Se ka xinokuechi nuu Jesucristu ka kuu‑da
4
Xijan kuu xa io xa kutnuni ini koio‑n nax ka kuu mee‑da.
Ka kuu‑da se xinokuechi nuu Jesucristu.
Ka kuu‑da se dakuaʼa ñaʼa mee‑n xa xani ini Ianyuux.
2 Io xa daxinokava‑da tniu n‑taxi Ianyuux.
Io xa dandeʼa‑da Ianyuux xa kuaʼa‑ia xa koo‑ia confianza nuu‑da,
xa kada‑da xa juini mee‑ia.
3 Juini ka xitotnuni ñaʼa mee‑n,
ko ñatu xiniñuʼu.
Juini ka xitotnuni ñaʼa se ka taxnuni ñuñayiu,
ko ñatu xiniñuʼu.
Nde mee‑da,
nux xitotnuni‑da mee‑da,
ko ña xiniñuʼu.
4 Juini ñatu tekuechi ñaʼa anu mee‑da,
ko xini‑da xa se kida kuechi kuu‑da.
Io xa kototnuni ñaʼa Ianyuux mee‑da.
5 Xijan kuu xa maxku jaʼan koio ka‑n xa kunduu‑n xiʼin ɨɨn seyɨɨ,
a ɨnka seyɨɨ.
Io xa kundetu koio‑n,
nde na ndixi Xtoʼo‑ro Jesucristu.
Kɨu ijan,
ndadandaa ñaʼa mee‑ia mee‑ro.
Na ndixi‑ia,
datuu‑ia ntdaa xa yɨvaʼa nuu nee,
datuu‑ia ntdaa xa ka xani ini ɨɨn ɨɨn ñayiu.
Kɨu ijan,
ndada kuenda Ianyuux ɨɨn ɨɨn ñayiu,
nux n‑kida‑i ɨɨn xavaʼa,
a n‑kida‑i ɨɨn xa ña yaʼu ni ɨɨn.
6 Ñani‑da kuʼa‑da,
xaxeʼe mee‑n,
kidavaʼa‑da tnuʼu yaʼa.
Mee‑da xiʼin Apolos,
ɨɨn ichi ka neʼe ka tnɨɨ‑n ka kuu‑da.
Ka kida mee‑da ná jaʼan tnuʼu Ianyuux,
te ka juini‑da xa dakuaʼa koio mee‑n,
xa kada koio mee‑n ná jaʼan tnuʼu Ianyuux.
Ñayo‑n kuaʼa jaʼan vaʼa‑n ɨɨn se dakuaʼa ñaʼa,
te kuiʼa jaʼan‑n ɨnka se dakuaʼa ñaʼa.
7 ¿Nax kuu xa xani ini‑n xa kunxaʼnu ka mee‑n dada ɨnka ñayiu?
¿Nax nevaʼa‑n xa ña n‑taxi Ianyuux?
Te nux n‑taxi Ianyuux ntdaa xa nevaʼa‑n,
¿nakuenda najuen tnuʼu‑n mee‑n?
8 Ka xani ini‑n xa se kuika ka kuu‑n,
ka xani ini‑n xa ntdaa xa ka kukajan ini‑n xnevaʼa‑n.
Xtuu‑n ná xtuu se kunxaʼnu ka.
Te ka xani ini‑n xa ñatuka ndoñuʼu ñaʼa‑n.
¡Naka vaʼa koo,
nux ku kuu koio‑n se kunxaʼnu ka,
te taxnuni mee‑da xiʼin‑n!
9 Xani ini‑da xa juini Ianyuux xa kujuiin koio ntdaa ñayiu nuu se n‑tundaʼa‑ia.
Ka xika mee‑da,
ná ka xika se n‑ka kidandaa‑s xa kuú‑s.
Xá n‑xee ntdaa ñayiu,
xa jini koio‑i,
hora kaʼni ñaʼa koio‑s.
Ñayiu,
xiʼin nde ángel,
ia ka xinokuechi nuu Ianyuux,
xndeʼa ñaʼa mee‑da.
10 Xaxeʼe Cristu,
kuu ná kuu xa ka kuu‑da se lilu.
Ko mee‑n,
ka xani ini‑n xa ka kuu‑n se tuʼa vaʼa.
Ka xani ini‑n xa ña ndaku mee‑da te yo ndaku mee‑n.
Xndaxio ñayiu xañuʼu nuu mee‑n,
ko ñayo ñayiu io xañuʼu nuu mee‑da.
11 Nde vitna ka kojon‑da,
te ka yichi‑da ndute,
te ña tuu na daʼma vaʼa‑da.
Ka janñaʼa‑i,
te ña tuu na veʼe‑da xndaxio.
12 Ka kidatniu‑da nde n‑xiau‑da.
Xiʼin ndaʼa mee‑da ka kidatniu‑da.
Nɨni kuiʼa jaʼan ñayiu nuu mee‑da,
te ka xijan taʼu‑da nuu Ianyuux xaxeʼe mee‑i,
xa kada‑ia xa kutuu vaʼa koio‑i.
Juini ka xini uʼu ñaʼa ñayiu,
ko dani ka kundee ini‑da.
13 Nɨni ka kakuneʼe ñaʼa ñayiu,
te ka kidatniu mee‑da xa kutuu mani‑da xiʼin‑i.
Ka xani ini‑i xa miʼi ñuñayiu ka kuu‑da.
Nde vitna,
ka kida ñaʼa‑i ná ka kida‑i nuu se ñatu xiniñuʼu.
14 Ña n‑kidavaʼa‑da tnuʼu yaʼa xa kada‑da xa taxi‑da xa januu.
Diko ni jan doʼo ñaʼa‑da,
chi ka kuu mee‑n daʼya mani‑da.
15 Juini na koo uxi mil se dakuaʼa ñaʼa tnuʼu Cristu mee‑n,
ko idini‑s kuu ná kuu taa‑n.
N‑jaʼan mee‑da tnuʼu vaʼa Cristu nuu mee‑n,
te duʼa n‑ka jandixa‑n‑ia.
Nde kɨu ijan,
kuu‑da taa‑n.
16 Xijan kuu xa jaʼan‑da nuu mee‑n,
xa kada koio mee‑n ná kida mee‑da.
17 Xijan kuu xa n‑tundaʼa‑da Timoteo nuu mee‑n.
Ná kuu ɨɨn daʼya mani‑da kuu Timoteo.
Kunduu mee‑s xiʼin mee‑da,
te ka kunduu‑da,
nduu‑da xiʼin‑s,
xiʼin Xtoʼo‑ro Jesucristu.
Kada‑s xa najaʼan koio mee‑n nanda kida mee‑da xa kunduu naʼi ka‑da xiʼin Cristu.
Nani dakuaʼa‑da ñani‑ro kuʼa‑ro nituʼu ñuu xa kada koio mee‑i,
dani kida mee‑da,
te dani io xa kada koio mee‑n.
18 Dava‑n,
xa n‑ka kuxee ini‑n,
chi ka xani ini‑n xa ma xee ka‑da ñuu‑n.
19 Ko vax kuyatni xa xee‑da ñuu‑n,
nux na kachi Ianyuux.
Te kototnuni‑da se ka najuen tnuʼu mee‑s.
Jini‑da nux kuaʼa koio‑s xa kada‑s ná ka jaʼan‑s,
a ñaʼa.
20 Nux ña kuaʼa‑s,
te xandaa kuu xa ña n‑kaxí Ianyuux mee‑s xa taxnuni‑s xiʼin‑ia.
21 Te mee‑n,
¿nax ka juini‑n?
¿Ka juini‑n xa xee‑da ñuu‑n,
xa kudeen ñaʼa‑da?
¿O ka juini‑n xa xee‑da ñuu‑n,
xa juemani ñaʼa‑da,
te xiʼin tnuʼu mani chindee ñaʼa‑da u?