N‑ka nduku ini se taxnuni nuu ñayiu Israel janda tnɨɨ‑s Jesús
22
Vax kuyatni viko Paxcua.
Viko Paxcua ka xaxi ñayiu tila ña kɨu levadura.
2 N‑ka nduku ini dutu ka taxnuni xiʼin se ka tuʼa vaʼa tnuʼu n‑chidotnuni Moisés nuu janda kada koio‑s xa kaʼni‑s Jesús,
ko ña n‑kuu chi n‑ka xo yuʼu‑s nuu ñayiu n‑ka xo nataka ijan.
3 N‑keé Satanás anu Judas,
se nani Iscariote,
ɨɨn se n‑kuu uxi uu se n‑dakuaʼa ñaʼa Jesús.
4 Te n‑xe ndatnuʼu‑s xiʼin dutu ka taxnuni xiʼin soldado xndee veñuʼu Jerusalén nuu janda kada‑s xa tnɨɨ koio‑s Jesús.
5 N‑ka kuvete se ijan.
Te n‑ka kendoo‑s xiʼin Judas xa juñaʼa‑s tvini.
6 Te n‑nduku ini Judas xa kada‑s xa tnɨɨ juxtixia Jesús nuu ñayo ñayiu xyuku.
N‑xaxdini Jesús xiʼin uxi uu se dakuaʼa‑ia
7 N‑xee kɨu kiʼna nuu viko ka xaxi ñayiu tila ña kɨu levadura.
Kɨu ijan ka xaʼni ñayiu tkolelu xa kaxi‑i kuñu‑tɨ viko Paxcua.
8 N‑tundaʼa Jesús Spedru xiʼin Sua xa jɨn kada tuʼa koio‑s xa kaxdini‑ia xiʼin‑s ɨɨn ñuu io yatni nuu xtuu‑ia xiʼin‑s.
Xiaʼan‑ia:
—Juan kada tuʼa koio xa kaxdini‑ro viko Paxcua.
9 Te ka xiaʼan‑s nuu Jesús:
—¿Ndexu juini‑n xa kada tuʼa koio‑da?
10 Te xiaʼan ntuku‑ia nuu‑s:
—Hora na kɨu koio‑n ñuu ijan,
nitnaʼa‑n xiʼin ɨɨn se ndido yoo ndute.
Nkuitandijun koio‑n‑sɨ te kɨu‑n veʼe ndɨu‑s.
11 Te juñaʼa koio‑n nuu se kuu xtoʼo veʼe jan:
“Jaʼan maestru‑da:
¿Ndexu io cuartu nuu kaxdini‑r xiʼin se dakuaʼa‑r viko Paxcua?”
12 Ijan dada dandeʼa ñaʼa‑s ɨɨn cuartu kaʼnu piso kuu uu nuu io mexa,
silla,
traxti du.
Ijan kada vaʼa koio‑n xa kaxdini‑ro.
13 Juaʼan koio‑s.
Nu n‑ka xee‑s ijan,
te n‑ka xini‑s ntdaa xa n‑jaʼan Jesús.
Te n‑ka kida tuʼa‑s xa kaxdini koio‑s xiʼin‑ia.
14 Nu n‑xee hora,
te n‑nukoo Jesús xiʼin se dakuaʼa‑ia.
15 Te xiaʼan‑ia nuu‑s:
—Yo vichi n‑kuu anu‑r xa kaxi kaʼnu‑ro tila viko Paxcua kiʼna ka;
ijan dada ndaʼu yaʼa‑r.
16 Xandaa xakuiti ma kaxi ka‑r kuñu tkolelu viko Paxcua ɨnka vuelta.
Nde kɨu kaxi kaʼnu koio‑ro nuu taxnuni Ianyuux,
ijan dada kaxi‑r kuñu‑tɨ.
17 N‑tnɨɨ‑ia taxa ñuʼu ndudi uva,
te n‑jaʼan‑ia xa n‑kutaʼu‑ia nuu Ianyuux,
te xiaʼan‑ia nuu‑s:
—Tnɨɨ koio,
te dakexio nuu tnaʼa.
18 Xandaa xakuiti ma koʼo ka‑r ndudi uva ɨnka vuelta nde kɨu na kixeʼe Taa‑ro Ianyuux xa taxnuni‑ia.
19 N‑tnɨɨ‑ia tila,
te dɨuni n‑jaʼan‑ia xa n‑kutaʼu‑ia nuu Ianyuux.
N‑taʼu dava‑ia tila jan,
te xiaʼan‑ia:
—Kuenda kɨu ñɨɨ‑r kuu xaʼa xa doko‑r xaxeʼe‑n.
Kaxi koio tila ya,
te duʼa ku kada koio‑n xa ku najaʼan ñaʼa koio‑n —kuu‑ia.
20 Nu n‑yaʼa xa n‑xaxdini‑ia xiʼin se dakuaʼa‑ia,
n‑tnɨɨ‑ia taxa ñuʼu ndudi uva,
te n‑xiaʼan‑ia‑s.
Nani n‑xiaʼan‑ia‑s tila,
dani n‑xiaʼan‑ia‑s taxa ñuʼu ndudi uva jan.
Te xiaʼan ntuku‑ia:
—Ndudi uva ñuʼu taxa yaʼa kuu nɨñɨ‑r katu xaxeʼe xa kada Ianyuux tratu xee xiʼin ñayiu.
21 Kunaʼa koio xa se kada xa tnɨɨ ñaʼa juxtixia,
xtuu‑ro xiʼin‑s nuu mexa yaʼa.
22 Yaʼa ruʼu,
Ia kuu ñayiu,
na n‑xantuu Ianyuux,
te naka ndaʼu yaʼa se kada xa tnɨɨ ñaʼa juxtixia.
23 N‑ka nukuita se dakuaʼa‑ia ka xijan tnuʼu tnaʼa‑s xa jini‑s nuu ndeda‑s daa kada.
La Última Cena
Ntdaa se dakuaʼa Jesús n‑ka juini xa ku kuu‑s se ndandɨʼɨ ka
24 Dɨuni n‑ka kixeʼe‑s xa ka ndatnuʼu‑s nuu ndeda ɨɨn‑s ndandɨʼɨ ka,
te ka jantnaʼa tnuʼu‑s.
25 Te xiaʼan Jesús nuu‑s:
—Se ka taxnuni nuu ñayiu,
ndeʼe taxnuni‑s.
Te ka jaʼan‑s xa kuu‑s se vaʼa ka kida.
26 Maxku duʼa ku kuu koio ndoʼo.
Se ndandɨʼɨ ka,
io xa ku kuu‑s ná kuu ɨɨn se kuechi.
Se taxnuni,
io xa ku kuu‑s ná kuu ɨɨn se xinokuechi.
27 ¿Jundu ndandɨʼɨ ka?
¿Ndandɨʼɨ ka se nukoo nuu mexa xa xaxdeʼñu‑s a ndandɨʼɨ ka se xinokuechi xa dakexio‑s ndeyu?
Ndandɨʼɨ ka se nukoo nuu mexa,
ko ruʼu tuku kuu‑r.
Kuu‑r ná kuu se xinokuechi nuu‑n.
28 Ndoʼo ɨɨn ɨɨn‑n,
kunduu‑ro hora ndaʼu yaʼa‑r.
29 Nani n‑tetutniu ñaʼa Ianyuux xa taxnuni‑r,
dani tetutnuniu ñaʼa‑r xa taxnuni‑n.
30 Xijan kuu xa kaxkoʼo koio‑n nuu kutuu‑r xa taxnuni‑r,
te kunukoo koio‑n silla nuu taxnuni koio‑n,
te ndadandaa koio‑n kuechi daʼya dana uxi uu xixitna‑ro ka kuu daʼya yɨɨ Israel.
N‑jaʼan Jesús xa jaʼan Spedru xa ñatu xini‑s‑ia
31 Te xiaʼan‑ia nuu Simón Pedru:
—Simón,
n‑jaʼan Satanás nuu‑r xa kada ñaʼa‑i ɨɨn xa kada ñaʼa‑i.
Kuenda kɨu trɨu yɨʼɨ paja kɨdɨ‑i xa kada ñaʼa‑i xijan.
32 N‑xijan taʼu‑r nuu Ianyuux xaxeʼe mee ni‑n na ñaʼa nujani‑n xa jandixa‑n Ianyuux.
Hora na jandixa ntuku‑n Ianyuux ɨnka vuelta,
te chindee‑n se ka kunduu xiʼin‑ro ya xa na jandixa naʼi‑s‑ia.
33 Te xiaʼan Spedru nuu‑ia:
—Maestru,
xa io tuʼa‑da xa kunduu‑ro,
juini na chindiʼu ñaʼa ñayiu,
juini na kaʼni ñaʼa ñayiu xaxeʼe‑n.
34 Te xiaʼan‑ia:
—Na jaʼan ndaa‑r xa kiʼna ka jaʼan‑n uni vuelta xa ña xini ñaʼa‑n;
ijan dada kana ɨɨn liʼi datne vitna.
N‑xee hora ndaʼu yaʼa Jesús
35 Ijan dada n‑xijan tnuʼu‑ia‑s ntdaa‑s:
—Kɨu na n‑tundaʼa ñaʼa‑r xa jɨn dakuaʼa‑n ñayiu,
n‑jaʼan‑r xa maxku kaneʼe koio‑n tvini,
maxku kaneʼe koio‑n bolsa‑n;
maxku kaneʼe koio‑n ɨnka tayu ndixa‑n.
¿Nax n‑ka n‑ndoñuʼu‑n tiempo ijan?
Ka xiaʼan‑s:
—Ña tuu nax n‑ka ndoñuʼu‑da.
36 Te xiaʼan‑ia:
—Te vitna,
se io tvini,
na kaneʼe‑s tvini‑s jɨʼɨn.
Se io bolsa,
na kaneʼe‑s bolsa‑s jɨʼɨn.
Se ña tuu na espada io,
na nadiko‑s cotona‑s,
te na jueen‑s.
37 Xandaa xakuiti yaʼa‑r xa io xa yaʼa‑r xa na jɨn tnaʼa tnuʼu Ianyuux xyodotnuni.
Duʼa yodotnuni:
“Kani ini koio ñayiu xa n‑kida se n‑kixee kuechi xiʼin se loko.”
Xa yodotnuni xa yaʼa‑r jɨn tnaʼa.
38 Te ka xiaʼan se dakuaʼa‑ia:
—Maestru,
na uu espada yaʼa.
Te xiaʼan‑ia:
—Xaʼa ni.
Enseñanza en la Habitación Superior
N‑xijan taʼu Jesús nuu nani Getsemaní
39 Ijan dada juaʼan‑ia Yuku Tnu Olivo nani xko kida‑ia,
te n‑ka xe kuitandijun ñaʼa se dakuaʼa‑ia.
40 Nu n‑xee‑ia xiʼin‑s ijan,
te xiaʼan‑ia:
—Kajan taʼu koio nuu Ianyuux xa na chindee ñaʼa‑ia xa maxku dajaʼan ñaʼa Kuiʼna xa kada‑n kuechi.
41 N‑kee dɨɨn‑ia itaʼu.
Juaʼan‑ia naxa nuu xee ɨɨn yuú dajɨʼɨn‑ro.
N‑xe juiin xiti‑ia,
te n‑xijan taʼu‑ia nuu Ianyuux:
42 —Taa‑ro Ianyuux,
nux vatuka xa dakaku ñaʼa‑n nuu xa uʼu yaʼa,
dakaku ñaʼa‑n,
ko maxku kada‑n xa juini mee‑da.
Kada‑n xa juini mee‑n.
43 Te n‑juun ɨɨn ángel,
ia xinokuechi nuu Ianyuux,
nuu‑ia.
N‑xiaʼan‑ia xandendaku.
44 Yo vichi n‑kukoʼyo ini‑ia.
Vichi n‑yɨ ini‑ia xa yaʼa‑ia,
te n‑xijan taʼu ka‑ia nuu Ianyuux xiʼin nde yɨkɨ nde tuchi‑ia,
te n‑kixi ñaʼa tnee.
Ná xatu nɨñɨ‑ro,
daa n‑xatu tnee‑ia nuu ñuʼu.
45 Nu n‑yaʼa xa n‑xijan taʼu‑ia nuu Ianyuux,
te n‑ndojuiin‑ia.
N‑xiko‑ia.
Juan nuʼu‑ia nde nuu xtuu ndruni se dakuaʼa‑ia.
N‑xini‑ia xa ka kidi‑s xaxeʼe xa ndeʼe n‑ka tnau ini‑s xaxeʼe‑ia.
46 Te xiaʼan‑ia nuu‑s:
—¿Nakuenda ka kidi‑n u?
Ndokoo koio.
Kajan taʼu koio nuu Ianyuux xa maxku dajaʼan ñaʼa Kuiʼna xa kada koio‑n kuechi.
N‑ka tnɨɨ‑s Jesús te xndeka ñaʼa‑s juaʼan
47 Nɨni jaʼan‑ia xijan,
n‑xee Judas,
se n‑xo kandeka tnaʼa xiʼin se dakuaʼa‑ia.
Kueʼe se ndeka‑s n‑xee nuu‑ia xiʼin se dakuaʼa‑ia.
N‑xetuʼa Judas Jesús te n‑teyuʼu‑s‑ia.
48 Te n‑jaʼan Jesús nuu‑s:
—Judas,
¿n‑teyuʼu ñaʼa‑n xa datuu ñaʼa‑n ruʼu,
Ia kuu ñayiu,
te kada‑n xa tnɨɨ ñaʼa koio‑s a?
49 N‑ka tuu ini se dakuaʼa‑ia xa yaʼa,
te ka xiaʼan‑s:
—Maestru,
¿jantnaʼa koio‑da xiʼin‑s xiʼin espada u?
50 Ijan n‑xaʼnde ɨɨn se dakuaʼa‑ia doʼo kuaʼa se xinokuechi nuu dutu taxnuni ka.
51 Xiaʼan Jesús nuu se duʼa n‑kida:
—Na yaʼa naʼi xa io xa yaʼa.
Te n‑tnɨɨ‑ia doʼo se xinokuechi jan,
te n‑natenee‑ia.
52 N‑jaʼan‑ia nuu dutu ka taxnuni nuu soldado kidatniu nuu‑s xiʼin nuu sexaʼnu ka taxnuni nuu ñayiu Israel n‑ka xee ijan:
—¿Nakuenda xneʼe‑n espada xiʼin karruti n‑ka kixee xa tnɨɨ ñaʼa koio‑n xa kuenda kɨu ñaduʼu kuu‑r?
53 Ndɨkɨu ndɨñuu n‑xo dakuaʼa‑r ñayiu veñuʼu Jerusalén,
te ijan n‑ka xo yuku‑n.
Ñayo‑n n‑tnɨɨ ñaʼa hora ijan,
ko vitna n‑xee hora kada koio‑n xa kada‑n.
N‑xee hora kada koio xaloko xa kada‑i —kuu Jesús,
xiaʼan‑ia.
Jesús es Traicionado y Arrestado
N‑jaʼan Spedru xa ña xini‑s Jesús
54 Te n‑ka tnɨɨ‑s‑ia.
Xndeka‑s‑ia juaʼan veʼe dutu taxnuni ka.
Xika xika ni n‑xe kuitandijun Spedru‑ia.
55 Juaʼan‑s veʼe dutu jan.
Dava‑s n‑ka tɨu ñuʼú dava dava nukeʼe dutu,
te n‑ka nukoo‑s yunuʼu.
Dɨuni n‑nukoo Spedru yunuʼu jan.
56 N‑kutnuni nuu Spedru,
te n‑xini ñaʼa ɨɨn ñá xinokuechi nuu dutu jan te n‑nukondeʼa vaʼa‑ña‑s.
Te n‑jaʼan‑ña nuu ñayiu xtuu ijan:
—Dani te yaʼa,
kunduu‑te xiʼin te ijan.
57 N‑jaʼan Spedru xa ñatu n‑kunduu‑s xiʼin Jesús.
Xiaʼan‑s:
—Ña xini‑da‑s.
58 Nunuvii ni n‑kuu te n‑xini ñaʼa ɨɨn se tnaʼa nuu ñayiu xtuu ijan.
N‑jaʼan‑s:
—Dani ndoʼo kunduu‑n xiʼin‑s ntdaa‑s.
Te n‑jaʼan Spedru:
—Ñaʼa,
ñatu kunduu‑da xiʼin‑s.
59 N‑yaʼa naxa ɨɨn hora,
te n‑jaʼan ɨnka‑s nuu ñayiu xyuku ijan:
—Xandaa xakuiti kunduu se yaʼa xiʼin‑s chi se Galilea kuu‑s.
60 Te n‑jaʼan Spedru:
—Ña kutnuni ini‑da nuu nax jaʼan‑n.
Ni ta ndɨʼɨ ka jaʼan Spedru tnuʼu ijan,
te n‑kana ɨɨn liʼi.
61 Ijan dada n‑ngonenuu Jesús,
te n‑nukondeʼa‑ia Spedru,
te n‑najaʼan‑s xa n‑jaʼan‑ia nuu‑s:
“Kiʼna ka jaʼan‑n uni vuelta xa ña xini ñaʼa‑n;
ijan dada kana ɨɨn liʼi.”
62 N‑kee dɨɨn‑s,
te vichi n‑tnau ini‑s,
te ndeʼe n‑ndaʼi‑s.
Pedro Niega a Jesús
N‑ka xakundee‑s Jesús
63 Se xndee Jesús,
n‑ka xakundee‑s‑ia,
te n‑ka kani‑s‑ia.
64 N‑ka duku‑s daʼma nuu‑ia,
te n‑ka jaʼan‑s:
—Jaʼan jundu janñaʼa —ka kuu‑s,
ka xiaʼan‑s.
65 Te yo kuiʼa n‑ka jaʼan‑s‑ia.
Xndeka‑s Jesús juaʼan nuu se kunuu ka ndadandaa kuechi
66 Nu n‑tuu kɨu kuu uu te n‑ka taka sexaʼnu ka taxnuni nuu ñayiu Israel xiʼin dutu ka taxnuni xiʼin se ka tuʼa vaʼa tnuʼu n‑chidotnuni Moisés,
te n‑ka xe ndeka‑s Jesús nuu ntdaa se ka kuu juxtixia Israel.
67 Te n‑jaʼan‑s nuu‑ia:
—Jaʼan:
“¿Mee‑n kuu Cristu a ñaʼa?”
Te n‑jaʼan‑ia nuu‑s:
—Nux na jaʼan‑r,
ma jandixa koio‑n.
68 Nux na kajan tnuʼu ñaʼa‑r ɨɨn xa kajan tnuʼu ñaʼa‑r,
mayo‑n jaʼan.
69 Vax kuyatni xa nkoo ruʼu,
Ia kuu ñayiu,
diñi kuaʼa Ianyuux nuu taxnuni‑ia.
70 Te ka xiaʼan‑s ntdaa‑s:
—¿Xijan juini kachi xa mee‑n kuu Daʼya Yɨɨ Ianyuux a?
Te xiaʼan‑ia nuu‑s:
—Joon.
71 Te ka xiaʼan tnaʼa‑s:
—Ñatu ka ndoñuʼu‑ro se kixi xa jaʼan‑s nax kuu kuechi‑s chi mee‑s n‑tekuechi mee‑s.
N‑ka teku‑ro vitna.
Jesús es Burlado e Interrogado