Se ka kidatniu xiʼin Ianyuux ka kuu‑da
3
Ñani‑da kuʼa‑da,
na n‑xo tuu‑da xiʼin‑n,
ña n‑kuu xa jaʼan‑da nuu mee‑n ná jaʼan‑da nuu ñayiu ka xejoon xa kadatniu Espíritu Ianyuux anu‑i.
Kɨu ijan,
ta juejoon ka koio‑n xa kadatniu Espíritu Ianyuux anu‑n.
Nani ka kuu sekuechi yɨjɨn,
dani n‑ka kuu mee‑n,
chi ña n‑ka kuaʼa‑n xa kutnuni ini‑n nax xani ini Cristu.
2 Xa n‑dakuaʼa ñaʼa‑da,
kuu ná kuu xa n‑taxi‑da dɨku koʼo koio‑n.
Ná kuu kuñu kaxi‑ro kuu xa xani ini Cristu.
Ko ña n‑taxi‑da kuñu jan,
chi ña n‑ka kuaʼa‑n xa kaxi‑n kuñu.
Te nde vitna,
dani ña ka kuaʼa‑n.
3 Chi dani ña n‑ka xejoon‑n xa kadatniu Espíritu Ianyuux anu‑n.
Xini‑da xa duʼa kuu,
chi ka kukuedi ini nuu tnaʼa‑n,
te ka jantnaʼa tnuʼu‑n.
Xtuu mee‑n ná xtuu ñayiu ñuñayiu,
ñayiu ña ka kunduu xiʼin Cristu.
Ta juejoon ka‑n xa kadatniu Espíritu Ianyuux anu‑n.
4 Chi jaʼan ɨɨn‑n:
“Kunduu mee‑r xiʼin Spalu”,
te ɨnka‑n jaʼan:
“Kunduu mee‑r xiʼin Apolos.”
Ka kuu mee‑n ná ka kuu ñayiu ñuñayiu,
chi ña ka xejoon‑n xa kadatniu Espíritu Ianyuux anu‑n.
5 ¿Jundu kuu Apolos?
¿Jundu kuu mee‑da?
Diko ni se xinokuechi nuu Ianyuux ka kuu‑da,
nduu‑da xiʼin‑s.
N‑taʼu tniu ñaʼa Xtoʼo‑ro Jesucristu xa kachitnuʼu koio‑da tnuʼu vaʼa Ianyuux,
te na n‑ka teku‑n xa n‑ka jaʼan‑da,
n‑ka jandixa‑n tnuʼu‑ia.
6 Ná kuu se dandeé yutnu tata kuu mee‑da,
te ná kuu se xodo ndute yutnu tata kuu Apolos.
Ko Ianyuux kida xa vax kueʼnu koio‑n.
7 Se dandeé yutnu tata,
ña yaʼu‑s ni ɨɨn,
te se xodo ndute yutnu tata,
ña yaʼu‑s ni ɨɨn.
Diko ni Ianyuux,
chi kida mee‑ia xa kueʼnu vaʼa‑n.
8 Ɨɨn nuu ka kuu se dandeé yutnu tata,
xiʼin se xodo ndute yutnu tata,
te nani kidatniu ɨɨn ɨɨn‑s,
dani chiyaʼu Ianyuux ɨɨn ɨɨn‑s.
9 Se ka kidatniu xiʼin Ianyuux ka kuu‑da.
Te mee‑n,
ka kuu‑n ná kuu nuu ñuʼu kidatniu‑ia.
Ná kuu veʼe kidavaʼa Ianyuux ka kuu‑n.
10 Ná kuu albañɨɨ tuʼa vaʼa kuu mee‑da.
Xiʼin xamani n‑taxi Ianyuux,
n‑kidavaʼa‑da cimientu veʼe,
hora n‑kachitnuʼu‑da tnuʼu vaʼa Jesucristu.
Te vitna,
ka dakuaʼa ñaʼa ɨnka seyɨɨ mee‑n.
Ná kuu se kidavaʼa xeveʼe nuu cimientu veʼe,
ka kuu‑s.
Xijan kuu xa na koo koio‑s ɨɨn ɨɨn‑s cuedado,
xa kadavaʼa vaʼa‑s xeveʼe nuu cimientu n‑kidavaʼa mee‑da.
11 Idini cimientu veʼe io,
te cimientu jan kuu Jesucristu.
Maxku koo xa kadavaʼa ɨnka ñayiu ɨnka cimientu veʼe jan.
12 Nux dakuaʼa vaʼa ñaʼa ɨɨn seyɨɨ mee‑n,
kuu ná kuu xa kidavaʼa‑s xeveʼe oro,
xeveʼe plata,
xeveʼe yuú yo yaʼu.
Nux ma dakuaʼa vaʼa ñaʼa‑s,
te kuu ná kuu xa kidavaʼa‑s xeveʼe yutnu,
xeveʼe ndayoʼo,
xeveʼe tnuñama.
13 Te jini Ianyuux nanda n‑ka kidavaʼa‑s,
ɨɨn ɨɨn‑s.
Na ndadandaa‑ia ntdaa xa io,
daa kototnuni‑ia xa n‑ka kidavaʼa‑s,
ɨɨn ɨɨn‑s.
Xiʼin ñuʼu koko,
kototnuni‑ia tniu n‑ka kida‑s.
14 Ɨɨn seyɨɨ,
nux n‑kidavaʼa vaʼa‑s veʼe,
te tnɨɨ‑s premiu‑s.
15 Ko nux kayu veʼe n‑kidavaʼa‑s,
dakuita‑s ntdaa xa n‑kidatniu‑s,
ko mee‑s dakaku ñaʼa Ianyuux.
Ko ku kuu‑s ná kuu ɨɨn seyɨɨ n‑yaʼa meʼñu ñuʼu koko.
16 ¿Ña kutnuni ini koio‑n xa ka kuu mee‑n veñuʼu Ianyuux a?
Xaxeʼe xa tuu Espíritu Ianyuux anu mee‑n,
te ka kuu‑n veñuʼu Ianyuux.
17 Nux na kanu ɨɨn seyɨɨ veñuʼu Ianyuux,
te danaa Ianyuux mee‑s.
Chi ii veñuʼu Ianyuux,
te mee‑n ka kuu veñuʼu jan.
18 Maxku dandaʼu koio‑n mee‑n,
ni ɨɨn‑n.
Ɨɨn seyɨɨ,
nux xani ini‑s xa vaʼa kutnuni ini‑s xa ka xani ini ñayiu ñuñayiu,
io xa juejoon‑s xa ku kuu‑s ná kuu ɨɨn se lilu,
io xa dandoo‑s xa ka xani ini ñayiu ñuñayiu,
xa kunduu‑s xiʼin Ianyuux.
Ijan dada,
ku kuu‑s ɨɨn se kutnuni ini vaʼa.
19 Chi xa ka xani ini ñayiu ñuñayiu kuu ɨɨn xa lilu nuu Ianyuux.
Jaʼan tnuʼu Ianyuux:
“Kida Ianyuux xa xa xani ini ɨɨn seyɨɨ kuu ná kuu ɨɨn trampa tnɨɨ ñaʼa.”
20 Ɨnka vuelta jaʼan tnuʼu Ianyuux:
“Naʼa Ianyuux nax xani ini se tuʼa vaʼa,
naʼa‑ia nax ka xani ini ñayiu ñuñayiu.
Naʼa‑ia xa ɨɨn xa ñatu xiniñuʼu kuu xa ka xani ini‑i.”
21 Xijan kuu xa maxku najuen tnuʼu‑n mee‑n,
xa kunduu‑n xiʼin ɨɨn seyɨɨ,
a ɨnka seyɨɨ.
Chi ntdaa xa io kuu xaxii mee‑n.
22 Mee‑da,
xiʼin Apolos,
xiʼin Spedru,
ndruni‑da,
kuu kuenda mee‑n.
Ntdaa xa io ñuñayiu kuu kuenda mee‑n.
Xa xtuu‑n,
a xa kuú koio‑n.
Ntdaa xa io vitna,
xiʼin ntdaa xa koo.
Ntdaa xa io kuu xaxii mee‑n.
23 Chi mee‑n,
ka kuu‑n kuenda Cristu,
te Cristu kuu kuenda Ianyuux.