N‑xitakaa Jesucristu nuu curuxi xaxeʼe‑ro
2
Ñani‑da kuʼa‑da,
na n‑xee‑da ñuu‑n xa juña tnuʼu‑da tnuʼu vaʼa Ianyuux,
ña n‑jaʼan‑da tnuʼu ndichi,
ña n‑jaʼan‑da xa ka xani ini ñayiu ñuñayiu.
2 N‑kachitnuʼu‑da Jesucristu.
N‑kachitnuʼu‑da xa n‑xitakaa Jesucristu nuu curuxi,
xaxeʼe mee‑ro.
Ña n‑juini‑da xa kachitnuʼu‑da ni ɨnka xa io.
3 Kɨu ijan ña ndaku‑da.
N‑yuʼu‑da te nɨʼɨ‑da.
4 Ña n‑kachitnuʼu‑da xa ka xani ini ñayiu ñuñayiu.
Ña n‑juini‑da xa kueka ñaʼa vaʼa koio‑n xaxeʼe tnuʼu mee‑da.
Ko n‑jaʼan‑da tnuʼu n‑taxi Espíritu Ianyuux.
Xiʼin xa taxnuni Ianyuux,
n‑kachitnuʼu‑da tnuʼu mee‑ia nuu mee‑n.
5 Chi ña n‑juini‑da xa jandixa koio‑n meni tnuʼu mee‑da.
N‑juini‑da xa dandeʼa ñaʼa Ianyuux xa taxnuni mee‑ia nuu‑n,
te xijan jandixa koio‑n Jesucristu.
Dandeʼa ñaʼa Espíritu Ianyuux ntdaa xa kida Ianyuux
6 Ka xian tnuʼu‑da tnuʼu Ianyuux nuu ñayiu ka kuaʼa xa kutnuni ini‑i tnuʼu‑ia.
Ñatu ka jaʼan‑da xa ka xani ini ñayiu ñuñayiu,
ñatu ka jaʼan‑da xa ka xani ini se kunxaʼnu ka ñuñayiu.
Chi vax ndɨʼɨ xa ka xani ini ñayiu ñuñayiu,
te vax ndɨʼɨ se kunxaʼnu ka ñuñayiu.
7 Tnuʼu Ianyuux nuncas ma jɨn ndɨʼɨ,
tnuʼu mee‑ia kuu xa ka xian tnuʼu‑da nuu ñayiu.
Ná kuu ɨɨn xa yɨvaʼa kuu xa xani ini Ianyuux,
ná kuu ɨɨn xa naʼi kuu.
Antecas xa kuaʼa ntdaa xa io,
xá daa,
xá n‑xani ini Ianyuux xa kada‑ia xaxeʼe mee‑ro.
N‑kida‑ia xa katakaa koio‑s Cristu nuu curuxi,
xa kutuu vaʼa mee‑ro xiʼin mee‑ia.
8 Xaʼa kuu xa ñayo se kunxaʼnu ka ñuñayiu n‑ka kutnuni ini.
Chi nux n‑ka kutnuni ini‑s n‑kuu,
te ma katakaa koio‑s Xtoʼo‑ro Jesús.
Ia kunxaʼnu ka nuu ntdaa xa io kuu Xtoʼo‑ro Jesucristu.
9 Ná jaʼan tnuʼu Ianyuux duʼa kuu:
Kueʼe io xa n‑kida tuʼa Ianyuux xa tnɨɨ koio ñayiu ka xemani‑ia.
Ta jini ka nduchi nuu‑ro ntdaa xa n‑kida tuʼa‑ia xaxeʼe‑ro.
Ta teku ka doʼo‑ro,
ni ta kani ini ka anu‑ro nax koo.
10 N‑kida Ianyuux xa n‑dandeʼa ñaʼa Espíritu Ianyuux mee‑ro ntdaa xa n‑kida tuʼa Ianyuux xaxeʼe‑ro.
Chi kutnuni ini Espíritu Ianyuux ntdaa xa io.
Nde xa naʼi Ianyuux kutnuni ini Espíritu Ianyuux.
11 Xa xani ini ɨɨn seyɨɨ,
ña kuaʼa xa kutnuni ini vaʼa ɨnka seyɨɨ.
Meni anu mee‑s kutnuni ini vaʼa xa xani ini‑s.
Xa xani ini Ianyuux du.
Xa xani ini Ianyuux,
ña kuaʼa kutnuni ini mee‑ro.
Diko ni Espíritu Ianyuux kutnuni ini xa xani ini Ianyuux.
12 Mee‑ro,
ña n‑ka tnɨɨ‑ro xa ka xani ini ñayiu ñuñayiu.
Xá n‑ka xeka vaʼa‑ro Espíritu Ianyuux,
te duʼa kuaʼa‑ro xa kutnuni ini‑ro ntdaa xa n‑tax nga Ianyuux.
13 Tnuʼu n‑taxi Ianyuux,
ka xian tnuʼu‑da nuu ñayiu.
Ña ka jaʼan‑da tnuʼu n‑ka dakuaʼa ñaʼa ñayiu.
Ka jaʼan‑da tnuʼu n‑dakuaʼa ñaʼa Espíritu Ianyuux.
Nuu ñayiu xa n‑ka xeka vaʼa Espíritu Ianyuux,
ka jaʼan‑da tnuʼu Espíritu Ianyuux.
14 Ko ɨɨn seyɨɨ,
nux ma juejoon‑s xa kadatniu Espíritu Ianyuux anu‑s,
ma kuaʼa‑s xa kueka vaʼa‑s tnuʼu Espíritu Ianyuux.
Chi nuu mee‑s,
tnuʼu Espíritu Ii kuu ná kuu tnuʼu lilu.
Ña kuaʼa‑s xa kutnuni ini‑s,
chi ñatu kidatniu Espíritu Ii anu‑s.
15 Ko ɨɨn seyɨɨ,
nux juejoon‑s xa kadatniu Espíritu Ianyuux anu‑s,
te kutnuni ini‑s.
Kutnuni ini mee‑s ntdaa.
Te ñayiu ñuñayiu,
ma kutnuni ini koio‑i nanda kuu xa kutnuni ini‑s.
16 Chi ná jaʼan tnuʼu Ianyuux yodotnuni xá n‑kuu kueʼe kuia,
duʼa kuu:
“Ni ɨɨn ñayiu ma kutnuni ini nax xani ini Ianyuux,
xa kuaʼa‑i xa dakuaʼa‑i‑ia.”
Ko mee‑ro,
ka kunduu‑ro xiʼin Cristu,
te dakuaʼa ñaʼa Espíritu Ianyuux ntdaa xa xani ini Cristu.