨ kuñu ñadɨʼɨ,
ñatu kuu kuenda mee‑ña,
chi kuenda yɨɨ‑ña kuu.
Yɨkɨ kuñu seyɨɨ,
ñatu kuu kuenda mee‑s,
chi kuenda ñadɨʼɨ‑s kuu.
5 Juejoon nuu tnaʼa‑n.
Ko nux kani ini ɨɨn nuu‑n,
nduu‑n,
xa ma kidi kaʼnu‑n uu uni kɨu,
xa kajan taʼu‑n,
nduu‑n,
nuu Ianyuux,
te vatuka.
Ko dada,
juejoon nuu tnaʼa‑n ɨnka vuelta,
xa maxku kadajuexa ñaʼa kuiʼna xa kada‑n xa uʼu,
xaxeʼe xa ma kuaʼa ka‑n xa kada maxu ka‑n yɨkɨ kuñu‑n.
6 Tnuʼu yaʼa kuu consejo‑da.
Ñatu kuu tnuʼu taʼu tniu‑da nuu‑n.
7 Xani ini mee‑da xa vaʼa ka xa kutuu koio mee‑n ná tuu mee‑da.
Ko nux ña kuaʼa‑n xa kutuu meni‑n,
te vatuka.
Xá n‑tnɨɨ‑ro,
ɨɨn ɨɨn‑ro,
xamani taxi Ianyuux.
Nuu ɨɨn‑s,
xiaʼan‑ia xamani‑ia xa ma tnundaʼa‑s.
Nuu ɨnka‑s,
xiaʼan‑ia xamani‑ia xa tnundaʼa‑s.
8-9 Vitna jaʼan‑da nuu se ka kuu solteru.
Vaʼa ka xa kutuu koio‑s ná tuu mee‑da.
Ko nux ña kuaʼa‑s xa kada maxu‑s yɨkɨ kuñu‑s,
na tnundaʼa‑s.
Vaʼa ka xa tnundaʼa‑s,
dada xa koo ná kuu xa koko xiti yɨkɨ kuñu‑s.
Dɨuni ñá ka kuu viuda tuku.
Vaʼa ka xa kutuu koio‑ña ná tuu mee‑da.
Ko nux ma kuaʼa‑ña xa kada maxu‑ña mee‑ña,
na natnundaʼa‑ña.
10 Vitna,
taʼu tniu‑da tnuʼu yaʼa nuu ñayiu xá n‑ka tnundaʼa.
Tnuʼu mee‑da ña kuu,
chi tnuʼu taʼu tniu Xtoʼo‑ro Jesucristu nuu‑n kuu.
Jaʼan‑ia xa maxku dandoo ñadɨʼɨ yɨɨ‑ña.
11 Ko nux dandoo‑ña yɨɨ‑ña,
te maxku natnundaʼa‑ña xiʼin ɨnka seyɨɨ.
O nux kuaʼa‑ña xa ndumani‑ña xiʼin yɨɨ‑ña,
na nukotuu‑ña xiʼin yɨɨ‑ña ɨnka vuelta.
Dani seyɨɨ.
Jaʼan Xtoʼo‑ro Jesucristu xa maxku dandoo koio seyɨɨ ñadɨʼɨ‑s.
12 Nuu dava ka‑n,
jaʼan‑da consejo mee‑da.
Tnuʼu mee‑da kuu,
ña kuu xa taʼu tniu Xtoʼo‑ro Jesucristu.
Ñani‑da,
nux ña jandixa ñadɨʼɨ‑n Cristu,
ko maxku kuijun‑n‑ña.
Nux kudɨ ini‑ña xa kutuu naʼi ka‑ña xiʼin‑n,
te vatuka.
13 Kuʼa‑da,
nux ña jandixa yɨɨ‑n Cristu,
ko maxku kuijun‑n‑sɨ.
Nux kudɨ ini‑s xa kutuu naʼi ka‑s xiʼin‑n,
te vatuka.
14 Chi hora n‑ka kixeʼe mee‑n xa jandixa‑n Cristu,
duʼa n‑ka kida‑n xa yɨɨ‑n xiʼin ñadɨʼɨ‑n ka kuu ñayiu dɨɨn nuu Ianyuux.
N‑ka kida‑n xa daʼya kuechi‑n ka kuu ñayiu dɨɨn nuu Ianyuux.
15 Kuʼa‑da,
nux ña jandixa yɨɨ‑n Cristu,
te juini‑s xa jɨʼɨn‑s,
te duʼa na koo.
Nux duʼa koo,
te io libre mee‑n.
Ñani‑da,
nux ña jandixa ñadɨʼɨ‑n Cristu,
te juini‑ña xa jɨʼɨn‑ña,
te duʼa na koo.
Io libre‑n.
Chi n‑jaʼan ñaʼa Ianyuux mee‑ro xa kutuu mani‑ro.
16 Ñadɨʼɨ,
juejoon koio‑n xa duʼa koo,
chi ña xini mee‑n nux xaxeʼe mee‑n jandixa yɨɨ‑n Cristu,
a ñaʼa.
Seyɨɨ,
juejoon koio‑n xa duʼa koo,
chi ña xini mee‑n nux xaxeʼe mee‑n jandixa ñadɨʼɨ‑n Cristu,
a ñaʼa.
17 Nuu ɨɨn ɨɨn‑n,
n‑taxi Xtoʼo‑ro Jesucristu tniu mee‑n.
Ná n‑jaʼan ñaʼa Ianyuux mee‑n,
duʼa kada koio‑n,
ɨɨn ɨɨn mee‑n,
vitna.
Te duʼa taʼu tniu‑da nuu ntdaa ñayiu ka jandixa Xtoʼo‑ro Jesucristu.
18 ¿N‑xaʼnde dutu nuu ii‑n na yɨjɨn‑n,
te dada n‑jaʼan ñaʼa Ianyuux a?
Vatuka,
maxku kujanuu‑n xaxeʼe xa n‑ka xaʼnde‑s nuu ii‑n.
¿Ña n‑xaʼnde taa‑n nuu ii‑n na yɨjɨn‑n,
ko n‑jaʼan ñaʼa Ianyuux a?
Vatuka,
maxku kaʼnde‑n nuu ii‑n vitna.
19 Ña tuu na kuenda nux n‑xaʼnde taa‑n nuu ii‑n,
te dɨuni ña tuu na kuenda nux ña n‑xaʼnde taa‑n nuu ii‑n.
Xa xiniñuʼu,
kuu xa kada koio‑n,
ɨɨn ɨɨn‑n,
xa juini Ianyuux.
20 Na ku kuu naʼi koio ka‑n vitna,
ná n‑ka kuu‑n hora n‑jaʼan ñaʼa Ianyuux mee‑n.
21 ¿N‑kuu‑n se kidatniu duʼa nuu ɨnka ñayiu,
hora n‑jaʼan ñaʼa Ianyuux a?
Maxku kɨ ini‑n xaxeʼe xa kuu‑n se kidatniu duʼa nuu ɨnka ñayiu.
Ko nux kuaʼa‑n xa kutuu libre‑n,
te vatuka.
22 Chi ɨɨn seyɨɨ,
juini kuu‑s se kidatniu duʼa nuu ɨnka ñayiu,
ko se tuu libre kuu‑s nuu Ianyuux.
N‑jaʼan Ianyuux mee‑s,
xa ku kuu‑s ɨɨn se xinokuechi nuu Cristu.
Dɨuni ɨɨn seyɨɨ tuu libre.
Juini ña kuu‑s se xinokuechi nuu ɨnka ñayiu,
ko n‑jaʼan Ianyuux mee‑s,
xa ku kuu‑s se xinokuechi nuu Cristu.
23 Na n‑xiʼí Cristu xaxeʼe‑n,
yaʼu n‑xeen ñaʼa‑ia mee‑n,
xa ku kuu koio‑n kuenda mee‑ia.
Maxku juejoon‑n xa kadajuexa ñaʼa ñayiu mee‑n,
xa daxio‑n xa juini Cristu,
xa kada‑n xa juini mee‑i.
24 Ñani‑da kuʼa‑da,
na ku kuu koio‑n ná n‑ka kuu‑n hora n‑jaʼan ñaʼa Ianyuux,
te kunduu naʼi koio ka‑n xiʼin Ianyuux.
25 Vitna,
kakuneʼe‑da soltera ta tnundaʼa koio ka.
Ña n‑taxi Xtoʼo‑ro Jesucristu tnuʼu mee‑ia xaxeʼe‑i,
ko jaʼan‑da xa xani ini mee‑da.
Xaxeʼe xa kidatniu xamani Xtoʼo‑ro Jesucristu anu‑da,
te kuaʼa‑n xa koo‑n confianza nuu‑da.
26 Xaxeʼe xa kueʼe vida yaʼa‑ro,
ntdaa‑ro,
vitna,
xani ini‑da xa vaʼa ka xa kutuu naʼi‑n,
ɨɨn ɨɨn‑n,
ná xtuu‑n vitna.
27 Nux xá n‑tnundaʼa‑n,
te maxku dandoo‑n ñadɨʼɨ‑n.
Nux kuu‑n solteru vitna,
te maxku tnundaʼa‑n.
28 Ko nux tnundaʼa‑n,
ñatu kuu kuechi.
Te nux tnundaʼa ɨɨn soltera vitna,
ñatu kuu kuechi.
Diko ni juini‑da xa chindee ñaʼa‑da,
ntdaa‑n.
Ña juini‑da xa kueʼe ka vida yaʼa koio‑n,
xaxeʼe ñadɨʼɨ‑n,
xaxeʼe yɨɨ‑n,
xaxeʼe daʼya kuechi‑n.
29 Ñani‑da,
jaʼan‑da xa ña tuu na tiempo.
Vitna,
juini io ñadɨʼɨ‑n,
ko io xa kutuu‑n ná xtuu ñayiu ña n‑tnundaʼa.
30 Ña tuu na tiempo xa tnau ini‑n.
Ña tuu na tiempo xa kuvete‑n.
Ña tuu na tiempo xa jueen‑n xa juini‑n.
31 Juini xtuu‑n ñuñayiu,
ko ña tuu na tiempo xa tna ini‑n xa io ñuñayiu,
chi vax ndɨʼɨ ntdaa xa io ñuñayiu.
32 Juini‑da xa ma kɨ ini koio‑n.
Seyɨɨ ña n‑tnundaʼa,
juini‑s xa kada‑s xa juini Xtoʼo‑ro Jesucristu,
xa na tna ini mee‑ia.
33 Seyɨɨ n‑tnundaʼa,
kidatniu‑s xa niʼi‑s xa io ñuñayiu,
xa na tna ini ñadɨʼɨ‑s.
Xijan kuu xa yɨ ini‑s.
34 Te soltera xiʼin ñadɨʼɨ ña yoo yɨɨ,
ka juini‑i xa kada‑i xa juini Xtoʼo‑ro Jesucristu.
Juini‑i xa kutuu ii‑i,
yɨkɨ kuñu‑i xiʼin anu‑i.
Ko ñadɨʼɨ n‑tnundaʼa,
kidatniu‑ña xa kada‑ña xa juini yɨɨ‑ña,
xa na tna ini mee‑s.
35 Tnuʼu yaʼa,
n‑jaʼan‑da xaxeʼe mee‑n.
Ñatu kidajuexa ñaʼa‑da.
Juini‑da xa kutuu libre koio‑n,
xa kada koio‑n xavaʼa.
Juini‑da xa kunduu naʼi ka koio‑n xiʼin Cristu,
xiʼin ntdaa anu‑n.
36 Ko nux xani ini ɨɨn seyɨɨ xa n‑dandaʼu‑s daʼya dɨʼɨ‑s,
xaxeʼe xa ña n‑xejoon‑s xa tnundaʼa‑i,
na juejoon‑s.
Nuxa xá io kuia‑i,
te juini‑i xa tnundaʼa‑i,
na juejoon‑s.
Vatuka xa tnundaʼa‑i.
Ñatu kida‑s xa uʼu.
37 Ko nux kundee ini ɨɨn seyɨɨ,
xa kani ini ka‑s xa vaʼa ka xa ma tnundaʼa daʼya dɨʼɨ‑s,
te vatuka.
Mee‑s,
ma kadajuexa mee‑s,
xa datnundaʼa‑s daʼya‑s.
Vatuka,
ñatu kida‑s xa uʼu.
Na kutuu naʼi ka daʼya dɨʼɨ‑s veʼe‑s.
38 Xijan kuu xa nduu‑s kada‑s xavaʼa.
Vaʼa kada taa datnundaʼa daʼya dɨʼɨ‑s,
te vaʼa ka kada taa ña datnundaʼa daʼya dɨʼɨ‑s.
39 Io xa kutuu ɨɨn ñadɨʼɨ xiʼin yɨɨ‑ña ntdaa kuia tuu yɨɨ‑ña.
Ko nux n‑xiʼí yɨɨ‑ña,
te juini‑ña xa natnundaʼa‑ña ɨnka vuelta,
te vatuka.
Diko ni io xa natnundaʼa‑ña xiʼin ɨɨn se jandixa Cristu.
40 Ko xani ini mee‑da xa kueʼe ka kuvete‑ña xa kutuu meni mee‑ña.
Te xani ini‑da xa duʼa jaʼan Espíritu Ianyuux tuku.