Jantnaʼa‑n nuu se ña ka jandixa Cristu
6
Nux ka jantnaʼa‑n,
ɨɨn‑n xiʼin ɨnka‑n,
¿te ña ka kujanuu‑n xa jɨʼɨn‑n nux juxtixia,
nuu se ña ka jandixa Cristu a?
Nux ka kiti ini nuu tnaʼa‑n,
ɨɨn‑n xiʼin ɨnka‑n,
io xa jɨʼɨn‑n xa kajan‑n consejo nuu ñani‑ro kuʼa‑ro,
nuu ñayiu ka jandixa Cristu.
Maxku jɨʼɨn koio‑n nuu ñayiu ña ka jandixa Cristu.
2 ¿Ña n‑ka teku‑n xa ndadandaa mee‑ro ñuñayiu a?
Nux ndadandaa koio‑n ñuñayiu,
te xandaa kuu xa kuaʼa‑n xa ndadandaa koio‑n xa luchi yaʼa.
3 ¿Ña n‑ka teku‑n xa ndadandaa mee‑ro nde ángel,
ia ka xinokuechi nuu Ianyuux,
a?
Nux ndadandaa‑ro ángel,
dɨuni kuaʼa‑ro xa ndadandaa‑ro kuechi ñani‑ro kuʼa‑ro.
4 Xijan kuu xa nux jantnaʼa koio‑n,
te nde se ñatu xiniñuʼu meʼñu‑n,
io xa juejoon koio‑n xa ndadandaa ñaʼa mee‑s mee‑n.
5 Jaʼan‑da tnuʼu yaʼa,
xa kada‑da xa na kujanuu koio‑n.
¿Meʼñu mee‑n,
ña yoo ni ɨɨn se tuʼa vaʼa kuaʼa xa ndadandaa‑s ñayiu ka jandixa Cristu a?
Joon,
io‑s.
6 ¿Nax kuu xa kandeka tnaʼa‑n jɨʼɨn nuu juxtixia ñuu‑n,
nuu se ña ka jandixa Cristu a?
7 Xandaa kuu xa ta dita koio ka‑n xa uʼu.
Xa ka jantnaʼa‑n,
ɨɨn‑n xiʼin ɨnka‑n,
te xndeka tnaʼa‑n juaʼan nuu juxtixia,
kuu xa ka kida‑n xa uʼu.
Nux kada ñaʼa ñani‑n kuʼa‑n xa uʼu,
te vaʼa ka xa juejoon‑n xa duʼa koo,
dada xa jantnaʼa‑n xiʼin‑s.
Vaʼa ka xa juejoon‑n xa duʼu ñaʼa‑s,
dada xa kandeka‑n‑sɨ jɨʼɨn nuu juxtixia.
8 Ko mee‑n ka kida tnaʼa‑n xa uʼu,
te dandaʼu tnaʼa‑n.
Ñayiu ka jandixa Cristu ka kuu‑n,
ko dani ka kida tnaʼa‑n xa uʼu.
9 ¿Ña ka kutnuni ini‑n xa ñayiu ka kida xa uʼu,
ma kuaʼa‑i xa kutuu vaʼa‑i nuu taxnuni Ianyuux a?
Maxku dandaʼu koio‑n mee‑n.
Ñayiu kidi xiʼin ñayiu ña n‑tnundaʼa xiʼin‑i,
ma kuaʼa‑i xa kutuu‑i nuu taxnuni Ianyuux.
Ni ñayiu ka jandixa santu,
ni seyɨɨ n‑dandoo ñadɨʼɨ‑s,
ni ñadɨʼɨ n‑dandoo yɨɨ‑ña.
Ni seyɨɨ kidakuechi ntnaʼa seyɨɨ,
ni ñadɨʼɨ kidakuechi ntnaʼa ñadɨʼɨ.
10 Ni ñaduʼu.
Ni ñayiu ka kukuedi ini.
Ni sexini,
ni ñáxini.
Ma kuaʼa ñayiu jan xa kutuu‑i nuu taxnuni Ianyuux.
Ni ñayiu kuiʼa jaʼan,
ni ñayiu dandaʼu ɨnka ñayiu.
Ma kutuu‑i xiʼin Ianyuux.
11 Te mee‑n ka kuu ñayiu n‑ka kida xa uʼu yaʼa.
Ntdaa‑n ñaʼa,
ko dava‑n,
joon.
Duʼa n‑ka kida‑n.
Ko n‑ka natu ini‑n kuechi‑n,
te n‑ka xendute‑n xaxeʼe xa jandixa‑n Jesucristu.
Te xá n‑kida Ianyuux xa ka kuu‑n ñayiu dɨɨn nuu mee‑ia,
ñayiu ka kida xa juini mee‑ia.
Te xaxeʼe xa n‑ka jandixa‑n Xtoʼo‑ro Jesucristu,
te n‑ka xejoon‑n xa kadatniu Espíritu Ianyuux anu‑n,
te xá ndadandaa ñaʼa Ianyuux mee‑n.
Xá n‑taxkanu ini ñaʼa‑ia mee‑n,
xá n‑jaʼan‑ia xa ka kuu mee‑n ná kuu ñayiu nuncas ña n‑kida ni ɨɨn xa uʼu.
Xa ii kuu yɨkɨ kuñu‑n
12 Ka jaʼan mee‑n xa io libre‑n xa kada‑n davaʼa nga xa juini‑n.
Joon,
io libre‑n,
ko ña ntdaa xiniñuʼu vaʼa.
Io libre‑n xa kada‑n davaʼa nga xa juini‑n,
ko maxku juejoon koio‑n xa kadajuexa ñaʼa ni ɨɨn xa io.
13 Xandaa kuu xa n‑kidavaʼa Ianyuux xa kaxi‑ro,
xa tnɨɨ‑ro xa ndoñuʼu xiti‑ro.
Te n‑kidavaʼa‑ia xiti‑ro xa tnɨɨ‑ro xa kaxi‑ro.
Te kada‑ia xa vax ndɨʼɨ xiti‑ro xiʼin xa kaxi‑ro.
Ko ña n‑kidavaʼa Ianyuux yɨkɨ kuñu‑ro xa kidi‑ro xiʼin ñayiu ña n‑tnundaʼa xiʼin‑ro.
N‑kidavaʼa‑ia yɨkɨ kuñu‑ro,
xa kada‑ro xa juini mee‑ia.
Te kada‑ia xa kutuu vaʼa‑ro,
xiʼin mee‑ia kuia ma jɨn ndɨʼɨ.
14 Nani n‑kida Ianyuux xa n‑nandoto Xtoʼo‑ro Jesús,
dani taxnuni‑ia xa nandoto koio mee‑ro tuku.
15 ¿Ñatu kutnuni ini koio‑n xa xaxeʼe xa jandixa‑ro Cristu,
te kuu ná kuu xa n‑nduu‑ro yɨkɨ kuñu Cristu a?
¿Dandoo‑da Cristu,
xa kunduu‑da xiʼin ñadɨʼɨ diko yɨkɨ kuñu‑ña?
¡Maxku duʼa koo!
16 ¿Ña kutnuni ini koio‑n xa hora kida‑n kuechi xiʼin ñadɨʼɨ diko mee‑ña,
duʼa nduu idini yɨkɨ kuñu,
mee‑n xiʼin mee‑ña u?
Jaʼan tnuʼu Ianyuux:
“Idini yɨkɨ kuñu ku kuu‑s nduu‑s.”
17 Ko nux kunduu ɨɨn ñayiu xiʼin Cristu,
te idini anu nduu‑i xiʼin‑ia.
Chi nani tuu Espíritu Ianyuux xiʼin Cristu,
dani tuu Espíritu Ianyuux xiʼin ñayiu ka kunduu xiʼin Cristu.
18 Xijan kuu xa maxku kidi koio‑n xiʼin ñayiu ña n‑tnundaʼa xiʼin‑n.
Davaʼa nga ɨnka xa uʼu kida ɨɨn seyɨɨ,
duʼa kida‑s kuechi nuu ɨnka ñayiu,
ko nux kidi‑s xiʼin ñayiu ña n‑tnundaʼa xiʼin‑s,
duʼa kida‑s kuechi nuu mee‑s.
19 ¿Ña kutnuni ini koio‑n xa yɨkɨ kuñu mee‑n,
ɨɨn ɨɨn‑n,
kuu veñuʼu nuu tuu Espíritu Ianyuux a?
N‑taxi Ianyuux Espíritu Ii,
xa kutuu‑ia xiʼin‑n.
Xijan kuu xa yɨkɨ kuñu‑n,
ñatu kuu kuenda mee‑n,
chi kuenda Ianyuux kuu.
20 Yaʼu n‑xeen ñaʼa Cristu,
hora n‑xiʼí‑ia xaxeʼe‑n.
Xijan kuu xa,
nani xndaxio‑n xañuʼu nuu Ianyuux xiʼin anu‑n,
dani io xa koo koio‑n xañuʼu nuu mee‑ia xiʼin yɨkɨ kuñu‑n.