Ɨɨn se io meʼñu mee‑n, kida‑s xa uʼu
5
N‑teku‑da xa meʼñu mee‑n,
tnaʼa ɨɨn seyɨɨ n‑tnɨɨ‑s ñadɨʼɨ taa‑s,
xa kava‑s xiʼin‑ña.
Nde ñayiu ña ka jandixa Ianyuux,
ñayiu ka kida kuechi xiʼin kuechi,
nde mee‑i,
ña ka kida ɨɨn‑i ná n‑kida mee‑s.
2 ¡Te mee‑n,
ka najuen tnuʼu‑n mee‑n!
Io xa ku kujanuu koio‑n,
io xa tnau ini koio‑n,
nde na ndaʼi koio‑n.
Io xa kineʼe koio‑n se n‑kida kuechi jan,
xa maxku kutuu ka‑s meʼñu‑n.
3 Chi mee‑da,
juini ña tuu‑da xiʼin‑n vitna,
ko kuu ná kuu xa tuu‑da xiʼin‑n.
Juini ña tuu‑da xiʼin‑n,
ko xá n‑ndadandaa‑da se n‑kida kuechi jan.
4 Ñayiu ka jandixa Xtoʼo‑ro Jesús ka kuu‑n.
Io xa nataka koio‑n,
xa ndadandaa koio mee‑n se ijan tuku.
Juini ma kutuu‑da xiʼin‑n,
ko koo ná kuu xa kutuu‑da xiʼin‑n.
Xiʼin xa taxnuni n‑taxi Xtoʼo‑ro Jesús mee‑n,
io xa ndadandaa koio mee‑n mee‑s.
5 Io xa juñaʼa koio‑n se n‑kida kuechi jan nuu kuiʼna,
xa danaa‑i yɨkɨ kuñu‑s.
Ko juini na danaa kuiʼna yɨkɨ kuñu‑s,
ko na koo xa dakaku Ianyuux anu‑s,
hora ndixi Xtoʼo‑ro Jesús xa ndadandaa‑ia ntdaa xa io.
6 Xa ka najuen tnuʼu‑n mee‑n,
ña kuu xavaʼa.
Ná kuu ndɨdɨ́ kuixi kuu kuechi n‑kida se ijan.
¿Ña ka xini‑n xa itaʼu ni ndɨdɨ́ kuixi dakuu ia ntdaa yuchi tila u?
Ná kuu ndɨdɨ́ kuixi kuu kuechi n‑kida se ijan,
te ná kuu yuchi tila ka kuu mee‑n.
7 Xijan kuu xa dita koio mee‑n ntdaa xa uʼu,
xa ku kuu koio‑n ná kuu yuxa xee.
Chi xaxeʼe Cristu,
ka kuu‑ro xa xee.
Ná kuu tkolelu n‑ka xaʼni ñayiu Israel viko Paxcua,
da kuu Cristu,
chi n‑xejoon‑ia xa n‑ka xaʼni ñaʼa seyɨɨ mee‑ia,
xaxeʼe mee‑ro.
8 Xijan kuu xa na kutuu mee‑ro ná xtuu ñayiu ndadakaʼnu viko Paxcua.
Na dita‑ro ntdaa xa uʼu.
Maxku kani ini ka‑ro xa uʼu,
maxku kada ka‑ro kuechi.
Na kani ini‑ro xa kuu xandaa,
te na jaʼan‑ro xa kuu xandaa,
te na kada‑ro xa kuu xandaa.
9 Na n‑kidavaʼa‑da carta kiʼna nuu,
n‑jaʼan‑da xa maxku kunduu koio mee‑n xiʼin ñayiu ka kidi xiʼin ñayiu ña n‑tnundaʼa xiʼin‑i.
10 Ko duʼa ña juini kachi xa io xa kaʼnde tnaʼa‑n xiʼin ñayiu ñuñayiu.
Xandaa kuu xa mee‑i ka kuu ñayiu ka kidi xiʼin ñayiu ña n‑tnundaʼa xiʼin‑i.
Ñayiu kukuedi ini,
xiʼin ñaduʼu ka kuu‑i.
Ñayiu ka jandixa santu ka kuu‑i.
Ko nux n‑xio xa kaʼnde tnaʼa‑n xiʼin mee‑i n‑kuu,
te koo xa kee koio‑n ñuñayiu.
11 Tnuʼu n‑kidavaʼa‑da,
juini kachi xa maxku kunduu koio‑n xiʼin se ka jaʼan xa kunduu‑s xiʼin Cristu,
ko kidi‑s xiʼin ñadɨʼɨ ña n‑tnundaʼa xiʼin‑s.
O kuu‑s se kuedi ini,
o jandixa‑s santu,
o se kuiʼa jaʼan kuu‑s,
o sexini kuu‑s,
o ñaduʼu kuu‑s.
Maxku nkoo koio‑n ni xa kax kaʼnu‑n xiʼin‑s.
12-13 Ko ña kuu tniu mee‑da xa ndadandaa‑da ñayiu ña ka jandixa Cristu.
Meni mee Ianyuux ndadandaa‑ia mee‑i.
Ko kuu tniu mee‑n,
xa ndadandaa koio‑n ñayiu ka jaʼan xa kuu‑i ñani‑n kuʼa‑n,
ko dani ka kida‑i kuechi.
Io xa kineʼe koio‑n se n‑kida kuechi jan,
xa ma kutuu ka‑s meʼñu mee‑n.